Danyela
9 Mu mwaka mutanshi wa bukalama bwa kwa Daliusa+ mwana wa kwa Ahaselusa wa mu kisemi kya bena Meda, ye babikile pa bufumu bwa bena Kalodeya,+ 2 mu mwaka mutanshi wa bukalama bwanji, amiwa Danyela nayukile bulongo byambo bya mu mabuku* Yehoba byo abuujile ngauzhi Yelemiya amba, pa myaka 70+ Yelusalema bakamonauna ne kushalatu masala.+ 3 Onkao mambo, natajile mwiulu kwi Yehoba Lesa wa kine ne kumusashijila saka nzhikilwa na nzala,+ kuvwala bivwalo bya majila ne kwipukula mu buto. 4 Nalombele kwi Yehoba Lesa wami ne kusolola bubi bwami namba:
“Anweba Yehoba Lesa wa kine, mukatampe kabiji ulengesha moyo, yenka anweba mulama lulayañano lwenu ne kumwesha butemwe bubula kwaluka+ ku boba bemutemwa kabiji balama mikambizho yenu,+ 5 atweba twalenga mambo, twauba byatama, twatamisha kabiji twasatuka;+ twaleka kulondela mikambizho yenu ne bunchibamambo bwenu. 6 Kechi twaumvwijile bakalume benu bangauzhi+ baambilenga mu jizhina jenu ku bamfumu betu, babinemanga betu, bashakulu betu ne ku bantu bonse ba mu kyalo kyetu ne. 7 Bololoke bo bwenu anweba Yehoba, pakuba atweba kitulenga bumvu* byonkatu byo kiji ne lelo jino, ku bena Yuda, ku bekala mu Yelusalema, ku bena Isalela bonse, ne ku boba bekala kwalepa ne ku bekala pepi ne mu byalo byonse mo mwibapalañenya, mambo kechi bajinga ba kishinka kwi anweba ne.+
8 “Anweba Yehoba, kitulenga bumvu,* atweba, bamfumu betu, babinemanga betu ne bashakulu betu, mambo twimulenga mambo. 9 Anweba Yehoba Lesa wetu, muji na lusa kabiji mulekela mambo,+ pakuba atweba twimusatukila.+ 10 Kechi twakookela byaamba Yehoba Lesa wetu byo twabula kulondela mizhilo yanji yo etupele kupichila mu bakalume banji bangauzhi ne.+ 11 Bena Isalela bonse kechi balondela Mizhilo yenu ne, kabiji basatuka pa kubula kukookela byambo byenu, o ene mambo mafingo ne luchipo lwanembwa mu Mizhilo ya Mosesa kalume wa Lesa wa kine o bitufikila,+ mambo twimusatukila. 12 Wafikizha byambo byanji byo aambile kwi atweba+ ne bakalama betu betulaminenga,* pa kwituletela bya malwa bikatampe; pano pa ntanda kechi pakimwekapo kintu nabiji kyokya kyamwekele mu Yelusalema ne.+ 13 Bino bya malwa byonse bitufikila byonkatu byo kyanembwa mu Mizhilo ya Mosesa,+ pano bino, kechi twamulomba Yehoba Lesa wetu amba etubile lusa* byo twabula kuleka kuba byatama+ kabiji kechi twata muchima ku byambo byanji ne.
