Yelemiya
7 Yehoba waambijile Yelemiya amba: 2 “Imana mu kibelo kya nzubo ya Yehoba wambe’mba, ‘Anweba bena Yuda bonse mutwelela pa bino bibelo na kupopwela Yehoba, umvwai byaamba Yehoba. 3 Yehoba wa mabumba, Lesa wa Isalela waamba’mba: “Pimpulai mashinda enu ne byubilo byenu, ne amiwa nkemuswisha kutwajijila kwikala mu uno muzhi.+ 4 Kange muketekele mu byambo bya bubela ne kwamba’mba, ‘Ino yo nzubo ya Yehoba, yo nzubo ya Yehoba, yo nzubo ya Yehoba ne!’+ 5 Mambo kine inge mwapimpula mashinda enu ne byubilo byenu; mwachibila muntu mambo bulongo na mukwabo mo bekajila,+ 6 mwabula kuyanjisha bantu bafuma mu byalo bingi, baana ba kishale* ne banabakazhi bafwilwa;+ mwabula kwichila mashi a bantu babula mambo mu uno muzhi; kabiji mwabula kongolokela ku balesa bangi;+ 7 amiwa nkemuswisha kutwajijila kwikala mu uno muzhi, mu kyalo kyo napele bashakulu benu kwikalamo myaka ne myaka.”’”
8 “Bino anweba mwaketekela mu byambo bya bubela,+ bikabula kwimukwasha nangwa pachechetu ne. 9 Nanchi mwakonsha kwiba,+ kwipayañana, kuba bukende, kuchipa bubela,+ kupana bitapisho* kwi Baela+ ne kongolokela ku balesa bangi bo mwabujile kuyuka, 10 ne kwiya na kwimana ku meso ami mu ino nzubo itelwa pa jizhina jami ne kwamba’mba, ‘Atweba tukapuluka,’ bino saka muba bino bintu byonse bya bunya nyi? 11 Nanchi ino nzubo itelwa pa jizhina jami yaaluka ke jiyengo ja tupondo kwi anweba nyi?+ Amiwa namona bintu byo mubena kuba,” byo byaamba Yehoba.
12 “‘Nangwa byonkabyo, yainga mu muzhi wami uji mu Shilo,+ mo nabikile jizhina jami kimyetu kitanshi,+ mumone byo namubile na mambo a bintu byatama byaubile bantu bami bena Isalela.+ 13 Yehoba waamba’mba, ‘Anweba mwatwajijiletu na kuba bino bintu bya bunya, nangwa kya kuba nemwambijilenga kimye kyonse,* anweba kechi mwaumvwinenga ne.+ Amiwa nemwichilenga, bino kechi mwankumbwilenga ne.+ 14 Onkao mambo, uno muzhi utelwa na jizhina jami+ ye mwaketekelamo,+ ne mpunzha yo napele bashakulu benu, nkeyuba byonkatu byo naubile na Shilo.+ 15 Amiwa nkemupanga ku meso ami byonkatu byo napangile balongo benu bonse, ba mu kisaka kyonse kya Efelaimu.’+
16 “Pakuba obewa, kange wibalombeleko bano bantu ne. Kange wibajijileko nangwa kwibalombelako nangwa kwibasashijilako kwi amiwa ne,+ mambo amiwa kechi nkakukumbula ne.+ 17 Nanchi kechi ubena kumona bintu byo babena kuba mu mizhi ya Yuda ne mu mikwakwa ya Yelusalema nenyi? 18 Baana babena kuchaba nkunyi, bashabo babena kubanza mujilo, banabakazhi babena kukanda muvuba wa kulengelako tubashinkwa twa kupana ke bitapisho kwi Inamfumu wa Mwiulu,*+ kabiji babena kupana milambo ya binyu ku balesa bangi kuba’mba banzhingijishe.+ 19 Yehoba waamba’mba, ‘Nanchi yami babena kukozha ku muchima* nyi?’ Nanchi kechi babena kwikozhatu ku michima yabo bene ne kwilengesha bumvu nenyi?’+ 20 Onkao mambo, Nkambo Mfumu Yehoba waamba’mba, ‘Umvwai! Amiwa nkazhingijila uno muzhi,+ kutatwilatu ku bantu ne banyama, bichi bya mungye ne kajo kalupuka mu mushiji; bukaji bwami kechi bukafwomoka ne.’+
