Mukivuluka Nyi?

Nanchi mwamwenamo mu kutanga magazini a Kyamba kya Usopa akatataka nyi? Monai inge mwakonsha kukumbula ano mepuzho:

• Nga bintu “bya buneme” byafuma mu mikoka yonse ya bantu byo bi ka? (Hagai 2:7)

Bano ke bantu bapopwela Yehoba na mambo a kuba amba bamutemwa nangwa kya kuba bambulwakulumbuluka. (Mana 27:11) Bano bantu byo bintu “bya buneme” bimupa lukumo kabiji wibanemeka bingi pa kwipana kwabo na muchima yense ne kumwingijila na kizaku.—4/1, jipa 11.

• Ki ka kyalengejile Danyela kwikala “muntu ye batemwa bingi” kwi Yehoba? (Da. 10:11, 19)

Danyela watelepo bingi muchima kutanga Binembelo. (Da. 9:2) Walombanga kimye kyonse. Watele muchima pa kutumbijika jizhina ja Yehoba. (Da. 2:20, 28; 9:19)—4/1, mapa 12-13.

• Nanchi bena Kilishitu bakine bafwainwa kwingijishanga jizhina ja Lesa nobe kambuma nyi?

Bantu bamo bamona bintu bimo nangwa jizhina ja Lesa nobe kambuma nangwa muchi wa kwibazhikijila ku bingelekezha, bino bantu ba Lesa kechi byobyo bamona jizhina ja Lesa ne. Baitabila mwi Yehoba kabiji bakebesha kuba kyaswa muchima wanji, kimwesha kuba amba baketekela mu jizhina janji. (Zefwa. 3:12, 13)—1/15, mapa 5-6.

• Bansemi bakonsha kukwasha byepi baana babo kuchinuzhuka byubilo byatama?

Bansemi bafwainwa kulumbulwila baana babo mizhilo yo banemeka. Bafwainwa kumona amba baana bebafunjisha bishinka byonse pa bya kwilaala. Kabiji bafwainwa ne kwibasha kulanguluka pa bintu bifuma mu kulaala mizhilo ya Yehoba.—4/1, mapa 19-20.

• Mambo ka Yehoba o akanyijile Mfumu Saulo?

Saulo wafwainwe kupembela ngauzhi wa Lesa kwiya na kupana bitapisho, pakuba uno mfumu wasatukile ne kutapisha bitapisho aye mwine. Kabiji palutwe walengulwile mukambizho wa kwipaya balwanyi bonse.—2/15, mapa 22-23.

• Twakonsha kumwesha byepi amba twashikwa bubi?

Kechi twafwainwa kukizhamo kutoma malwa ne, tuchinuzhuka bya buñanga bwa lubuko ne kumvwina lujimuno lwa kwa Yesu lwaamba pa byubilo byatama. Kyakumwenako, twafwainwa kuchinuzhuka kutamba bya mulekese ne milanguluko yatu yo bileta. (Mat. 5:27, 28) Kabiji kechi twafwainwa kupwanañana na bantu bapangwa mu kipwilo ne.—2/15, mapa 29-32.

• Ñanyi mafunde a mu Baibolo akonsha kwitukwasha kuyuka mwayila kyaswa muchima wa Yehoba pa makayo a kuchikapo mali? (Efi. 5:17)

Lesa umona kwitabila mu jishuko kuba’mba kyo kimotu na kupopwela bankishi. (Isa. 65:11) Yehoba ujimunako bapopweshi banji pa mambo a lunkumbwa. (Lupu. 20:17; Loma 7:7) Bakalume ba Lesa batundaikwa kumwena mali mu mingilo yakishinka. (Efi. 4:28; 2 Tesa. 3:10, 12)—4/1, mapa 22-23.

• Yelemiya wajinga byepi nobe “kichi kyo bajimba ku mema, kitwala mizhazhi yakyo kumukola”? (Yele. 17:7, 8)

Yelemiya kechi walekele kupanga bipangwa ne, nangwa kulondela milanguluko yatama ya bantu bamyendeleko ne. Aye watwajijile kulondela Nsulo ya mema a bumi ne kulama byonse byo bamubulanga kwi Lesa.—3/15, jipa 14.

• Tufunda ka pe Yehoba ku byaambile Yoba pa Yoba 14:13-15?

Yehoba watemwa bingi bantu baji mu maboko anji, bekepesha kuba’mba ebabumbe pa kuba’mba bekale bantu baitabilwa ku meso anji. (Isa. 64:8)—4/1, jipa 31.

• Ngauzhi Samwela ‘waubilenga’ byepi “byaoloka”? (Hebe. 11:32, 33)

Samwela walengejile bantu kuba byawama ku meso a Lesa. Wakonsheshe kwibakwasha mambo wapembejilenga Yehoba saka atekanya, kabiji watwajijile kwingila mwingilo wanji mu bukishinka nangwa kya kuba wapichilenga mu makatazho.—4/1, jipa 27.