Hagai

1 Mu mwaka wa bubiji wa bukalama bwa Mfumu Daliusa, mu ñondo wa butanu na bumo, pa juba jitanshi ja ñondo, byambo bya Yehoba byaishile kupichila mwi ngauzhi Hagai*+ kwi Zelubabele+ mwana wa kwa Shalachele, kinemanga wa mu Yuda, ne kwi Yoshua mwana wa kwa Yehozadaka, ñanga mwine mukatampe amba:

2 “Yehoba wa mabumba waamba’mba, ‘Bano bantu bamba’mba, “Kimye kya kushimikilamo* nzubo ya Yehoba kikyangye kufika.”’”+

3 Kabiji byambo bya Yehoba byaishile jibiji kupichila mwi ngauzhi Hagai+ amba: 4 “Nanchi kino kyo kimye kya kwikala mu mazubo enu awamisha, ino nzubo saka yakunduka nyi?+ 5 Yehoba wa mabumba waamba’mba, ‘Teshai muchima* pa mashinda enu. 6 Mwabyajile nkunwa yavula, bino mwanowatu bicheche.+ Muja, bino kechi mwikuta ne. Mutoma, bino kechi mutondwa ne. Muvwala bivwalo, bino kafwako umvwa kyuya ne. Awa uya na kwingijila mali, ubika mfweto yanji mu fukuta wasabika.’”

7 “Yehoba wa mabumba waamba’mba, ‘Teshai muchima* pa mashinda enu.’

8 “Yehoba waamba’mba, ‘Yainga ku mutumba na kuleta bichi.+ Kabiji mushimike nzubo+ pa kuba’mba nkamwenengamo lusekelo ne kuntumbijika.’”+

9 “Yehoba wa mabumba waamba’mba, ‘Mwaketekejilenga byavula bino mwatambwiletu bicheche; kabiji byo mwibiletele mu nzubo, amiwa nebyululwile na mwela.+ Mambo ka? Mambo nzubo yami yakunduka, bino anweba pa muntu pa muntu saka mwatatu michima yenu pa mazubo enu.+ 10 O ene mambo jiulu o jabujila kwimunokeshesha mvula, ne ntanda o yabujila kwimupela kajo. 11 Kabiji natwajijile kwita kyashi kwiya pa ntanda, pa mitumba, pa kajo, pa binyu bya katataka, pa manyi, pa bintu bimena mu mushiji, pa bantu ne pa bilelwa, ne pa mingilo yonse ya maboko enu.’”

12 Zelubabele+ mwana wa kwa Shalachele+ ne Yoshua mwana wa kwa Yehozadaka,+ ñanga mwine mukatampe, ne bantu bonse bashala, baumvwine jiwi ja Yehoba Lesa wabo ne byambo bya kwa ngauzhi Hagai, mambo Yehoba Lesa wabo ye wamutumine; kabiji bantu batendekele kwakamwa na mambo a Yehoba.

13 Kepo Hagai, muluwe wa Yehoba, abuujile bantu bino byambo monka mwayijile mwingilo ye bamupele kwi Yehoba amba: “‘Anweba bantu nji nenu,’+ byo byaamba Yehoba.”

14 Onkao mambo, Yehoba watundaikile+ Zelubabele mwana wa kwa Shalachele, kinemanga wa mu Yuda,+ ne Yoshua+ mwana wa kwa Yehozadaka, ñanga mwine mukatampe, ne bantu bonse bashala; kabiji baishile ne kutendeka kwingila ku nzubo ya Yehoba wa mabumba, Lesa wabo.+ 15 Kino kyaubiwe pa juba ja bu 24 ja ñondo wa butanu na umo mu mwaka wa bubiji wa Mfumu Daliusa.+