Ku Bahebelu
12 Onkao mambo, byo tuji na jino jibumba jikatampe jituzhokoloka ja bakamonyi, twayai tutaye byonse bitunemena ne bundengamambo bupelawizha kwitukobankanya,+ kabiji twayai tunyeme kapela na kuchinchika ko betutongwela,+ 2 byo tubena kutala konka kwi Ntangi Mwine kabiji Kalumbulula wa lwitabilo lwetu, aye Yesu.+ Na mambo a lusekelo lo bamutujile kulutwe, wachinchikile pa kichi* kya lumanamo, kabiji kechi wateleko muchima ku bumvu ne, kabiji aye waikala ku kilujo kya jitanda ja Lesa.+ 3 Vulukainga muntu wachinchikile pa kulengululwa ku bandengamambo+ beletelejilenga bene makatazho pa kumulengulula, pa kuba’mba mubule kukooka ne kulefulwa.*+
4 Byo mubena kulwa na bobwa bundengamambo, mukyangye kwibushinda kufika pa kwichilwa kwa mashi enu. 5 Kabiji mwavulama kala alwa lusashijilo lo bemusashijile byo muji baana amba: “Mwanami, kange ulengulule bikufunjisha Yehoba* nangwa kulefulwa umvwe wakololako ne; 6 mambo Yehoba* ufundako muntu ye atemwa; kabiji upuma* yense ye atambula kwikala mwananji.”+
7 Mwafwainwa kuchinchika mambo ke lubaji lumo lwa kwimufunjilamo. Lesa ubena kwimulama byonka byo balama baana.+ Mambo ñanyi mwana ye babula kufunda kwi shanji?+ 8 Bino umvwe anweba bonse kechi bemufunjileko ne, ko kuba’mba mwi baana ba mu bukende kechi baana ba kine ne. 9 Bashetu ba pano pa ntanda betufunjilenga, kabiji twibanemekanga. Nanchi kechi twafwainwa kukilamo kunemeka Shetu witutongwele na mupashi wanji wazhila ne kwikala bomi nenyi?+ 10 Mambo abo betufunjilenga pa kakimye kacheche monka mwayijile kibawamijile, bino aye witufunda’mba tumwenemo bintu byawama kuba’mba twikale bazhila byonka byo aji.+ 11 Ibyo, kimye muntu kyo babena kumufunda kechi usekelamo ne, bino kimukola* ku muchima; nangwa byonkabyo, kulutwe na lwendo aba bo bafunda bapanga bipangwa bya mutende ne bololoke.
12 Onkao mambo, koseshainga maboko abula kukosa ne manungo azukuma,+ 13 kabiji endainga kwa kubula kusendukamo mu jishinda jaoloka,+ pa kuba’mba awa usunkuta abule kutelumuka, kana amba abukwe. 14 Kebeshainga kwikala mu mutende na bantu bonse+ ne kwikala bazhila+ mambo umvwe muntu kechi wazhila ne, ko kuba’mba kechi ukamumona Nkambo ne. 15 Jimukai kuchina’mba muntu nangwa umo wakabula kubilwa lusa lukatampe lwa Lesa, pa kuba’mba muzhazhi wa bulembe abule kusapuka ne kuleta lukatazho kabiji bavula wibazhilulula;+ 16 Kabiji jimukai kuba’mba mwi anweba mubule kwikala wa bulalelale* nangwa ubula kunemeka bintu byazhila, byonka byajinga Isao wapoteshe bubeji bwanji na kajo.+ 17 Mambo mwayuka’mba kulutwe byo akebelenga mapesho, bamutaineo; nangwa kya kuba wakebeshe kupimpula milanguluko* kupichila mu kujila mipolo,+ wakankelwe.
18 Mambo anweba kechi mwaiya ku kintu kyo mwakonsha kukwata,+ kiteema mujilo,+ jikumbi jifiita, mfishi nangwa kinkunkwila,+ 19 kuvuma kwa ntolompita+ ne kumvwanyika kwa jiwi ne,+ bantu byo baumvwine, basashijile’mba kechi bebanungilepo byambo bikwabo ne.+ 20 Mambo abo baubile bingi moyo na mambo a uno mukambizho wa kuba’mba: “Umvwe nyama wanyanta ku uno mutumba, bamwase mabwe afwe.”+ 21 Kino kintu kyamwekele kyalengejile bantu kuba bingi moyo, kya kuba ne Mosesa waambile’mba: “Amiwa nachina bingi ne kuzakama.”+ 22 Bino anweba mwaiya ku Mutumba wa Ziona+ kabiji muzhi wa Lesa mumi, Yelusalema wa mwiulu,+ ne ku mabumba* a bamalaika, 23 ne ku kukonkana kwa bonse+ ne ku kipwilo kya babeji banembwa mazhina abo mwiulu, ne kwi aye Lesa Mutonyi wa bonse,+ ne wa baoloka aba basemwa ku mupashi+ kabiji balumbuluka,+ 24 ne kwi Yesu ñambi+ wa lulayañano lupya,+ ne mashi o etusanshile abena kwamba kukila mashi a kwa Abela.+
25 Monai amba kechi mwakana* kumvwa ku yewa ubena kwamba ne. Mambo umvwe babujile kunyema lukabisho aba bakainenga kuteleka ku yewa wibapelenga lujimuno lwa Lesa pano pa ntanda, ko kuba’mba ne atweba kechi tukapuluka nangwa pachechetu ne, umvwe twavundamina yewa ubena kwamba kufuma mwiulu!+ 26 Pa kyokya kimye, jiwi janji jatenkenye ntanda,+ pano luno walaya’mba: “Ne jikwabo, kechi nkatenkenyatu ntanda yonka ne, bino ne jiulu.”+ 27 Byambo bya kuba’mba, “ne jikwabo” bibena kulumbulula’mba kufumyapo bintu byonse byo babena kutenkenya, bintu byo balenga, pa kuba’mba bintu byo babena kubula kutenkenya bikekale myaka. 28 Onkao mambo, byo tukatambula Bufumu bubula kukonsheka kutenkena, twayai tumwenengamo byawama mu lusa lukatampe, kupichila mu luno lusa twakonsha kumwingijila Lesa mwingilo wazhila saka tumwakamwa. 29 Mambo Lesa wetu ye mujilo usokañana.+