Ku Bena Kolose
3 Nangwa byonkabyo, umvwe mwasangwilwe pamo na Kilishitu,+ kebainga bintu biji mwiulu, monka mwaikala Kilishitu ku kilujo kya Lesa.+ 2 Teshai muchima ku bintu biji mwiulu,+ kechi ku bintu biji pano pa ntanda ne.+ 3 Mambo mwafwile, ne bumi bwenu bebufya pamo na Kilishitu monka mwi Lesa. 4 Kimye Kilishitu, aye uleta bumi,+ kyo akamweka, ponkapo ne anweba mukamweka nanji mu lukumo.+
5 Onkao mambo, ipayai binungwa bya mibiji yenu+ bya pano pa ntanda, na mambo a bulalelale,* bubipisho, milanguluko yatama ibindankanya muchima,+ kusakasaka kubi, ne lunkumbwa, ko kupopwela bankishi. 6 Na mambo a bino bintu, bukaji bwa Lesa bubena kwiya. 7 Ne anweba byo byo mwaubanga* mu bwikalo bwenu bwa kala.*+ 8 Pano mwafwainwa kutaya bino bintu byonse: bukaji, kuzhingila, bubi,+ mwenga+ ne ñambilo ya bunya+ kufuma mu kanwa kenu ne. 9 Kechi mwibepenga anwe bene na bene ne.+ Vuulai bumuntu* bwa kala+ ne byubilo byabo, 10 ne kuvwala bumuntu bupya, bubena kulengwa ke bupya+ kupichila mu kuyukisha bintu bulongo mwayila kipasha kya yewa wibulengele,+ 11 monka mwabula Mungiliki nangwa Muyudea, wa mukanda nangwa wabula mukanda, mwenyi, mwina Sikitya,* muzha nangwa mwana bene ne; bino Kilishitu ye bintu byonse kabiji uji mu byonse.+
12 Byonkabyo, byo muji basalwa ba Lesa,+ bazhila kabiji batemwe, vwalai muchima wa kifyele,+ wa lusa, wa kwipelula,+ wakooka+ ne wa butekanye.+ 13 Itekenyainga anwe bene na bene ne kwilekelako mambo+ umvwe umo uji na mambo na mukwabo.+ Byonkatu Yehoba* byo emulekejileko mambo, ne anweba byo byo mwafwainwa kubanga.+ 14 Bino kyakila pa bino byonse, vwalai butemwe,+ mambo butemwe bukwatankanya bantu bulongo.+
15 Kabiji muleke mutende wa Kilishitu alamenga mu michima* yenu,+ mambo ku uno mutende ko ko mwaichilwe mu mubiji umo. Kabiji saka musanta. 16 Byambo bya kwa Kilishitu bikale mwi anweba ne kwimulengela kwikala na maana onse. Saka mufunjisha ne kwitundaika* anwe bene na bene na masalamo,+ na nyimbo ya kutota Lesa, ne na nyimbo ya ku mupashi yo baimba ya kusanta,* ne kwimba mu michima yenu kwi Yehoba.*+ 17 Kabiji byonse byo muba mu byambo nangwa mu byubilo, byubilainga mu jizhina ja Nkambo Yesu, saka mumusanchila Lesa Tata kupichila mwi aye.+
18 Anweba banabakazhi, nekenenainga bamwatawenu,+ mambo kyo kyafwainwa mwi Nkambo. 19 Anweba banabalume, saka mutemwa bakazhi benu+ kabiji kange mwibashintaukilenga* ne.+ 20 Anweba baana, saka mukookela bansemi benu mu bintu byonse,+ mambo kino kitokesha Nkambo ku muchima. 21 Anweba bashabo, kange muzhingijishenga baana benu ne,+ pa kuba’mba babule kupopomenwa.* 22 Anweba bakalume, mukookelenga bankambo yenu ba pano pa ntanda* mu bintu byonse,+ kechi kubatu kino kimye kyo babena kwimumona kuba’mba mutokeshe bantu ku muchima* ne, kana kukookela na muchima wa kishinka ne kwakamwa Yehoba.* 23 Bintu byonse byo mubena kuba, byubainga na mweo* yense kwi Yehoba*+ kechi bantu ne, 24 mambo mwayuka’mba kwi Yehoba* ko ko mukatambula kya buswanyi, kwikala mfweto yenu.+ Ingijilainga Nkambo, aye Kilishitu. 25 Kine, yense uba byatama bakamukambula na mambo a kyatama kyo aubile,+ kabiji aye kechi uji na misalululo ne.+