Byubilo bya Batumwa
10 Mu Kesalea mwajinga muntu wa jizhina ja Koneleusa, mukulumpe* wa bashilikale wa mu jibumba jo batelanga’mba Italya. 2 Aye wanemekanga ne kwakamwa Lesa pamo na ba mu nzubo yanji bonse, kabiji wapananga bya bupe byavula ku bantu ne kulomba na misashijilo kwi Lesa kimye kyonse. 3 Pa jiola* ja butanu na buna,+ wamwene mu kimwesho malaika wa Lesa saka eya kwi aye ne kumwita’mba: “Koneleusa!” 4 Koneleusa byo amutajile waubile moyo ne kumushikisha’mba: “I ki ka Nkambo?” Aye wamukumbwile’mba: “Milombelo yobe ne bupe bo upana byafika kwi Lesa kwikala bya kukuvulukilako.+ 5 Onkao mambo, tuma banabalume kuya ku Yopa na kwita Shimona utelwa’mba Petelo. 6 Uno muntu mwenyi wafikila mu nzubo ya kwa Shimona sendwe wa biseba iji kwipi na kalunga ka mema.” 7 Malaika ye esambilenga nanji aku ufumapotu, waichile bakalume banji babiji ne mushilikale wanemekanga Lesa kufuma mu ba mingilo banji, 8 kabiji wibabuujile bintu byonse ne kwibatuma ku Yopa.
9 Juba jalondejilepo byo bakiyilenga na kunangijila ku muzhi, Petelo wakanjijile peulu ya nzubo na kulomba, kyajinga nobe pa jiola* ja butanu na bumo. 10 Bino wafwile bingi nzala kabiji wasakilenga kuja. Byo bakinengezhezhenga kajo, waubile nobe ubena kumona kimwesho+ 11 kabiji wamwene mwiulu saka mwashinkuka ne kintu* kyamwekelenga nobe kisapi kya linenyi kikatampe saka bekikwata ku makonka ana ne kwikikizha pano pa ntanda; 12 kabiji pa kisapi pajinga mitundu yonse ya banyama ba maulu ana, bikalaba panshi ne bañonyi. 13 Kepo aumvwine jiwi na kumwambila’mba: “Petelo, imana wipaye uje!” 14 Bino Petelo waambile’mba: “Ine Nkambo, mambo nkyangye kujapo bintu bya muzhilo ne biji na biko.”+ 15 Kabiji jiwi jamwambijile jibiji amba: “Kileke kutela bintu Lesa byo atokesha amba bya biko.” 16 Kino kyamwekele ja busatu, kabiji ponkapo kino kintu* bekitwajile mwiulu.
17 Petelo byo akilangulukilenga mwatajile kimwesho kyo amwene, ponkapo banabalume batumine Koneleusa bashikishe kwajinga nzubo ya kwa Shimona kabiji baimene konkakwa ku kibelo.+ 18 Baichile ne kushikisha umvwe Shimona watelwanga’mba Petelo wafikijile kokwa. 19 Petelo byo akilangulukilenga mwatajile kino kimwesho, mupashi+ wamwambijile’mba: “Umvwa! Banabalume basatu babena kukukeba. 20 Onkao mambo, ikila uye nabo, kange uzhinauke ne, mambo yami nebatuma.” 21 Ponkapo Petelo waikijile ne kuya ku bano banabalume ne kwibambila’mba: “Amiwa yami mubena kukeba. Ñanyi mambo o mwaendela?” 22 Abo bamukumbwile’mba: “Koneleusa,+ mukulumpe wa bashilikale muntu waoloka kabiji wakamwa Lesa, utelwa bulongo ku kisaka kyonse kya Bayudea, bamupele mikambizho kwi Lesa kupichila mwi malaika wazhila wa kwimwita anweba ku nzubo yanji kuba’mba omvwe bintu byonse byo musakwamba.” 23 Onkao mambo, wibatambwijile mu nzubo ne kwikala nabo.
