Nkalata Itanshi ku Bena Kolinda

7 Pano mbena kwimunembela pa bintu byo mwannembejile, kyawama mwanamulume kubula kukwataula* mwanamukazhi pa mubiji; 2 bino na mambo a kuvula kwa bulalelale,* mwanamulume yense ekale na mukazhanji,+ ne mwanamukazhi yense na mwatawanji.+ 3 Mwanamulume ape mukazhanji kyamufwainwa, ne mwanamukazhi obe byonkabyo ku mwatawanji.+ 4 Mwanamukazhi kechi uji na luusa pa mubiji wanji ne, kana mwatawanji; ne mwanamulume naye kechi uji na luusa pa mubiji wanji ne, kana mukazhanji. 5 Kange mwitanenga anweba bene na bene ne, kanatu mwaitabanzhanya kubula kuba kino pa kimye kyo mwaumvwañana, pa kuba’mba mute muchima ku milombelo kabiji mwakonsha kusambakana jibiji, pa kuba’mba Satana abule kwimweseka na mambo a kubula kwikanya kwenu. 6 Nangwa byonkabyo, naamba bino namba nemubuulekotu, kechi kwimukambizha ne. 7 Nanchi umvwe bantu bonse bajinga byonka byo nji. Nangwa byonkabyo, muntu yense uji na kya bupe+ kyanji kufuma kwi Lesa, awu kyayila mumu, mukwabo kyayila mumu.

8 Pano mbena kubuula bantu babula mu masongola ne banabakazhi bafwilwa kuba’mba kibafwainwa kwikala byonka byo nji.+ 9 Bino umvwe bakankalwa kwikanya, basongole nangwa kusongolwa, mambo kyawama kusongola nangwa kusongolwa kukila kupya muchima.+

10 Mbena kubuula bantu baji mu masongola, pakuba kechi yami mbena kwamba ne, bino Nkambo, amba mwanamukazhi kechi wafwainwa kwabana na mwatawanji ne.+ 11 Bino umvwe mwanamukazhi wafuukulapo kwabana, wafwainwa kwikala kwa kubula kusongolwa, inge ne, abwele jibiji ku mwatawanji; kabiji mwanamulume kechi wafwainwa kwabana na mukazhanji ne.+

12 Bino ku bakwabo yami naamba, kechi Nkambo ne,+ amba: Umvwe mulongo uji na mukazhi wabula kwitabila, bino mukazhanji waswa kwikala nanji, kechi abane nanji ne; 13 kabiji umvwe mwanamukazhi uji na mwatawanji wabula kwitabila, bino mwatawanji waswa kwikala nanji, kechi abane nanji ne. 14 Mambo mwanamulume wabula kwitabila wazhijikwa na mambo a mukazhanji, kabiji mwanamukazhi wabula kwitabila wazhijikwa na mambo a mwatawanji waitabila; mambo inge ne, baana benu bakonsha kwikala ba muzhilo, bino bazhijikwa. 15 Bino umvwe muntu wabula kwitabila wafuukulapo kwabana, babane; mulongo nangwa nyenga kechi wakaswa ku kino ne, bino Lesa wimwita amba mwikale mu mutende.+ 16 Obewa mwanamukazhi, wayuka byepi inge ukapulusha mwatawobe?+ Nangwa obewa mwanamulume, wayuka byepi kana ukapulusha mukazhobe?

17 Nangwa byonkabyo, monka Yehoba* mo ebapela bantu bintu pa muntu pa muntu, muntu yense ekale byonkabyo monka mo amwichijile Lesa.+ Kabiji napana uno mukambizho ku bipwilo byonse. 18 Nanchi muntu waichilwe saka aya kala ku mukanda nyi?+ Kange aluke ke wabula kuya ku mukanda ne. Nanchi muntu waichilwe saka abula kuya ku mukanda nyi? Kange aye ku mukanda ne.+ 19 Kuya ku mukanda ko kwatu, ne kubula kuya ku mukanda nako ko kwatu;+ bino kulama mikambizho ya Lesa ko kwanema.+ 20 Muntu yense ekale byonka byo ajinga kimye kyo bamwichile.+ 21 Nanchi mwaichilwe saka muji bazha nyi? Kutako muchima ku kino ne;+ bino umvwe mwakasululwa, kingijishai akyo kimye. 22 Mambo yense wa mwi Nkambo waichilwe saka aji muzha, waaluka ke muntu wa Nkambo ye bakasulula;+ kabiji awa waichilwe saka aji mwana bene, waaluka ke kalume wa Kilishitu. 23 Bemupotele na mutengo mukatampe;+ kilekai kwikala bazha ba bantu. 24 Balongo bami, muntu yense ekale kwi Lesa byonka byo ajinga kimye kyo bamwichile.