14 “Onkao mambo, Yehoba wamwenenga kabiji wituletejile bya malwa, mambo Yehoba Lesa wetu waoloka mu bintu byonse byo oba; nangwa byonkabyo, atweba kechi twakookela byambo byanji ne.+
15 “Anweba Yehoba Lesa wetu, yenka anweba mwafumishe bantu benu mu kyalo kya Ijipita na kuboko kwenu kwa bulume+ ne kutumbijika jizhina jenu kufikatu ne lelo jino,+ atweba twimulenga mambo kabiji twauba bintu byatama bingi. 16 Anweba Yehoba, monka mwayila byubilo byenu byonse byaoloka,+ twapopwela kange muzhingijile ne kubuukila bukaji muzhi wenu Yelusalema, mutumba wenu wazhila ne; mambo bundengamambo bwetu ne bubi bwa bashakulu betu, bwalengela Yelusalema ne bantu benu kwibendeleka ku bonse betuzhokoloka.+ 17 Pano anweba Lesa wetu, umvwai milombelo ne misashijilo ya kalume wenu, kabiji na mambo a lukumo lwenu anweba Yehoba, ubai bintu byawama pa nzubo yenu yazhila+ yo baonauna.+ 18 Anweba Lesa wami, ntelekai ne kuñumvwa! Talai, mumone byaonaika muzhi wetu utelwa pa jizhina jenu; mambo atweba tubena kwimusashijila anweba kechi na mambo a kuba’mba twaoloka ne, bino ke na mambo a lusa lwenu lukatampe.+ 19 Anweba Yehoba, umvwai. Anweba Yehoba, tulekelaiko mambo.+ Anweba Yehoba, telekai kabiji mukumbule! Anweba Lesa wami, na mambo a kyaswa muchima wenu, kange mubande ne, mambo jizhina jenu jatelwa pa muzhi wenu ne pa bantu benu.”+
20 Byo nakyambilenga ne kulomba ne kusolola bubi bwami ne bwa balongo bami bena Isalela ne kulomba bukwasho kwi Yehoba Lesa wami na mambo a mutumba wazhila wa Lesa wami,+ 21 kabiji byo na kilombelenga, Ngabaliela+ yenka ye namwene patanshi mu kimwesho,+ waishile kwi amiwa saka nakookatu zubulu, pa kimye kya kupana mulambo wa mabanga. 22 Kabiji wankwashishe kuyuka bintu ne kuñambila’mba:
“Obewa Danyela, pano naiya namba nkukwashe kuyuka ne kumvwisha bintu byonse. 23 Byo waji kutendeka misashijilo yobe, byambo byakumvwanyika, kabiji amiwa naiya kukubuula mo byatala, mambo obewa wi muntu wanemekwa* bingi.+ Onkao mambo, umvwa byo nsakukubuula ne kumvwisha mwatala kimwesho.
24 “Balongo bobe ne muzhi wenu wazhila+ bemutongwela milungu* 70, ya kupwishishamo bubi, bundengamambo,+ kulekelamo bantu mambo,+ kuletelamo bololoke bwa myaka,+ kushinka kimwesho ne bungauzhi* na katetesho+ ne kuzhijika Mwazhijisha. 25 Wafwainwa kuyuka ne kumvwisha kuba’mba kufuma kimye kyo baambile byambo bya kuwamisha Yelusalema+ ne kumushimukulula kufika ne pa kumweka kwa kwa Mesiasa*+ Ntangi,+ pakapita milungu itanu na ibiji ne milungu 62.+ Bakamuwamisha ne kumushimukulula pamo na lubanza mukatampe ne mufolo mukatampe wazhika, pano bino, kino kikekala kimye kya bya malwa.
26 “Milungu 62 inge yapwa, Mesiasa bakamuchibako,*+ kya kuba kechi ukashapo kintu kyanji nangwa kimo ne.+
“Kabiji jibumba ja ntangi ubena kwiya, jikonauna muzhi ne mpunzha yazhila.+ Kabiji ikonaika na muyulo wa mema. Kabiji kukekala nkondo kufikatu ne ku mpelo; Lesa wafuukulapo kwiyonauna.+
27 “Kabiji ukalama lulayañano mulungu umo na mambo a bantu bavula; kabiji pakachi ka yewa mulungu ukakanya kupana bitapisho ne milambo.+
“Kabiji awa uleta lonaiko ukeya pa byapi bya bintu bya bunya;+ kabiji kintu Lesa kyo afuukula kuba, kikamwekela yewa ye batongwela konaunwa, posotu akavile.”