Byubilo bya Batumwa
21 Byo twaabene nabo ne kufumako na bwato, twayilengatu kwa kubula kwimana kukafika ne ku Kosa, juba jalondejilepo twafikile ku Lodesa, kabiji byo twafumine kokwa twayile ku Patala. 2 Byo twataaine bwato bwayilenga ku Fenesha, twakanjijile monka ne kuya. 3 Byo twamwene jikuji ja Kipilusa, twijipitaijile ku kipiko ne kuya na bwato ku Silya kabiji twatuntukijile pa Tila, mambo po po bakebele kulongolwela bintu byajinga mu bwato. 4 Twakebele baana ba bwanga ne kwibataana kabiji twaikeleko moba atanu na abiji. Bino kupichila mu mupashi, Paulo bamukainye javula amba kange aye ku Yelusalema ne.+ 5 Onkao mambo, kimye kyetu byo kyapwile, twafumineko ketuye ne kuya, bino bonse pamo na banabakazhi ne baana, betushinjikinyeko ne kwitufikizha pangye ya muzhi. Byo twafukamine panshi ku kitulu, twalombele 6 ne kwishajikapo. Kepo twakanjijile mu bwato, bino abo babwelele ku mazubo abo.
7 Twapwishishe lwendo lwa kufuma ku Tila ne kufika pa Tolemesa na bwato, kabiji twaimwine balongo ne kwikala nabo juba jimo. 8 Juba jalondejilepo, twafumineko ne kuya ku Kesalea, kabiji twatwelele mu nzubo ya kwa Filipa musapwishi wajinga pa banabalume batanu na babiji,+ kabiji twaikele nanji. 9 Uno muntu wajinga na baana ba bakazhi bana bazhike* baaulanga.+ 10 Bino byo twaikeleko moba amo, ngauzhi umo wa jizhina ja Agabusa+ waishile kufuma ku Yudea. 11 Kabiji waishile kwi atweba ne kushikula mushipi wa kwa Paulo ne kwikasa ku maulu ne ku maboko ne kwamba’mba: “Mupashi wazhila waamba’mba, ‘Mwina uno mushipi bakamukasa byonka bino ku Bayudea mu Yelusalema+ kabiji bakamupana ku bantu ba mu bisaka bya bantu.’”+ 12 Byo twaumvwine kino, atweba ne bantu ba mu yoya mpunzha twatendekele kumusashijila’mba abule kuya ku Yelusalema. 13 Paulo waipwizhe’mba: “Mambo ka o mubena kujijila ne kundefula?* Yukai’mba, amiwa kechi nenengezhatu kukaswa ne, bino ne kungipaya monka mu Yelusalema na mambo a jizhina ja Nkambo Yesu.”+ 14 Byo akaine kumwitabisha, twalekele kumukanya,* kabiji twaambile’mba: “Kyaswa muchima wa Yehoba* kyubiwe.”
15 Ano moba byo apwile, twanengezhezhe lwendo ne kuya ku Yelusalema. 16 Baana ba bwanga bamo bafumine ku Kesalea twayijile nabo pamo, kabiji betufikizhe kwi Nasoni mwana wa bwanga mutanshi wa ku Kipilusa. Ku nzubo yanji ko ko twafwainwe kufikila. 17 Byo twafikile mu Yelusalema, balongo betutambwijile na lusekelo. 18 Bino juba jalondejilepo, twayijile pamo ne Paulo kwi Yakoba,+ ne bakulumpe mu kipwilo bonse bajinga konka. 19 Kabiji wibemwine ne kutendeka kwibalumbulwila bintu byonse Lesa byo aubile mu bisaka bya bantu kupichila mu mwingilo wanji.
