BENA LEVI

1 Kabiji Yehoba waichile Mosesa ne kwamba nanji mu tente wa lusambakeno+ amba: 2 “Buula bena Isalela* amba, ‘Umvwe umo mwi anweba akalambule mulambo kwi Yehoba kufuma mu banyama banji ba kulela, wafwainwa kulambula mulambo wanji kufuma mu bañombe nangwa mu jitanga.+

3 “‘Umvwe mulambo wanji ukekala mulambo wa kusoka kufuma mu bañombe, wafwainwa kulambula nyama mulume wabula bulema.+ Akefuukwile mwine+ kumulambula kwi Yehoba konka ku kibelo kya tente wa lusambakeno. 4 Akatenteke kuboko kwanji pa mutwe wa mulambo wa kusoka ne mulambo bakamutambula kwikala wa kumufuchilako mambo.

5 “‘Kepo bakepaye mwana ñombe ku meso a Yehoba, kabiji baana ba kwa Alona bañanga,+ bakalete mashi ne kwiasansa ku mbaji yonse ya kya kusokelapo bitapisho+ kiji ku kibelo kya tente wa lusambakeno. 6 Nyama wa mulambo wa kusoka bakamusube ne kumutetaula bipimvwa bipimvwa.+ 7 Kabiji baana ba kwa Alona, bañanga, bakabanze mujilo pa kya kusokelapo bitapisho ne kubikapo nkunyi.+ 8 Baana ba kwa Alona, bañanga, bakatule bulongo bipimvwa bya nyama wa mulambo+ pamo na mutwe ne mafuta* peulu ya nkunyi iji pa mujilo wa pa kya kusokelapo bitapisho. 9 Mila ne mikupa bakebyovwe mu mema, kabiji ñanga akebisoke byonse kwikala mulambo wa kusoka pa kya kusokelapo bitapisho, ye mulambo wa kusoka pa mujilo kwikala bwema bwawama* kwi Yehoba.+

10 “‘Umvwe ubena kulambula nyama kwikala mulambo wa kusoka+ wafuma mu baana ba mikooko balume nangwa bambuzhi, wafwainwa kulambula nyama mulume wabula bulema.+ 11 Bakamwipayile ku kabeta ka ku buyeke bwa kya kusokelapo bitapisho ku meso a Yehoba, kabiji baana ba kwa Alona bañanga, bakasanse mashi ku mbaji yonse ya kya kusokelapo bitapisho.+ 12 Akamutetaule bipimvwa bipimvwa, ne mutwe ne mafuta* anji, ñanga akebibike pa mujilo peulu ya nkunyi iji pa kya kusokelapo bitapisho. 13 Akovwe mila ne mikupa mu mema, kabiji ñanga akebisoke byonse pa kya kusokelapo bitapisho. Uno ke mulambo wa kusoka, ye mulambo wa kusoka pa mujilo kwikala bwema bwawama* kwi Yehoba.

14 “‘Pano bino, umvwe ubena kulambula bañonyi kwikala mulambo wa kusoka kwi Yehoba, akalambule tutela nangwa twana twa nkunda.+ 15 Ñanga aketulete ku kya kusokelapo bitapisho ne kwitukingya ne kwitusoka pa kya kusokelapo bitapisho, bino mashi ato akeasumishe kunsa ya kya kusokelapo bitapisho. 16 Wafwainwa kwitufumya bibovu ne kwituvuyula mayona ne kwiataya ku mbaji ya kya kusokelapo bitapisho ku musela, ku mpunzha ko bataya buto.*+ 17 Kabiji aketupabike kwa kubula kwitwabanyapo bipimvwa bibiji. Apa bino ñanga aketusoke pa kya kusokelapo bitapisho peulu ya nkunyi iji pa mujilo. Uno ke mulambo wa kusoka, ye mulambo wa kusoka pa mujilo kwikala bwema bwawama* kwi Yehoba.

2 “‘Umvwe muntu* ubena kulambula mulambo wa kajo+ kwi Yehoba, mulambo wanji wafwainwa kwikala wa bunga bwalamba, kabiji wafwainwa kwitulwilapo manyi ne kubikapo binunka bulongo.+ 2 Apa bino akamulete ku baana ba kwa Alona bañanga, kabiji ñanga akakamunepo mukono umo wa bunga bwalamba, manyi ne byonse binunka bulongo, kabiji akebisoke pa kya kusokelapo bitapisho kwikala mulambo*+ wa kuvulukilako, mulambo wa kusoka pa mujilo kwikala bwema bwawama* kwi Yehoba. 3 Bintu byonse bikashalapo pa mulambo wa kajo, bikekala bya kwa Alona ne baana banji,+ mambo byo byazhijisha+ byashalapo ku mulambo wa kusoka pa mujilo kwi Yehoba.

