Yelemiya
31 Yehoba waamba’mba, “Pa kyokya kimye, amiwa nkekala Lesa wa bisemi byonse bya bena Isalela, ne abo bakekala bantu bami.”+
2 Yehoba waamba’mba:
“Bantu bapulukile ku mpoko bebobijile bibusa mu kiselebwa
Kimye bena Isalela kyo bayilenga ku mpunzha yabo kwa kukokolokela.”
3 Yehoba wamwekele kwi amiwa byo najinga kwalepa kabiji wañambijile’mba:
“Amiwa nakutemwa butemwe bwa myaka ne myaka.
O ene mambo o nakumweshesha butemwe bwami bubula kwaluka.*+
4 Nangwa byonkabyo, amiwa nkakushimika jibiji, kabiji bakakushimukulula.+
5 Ukajimba jibiji miñanzañanza ku mitumba ya mu Samaliya;+
Banjimi bakajimba ne kuja bipangwa byayo.+
6 Mambo juba jikafika kimye bakasopa ba ku mitumba ya Efelaimu kyo bakabijika amba:
‘Imanai, twayai tuye ku Ziona kwi Yehoba Lesa wetu.’”+
7 Mambo Yehoba waamba’mba:
“Bijikai na lusekelo ku ba mu kisemi kya kwa Yakoba.
Bijikai na lusekelo mambo mwakila bisaka bya bantu.+
Tayai mbila; mutotai ne kwamba’mba,
‘Anweba Yehoba, pulushai bantu benu, bena Isalela bashalapo.’+
8 Amiwa mbena kwibabwezha kufuma ku kyalo kya ku kabeta ka ku buyeke.+
Kabiji nkebakonkanya pamo kwibafumya ku mapunzha a kwalepa a pano pa ntanda.+
Mwi abo mukekala ne bampofu ne bantu balemana,+
Mwanamukazhi waimita ne yewa ubena kupaapa.
Bakabwela kuno saka baji jibumba jikatampe.+
9 Bakeya saka bajila.+
Nkebatangijila byo bakakebanga kwibobila bibusa.
Mambo amiwa yami Shanji Isalela kabiji Efelaimu ye mubeji wami.”+
10 Anweba bisaka bya bantu, umvwai byambo bya Yehoba,
Ne kwibisapwila ku bantu ba pa makuji aji kwalepa:+
“Awa wapalañenye kisaka kya Isalela ukekikonkanya pamo.
Ukekilamanga byonka kafunga byo alama jitangab janji.+
11 Mambo Yehoba ukakuula ba mu kisemi kya Yakoba+
12 Bakeya ne kubijika na lusekelo pa mutumba wa Ziona+
Ne kusekela pa bintu byawama byauba* Yehoba,
Ko kuba’mba kajo, binyu bya katataka,+ manyi
Ne baana ba mikooko ne bañombe.+
13 “Pa kyokya kimye, kisungu ukazha na lusekelo,
Ne bansongwalume ne banabalume bakote nabo bakazha na lusekelo.+
Kujila kwabo nkekwalula ke lusekelo.+
Nkebatekenesha ne kwibalengela kusangalala kechi bakekala na bulanda ne.+
14 Bañanga* nkebapa kajo kavula,*
Kabiji bantu bami bakekala na bintu byami byawama,”+ byo byaamba Yehoba.
15 “Yehoba waamba’mba:
‘Jiwi jaumvwanyika mu Lama,+ ja kujila mabingo ne kuwowakana:
Lechela ubena kujila baana* banji.+
Wakana kumutekenesha na mambo a baana banji,
Mambo bafwa.’”+
16 Yehoba waamba’mba:
“‘Leka kujila, shimuna mipolo ku meso obe,
Mambo mu mingilo yobe muji mfweto,
‘Bakabwela kufuma mu kyalo kya balwanyi,’+ byo byaamba Yehoba.
17 ‘Kabiji uji na luketekelo lwa kukamona byawama kulutwe,+
‘Baana bobe bakabwela ku kyalo kyabo,’”+ byo byaamba Yehoba.
18 “Kine naumvwa kujila kwa kwa Efelaimu amba,
‘Anweba mwamfundako kabiji kine mwamfundako,
Nobe mwana ñombe ye babula kufunjisha.
Mbwezhai, ne amiwa nkabwela,
Mambo anweba mwi Yehoba Lesa wami.
Naumvwine bumvu ne kulengululwa,+
Na mambo a bintu byo naubilenga ku bwanyike.’”
20 Yehoba waamba’mba, “Nanchi Efelaimu kechi mwanami ye natemwisha nenyi?+
Mambo nangwa namukajipilepotu byepi, kechi namuvulama ne.
O ene mambo muchima* wami o alukuchila munda na mambo a aye.+
Kabiji kine nkamubila lusa.”+
21 “Ibikile tuyukilo twa mabwe mu mukwakwa,
Ne kubika bipachi.+
Tajishanga mu mukwakwa mo ubena kuya.+
Bwela obewa kisungu Isalela, bwela ku ino mizhi yobe.
