Byubilo bya Batumwa
13 Mu kipwilo kya mu Antioka mwajinga bangauzhi ne bafunjishi:+ Banabasa, Shimeona watelwanga’mba Nigela, Lukiusa wa ku Kilene ne Manena mo bafunjilanga pamo na Heloda ntangi wa nkambi, ne Saulo. 2 Byo baingijilenga* Yehoba* ne kuzhikilwa na nzala, mupashi wazhila waambile’mba: “Mpaatwilai Banabasa ne Saulo+ bengile mwingilo ye nebechila.”+ 3 Byo bapwishishe kuzhikilwa na nzala ne kulomba, batentekele maboko pe abo ne kwibambila’mba bayenga.
4 Onkao mambo, bano banabalume bo batumine ku mupashi wazhila, bayile ku Selukya, kabiji byo bafumineko, bayile na bwato ku Kipilusa. 5 Byo bafikile ku Salamisa, batendekele kusapwila mambo a Lesa mu mashinagoga a Bayudea. Kabiji bajinga ne Yoano wajinga wa mwingilo.*+
6 Byo bapichile mu jikuji jonse kukafika ne ku Pafosa, basambakene mwanamulume Muyudea wa jizhina ja Balayesu mulozhi kabiji ngauzhi wa bubela. 7 Uno wajinga pamo na mukulumpe* wa kibunji aye Seligiusa Paulosi muntu wa maana. Byo aichile Banabasa ne Saulo, uno muntu wakebeshenga bingi kumvwa mambo a Lesa. 8 Bino Elimasa mulozhi (bino byo byo batuntulula jizhina janji) watendekele kwibakanya ne kukeba kusendula mukulumpe wa kibunji mu lwitabilo. 9 Saulo utelwa jikwabo amba Paulo, byo ayujile mupashi wazhila, wamuzanzhile meso 10 ne kumwambila’mba: “Obewa muntu wayula na bujimbijimbi ne bubi bonse, mwana Diabola,+ obewa mulwanyi wa bintu byonse byaoloka, nanchi kechi ukaleka kukonkomanya mashinda aoloka a Yehoba* nenyi? 11 Umvwa! Yehoba* usakukukambula kabiji usakwikala mpofu kabiji kechi usakumona ne.” Ponkapotu pa meso paubile kamfwa ne kufiita, kabiji wapupuchilengatu na kukeba muntu wa kumukwatako ku kuboko kuba’mba amutangijile. 12 Mukulumpe wa kibunji pa kumona kino kyamwekele, waitabijile, mambo wakuminye bingi pa bintu byo afunjile pe Yehoba.*
13 Paulo ne bakwabo bo ajinga nabo bafumine ku Pafosa na bwato, ne kuya ku Pelega mu Pamifilya. Bino Yoano+ wibashile ne kubwela ku Yelusalema.+ 14 Nangwa byonkabyo, abo bafumine ku Pelega ne kuya ku Antioka mu Pisidya. Kabiji byo batwelele mu nshinagoga+ pa juba ja Sabado, baikele monka. 15 Byo bapwishishe kutanga buku wa Mizhilo+ ne wa Bangauzhi ku bantu, bakulumpe ba nshinagoga batumine mawi kwi abo amba: “Anweba bakwetu, balongo, umvwe muji na byambo bya kutundaika bantu, byambai.” 16 Ponkapo Paulo waimene ne kutanyika kuboko kwanji ne kwibambila’mba:
“Anweba bakwetu, anweba bena Isalela ne anweba mwakamwa Lesa, telekai. 17 Lesa wa bano bena Isalela ye wasajile bashakulu betu, kabiji watumbijikile bano bantu kimye kyo bajinga benyi mu kyalo kya Ijipita, ne kwibafumyamo na kuboko kwa bulume.+ 18 Kabiji wibatekenyejile pa myaka 40 mu kiselebwa.+ 19 Byo aonawine bisaka bya bantu bitanu na bibiji byajinga mu kyalo kya Kenana, wibapele kyalo kyabo kwikala ke kya buswanyi.+ 20 Bino byonse byamwekele mu myaka 450.