4 “‘Umvwe ubena kukeba kulambula mulambo wa kajo ko baosha mu kitofu, wafwainwa kwikala shinkwa wanzhingwile wabula mbizho ye balenga na bunga bwalamba, bo bavwangakanya na manyi nangwa bibebulwa byabula mbizho byo bashingako manyi.+

5 “‘Umvwe mulambo wobe ke mulambo wa kajo ka kukanga pa kikango,+ wafwainwa kwikala wa bunga bwalamba bwabula mbizho bwavwangakana na manyi. 6 Wafwainwa kumuchibaula mu bibese ne kwitulwilapo manyi.+ Uno ke mulambo wa kajo.

7 “‘Umvwe mulambo wobe ke mulambo wa kajo wa kukanga pa kikango, wafwainwa kumulenga na bunga bwalamba ne na manyi. 8 Wafwainwa kuleta kwi Yehoba mulambo wa kajo ye walenga na bino bintu, kabiji ukamupane kwi ñanga ne aye akamulete ku kya kusokelapo bitapisho. 9 Kabiji ñanga akatolepo mulambo umo wa kajo kwikala mulambo*+ wa kuvulukilako ne kumusoka pa kya kusokelapo bitapisho, ye mulambo wa kusoka pa mujilo kwikala bwema bwawama* kwi Yehoba.+ 10 Bintu byonse bikashalapo ku mulambo wa kajo, bikekala bya kwa Alona ne baana banji, mambo byo byazhijisha byashalapo ku mulambo wa kusoka pa mujilo kwi Yehoba.+

11 “‘Kechi mukalambule mulambo wa kajo nangwa umo uji na mbizho kwi Yehoba ne,+ mambo kechi mwafwainwa kuvuba muvuba uji na mbizho nangwa buki kwikala mulambo wa kusoka pa mujilo kwi Yehoba ne.

12 “‘Mwakonsha kulambula kwi Yehoba mulambo wa kajo katanshi,+ bino kechi mwafwainwa kwibilambula pa kya kusokelapo bitapisho kwikala bwema bwawama* ne.

13 “‘Ku mulambo wa kajo yense ye ukalambula wafwainwa kubikako mukele; pa mulambo wobe wa kajo kechi wafwainwa kulubako kubikapo mukele wa lulayañano lwa Lesa wobe ne. Ku mulambo wobe yense ye ukalambula, ukabikeko mukele.+

14 “‘Umvwe ukalambule mulambo kwi Yehoba wa bipangwa bitanshi kupya, wafwainwa kulambula kajo ka katataka,* ko baosha pa mujilo, kajo katanshi ko basompa, kwikala mulambo wa kajo ka bipangwa bitanshi kupya.+ 15 Pa uno mulambo uketulwilepo manyi ne binunka bulongo. Uno ke mulambo wa kajo. 16 Ñanga ukebisoka kwikala mulambo*+ wa kuvulukilako, ko kuba’mba kajo ka kupuula kamo ne manyi pamo na byonse binunka bulongo, bikekala ke mulambo wa kusoka pa mujilo kwi Yehoba.

3 “‘Umvwe mulambo wanji kitapisho kya mutende,*+ kabiji ubena kulambula ñombe mulume nangwa ñombe mukazhi, wafwainwa kulambula kwi Yehoba nyama wabula bulema. 2 Wafwainwa kutenteka kuboko kwanji pa mutwe wa nyama wanji wa mulambo, kabiji bakamwipayile ku kibelo kya tente wa lusambakeno; kabiji baana ba kwa Alona bañanga, bafwainwa kusansa mashi ku mbaji yonse ya kya kusokelapo bitapisho. 3 Kabiji lubaji lumo lwa kitapisho kya mulambo wa mutende kyo akalambula kwikala mulambo wa kusoka pa mujilo kwi Yehoba ke:+ mafuta+ avweta mila ne mafuta onse aji ku mila, 4 ne mafyo abiji ne mafuta aji ku mafyo ne mafuta aji kwipi na musana. Kabiji wafwainwa ne kufumya mafuta aji peulu ya jichima pamo na mafyo.+ 5 Baana ba kwa Alona bakeasoke pa kya kusokelapo bitapisho peulu ya mulambo wa kusoka uji pa nkunyi iji pa mujilo;+ ye mulambo wa kusoka pa mujilo kwikala bwema bwawama* kwi Yehoba.+