22 Obewa kisungu Isalela, ukatwajijila kupapala kufika ñanyi kimye?
Mambo Yehoba walenga kintu kya katataka pano pa ntanda:
Mwanamukazhi ukakebeshanga kulondela mwanamulume.”
23 Yehoba wa mabumba, Lesa wa Isalela waamba’mba: “Bakamba jibiji bino byambo mu kyalo kya Yuda ne mu mizhi yakyo kimye kyo nkabwezha bazha babo amba: ‘Yehoba akupeshe, obewa mpunzha yaoloka,+ yenka obewa mutumba wazhila.’+ 24 Kabiji mu kyalo kya Yuda, bantu bekalamo, banjimi ne bakafunga bakekala pamo.+ 25 Mambo amiwa nkakosesha yewa* wakooka ne kukwasha yense* ubena kumanama.”+
26 Ponkapo nabukile ne kukenkenta, tulo twangwamijile bingi.
27 Yehoba waamba’mba, “Moba abena kwiya o nkapana lusemo ku ba mu nzubo ya Isalela ne ba mu nzubo ya Yuda ne ku banyama babo pamo.”+
28 Yehoba waamba’mba, “Byonkatu byo nebatajilenga kuba’mba nebatupule, kwibakundula, kwibaponesha, kwibonauna ne kwibaletela bya malwa,+ byo byo nkebatalanga pa kuba’mba nebashimike ne kwibajimba.”+ 29 “Mu oa moba kechi bakambapo jibiji amba, ‘Bashabo bajiile mañanzañanza asasa, pano bino, meno a baana o aubile ngwe* ne.’+ 30 Nangwa byonkabyo, muntu yense ukafwa na mambo a bubi bwanji mwine. Muntu yense ukaja mañanzañanza asasa, meno anji mwine o akooba ngwe.”
31 Yehoba waamba’mba, “Umvwai! Moba abena kwiya o nkalayañana lulayañano lupya na ba mu nzubo ya Isalela ne ba mu nzubo ya kwa Yuda.+ 32 Kechi lukekala nobe lulayañano lo nalayañene na bashakulu babo juba jo nebakwachile pa kuboko kwabo ne kwibafumya mu kyalo kya Ijipita,+ ko kuba’mba ‘lulayañano lwami lo bakankelwe kulama+ nangwa kya kuba amiwa najinga nkambo* yabo wa kine ne,’ byo byaamba Yehoba.”
33 “Luno lo lulayañano lo nkalayañana na ba mu nzubo ya Isalela aa moba byo akapwa,” byo byaamba Yehoba. “Nkabika mizhilo yami mwi abo ne kwiinemba mu michima yabo.+ Kabiji nkekala Lesa wabo, ne abo bakekala bantu bami.”+
34 Yehoba waamba’mba: “Muntu kechi ukafunjishapo mukwabo ye ekala nanji kipi kipi nangwa mulongo wanji amba, ‘Yukai Yehoba ne!’+ mambo bonse bakangyuka kufumatu ku mwanyike kufika ne ku mukulumpe.+ Mambo amiwa nkebalekelako mambo abo kabiji kechi nkeavulukapo jibiji ne.”+
35 Yehoba,
Yenka ulengela juba kusamisha kyeya mute,
Upana mizhilo* ya ñondo ne tubangabanga ya kusamisha kyeya bufuku,
Ulengela kalunga ka mema ne manyaki ako kuvwandauka bingi,
Yenka wa jizhina ja Yehoba wa mabumba waamba’mba:+
36 “Yehoba waamba’mba: ‘Umvwe bino bintu byakankalwa kwingila monka mo nebikambizhizha,
‘Ko kuba’mba baana ba kwa Isalela bakaleka kwikala kisaka kya bantu kwi amiwa myaka ne myaka.’”+
37 Yehoba waamba’mba: “‘Umvwe jiulu bakonsha kwijipima kabiji inge bitendekesho bya ntanda bakonsha kwibitaana ko biji, ko kuba’mba ne amiwa nakonsha kukana bonse ba mu kisemi kya Isalela na mambo a bintu byonse byo bauba,’ byo byaamba Yehoba.”+
38 Yehoba waamba’mba, “Umvwai! Moba abena kwiya Yehoba po bakamushimikila muzhi+ kufuma ku Kyamba kya Hananela+ kufika ku Kibelo kya ku Jikonka.+ 39 Kabiji bakapisha lutambo wa kupiminako,+ kumolola kupita ku katumbatumba ka Galeba ne kumuchimpula kuya ku Gowa. 40 Kabiji kimpachiko* kyonse kya bantu bafwa ne kya buto,* ne mu milaala yatentakana yonse kufika ne ku Kimpachiko kya Kedolona+ kabiji kukafikatu ne ku Kibelo kya Bambili+ kyaikela ku musela, kikekala ke kintu kyazhila kwi Yehoba.+ Kechi bakekitupula nangwa kwikiponesha jibiji ne.”