Yoba
4 Ponkapo Elifwaza+ mwina Temanyi wamukumbwile’mba:
2 “Umvwe muntu akebe kwisamba ne obewa, usakumvwa ku muchima kutama nyi?
Mambo ñanyi wakonsha kwikalatu kwa kubula kwamba?
3 Ibyo kuba’mba wafundangako bantu bavula,
Kabiji wakoseshanga maboko akooka.
4 Byambo byobe byakoseshanga muntu yense wakebanga kupona,
Kabiji wakoseshanga boba bazukumanga mu manungo.
5 Pano luno kyakumwekela, kabiji kyakupezha maana;*
Kya kufikila, ne obewa wauba moyo.
6 Nanchi kwakamwa Lesa kechi kukulengela kuchinchika nenyi?
Abya bwikalo bobe bwa bukishinka+ kechi bukukosesha nenyi?
7 Pano vuluka kino: Ñanyi muntu wabula mambo wakifwapo kala?
Ñanyi muntu waoloka wakyonaikapo kala?
8 Kintu kyo namona ke kya kuba’mba, aba bonse bajima* bintu byatama
Ne boba babyala makatazho banowa kintutu kimo.
9 Bafwa na muya wa Lesa,
Kabiji na bukaji bwanji bukatampe bavila.
10 Bokwe ubuluma, ne mwananji naye ubuluma,
Bino ne meno a mabokwe akaji amokauka.
11 Bokwe ufwa na mambo a kubula nyama wa kuja,
Ne baana ba bokwe bapalañenamo.
12 Naumvwine byambo mu bufyamfya,
Kabiji banongotwejilebyo mu matwi.
13 Kimye milanguluko yatama kyo yankatezhenga mu bimwesho bya bufuku,
Kimye bantu kyo baponena mu tulo tukatampe,
14 Naumvwine bingi moyo,
Ne kulengela bikupa byami byonse kuzakama.
15 Mupashi wapichijile ku meso ami;
Ne nsuki yami yaendele.
16 Kepo kyaimene,
Bino kechi nekiyukile ne.
Namwenetu kintu kulutwe yami;
Kwakyubiletu nzoo, kepo naumvwine jiwi amba:
17 ‘Nanchi muntu ufwa wakonsha koloka kukila Lesa nyi?
Abya muntu wakonsha kutoka kukila Mulenga wanji nyi?’
18 Umvwa! Aye kechi wibaketekela bakalume banji ne,
Kabiji ukebakeba mambo mu bamalaika* banji.
19 Pano ku boba bekala mu mazubo a maloba kyakilamo,
Aji na bitendekesho mu mushiji,+
Bo bavingakanyatu bukiji nobe kipuupulwa.
20 Bebonaunatu pelu mu kimye kimotu kufuma lukelo kufika ne mabanga;
Bavila kikupu, kabiji kafwako ukayuka.
21 Nanchi abo kechi baji nobe tente ye bakasulula ntambo nenyi?
Bafwatu kwa kubula maana.