Byubilo bya Batumwa
22 “Anweba bakwetu, balongo ne bashetu, telekai byo nsakwiambila kwi anweba.”+ 2 Byo baumvwine saka ebambila mu Kihebelu, bonse bazhindaminepo, kabiji wibambijile’mba: 3 “Amiwa yami Muyudea,+ nasemekejilwe mu Talasusa wa mu Kilikya,+ bino nafunjile mu yenka uno muzhi kwi Ngamaliela,+ bamfunjishe kulondela bulongo Mizhilo ya bashakulu betu,+ ne kwingijila Lesa na mukoyo byonka byo muji ne anweba lelo.+ 4 Namanyikilenga bantu ba mu jino Jishinda ne kwibepaya, nakashilenga banabalume ne banabakazhi ne kwibataya mu tuleya,+ 5 ñanga mwine mukatampe ne kije kyonse kya bakulumpe bo bakamonyi bami pa bino byo mbena kwamba. Kwi abo ko ko natambwile makalata a kutwajila balongo mu Damasakasa, kabiji nayilenga na kusenda aba bajinga kokwa namba nebakase ne kwibaleta ku Yelusalema na kwibakambula.
6 “Bino byo nayilenga ne kunangijila ku Damasakasa pa kushinkamana juba, ponkapotu mwiulu mwafumine kyeya kikatampe kyansamijile,+ 7 kabiji naponene panshi ne kumvwa jiwi saka jiñambila’mba: ‘Saulo, Saulo, mambo ka o ubena kummanyikila?’ 8 Nakumbwile’mba: ‘Nanchi yenu bañanyi Nkambo?’ Ne aye wañambijile’mba: ‘Amiwa yami Yesu mwina Nazala ye ubena kumanyika.’ 9 Bantu bo najinga nabo bamwene kyeya, bino kechi baumvwine byambo bya yewa waambilenga ne amiwa ne. 10 Ponkapo nashikishe’mba: ‘Nkambo, ñanyi kintu kyo nsakuba?’ Nkambo wankumbwile’mba: ‘Imana, uyenga ku Damasakasa kabiji akwa bakakubuula byonse byo bakutongwela kuba.’+ 11 Bino byo nakankelwe kumona na mambo a lukumo lwa kyeya kyansamijile, aba bo najinga nabo bantangijile saka bankwata ku kuboko ne kufika nafikile mu Damasakasa.
12 “Kabiji muntu wa jizhina ja Ananyasa waakamwanga Lesa kwesakana na mwayijile Mizhilo, ye batelanga bulongo ku Bayudea baikalanga monka, 13 waishile kwi amiwa. Waimene ko najinga ne kuñambila’mba: ‘Saulo mulongo wami, laba!’ Pa kyonkakya kimye nalabile ne kumumona.+ 14 Wañambijile’mba: ‘Lesa wa bashakulu betu wa kusala kuba’mba uyuke kyaswa muchima wanji ne kumona awa waoloka+ ne kumvwa jiwi janji, 15 mambo ukekala kamonyi wanji ku bantu bonse pa bintu byo wamona ne kumvwa.+ 16 Pano ki ka kyo ubena kupembelela? Imana ubatizhiwe, kabiji kupichila mu kwita pa jizhina ja Yesu,+ Lesa ukakulekelako mambo obe.’+
17 “Bino byo nabwelele ku Yelusalema+ ne byo nalombelenga mu nzubo ya Lesa, naubile nobe mbena kumona kimwesho 18 kabiji namwene Nkambo saka añambila’mba: ‘Pelawizha kufuma mu Yelusalema mambo kechi bakaswa kushimuna kobe ko unshimuna ne.’+ 19 Naambile’mba: ‘Nkambo, abo bene bayukishatu bulongo amba bonse bemwitabilanga nebatayanga mu kaleya ne kwibapuma mu mashinagoga monse;+ 20 kabiji byo baichijilenga mashi a kwa Setepena kamonyi wenu, najinga ponka saka ngitabizha ne kusopa bivwalo bya peulu bya boba bamwipayilenga.’+ 21 Nangwa byonkabyo, wañambijile’mba: ‘Yanga, mambo nkakutuma ku bisaka bya bantu biji kwalepa.’”+
22 Abo bamutelekelenga kufikatu ne byo aambile bino byambo. Kepo babijikile’mba: “Mufumyai pa ntanda uno muntu, mambo kechi wafwainwa kwikala na bumi ne!” 23 Na mambo a kuba babijikilenga ne kutayaika bivwalo byabo bya peulu ne kufukula lukungu,+ 24 mwine mukulumpe wa bashilikale wakambizhe’mba Paulo bamutwale mu kamba ka bashilikale na kumupuma bipumo, kuba’mba ayuke ene mambo bantu o babijikijilenga byobya pe Paulo. 25 Bino byo bamukashile Paulo kuba’mba bamupume bipumo, washikishe mukulumpe wa bashilikale waimene konka amba: “Nanchi kijitu bulongo anweba bantu kupuma muntu mwina Loma* ye babula kuzhachisha* nyi?”+ 26 Mukulumpe wa bashilikale byo aumvwine kino, wayile ku mwine mukulumpe wabo ne kumushikisha’mba: “Nanchi mubena kusaka kuba ka? Mambo uno muntu mwina Loma.” 27 Onkao mambo, mwine mukulumpe wa bashilikale waishile ne kumushikisha’mba: “Mbuule, Nanchi wi mwina Loma nyi?” Aye wakumbwile’mba: “Ee.” 28 Mwine mukulumpe wa bashilikale waambile’mba: “Amiwa napotele na mali avula luno luusa lwa kwikala ngikazhi mwina Loma.” Paulo waambile’mba: “Bino amiwa nasemekelwe nalo.”+
29 Ponkapo aba bakebelenga kumutebawisha kupichila mu kumupuma bipumo bafumineko ko aji; kabiji mwine mukulumpe wa bashilikale waubile moyo byo ayukile’mba mwina Loma ne na mambo a kumukasa minyololo.+
30 Onkao mambo, juba jalondejilepo byo akebelenga kuyuka kine kintu Bayudea kyo bamupelejilemo mambo, wamukasulwile ne kukambizha bañanga bakatampe ne kije kya Saniedilini kukonkana pamo. Kepo amuletele Paulo ne kumwimika mukachi kabo.+