Kwi Titusa
3 Saka wibavululamo kunekenena ne kukookela makafulumende ne ba luusa,+ ne kwinengezhezha jimo kwingila mingilo yonse yawama, 2 kubula kwambila muntu nangwa umo byatama, kechi kwikala wa lutobo ne, kana kwikala wakooka muchima+ ne kumwesha bukimote bonse ku bantu bonse.+ 3 Mambo ne atweba kala twajinga babula maana, babula kukookela, bajimbaikwa, saka tunonkwa buzha ku bya kusakasaka ne bya kisangajimbwe bya misango ne misango, saka twikala mu bubi ne mu kuba kichima, mu bya bunya ne kwishikwa atwe bene na bene.
4 Bino Mupulushi wetu aye Lesa byo amwesha lusa+ ne byo atemwa bantu 5 (kechi na mambo a mingilo yonse yaoloka yo twaingijile ne,+ bino na mambo a lusa lwanji),+ witupulwishe byo etovwele ne kwitulengela kwikala bomi+ ne byo aingijishe mupashi wanji wazhila kwitusangula ke bapya.+ 6 Waitulwile uno mupashi wa bupetu pe atweba kupichila mwi Yesu Kilishitu Mupulushi wetu,+ 7 kuba’mba inge twatelwa’mba twaoloka na mambo a lusa lukatampe lwa yewa,+ twikale banswanyi+ monka mwayila luketekelo lwa bumi bwa myaka ne myaka.+
8 Bino byambo bya kine, nakeba namba utwajijiletu na kwibyamba, pa kuba’mba aba baitabila mwi Lesa batesheko muchima kwingila mingilo yawama. Bino bintu byanengela kabiji bilengela bantu kumwenamo byawama.
9 Bino chinuzhukanga kwipachika kwa kukosama, bya kulondolola bisemi, mapata ne lutobo pa Mizhilo, mambo bino byo byatu kabiji kafwako kifumamo ne.+ 10 Muntu ufunjisha mafunjisho a bubela,+ umukane+ inge wamujimunako jimo nangwa jibiji,+ 11 byo wayuka’mba muntu wa yenkao mutundu wasenduka mu jishinda kabiji ubena kulenga mambo ne kwizhachisha mwine.
12 Umvwe nkakutumine Aletemasa nangwa Tikikusa+ ukapelawizhe kwiya ko nji ku Nikapolisa, mambo konkakwa ko ko nafuukula kuya na kwikala mu bañondo bamashika. 13 Ukatesheko muchima kukwasha Zenasi wayuka Mizhilo, ne Apolosa pa kuba’mba bakabule kukajilwa kintu nangwa kimo pa lwendo lwabo.+ 14 Bino balongo betu nabo bafunde kwingila mingilo yawama kuba’mba bakakwashañane umvwe kwaikala kukajilwa,+ pa kuba’mba bakabule kwikala babula kupanga bipangwa.+
15 Bonse bo nji nabo bakwimuna. Wimunepo bakwetu ba mu lwitabilo betutemwa.
Lusa lukatampe lwikale pe anweba bonse.