6 “‘Umvwe ubena kulambula mukooko kwikala kitapisho kya mulambo wa mutende kwi Yehoba, wafwainwa kulambula nyama mukazhi nangwa mulume wabula bulema.+ 7 Kabiji inge ubena kulambula mwana mukooko mulume kwikala mulambo wanji, akamulete kwi Yehoba. 8 Akatenteke kuboko kwanji pa mutwe wa nyama wanji wa mulambo kabiji bakamwipayile kulutwe ya tente wa lusambakeno. Baana ba kwa Alona bakasanse mashi a uno mukooko ku mbaji yonse ya kya kusokelapo bitapisho. 9 Kabiji akalambule mafuta a kitapisho kya mulambo wa mutende kwikala mulambo wa kusoka pa mujilo kwi Yehoba.+ Akafumyeko mafuta onse aji ku mukila kwipi na longololo, mafuta avweta mila ne onse aji ku mila, 10 ne mafyo abiji ne mafuta aji ku mafyo ne mafuta aji kwipi na musana. Kabiji wafwainwa ne kufumya mafuta aji peulu ya jichima pamo na mafyo.+ 11 Kabiji ñanga akeasoke pa kya kusokelapo bitapisho kwikala ke kajo* ko balambula pa mujilo kwi Yehoba.+

12 “‘Umvwe ubena kulambula mbuzhi, akamulete kwi Yehoba. 13 Wafwainwa kutenteka kuboko kwanji pa mutwe wa nyama wanji wa mulambo, kabiji bakamwipayile kulutwe ya tente wa lusambakeno, kabiji baana ba kwa Alona bakasanse mashi a uno mbuzhi ku mbaji yonse ya kya kusokelapo bitapisho. 14 Lubaji lumo lo akalambula kwikala mulambo wanji wa kusoka pa mujilo kwi Yehoba, ke mafuta avweta mila ne mafuta onse aji ku mila,+ 15 ne mafyo abiji ne mafuta aji ku mafyo ne mafuta aji kwipi na musana. Wafwainwa ne kufumya mafuta aji peulu ya jichima pamo na mafyo. 16 Kabiji ñanga akeasoke pa kya kusokelapo bitapisho kwikala kajo* ko balambula pa mujilo ka bwema bwawama.* Mafuta onse o a kwa Yehoba.+

17 “‘Ajino ke jilamuna ja myaka ne myaka ku bisemi byenu byonse bya kulutwe ne mu mapunzha onse mo mukekalanga: Kechi mwafwainwa nangwa pachechetu kuja mafuta nangwa mashi+ ne.’”

4 Kabiji Yehoba waambijile Mosesa amba: 2 “Buula bena Isalela amba, ‘Umvwe muntu* walenga mambo kwa kubula kuyuka+ ne kuba kintu kyonse Yehoba kyo akambizhe’mba kechi mwafwainwa kwikyuba ne:

3 “‘Umvwe ñanga washingwa+ walenga mambo+ ne kuletelela bantu, wafwainwa kuleta mwana ñombe wabula bulema kwi Yehoba kwikala mulambo wa mambo o alengele.+ 4 Kabiji akalete ñombe ku kibelo kya tente wa lusambakeno+ kwi Yehoba ne kutenteka kuboko kwanji pa mutwe wa ñombe ne kwipayila uno ñombe kwi Yehoba.+ 5 Kepo ñanga washingwa+ akashikulepo mashi amo a ñombe ne kwialeta mu tente wa lusambakeno; 6 kabiji ñanga akatumpe munwe wanji mu mashi+ ne kusansa mashi amo kulutwe ya kipembe kya pa mpunzha yazhila bimye bitanu na bibiji+ ku meso a Yehoba. 7 Kabiji ñanga akashinge mashi amo ku nsengo ya kya kusokelapo bitapisho binunka bulongo+ kiji mu tente wa lusambakeno konka kwi Yehoba; ne mashi onse ashala akeetulwile kunshi ya kya kusokelapo bitapisho bya mulambo wa kusoka+ kiji ku kibelo kya tente wa lusambakeno.

