Ezikyo
11 Kabiji mupashi wanshikwile ne kuntwala ku kibelo kya nzubo ya Yehoba kyatajile ku musela.+ Konkakwa ku kibelo, namweneko banabalume 25, pe abo pajinga Yazaniya mwana wa kwa Azula ne Pelatiya mwana wa kwa Benaya bajinga babinemanga ba bantu.+ 2 Kabiji Lesa wañambijile’mba: “Obewa mwana muntu, abano bantu babena kulanguluka mwa kubila byatama kabiji babena kubuula bantu ba mu muzhi bintu byatama. 3 Babena kwamba’mba, ‘Nanchi kino kechi kyo kimye kya kushimika mazubo nenyi?+ Uno muzhi* ye mwipika,*+ ne atweba twi nyama iji mu mwipika.’
4 “Onkao mambo, aula bintu bikebamwekela. Obewa mwana muntu, aula.”+
5 Kepo mupashi wa Yehoba aishile pe amiwa+ ne kuñambila’mba: “Babuule’mba, ‘Yehoba waamba’mba: “Anweba bena Isalela, bintu byo mwaamba bijitu bulongo kabiji nayuka ne bintu byo mubena kulanguluka.* 6 Mwaipayisha bantu bavula mu uno muzhi, kabiji mu mikwakwa mwayula bantu bo mwaipaya.”’”+ 7 “Onkao mambo, Nkambo Mfumu Yehoba waamba’mba: ‘Bantu bonse bo mwaipaya mu muzhi yo nyama, ne muzhi ye mwipika.+ Pakuba anweba bakemufumyamo.’”
8 Nkambo Mfumu Yehoba waamba’mba, “‘Mpoko yo mwachiine,+ yo yo nkemuletela.’ 9 ‘Nkemulupulamo mu muzhi ne kwimupana mu maboko a bantu bafuma ku byalo bingi kuba’mba bakemukambule.+ 10 Anweba mukafwa ku mpoko.+ Nkemuchibila mambo konka ku mupaka wa bena Isalela,+ kabiji mukayuka’mba amiwa yami Yehoba.+ 11 Muzhi kechi ukekala nobe mwipiki kwi anweba ne, kabiji kechi mukekala nobe nyama iji mu mwipika ne; amiwa nkemuchibila mambo konka ku mupaka wa bena Isalela. 12 Kabiji mukayuka’mba amiwa yami Yehoba. Mambo anweba kechi mwalondejile malamuna ami ne mizhilo yami ne,+ pakuba mwauba bintu kwesakana na mizhilo ya bisaka bimuzhokoloka.’”+
13 Aku mpwishatu kwaula, Pelatiya mwana wa kwa Benaya wafwile, ne amiwa naponene panshi kinkuvumene ne kubijika na jiwi ja bulanda amba: “Anweba Nkambo Mfumu Yehoba! Nanchi musakuvizha bonse bashalapo ba mu bena Isalela nyi?”+
14 Ponkapo Yehoba wañambijile jibiji amba: 15 “Obewa mwana muntu, balongo bobe, ba mu kisemi kyobe baji na luusa lwa kutambula kyalo pamo na kisaka kyonse kya bena Isalela bo babuujile ku bangikazhi ba mu Yelusalema amba, ‘Fumaiko kwi Yehoba. Akino kyalo kyetu; betupa kuba’mba twikalengamo.’ 16 Onkao mambo, wibabuule’mba, ‘Nkambo Mfumu Yehoba waamba’mba: “Nangwa kya kuba nebafumya kwalepa na bisaka byabo ne kwibapalañenya mu byalo bingi,+ kechi pakapita kimye kyabaya ne, nkekala ke nzubo yazhila kwi abo mu byalo mo bapalañena.”’+
17 “Kabiji wibabuule’mba, ‘Nkambo Mfumu Yehoba waamba’mba: “Nkemufumya mu mitundu ya bantu ne kwimukonkanya pamo kufuma mu byalo mo mwapalañenejile, kabiji nkemupa kyalo kya bena Isalela.+ 18 Ne abo bakabwela konkakwa ne kufumyamo bintu byonse byatama ne byubilo byonse bya bunya.+ 19 Kabiji nkebapa muchima* wakosa nobe jibwe+ ne bulume bwami bukengilanga mwi abo;+ kabiji nkafumyamo muchima wakosa nobe jibwe+ ne kwibapa muchima wakooka,*+ 20 pa kuba’mba bakendenga mu malamuna ami, bakalamenga mizhilo yami ne kwiikookela. Kepo bakekala bantu bami, ne amiwa nkekala Lesa wabo.”’
21 “Pakuba Nkambo Mfumu Yehoba waamba’mba: ‘Aba bateshatu michima yabo ku bintu byatama ne ku byubilo byabo bya bunya, nkebakambula monka mwayila byubilo byabo.’”
22 Bakelubi basuntwile byapi byabo, bitanga saka biji kwipi ne abo,+ kabiji lukumo lwa Lesa wa bena Isalela lwajinga peulu yabo.+ 23 Kabiji lukumo lwa Yehoba+ lwafumine mu muzhi ne kukekala pa mutumba ku musela wa muzhi.+ 24 Mu kimwesho kyammwesheshe Lesa, mupashi wanshikwile ne kuntwala ku bantu bajinga mu buzha mu Kalodeya. Kechi papichile ne kimye kyabaya ne, kimwesho kyo namwene kyazhimañene. 25 Ponkapo nabuujile bantu bajinga mu buzha bintu byonse byammwesheshe Yehoba.