Nkalata Itanshi ku Bena Kolinda
2 Onkao mambo, byo naishile kwi anweba balongo bami na kusapwila kyafyamika kyazhila kya Lesa+ kwi anweba, kechi naambilenga byambo byakatazha kumvwa+ nangwa bimwesha’mba muntu uji na maana ne. 2 Mambo byo najinga ne anweba nafuukwilepo kwikala nobe kafwako kintu nangwa kimo kyo nayuka ne, kanatu kwamba pe Yesu Kilishitu, ne byo bamwipayijile pa kichi.+ 3 Kabiji byo naishile ko muji, kechi najinga wakosa ne, naubile moyo ne kuzakama bingi; 4 kabiji byambo byami ne byo nasapwijilenga kechi byajinga byambo bya maana a kwitabisha ne, bino byamwesheshenga mupashi ne bulume,+ 5 kuba’mba lwitabilo lwenu lwikale, kechi mu maana a bantu ne, kana mu bulume bwa Lesa.
6 Tubuula maana bakoma ku mupashi,+ bino kechi maana a buno bwikalo* nangwa a bakalama ba buno bwikalo bakazhimañana ne.+ 7 Bino atweba tubulañana maana a Lesa a mu kyafyamika kyazhila,+ o maana afyamika, Lesa o atongwejile jimo buno bwikalo saka bukyangye kwikalako kuba’mba etuletele lukumo. 8 Ano o maana abula kuyuka kalama nangwa umo mu buno bwikalo,*+ mambo umvwe beayukile, inge kechi baipayile* Nkambo wa lukumo ne. 9 Bino monka mo kyanembelwa’mba: “Jiso kechi jamwene ne, kutwi nako kechi kwaumvwine ne, kabiji kechi balangulukilengapo pa bintu Lesa byo anengezhejile aba bamutemwa ne.”+ 10 Mambo Lesa witusolwelabyo+ na mupashi wanji,+ mambo mupashi ukebakeba mu bintu byonse, ne mu bintu byazhika bya Lesa.+
11 Kafwako muntu uyuka bilanguluka muntu mukwabo ne. Muntu mwine ye uyuka bintu biji mu muchima wanji. Onkao mambo, kafwako wayuka bintu bya Lesa ne, kanatu mupashi wa Lesa. 12 Bino atweba twatambula, kechi mupashi wa pano pa ntanda ne, bino mupashi ufuma kwi Lesa,+ pa kuba’mba tuyuke bintu byo etusolwela Lesa kyatutu. 13 Twamba bino bintu, kechi mu byambo bifunjisha maana a bantu ne,+ kana na byambo bifunjisha mupashi wa Lesa,+ kabiji tulumbulula bintu byaamba pe Lesa na byambo byo twatambula na mambo a mupashi wanji.
14 Bino muntu wa buntunshi kechi uswa* bintu byasololwa na mupashi wa Lesa ne, mambo bo bumbulwamaana kwi aye; kabiji kechi wakonsha kwibiyuka ne, mambo bebipima ku mupashi. 15 Nangwa byonkabyo, muntu wa bumupashi upima bintu byonse,+ bino aye mwine kechi bamupima ku muntu nangwa umo ne. 16 Mambo “ñanyi wayuka milanguluko ya Yehoba* kuba’mba amufunjishe?”+ Bino atweba tuji na muchima wa Kilishitu.+