Buku Mutanshi wa Bamfumu

15 Mu mwaka wa bu 18 wa bukalama bwa Mfumu Yeloboma+ mwana wa kwa Nebati, Abiyama mo mo aikele mfumu wa bena Yuda.+ 2 Walamine mu Yelusalema myaka isatu. Inanji wajinga Maaka,+ munkana wa kwa Abishalomo. 3 Watwajijile kwenda mu bubi bonse bwaubilengapo shanji, kabiji kechi waingijilenga Yehoba Lesa wanji na muchima wanji yense* byonka byajinga muchima wa kwa Davida mushakulu wanji ne. 4 Bino na mambo a kwa Davida,+ Yehoba Lesa wanji wamupele lampi mu Yelusalema+ kupichila mu kutongola mwananji kwikala mfumu ne kutwajijila kulama Yelusalema. 5 Mambo Davida waubilenga byaoloka ku meso a Yehoba, kabiji kechi walekele kulondela bintu byonse byo amukambizhe mu moba onse a bumi bwanji ne, kanatu kintu kyo aubile kwi Uliya mwina Hiti.+ 6 Kabiji pajinga nkondo pakachi ka kwa Lehoboma ne Yeloboma mu moba onse a bumi bwanji.+

7 Bintu bikwabo byapichilemo Abiyama ne byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi?+ Kabiji pajinga nkondo yabulanga kupwa pe Abiyama ne Yeloboma.+ 8 Kepo Abiyama bamutwajile na kulaala kwalaala bashakulu banji, kabiji bamuzhiikile mu Muzhi wa Davida; kabiji mwananji aye Asa+ waswaine pa bufumu.+

9 Mu mwaka wa bu 20 wa bukalama bwa kwa Yeloboma Mfumu wa bena Isalela, Asa mo mo atendekele kulama mu Yuda. 10 Walamine mu Yelusalema myaka 41. Nkambo yanji wa mukazhi wajinga Maaka,+ munkana wa mukazhi wa kwa Abishalomo. 11 Asa waubilenga byaoloka kwi Yehoba,+ byonkatu byaubilenga Davida mushakulu wanji. 12 Wapangilemo banabalume mu kyalo belaalanga na banabalume bakwabo ku nzubo ya Lesa,+ kabiji wafumishemo bankishi bonse ba bunya* balengele bashakulu banji.+ 13 Kabiji wafumishepo Maaka+ nkambo yanji wa mukazhi pa kifulo kyanji kya bu inamfumu,* mambo walengele nkishi wa bunya wa kwingijisha pa kupopwela kichi kya mulumbulumbu kyazhila.* Asa watemene nkishi+ wa kwa Maaka ne kukamusokela mu Kimpachiko kya Kedolona.+ 14 Bino mapunzha atuntama kechi beonawine ne.+ Nangwa byonkabyo, Asa waingijilanga Yehoba na muchima wanji yense* mu bumi* bwanji bonse. 15 Kabiji watwezhezhe mu nzubo ya Yehoba bintu byo azhijikile aye ne bashanji—siliva ne ngolode ne bipe byapusana pusana.+

