Ezikyo

39 “Obewa mwana muntu, aula bikamumwekela Gogi+ ne kumubuula’mba, ‘Nkambo Mfumu Yehoba waamba’mba: “Amiwa nakuzhingijila obewa Gogi mukulumpe wa babitumbafumu* ba bena Mesheke ne bena Tubala.+ 2 Nkakwalulula ne kukutangijila, kabiji nkakufumya ku mapunzha a kwalepa a ku kabeta ka ku buyeke+ ne kukuleta ku mitumba ya Isalela. 3 Nkapaakula buta bobe bwa mukanda buji mu kuboko kobe kwa kipiko ne kukulengela kulakasha miketo yobe iji mu kuboko kobe kwa kilujo. 4 Ukafwila pa mitumba ya Isalela pamo na mazhita obe onse+ ne mitundu ya bantu yo ukekala nayo. Nkemupana ku bañonyi bapusana pusana baja nyama ne ku banyama bakaji ba mungye kuba’mba bakemuje.”’+

5 “Nkambo Mfumu Yehoba waamba’mba, ‘Mukafwila mungye,+ mambo amiwa yami naamba.’

6 “‘Nkatuma mujilo pe Magogi ne pa boba bekala mu mutende pa makuji,+ kabiji po po bakayuka’mba amiwa yami Yehoba. 7 Nkalengela jizhina jami kuyukanyikwa ku bantu bami bena Isalela kabiji kechi nkaswishapo jibiji kuba’mba jizhina jami bejizhilulule ne; kabiji bisaka bya bantu po po bikayuka’mba amiwa yami Yehoba,+ wazhila mu Isalela.’+

8 “‘Nkambo Mfumu Yehoba waamba’mba, ‘Bino bintu bibena kwiya kabiji bikamweka. Jino jo juba jo naambilengapo. 9 Bantu bekala mu mizhi ya mu Isalela bakalupuka ne kuya na kubanza mujilo kwingijisha bilwilo bya nkondo, ko kuba’mba makebo* acheche ne akatampe, mata a mikanda ne miketo, tukonkolo* twa nkondo ne mafumo. Kabiji bakebingijisha kubanzhilako mujilo+ pa myaka itanu na ibiji. 10 Kechi bakachabanga nkunyi mu majimi nangwa mungye ne, mambo bakengijishanga bilwilo bya nkondo kubanzhilako mujilo.’

“Nkambo Mfumu Yehoba waamba’mba, ‘Bakangata bintu byabo ku boba bebangachile kabiji bakapukula bintu byabo ku boba bapukwile bintu byabo.’

11 “‘Pa joja juba, nkapa Gogi+ kilende kya kumuzhiikamo mu Isalela, mu kimpachiko kya boba baya ku musela wa kalunga ka mema, kabiji kikashinka jishinda ja boba bapitamo. Kuno ko ko bakazhiika Gogi ne mabumba anji onse, kabiji bakekutelanga’mba Kimpachiko kya Hamone-Gogi.*+ 12 Ba mu kisaka kya Isalela bakazhiika bano bantu pa bañondo batanu na babiji pa kuba’mba bakatokeshe kyalo.+ 13 Bantu bonse ba mu kyalo bakengijila pamo kuzhiika bano bantu, kabiji kino kikebalengela kutumbijikwa pa joja juba jo nkamwesha lukumo lwami,’+ byo byaamba Nkambo Mfumu Yehoba.

14 “Bakatongola bantu kuba’mba bapitañanenga mu kyalo na kuzhiika mibiji yafwa ikalaalazhamatu patoka pa kuba’mba bakatokeshe kyalo. Bakoba bino pa bañondo batanu na babiji. 15 Aba bakapitañananga mu kyalo inge bamona kikupa kya muntu, bakabikangapo kayukilo. Kabiji aba bo bapa mwingilo wa kuzhiika, bakekizhiika mu Kimpachiko kya Hamone-Gogi.+ 16 Kabiji kukekala muzhi ye bakatelanga’mba Hamona.* Kabiji bakatokesha kyalo.’+

17 “Obewa mwana muntu, Nkambo Mfumu Yehoba waamba’mba: ‘Ambila bañonyi bapusana pusana ne banyama bakaji bonse ba mungye amba, “Ikonkanyai bonse pamo mwiye. Konkenai ku kitapisho kyami kyo nemunengezhezha, kitapisho kikatampe kya pa mitumba ya Isalela.+ Mukaja nyama ne kutoma mashi.+ 18 Mukaja nyama ya babiyangala ne kutoma mashi a babinemanga ba pano pa ntanda, ko kuba’mba mikooko ilume, baana ba mikooko, bambuzhi, bañombe ne banyama bonse banuna ba ku Bashana. 19 Mukaja mafuta avula ne kutoma mashi kufikatu ne byo mukapendwa ku kitapisho kyo nkemunengezhezha.”’

20 “Nkambo Mfumu Yehoba waamba’mba, ‘Ku tebulu wami mukekuta nyama ya bambili, nyama ya boba benda pa makalaki,+ ya babiyangala ne ya babilobo bonse.’

21 “‘Nkamwesha lukumo lwami ku bisaka bya bantu. Kabiji bisaka byonse bikamona byo nkebakambula ne byo nkamwesha bulume* bwami pe abo.+ 22 Kufumatu joja juba, ba mu kisaka kya Isalela bakayuka’mba amiwa yami Yehoba Lesa wabo. 23 Kabiji bisaka bya bantu bikayuka’mba ba mu kisaka kya Isalela bayile mu buzha na mambo a bubi bwabo, ne na mambo a kubula kwikala bakishinka kwi amiwa.+ Onkao mambo, nafile kilungi kyami kwi abo+ ne kwibapana ku balwanyi babo,+ kabiji bonse bebepayile na mpoko. 24 Nebakambwile monka mwayijile byubilo byabo byatama ne bubi bwabo, kabiji nafile kilungi kyami kwi abo.’

25 “Onkao mambo, Nkambo Mfumu Yehoba waamba’mba: ‘Nkafumya Yakoba+ mu buzha ne kubila lusa kisaka kyonse kya Isalela;+ kabiji nkazhikijila bingi jizhina jami jazhila.+ 26 Kufumatu kimye kyo nkebalengesha bumvu na mambo a kubula kwikala bakishinka kwi amiwa,+ bakekala mutende mu kyalo kyabo kafwako nangwa umo ukebalengesha moyo ne.+ 27 Byo nkebaleta kwibafumya mu mitundu ya bantu ne kwibakonkanya pamo kufuma mu byalo bya balwanyi babo,+ nkezhijika amiwa mwine kwi abo ku meso a bisaka bya bantu byavula.’+

28 “‘Byo nkebatwala mu buzha mu bisaka bya bantu ne kwibabwezha mu kyalo kyabo kwa kubula kushapo muntu nangwa umo ne, po po bakayuka’mba yami Yehoba Lesa wabo.+ 29 Kechi nkebafyapo kilungi kyami jibiji ne,+ mambo nketulwila mupashi wami pa kisaka kya Isalela.’+ Byo byaamba Nkambo Mfumu Yehoba.”