“Bino bintu byo byapwile, wibapele bamitonyi kufikatu ne kimye kya ngauzhi Samwela.+ 21 Bino kufumatu pa kyokya kimye bakebelenga mfumu,+ ne Lesa wibapele Saulo mwana wa kwa Kisha, wa mu mukoka wa bena Benjamina+ wibalamine pa myaka 40. 22 Byo amufumishepo, wapingizhepo Davida kwikala mfumu,+ yenka ye aambilepo’mba: ‘Namona Davida mwana wa kwa Yese+ muntu wantokela ku muchima;+ uno ye ukoba bintu byonse byo nkeba.’ 23 Monka mwayijile mulaye wanji, Lesa wapaine mupulushi ku bena Isalela, aye Yesu wafumine mu baana* ba uno muntu.+ 24 Aye saka akyangye kufika, Yoano wasapwijile ku bena Isalela bonse pa mambo a lubatizhilo kwikala kiyukilo kya kulapila.+ 25 Bino Yoano byo ayilenga na kupwisha mwingilo wanji, waambilenga’mba: ‘Mwalanguluka’mba amiwa yami ñanyi? Kechi yami iye ne. Bino awa ubena kundondela kechi nakonsha kukasulula ntambo ya pa makwabilo anji ne.’+
26 “Anweba bakwetu, balongo, baana ba kwa Abalahama ne boba bo muji nabo bakamwa Lesa, byambo bya luno lupulukilo bebituma kwi atweba.+ 27 Mambo bangikazhi ba mu Yelusalema ne bantangi babo kechi bamuyukile ne, bino byo bamuchibijile mambo, bafikizhe bintu byaambile Bangauzhi+ byo batanga na jiwi ja peulu pa moba onse a sabado. 28 Nangwa kya kuba kechi bamutaaine na mambo a kumwipayilapo ne,+ bakanjikizhe Pilato kuba’mba bamwipaye.+ 29 Kabiji byo bafikizhe bintu byonse byanembelwe pe aye, bamufumishepo pa kichi ne kukamubika mu kilende.*+ 30 Bino Lesa wamusangwile mu bafu,+ 31 kabiji pa moba avula bamumwenenga ku boba bo ayile nabo ku Ngalilea kukafikatu ne ku Yelusalema. Bano bo bakamonyi banji ku bantu.+
32 “Onkao mambo, tubena kwimusapwila mambo awama pa mambo a mulaye ye balayile bashakulu. 33 Lesa wafikizha uno mulaye kwi atweba baana babo, kupichila mu kusangula Yesu;+ byonkatu byo kyanembwa mu salamo wa bubiji amba: ‘Obewa wi mwanami; lelo jino yami shobe.’+ 34 Kabiji na mambo a kuba wamusangwile mu bafu kuba’mba abule kubola, kyo kyo aambijile’mba: ‘Nkemumwesha butemwe bubula kwaluka bo nalayile Davida, bonka bwa kishinka.’*+ 35 Kabiji kyaambiwa ne mu salamo mukwabo amba: ‘Kechi mukaswisha kalume wenu wa kishinka kubola ne.’+ 36 Davida waingijilenga Lesa mu kisemi kyanji, kabiji wafwile ne kumutwala kwalaala bashakulu banji, kabiji wabolele.+ 37 Bino awa muntu Lesa ye asangwile kechi wabolele ne.+
38 “Onkao mambo, balongo bami, yukai’mba kupichila mu uno muntu, kulekelwa kwa mambo kubena kusapwilwa kwi anweba,+ 39 ne kuba’mba Mizhilo ya Mosesa kechi yakonsha kwimubingisha ne,+ bino na mambo a lufu lwa uno muntu, Lesa ukabingisha yense waitabila.+ 40 Onkao mambo, jimukai kuba’mba kintu kyaamba Bangauzhi kikabule kwimufikila kya kuba’mba: 41 ‘Akimonai uno mwingilo anweba ba milengulwila ne kukumya kabiji mukafwa, mambo mbena kwingila uno mwingilo mu moba enu ye mukabula kwitabila nangwa kya kuba muntu mukwabo akemulumbulwileye.’”+
42 Byo balupukilenga, bantu batendekele kwibasashijila’mba bino bintu byo baamba bakebyambe ne pa juba ja Sabado jikalondelapo. 43 Onkao mambo, bantu byo bapalañenemo mu nshinagoga, Bayudea bavula ne boba baalukile ke Bayudea bapopwelanga Lesa balondejilenga Paulo ne Banabasa, kabiji abo batundaikilenga bantu amba batwajijile kwikala mu lusa lukatampe lwa Lesa.+
44 Pa juba ja Sabado jalondejilepo, bantu bavula ba mu muzhi bakonkene na kumvwa byambo bya Yehoba.* 45 Bayudea byo bamwene mabumba, baubile kichima ne kutendeka kulengulula bintu byaambilenga Paulo.+ 46 Ponkapo Paulo ne Banabasa na kuchinchika bebambijile’mba: “Kyafwainwe patanshi mambo a Lesa kusapwilwa kwi anweba.+ Bino na mambo a kuba mubena kwiakana ne kwichibila anwe bene mambo amba kechi mwafwainwa bumi bwa myaka ne myaka ne, twaya ku bisaka bya bantu.+ 47 Mambo Yehoba* witukambizha na bino byambo amba: ‘Nakutongola kwikala kyeya ku bisaka bya bantu, kuba’mba wikale lupulukilo kufika kwapela ntanda.’”+
48 Aba ba mu bisaka bya bantu byo baumvwine kino, basekejile bingi ne kwibitumbijika byambo bya Yehoba* kabiji bonse bajinga na michima ya bukishinka ya kukeba bumi bwa myaka ne myaka, baitabijile. 49 Kabiji byambo bya Yehoba* byayilenga na kukumbana mu kyalo kyonse. 50 Bino Bayudea batundaikile banabakazhi bamo bashiñama bapopwelanga Lesa ne bakulumpe ba mu muzhi, ne abo bamanyikile Paulo ne Banabasa+ ne kwibataya pangye ya mipaka yabo. 51 Onkao mambo, bakunchile lukungu ku maulu abo ne kuya ku Ikonyuma.+ 52 Kabiji baana ba bwanga batwajijile kwikala na lusekelo lukatampe+ ne kuyula na mupashi wazhila.