8 “‘Kabiji akakaabule mafuta a ñombe wa mulambo wa bubi kuvwangakotu ne mafuta avweta pa mila ne mafuta aji pangye ya mila, 9 ne mafyo abiji ne mafuta aji ku mafyo ne mafuta aji kwipi na musana. Kabiji wafwainwa ne kufumya mafuta aji peulu ya jichima pamo na mafyo.+ 10 Ano mafuta akekalatu pamo na oa o bafumya ku ñombe wa kitapisho kya mulambo wa mutende.+ Kabiji ñanga akeasoke pa kya kusokelapo bitapisho bya mulambo wa kusoka.

11 “‘Pakuba mwayi wa ñombe ne misunyi yanji yonse pamo ne mutwe, mikupa, mila ne busobe,+ 12 ne byonse bikashalapo ku ñombe, akebitwale pangye ya kampu ku mpunzha kwatoka ko bataya buto* kabiji akebisoke pa mujilo wa nkunyi.+ Bafwainwa kwibisokela ponka po bataya buto.

13 “‘Bino umvwe jibumba jonse ja bena Isalela jafwa nao, na mambo a kulenga mambo kwa kubula kuyuka,+ bino kipwilo kechi kyayuka amba bauba kintu Yehoba kyo ebakambizhe’mba kechi bafwainwa kwikyuba ne,+ 14 kabiji inge mambo ayukanyikwa, kipwilo kyafwainwa kuleta mwana ñombe wa mulambo wa bubi ne kumuleta ku tente wa lusambakeno. 15 Bakulumpe ba jibumba bakatenteke maboko abo pa mutwe wa ñombe ku meso a Yehoba kabiji ñombe bakamwipayile ku meso a Yehoba.

16 “‘Ñanga washingwa akaletepo mashi amo a ñombe mu tente wa lusambakeno. 17 Kabiji ñanga akatumpe munwe wanji mu mashi ne kusansapo amo kulutwe ya kipembe bimye bitanu na bibiji ku meso a Yehoba.+ 18 Kabiji ñanga akashinge mashi amo ku nsengo ya kya kusokelapo bitapisho+ kiji mu tente wa lusambakeno konka ku meso a Yehoba, ne mashi onse ashalapo akeetulwile kunshi ya kya kusokelapo bitapisho bya mulambo wa kusoka kiji ku kibelo kya tente wa lusambakeno.+ 19 Kabiji akafumyemo mafuta ne kwiasoka pa kya kusokelapo bitapisho.+ 20 Akobe na uno ñombe byonkatu byo aubile na ñombe mukwabo wa mulambo wa bubi. Abino byo byo afwainwa kuba, kabiji ñanga ukebafuchilako mambo,+ kabiji mambo abo akalekelwa. 21 Kabiji ñombe akamutwale pangye ya kampu ne kumusoka, byonkatu byo aubile na ñombe mutanshi.+ Uno ke mulambo wa mambo a kipwilo.+

22 “‘Inge kinemanga+ walenga mambo kwa kubula kuyuka kabiji wauba kintu Yehoba Lesa wanji kyo akambizhe’mba kechi wafwainwa kwikyuba ne, kabiji waikala na mambo, 23 nangwa inge wayuka mambo o alengele a kulala mukambizho, wafwainwa kuleta mwana mbuzhi mulume wabula bulema kwikala mulambo wanji. 24 Akatenteke kuboko kwanji pa mutwe wa mwana mbuzhi ne kumwipayila pa mpunzha po bepayila mulambo wa kusoka konka ku meso a Yehoba.+ Uno ke mulambo wa bubi. 25 Kabiji ñanga akatumpe munwe wanji mu mashi a mulambo wa bubi ne kwiashinga ku nsengo+ ya kya kusokelapo bitapisho bya mulambo wa kusoka, ne mashi ashalapo akeetulwile kunshi ya kya kusokelapo bitapisho bya mulambo wa kusoka.+ 26 Akasoke mafuta anji onse pa kya kusokelapo bitapisho byonkatu byo akooba na mafuta a kitapisho kya mulambo wa mutende;+ kabiji ñanga ukamufuchilako mambo o alengele, ne mambo anji akalekelwa.