Juba jalondejilepo, waimene ne kuya nabo kabiji balongo bamo bajinga mu Yopa nabo bamulondejile. 24 Juba jalondejilepo, watwelele mu muzhi wa Kesalea. Koneleusa wibatengejilenga kabiji waichile balongo banji ne balunda nanji. 25 Petelo byo atwelele, Koneleusa wamutundaijile, waponejile ku maulu anji ne kumulambila.* 26 Bino Petelo wamwimenye ne kumwambila’mba: “Imana; amiwa nemuntutu.”+ 27 Petelo byo esambile nanji, watwelele mukachi ne kutaana bantu bavula bakonkana. 28 Wibambijile’mba: “Mwayukishatu bulongo amba kechi kyafwainwa Bayudea kwikala pamo nangwa kwisamba na muntu wa mutundu mukwabo ne,+ bino Lesa wammwesha’mba kechi nafwainwa kutela muntu nangwa umo amba wa muzhilo nangwa’mba wabula kwitokesha ne.+ 29 Onkao mambo, kyo kyo naishila kwa kubula kuzhinyazhinya byo mwangichile. Pano mbuulai kyo mwangichila.”
30 Ponkapo Koneleusa waambile’mba: “Pa kyonka kino kimye, moba ana apitapo, nalombelenga mu nzubo pa jiola* ja butanu na buna; ponkapo muntu wavwajile bivwalo byabembela waimene kwi amiwa 31 ne kuñambila’mba: ‘Koneleusa, lulombelo lobe lwaumvwanyika, ne bupe bo upana, Lesa wibuvuluka. 32 Onkao mambo, tuma bantu ku Yopa na kwita Shimona utelwa’mba Petelo. Uno muntu mwenyi wafikila mu nzubo ya kwa Shimona sendwe wa biseba iji kwipi na kalunga ka mema.’+ 33 Ponkapo natumine ba kwimwita kabiji mwauba bulongo kwiya kuno. Onkao mambo, atweba bonse twaimana kwi Lesa kuba’mba tumvwe bintu byonse bimukambizha Yehoba* kwamba.”
34 Ponkapo Petelo watatwile kwamba’mba: “Pano nayuka namba, Lesa kechi uji na misalululo ne,+ 35 bino mu bisaka byonse muntu umwakamwa ne kuba byaoloka ye witabilwa kwi aye.+ 36 Watumine byambo ku bena Isalela kupichila mu kwibasapwila mambo awama+ a mutende mwi Yesu Kilishitu—uno ye Nkambo wa bantu bonse.+ 37 Mwayuka mambo o baambilepo mu Yudea monse kutatwila mu Ngalilea,+ kufuma pa lubatizhilo Yoano lo asapwijile: 38 pe Yesu wafumine ku Nazala, Lesa byo amushingile mupashi wazhila+ ne na bulume, kabiji wapitañenenga monse mu kyalo na kuba bintu byawama ne kubuka bonse bo bamanyikilenga kwi Diabola,+ mambo Lesa wajinga ne aye.+ 39 Kabiji atweba twi bakamonyi pa bintu byonse byo aubile mu kyalo kya Bayudea ne mu Yelusalema; bino bamwipayile kupichila mu kumupopa pa kichi. 40 Lesa wamusangwile pa juba ja busatu+ ne kumuswisha kwisolola,* 41 kechi ku bantu bonse ne, bino ku bakamonyi bonka Lesa bo atongwejile jimo, kwi atweba twajiilenga ne kutoma nanji kimye kyo asangukile mu bafu.+ 42 Kabiji witukambizhe kusapwila bantu ne kushimuna bulongo+ amba uno ye yewa Lesa ye aambilepo amba ye ukekala mutonyi wa bomi ne bafu.+ 43 Bangauzhi bonse bashimuna+ pe aye amba, yense wamwitabila ulekelwa mambo anji kupichila mu jizhina janji.”+
44 Petelo byo akyambilenga pa bino bintu, mupashi wazhila waikijile bonse batelekelenga byo aambilenga.+ 45 Ne boba bayile ku mukanda baitabijile* baishile ne Petelo bakuminye bingi, mambo mupashi wazhila wa bupetu waitulukijile pa bantu ba mu bisaka bya bantu. 46 Mambo bebomvwine saka bamba mu milaka* ingi ne kutota Lesa.+ Kepo Petelo aambile’mba: 47 “Bano bantu batambula mupashi wazhila byonkatu byo twatambwile ne atweba, onkao mambo, ñanyi wakonsha kwibakanya kubatizhiwa mu mema?”+ 48 Byo apwishishe kwamba bino, wakambizhe’mba babatizhiwe mu jizhina ja Yesu Kilishitu.+ Kepo bamwambijile’mba bekale nanji moba amo.