21 “Yehoba wa mabumba, Lesa wa Isalela waamba’mba, ‘Vwangai pamo milambo yenu yonse ya kusoka ne bitapisho byenu muje ne nyama yabyo.+ 22 Mambo juba jo nafumishe bashakulu benu mu kyalo kya Ijipita, amiwa kechi nesambilepo nabo nangwa kwibakambizha kupana milambo ya kusoka ne bitapisho ne.+ 23 Bino nebakambizhe namba: “Kookelainga byo ñamba, kabiji amiwa nkekala Lesa wenu, ne anweba mukekala bantu bami.+ Mwafwainwa kukookelanga bintu byonse byo nemukambizha, pa kuba’mba bintu bikemwendelenga bulongo.”’+ 24 Pano bino, kechi bankookejile nangwa kuñumvwina ne;+ baubilengatu bintu byo bakeba bene, ne kulondela bikeba michima yabo yatama+ kabiji baendelenga lumfutwanyuma kechi bayilenga kulutwe, 25 kufuma juba bashakulu benu jo bafumine mu kyalo kya Ijipita kufika ne lelo jino ne.+ Onkao mambo, kimye kyonse pa juba pa juba amiwa nemutumijilenga* bakalume bami bonse bangauzhi.+ 26 Nangwa byonkabyo, bantu bakaine kunkookela ne kuñumvwina.+ Pakuba bakoseshe michima,* kabiji bakizhizhemo kuba bintu byatama kukila bashakulu babo!
27 “Nangwa kya kuba ukebabuula bino byambo byonse,+ kechi bakakumvwina ne; ukebeta, bino kechi bakakukumbula ne. 28 Kabiji ukebabuule’mba, ‘Kino kyo kisaka kya bantu babujile kukookela Yehoba Lesa wabo, kabiji bakaine kutambwila lujimuno. Bukishinka bwapwa kabiji kafwako muntu nangwa umo wa kishinka mwi abo* ne.’+
29 “Tendai nsuki yenu yo mubula kutenda* ne kwiitaya, kabiji mukembe lwimbo wa bulanda* pa tutumbatumba pabula bintu, mambo Yehoba wibakana ne kusha kino kisaka kyamuzhingijisha. 30 Yehoba waamba’mba, ‘Bena Yuda banguba kintu kyatama bingi.’ ‘Babika bankishi babo ba bunya mu nzubo itelwa pa jizhina jami, pa kuba’mba beizhilulule.+ 31 Bashimika mapunzha atuntama a Tofweta aji mu Kimpachiko kya Mwana wa kwa Hinomu,*+ pa kuba’mba basokenga baana babo ba balume ne baana babo ba bakazhi mu mujilo,+ kintu kyo nabujile kwibakambizha kabiji kintu kyo nabujile kulangulukapo mu muchima wami.’*+
32 “‘Onkao mambo, umvwai! moba abena kwiya,’ byo byaamba Yehoba, ‘o bakabula kwiitela’mba Tofweta nangwa’mba Kimpachiko kya Mwana wa kwa Hinomu,* bino bakeitela’mba Kimpachiko kya Bantu Bafwa. Bakazhiika bantu bafwa mu Tofweta kufikatu ne byo kikayula.+ 33 Ne mibiji ya bafwa ya bano bantu ikekala ke kajo ka bañonyi ne banyama ba mungye, kabiji kafwako nangwa umo ukebapangapo.+ 34 Amiwa nkalengela jiwi ja kusekela ne kusangalala, jiwi ja musongoshi ne ja musongwa+ kubula kumvwanyika mu mizhi ya Yuda ne mu mikwakwa ya mu Yelusalema, mambo kyalo bakekyonauna.’”+