25 Pa mambo a bantu* babula kusongola nangwa kusongolwa kechi njipo na mukambizho kufuma kwi Nkambo ne, bino naamba mo nalangulukila+ byo nji muntu wa kishinka ye baubila lusa kwi Nkambo. 26 Onkao mambo, nalanguluka namba kyawama mwanamulume kwikala byonka byo aji na mambo a kino kimye kyakatazha. 27 Nanchi mwakaswa ku mukazhenu nyi? Kilekai kukeba kukasuluka.+ Nanchi mwakasuluka ku mukazhenu nyi? Kilekai kukeba mukazhi. 28 Bino umvwe mwasongola kechi mwalenga mambo ne. Kabiji umvwe muntu* wasongola nangwa kusongolwa kechi walenga mambo ne. Pano bino, aba bakasongola nangwa kusongolwa bakamonanga bya malwa mu mibiji yabo. Bino mbena kwimujimunako.

29 Balongo bami, naamba bino namba kimye kyashalako kyakepa.+ Kufumatu luno aba baji na bakazhi bekale nobe bafwabo, 30 ne boba bajila bekale nobe kechi bajila ne, aba basekela bekale nobe kechi basekela ne, aba bapota bekale nobe kechi baji na bintu ne, 31 ne boba bengijisha bya pano pa ntanda babule kukizhamo kwibingijisha; mambo bintu pano pa ntanda bibena kwaluka. 32 Mbena kukeba namba mwikale babula bijikila. Mwanamulume wabula kusongola uta muchima ku bintu bya Nkambo, kuba’mba atokeshe Nkambo ku muchima. 33 Bino mwanamulume wasongola uta muchima ku bintu bya pano pa ntanda,+ kuba’mba atokeshe mukazhanji ku muchima, 34 kabiji watabankana. Kabiji mwanamukazhi wabula kusongolwa nangwa kisungu, uta muchima ku bintu bya Nkambo+ kuba’mba ekale wazhila mu mubiji wanji ne mu milanguluko yanji. Pakuba mwanamukazhi wasongolwa uta muchima ku bintu bya pano pa ntanda kuba’mba atokeshe mwatawanji ku muchima. 35 Bino mbena kwamba bino kuba’mba mumwenemo, kechi kwimukanya ne, bino kwimulengela kuba kyonka kyafwainwa muntu wabula kusongola ne kutesha muchima ku kwingijila Nkambo kwa kubula bya kwimutabakanya.

36 Umvwe muntu wamona’mba wakankalwa kwikala bunke, kabiji inge wapitaila pa jifumbi ja bwanyike, wafwainwa kuba bino: Obe monka mwakebela muchima wanji; kechi walenga mambo ne. Basongole nangwa kusongolwa.+ 37 Pakuba awa wafuukulapo ne kwikitabizha mu muchima wanji, uji na luusa pa kyo akeba kabiji wasalapo kubula kusongola nangwa kubula kusongolwa, wauba bulongo.+ 38 Byonkabyo, umvwe muntu yense wasongola nangwa kusongolwa wauba bulongo, bino yense wabula kutwela mu masongola wakizhamo kuba bulongo.+

39 Mwanamukazhi wakaswa kimye kyonse mwatawanji kyo akiji mumi.+ Bino umvwe mwatawanji waponena mu tulo twa lufu, wakasuluka kusongolwa ku ye akeba, kanatu monka mwi Nkambo.+ 40 Bino nalanguluka namba, umvwe waikala byonka byo aji, ukakilamo kwikala na lusekelo; kabiji nayuka namba nji na mupashi wa Lesa.