16 Pajinga nkondo yabulanga kupwa pe Asa ne Baasha+ mfumu wa bena Isalela. 17 Onkao mambo, Baasha Mfumu wa bena Isalela waishile na kulwa na bena Yuda, kabiji watendekele kushimika* muzhi wa Lama+ pa kuba’mba ashinkile bantu kubula kutwela nangwa kulupuka kuya kwi* Asa Mfumu wa Yuda.+ 18 Ponkapo Asa washikwile siliva yonse ne ngolode yashajile mo balaminanga bya buneme mu nzubo ya Yehoba ne mo balaminanga bya buneme mu nzubo* ya mfumu ne kwiipana ku bakalume banji. Mfumu Asa wibatumine kwi Benehadada mwana wa kwa Tabulimona, Tabulimona mwana kwa Heziona, mfumu wa Silya,+ yenka waikelenga mu Damasakasa ne kwamba’mba: 19 “Tulayañane lulayañano amiwa ne obewa, byonkatu byo kyajinga kwi batata ne bashobe. Nakutumina bupe bwa siliva ne ngolode. Iya upwishe lulayañano lo walayañene na Baasha Mfumu wa mu Isalela, kuba’mba afumeko kwi amiwa.” 20 Benehadada waumvwijile byaambile Mfumu Asa kabiji watumine bakulumpe ba bashilikale banji kuya na kulukuka mizhi ya mu Isalela, kabiji batapile ba mu muzhi wa Iyonyi,+ Danyi,+ Abela-betemaaka, ne bonse ba mu Kineleta ne ba mu kyalo kyonse kya Nafitali. 21 Baasha byo aumvwine kino, ponkapo wikilekele kushimika* muzhi wa Lama ne kutwajijila kwikala mu Tiliza.+ 22 Kabiji Mfumu Asa waichile bonse ba mu Yuda, kafwako nangwa umo washajilepo ne, ne abo basendele mabwe ne bichi bya ku Lama byonka Baasha byo ashimikijilenga, kabiji Mfumu Asa wibingijishe kushimika* muzhi wa Geba+ mu Benjamina, ne Mizipa.+

23 Bintu bikwabo byonse byapichilemo Asa ne mingilo yanji yonse ikatampe ne bintu byonse byo aubile ne mizhi yo ashimikile,* nanchi kechi byanembwa mu buku wa bintu byapichilengamo bamfumu ba mu Yuda nenyi? Bino byo akotele wakolelwe kikola kya maulu.+ 24 Kepo Asa bamutwajile na kulaala kwalaala bashakulu banji ne kumuzhiika ko bazhiikile bashakulu banji mu Muzhi wa Davida; kabiji mwananji aye Yehoshafwata+ waswaine pa bufumu.

25 Nadaba+ mwana wa kwa Yeloboma waikele mfumu wa bena Isalela mu mwaka wa bubiji wa bukalama bwa kwa Asa Mfumu wa Yuda, kabiji walamine mu Isalela pa myaka ibiji. 26 Watwajijile kuba byatama kwi Yehoba ne kwenda mu jishinda ja shanji+ ne mu bubi bwanji bo alengejile bena Isalela kuba.+ 27 Baasha mwana wa kwa Ahiya mwina Isakala wamwalukijilemo, kabiji Baasha wamutapijile ku Gibetona+ wa bena Filishitiya, kimye Nadaba ne bena Isalela bonse kyo bazhokolokele muzhi wa Gibetona. 28 Byonkabyo, Baasha wamwipayile mu mwaka wa busatu wa bukalama bwa kwa Asa Mfumu wa Yuda kabiji wamuswaine pa bufumu. 29 Byo aikeletu pa bufumu, waipayile bonse ba mu nzubo ya kwa Yeloboma. Kechi washilepo muntu nangwa umo wa kwa Yeloboma na bumi ne; wibavizhizhetu bonse monka mwayijile byambo bya Yehoba byo aambile kupichila mwi kalume wanji Ahiya mwina Shilo.+ 30 Kino kyaubiwe na mambo a bubi bonse bwaubile Yeloboma ne kulengela bena Isalela kwibuba ne na mambo a kuba wafichishe bingi Yehoba Lesa wa Isalela ku muchima. 31 Kabiji bintu bikwabo byapichilemo Nadaba ne byonse byo aubile, nanchi kechi byanembwa mu buku wa bintu byapichilengamo bamfumu ba mu Isalela nenyi? 32 Kabiji pajinga nkondo yabulanga kupwa pe Asa ne Baasha Mfumu wa bena Isalela.+

33 Mu mwaka wa busatu wa bukalama bwa kwa Asa Mfumu wa Yuda, Baasha mwana wa kwa Ahiya waikele mfumu wa bena Isalela bonse mu Tiliza kabiji walamine pa myaka 24.+ 34 Bino waubilenga bintu byatama kwi Yehoba,+ ne kwenda mu jishinda ja kwa Yeloboma ne mu bubi bwanji bo alengejile ne bena Isalela kuba.+