Yelemiya
17 “Bundengamambo bwa bena Yuda bebunemba na kyela kya kapotwe kyatwa.
Bebunemba pa michima yabo na jibwe ja nguzha jasongoloka kulutwe
Ne pa masengo a bya kusokelapo bitapisho byabo,
2 Baana babo saka bavuluka bya kusokelapo bitapisho byabo ne mashiki* abo azhila+
Biji kwipi na bichi byafunkama, pa tutumbatumba twalepa,+
3 Ne pa mitumba iji mungye.
Amiwa nkalengela bantu kwimwangata bintu byenu bya bunonshi ne bya buneme byenu byonse+
Ko kuba’mba mapunzha enu atuntama na mambo a bubi bwenu bonse bo mwauba mu mapunzha enu onse.+
4 Na mambo a byubilo byenu anwe bene, mukataya kya buswanyi kyenu kyo nemupele.+
Kabiji nkemulengela kwingijila balwanyi benu mu kyalo kyo mwabula kuyuka,+
Bukateemangatu kimye kyonse.”
5 Yehoba waamba’mba:
“Malwa anji awa muntu* uketekela mu bantu,+
Ukinka manungo mu bulume* bwa bantu,+
Kabiji uvundamina Yehoba.
6 Aye ukekala nobe kichi kijitu pa bunke mu kiselebwa.
Kechi ukamona bintu byawama inge byamweka ne,
Pano bino, aye ukekala mu mapunzha mwauma mu kiselebwa,
Mu kyalo kya mukele mubula kwikala bantu.
8 Aye ukekala nobe kichi kyo bajimba ku mema,
Kitwala mizhazhi yakyo ku mukola.
Umvwe kwaikala kyuya, aye kechi ukekyumvwa ne,
Bino mabuula anji akatenkumangatu kikupu.+
Kabiji mu kimye kya kyashi kechi ukakamwa,
Nangwa kuleka kupanga bipangwa ne.
9 Muchima uji bingi na bujimbijimbi kukila bintu byonse kabiji watama bingi.+
Ñanyi wakonsha kuyuka byo aji?
10 Amiwa Yehoba yami nkebakeba ne kuyuka biji muchima,+
Yami mpalanguzha milanguluko ya mukachi mwine,*
Namba mfwete muntu yense monka mwayila byubilo byanji,
Ne bintu bifuma mu mingilo yanji.+
11 Byonkatu nkwaji byo abungizha make o abujile kusema,
Byo biji ne muntu umwena bunonshi mu jishinda jabula kufwainwa.*+
Bunonshi bwanji bukapwa saka akyangye kukota,
Kabiji kukosama kwanji kukasoloka ku mpelo.”
12 Kufumatu ku ntendekelo jitanda ja Lesa jatumbijikwa,
Kabiji jino jitanda yo nzubo yetu yazhila.+
13 Anweba Yehoba, ye baketekelamo bena Isalela,
Aba bonse bemwalukamo kikebalenga bumvu.
14 Anweba Yehoba mbukai, ne amiwa nsakubukwa.
Mpulushai, ne amiwa nsakupuluka,+
Mambo anweba yenu ntota.
15 Umvwai! Kuji bantu babena kuñambila’mba:
“Nanchi bintu byaamba Yehoba biji pi?+
Bifike lonka luno!”
16 Pakuba amiwa byonji kafunga kechi nalekele kwimulondela ne,
Kabiji kechi nakebelenga kumona juba ja bya malwa ne.
Anweba yenu mwayukisha byonse byaamba kanwa kami;
Byonse byamwekele ku meso enu!
17 Kange mundengele kwikala na moyo ne.
Anweba yenu kya kufyamamo kyami mu juba ja bya malwa.
18 Balengeshai bumvu aba bammanyika,+
Bino amiwa kange mundengeshe bumvu ne.
Balengelai kwikala na moyo,
Bino amiwa kange mundengele kwikala na moyo ne.
19 Yehoba wañambijile’mba: “Yanga ukemane mu kibelo kya baana ba bantu monka mutwelela ne kulupukila bamfumu ba mu Yuda, ne mu bibelo byonse bya mu Yelusalema.+ 20 Ukebabuule’mba, ‘Umvwai byaamba Yehoba, anweba bamfumu ba bena Yuda, bantu bonse ba mu Yuda ne bonse bekala mu Yelusalema batwelela pa bino bibelo. 21 Yehoba waamba’mba: “Jimukai, kange musende kintu nangwa kimo pa juba ja Sabado nangwa kwikitwezha pa bibelo bya mu Yelusalema ne.+ 22 Kechi mwafwainwa kuleta kintu nangwa kimo kwikifumya mu mazubo enu pa juba ja Sabado ne; kabiji kechi mwafwainwa kwingila mwingilo nangwa umotu ne.+ Mwafwainwa kuzhijika juba ja Sabado, byonkatu byo nakambizhe bashakulu benu.+ 23 Bino abo kechi batelekele nangwa kumvwa ne, kabiji bakaine* kukookela nangwa kuswa byo nebafunjileko.”’+
24 “‘“Pano bino,” Yehoba waambile’mba, “Umvwe kine mwankookela ne kubula kutwezha kintu nangwa kimo pa bibelo bya uno muzhi pa juba ja Sabado, kabiji mwazhijika juba ja Sabado kwa kubula kwingilapo mwingilo nangwa umo ne,+ 25 bamfumu ne babinemanga bekala pa jitanda ja Davida+ nabo bakatwelela pa bibelo bya uno muzhi saka benda pa makalaki ne pa bambili, ne babinemanga babo ne bantu bekala mu Yuda ne mu Yelusalema;+ kabiji mu uno muzhi mukekalanga bantu kimye kyonse. 26 Kabiji bantu bakeya kufuma mu mizhi ya mu Yuda ne mu mapunzha azhokoloka Yelusalema, kufuma mu kyalo kya Benjamina,+ mapunzha aikela mu binkunenke,+ mapunzha a ku mitumba ne mu Negeba* saka baleta milambo yonse ya kusoka,+ bitapisho,+ milambo ya kajo,+ binunka bulongo ne bitapisho bya kusanta mu nzubo ya Yehoba.+
27 “‘“Pano bino, umvwe mwabula kunkookela ne kubula kuzhijika juba ja Sabado ne kubula kusenda ne kutwezha bintu pa bibelo bya mu Yelusalema pa juba ja Sabado, amiwa nkasoka binzhilo na mujilo, ne uno mujilo ukasoka byamba byakosa bya mu Yelusalema+ kabiji kechi bakamuzhimya ne.”’”+