20 Byo baumvwine kino, batendekele kutumbijika Lesa, bino bamwambijile’mba: “Mulongo, mu Bayudea muji bantu bavula bingi baitabila, kabiji bonse bateshako bingi muchima ku Mizhilo.+ 21 Bino baumvwa’mba mwafunjishenga Bayudea bonse baji mu bisaka bya bantu kukana kulondela Mizhilo ya Mosesa ne kwibabuula’mba kechi bafwainwa kutwala baana babo ku mukanda nangwa kulondela bisho ne.+ 22 Nanchi tusakuba byepi? Mambo kwa kubula nangwa kuzhinaukatu ne, basakumvwa’mba mwaiya. 23 Onkao mambo, mube byo tusakwimubuula: Tuji na banabalume bana bechipisha luchipo abo bene. 24 Yai na bano banabalume ne kwitokesha anwe bene pamo nabo monka mwayila mizhilo ne kwibalipililako kuba’mba bakebatende nsuki. Ne bantu bonse bakayuka’mba bintu byo baumvwine pe anweba kechi bya kine ne, bino bakayuka’mba byubilo byenu byawama, ne kuba’mba ne anweba mubena kulondela Mizhilo.+ 25 Pa mambo a baitabila ba mu bisaka bya bantu, twanemba ne kutuma byo twafuukulapo kuba’mba bafwainwa kukana bintu byo batapishisha bankishi,+ mashi,+ ne nyama ya kubula kukingya,+ ne bulalelale.”*+
26 Kepo Paulo ayile na bano banabalume pa juba jalondejilepo ne kwitokesha pamo ne abo monka mwayijile mizhilo,+ kabiji watwelele mu nzubo ya Lesa na kwibabuula juba pakapwila moba a kwitokesheshamo mwayila mizhilo, kuba’mba ñanga akatapishe kitapisho kya pa muntu pa muntu pa joja juba.
27 Moba atanu na abiji byo ajinga pepi kupwa, Bayudea bafumine ku Asha byo bamumwene mu nzubo ya Lesa, batendekele kuvulumuna jibumba kabiji bamukwachile, 28 ne kubijika’mba: “Anweba bena Isalela, tukwashai! Uno ye muntu ufunjisha bantu bonse konse konse bintu bilengulwisha bantu betu ne Mizhilo yetu ne ino mpunzha. Kabiji waletele ne Bangiliki mu nzubo ya Lesa ne kuzhilulula ino mpunzha yazhila.”+ 29 Mambo bamwene Tolofimusa+ mwina Efisesa mu muzhi, kabiji balangulukilenga’mba Paulo ye wamuletele mu nzubo ya Lesa. 30 Kabiji mu muzhi yense mwabuukile kiwowo kikatampe, ne bantu baishile lubilo ne kumukwata Paulo ne kumukokela pangye ya nzubo ya Lesa, kabiji ponkapotu bashinkile ne binzhilo. 31 Byo bakebelenga’mba bamwipaye, mawi afikile ku mukulumpe wa bashilikale kuba’mba monse mu Yelusalema muji kiwowo; 32 ne aye ponkapotu wasendele bashilikale ne bakulumpe ba bashilikale ne kuya ko bajinga. Byo bamwene mukulumpe wa bashilikale ne bashilikale, balekele kumupuma Paulo.
33 Kepo mukulumpe wa bashilikale aishile kwipi ne kumukwata ne kukambizha’mba bamukase minyololo ibiji;+ kabiji waipwizhe kuba’mba amuyuke ne kuyuka kintu kyo aubile. 34 Bino bamo mu jibumba babijikilenga kintu kimo, bakwabo nabo kintu kikwabo. Onkao mambo, byo akankelwe kuyuka kine kintu na mambo a kiwowo, wakambizhe’mba bamutwale ku kamba ka bashilikale. 35 Bino byo afikile pa kukanjijila, bamusendele ku bashilikale na mambo a bukaji bwa jibumba, 36 mambo jibumba ja bantu jalondejilenga saka babijika’mba: “Mwipayai!”
37 Byo kwashajiletu pacheche kumutwala ku kamba ka bashilikale, Paulo waipwizhe mukulumpe wa bashilikale’mba: “Nanchi mwakonsha kunswisha kwisambako nenu nyi?” Wamwipwizhe’mba: “Nanchi wakonsha kwamba Kingiliki nyi? 38 Nanchi kechi yobe mwina Ijipita walengejile bantu kunyumakwe kusatuka ne kutangijila banabalume bambanzhi 4,000 mu kiselebwa nenyi?” 39 Kepo Paulo akumbwile’mba: “Amiwa yami Muyudea+ wa ku Talasusa+ mu Kilikya, ngikazhi wa mu muzhi waya nkuwa. Onkao mambo, nemusashijila namba munswishe ñambe ku bantu.” 40 Byo amuswishishe, Paulo waimene pa kukanjijila, ne kutanyika kuboko ku bantu. Bantu byo bazhindaminepo, wibambijile mu Kihebelu+ amba: