Nkalata Itanshi ku Bena Kolinda
6 Nanchi mwi anweba muji uji na mambo na mukwabo+ ukeba kumutwala ku kije kya bantu babula koloka, mu kifulo kya kuya ku bazhijikwa nyi? 2 Nangwa nanchi kechi mwayuka’mba bazhijikwa bakachibila mambo ba pano pa ntanda nenyi?+ Umvwe ba pano pa ntanda mukebachibila mambo, nanchi kechi mwakonsha kuchiba tumambo tucheche nenyi? 3 Nanchi kechi mwayuka’mba tukachibila mambo bamalaika nenyi?+ Pano twakonsha kukankalwa byepi kuchibila mambo bintu bya mu buno bwikalo? 4 Umvwe kya kuba muji na mambo a uno mutundu mu buno bwikalo o mukeba kuchiba,+ nanchi mwiatwala ku bantu balengululwa mu kipwilo amba beachibe nyi? 5 Naamba kino namba nemulengeshe bumvu. Nanchi mwi anweba kafwamo muntu uji na maana wakonsha kuchibila mambo balongo banji nenyi? 6 Bino balongo batwala balongo bakwabo ku kije ku bantu babula kwitabila!
7 Umvwe mwitwala ku bije, ko kuba’mba mwatamisha. Mambo ka o mubujilatu kuchinchika umvwe bemuba nshiji?+ Kabiji mambo ka o mubujilatu kuchinchika umvwe bemubepaika? 8 Bino anweba muba nshiji ne kubepaika balongo benu!
9 Nanchi kechi mwayuka’mba, bantu babula koloka kechi bakaswana Bufumu bwa Lesa nenyi?+ Kange bemutwale mungi* ne. Ba bulalelale,*+ bapopwela bankishi,+ bankende,+ banabalume baswisha banabalume bakwabo kwibalaala,+ banabalume belaala na banabalume bakwabo,*+ 10 bangivi, ba lunkumbwa,+ bapendwapendwa,+ batukana,* ne baja bya lunkanankana kechi bakaswana Bufumu bwa Lesa ne.+ 11 Bamo mwajinga byonka bino. Pano bemovwa ne kwimutokesha;+ bemuzhijika;+ ne kwimutela’mba mwaoloka+ mu jizhina ja Nkambo yetu Yesu Kilishitu ne na mupashi wa Lesa wetu.
12 Kwi amiwa bintu byonse bijitu bulongo mwayila mizhilo, bino kechi byonse byo nafwainwa kuba ne.+ Kwi amiwa bintu byonse bijitu bulongo mwayila mizhilo; bino kechi nkaswisha kintu nangwa kimo kunnonka buzha* ne. 13 Kajo ko ka kifu, kifu nakyo kyo kya kajo, bino Lesa ukafumyapo byonse bibiji.+ Mubiji kechi ye wa bulalelale* ne, bino ye wa kwa Nkambo,+ kabiji Nkambo ye wa mubiji. 14 Bino Lesa wasangwile Nkambo,+ ne atweba ye uketusangula+ mu bulume bwanji.+
15 Nanchi kechi mwayuka’mba mibiji yenu byo binungwa bya Kilishitu nenyi?+ Nanchi ngalule binungwa bya Kilishitu ne kwikala ke binungwa bya pite nyi? Ine! 16 Nanchi kechi mwayuka’mba awa winunga kwi pite, wikala ke mubiji umo ne aye nenyi? Mambo Lesa waamba’mba, “ne bano babiji bakekala ke mubiji umo.”+ 17 Pakuba awa winunga kwi Nkambo, wikala umo ne aye mu mupashi.+ 18 Chinai bulalelale!*+ Mambo onse alenga muntu aji pangye ya mubiji wanji, pakuba awa uba bulalelale umulenga mambo mubiji wanji mwine.+ 19 Nanchi kechi mwayuka’mba mubiji wenu yo nzubo+ ya mupashi wazhila uji mwi anweba ye mwatambwile kwi Lesa nenyi?+ Kabiji kechi mwinonka anwe bene ne,+ 20 mambo bemupotele pa mutengo mukatampe.+ Onkao mambo, tumbijikainga Lesa+ mu mibiji yenu.+