NANCHI MWAYUKA NYI?

Kwikala ngikazhi wa mu Loma kwakwashishe byepi Paulo kwingila bulongo?

Kwikala ngikazhi wa mu Loma kwalengelanga muntu kwingilako mingilo imo ne kubakotu bintu bikwabo ku mpunzha konse ko aya. Mwina Loma walondelangatu mizhilo ya bena Loma kwapwa, kechi mizhilo ya mu bibunji bingi ne. Inge muntu bamupamo mambo, waswanga kumutotolwesha kwesakana na mizhilo, nangwa byonkabyo, bamuswishanga kutwala mambo anji ku kije kya bena Loma. Umvwe muntu bamutaana na mambo a kuba’mba wafwainwa kufwa, bamuswishanga kwiatwala ku mfumu.

O ene mambo Cicero mwina Loma ye banemekele bingi mu bya bumulwila ntanda mu myaka kitota kitanshi, o anembejile’mba: “Kukasa ngikazhi wa mu Loma ajinga mambo akatampe bingi; kupuma muntu ajinga a bulala; kwipaya muntu kwajingatu pamo na muntu waipaya bansemi banji nangwa mulongo wanji.”

Mutumwa Paulo wasapwijile bingi bulongo mu Bufumu bonse bwa bena Loma. Pa bimye bisatu, waingijishe luusa lwanji byo ajinga ngikazhi wa mu Loma: (1) Wabuujile kije kya bena Filipai amba bamulengele mambo pa kumupuma. (2) Waambile ko afumine pa kuba’mba bakabule kumupuma pa kuya ku Yelusalema. (3) Watwajile mambo anji kwi Kesala, mfumu wa mu Loma, pa kuba’mba akomvwe byajinga mambo o bamupelengamo.—Byubilo 16:37-39; 22:25-28; 25:10-12.

Bakafunga bebafwetanga byepi mu moba a kala?

Mushakulu Yakoba wafungilenga mikooko ya bako banji ba Labanyi myaka 20. Yakoba waingijile Labanyi myaka 14 pa kuba’mba amupe baana banji ba bakazhi babiji, kabiji myaka yashajileko 6 bamupelejilemo banyama. (Ntendekelo 30:25-33) Magazini umo wa Biblical Archaeology Review waamba’mba: “Lumvwañano lo baumvwañene Labanyi ne Yakoba pa mambo a kufunga mikooko lwipasha bingi na byanembele banembi ba kala ne batanga Binembelo.”

Bakeba bya kukebakeba bataaine po banemba byo baubanga kala inge balayañana kuba bintu bimo pa mapunzha a Nuzi, Larsa ne mapunzhatu akwabo aji mu Iraq. Luno lulayañano belubanga pa mwaka pa mwaka pa kutenda boya bwa mikooko kukafikatu ne ku mwaka mukwabo. Bakafunga baswanga kwingila ino mingilo inge bebapa banyama bo banemba kwesakana na myaka iji na banyama inge ba balume nangwa ba bakazhi. Umvwe mwaka wapwa, mwina banyama watambulanga boya bwa mikooko, nangwa kajo kakwabo ko balenganga ku mukaka, baana ba banyama ne bintutu bikwabo. Bintu byonse byasubukangapo bebipananga ku kafunga.

Pa kuba’mba mikooko ivule, bavuzhanga mikooko ikazhi yo bapanga kafunga kuba’mba eifungenga. Mikooko ikazhi 100 yasemanga baana 80. Kafunga wabwezhangapo ungi inge umo wafwa nangwa waeleka. Onkao mambo, kafunga watangako bingi muchima kulama bulongo banyama bo bamupa.