27 “‘Umvwe muntu* wa mu kyalo walenga mambo kwa kubula kuyuka ne kufwa nao na mambo a kuba kintu Yehoba kyo akambizhe’mba kechi mwafwainwa kwikyuba ne,+ 28 nangwa umvwe wayuka mambo o alengele, wafwainwa kuleta mwana mbuzhi mukazhi wabula bulema kwikala mulambo wa mambo anji o alengele. 29 Akatenteke kuboko kwanji pa mutwe wa nyama wanji wa mulambo wa bubi kabiji bakepayile nyama wa mulambo wa bubi pa mpunzha imotu ponka po bepayila mulambo wa kusoka.+ 30 Kabiji ñanga akatumpe munwe wanji mu mashi ne kwiashinga ku nsengo ya kya kusokelapo bitapisho bya mulambo wa kusoka, ne mashi onse ashalapo akeetulwile kunshi ya kya kusokelapo bitapisho.+ 31 Akafumyeko mafuta onse+ byonkatu byo akafumya mafuta a ku kitapisho kya mulambo wa mutende,+ kabiji ñanga akeasoke pa kya kusokelapo bitapisho kwikala bwema bwawama* kwi Yehoba; kabiji ñanga ukamufuchilako mambo o alengele, ne mambo anji akalekelwa.

32 “‘Umvwe wapana mwana mukooko kwikala mulambo wa mambo anji, wafwainwa kuleta mwana mukooko mukazhi wabula bulema. 33 Akatenteke kuboko kwanji pa mutwe wa nyama wa mulambo wanji wa bubi ne kumwipayila pa mpunzha po bepayila mulambo wa kusoka kwikala ke mulambo wa bubi.+ 34 Kabiji ñanga akashikulepo mashi amo a mulambo wa bubi na munwe wanji ne kwiashinga ku nsengo ya kya kusokelapo bitapisho bya mulambo wa kusoka,+ ne mashi onse ashala akeetulwile kunshi ya kya kusokelapo bitapisho. 35 Akakaabule mafuta onse byonkatu byo akakaabula mafuta a mwana mukooko mulume wa kitapisho kya mulambo wa mutende; kabiji ñanga akeasoke pa kya kusokelapo bitapisho peulu ya milambo ya Yehoba ya kusoka pa mujilo;+ kabiji ñanga ukamufuchilako mambo o alengele, ne mambo anji akalekelwa.+

5 “‘Umvwe muntu* waumvwa kuba’mba babena kukeba’mba ekale kamonyi*+ pa mambo o ashinkilwepo nangwa o amwene nangwa o aumvwine kabiji wabula kwiasolola, ko kuba’mba walenga mambo kabiji ukazhatwa na mambo.

2 “‘Umvwe muntu* wakwata ku kintu kya muzhilo, nangwa nyama wa muzhilo wafwa, nangwa nyama wa kulela wa muzhilo nangwa bintu bya muzhilo byenda kisamba,+ ko kuba’mba wizhilulula kabiji ukekala na mambo nangwa kya kuba kechi wakuyuka ne. 3 Nangwa umvwe muntu kwa kubula kuyuka wakwata ku kintu kyonse kya muzhilo kifuma ku muntu,+ kintu kyonse kya muzhilo kyakonsha kumulengela kwizhilulula, inge wayuka kino kintu, ko kuba’mba ukafwa nao.

4 “‘Nangwa umvwe muntu* wapelawizha kuchipa amba ukoba kintu kyawama nangwa kyatama, kana kya mutundu ka, kabiji kechi wikiyukile ne, bino byo ayuka’mba waubile kanswatu pa kuchipa, ukekala na mambo.*+

5 “‘Umvwe muntu wafwa na mambo a uno mutundu, wafwainwa kusolola patoka mambo anji+ o alengele. 6 Akalete ne mulambo wanji wa mambo kwi Yehoba pa mambo o alengele,+ ko kuba’mba mwana mukooko mukazhi nangwa mwana mbuzhi mukazhi kwikala mulambo wa mambo anji. Kabiji ñanga ukamufuchilako mambo anji.

7 “‘Bino umvwe wakankalwa kupana mukooko, wafwainwa kuleta tutela tubiji nangwa twana twa nkunda tubiji kwi Yehoba+ kwikala mulambo wa mambo anji, nkunda umo ukekala ke mulambo wa mambo ne mukwabo wa mulambo wa kusoka.+ 8 Akebilete kwi ñanga ne aye ukapana nkunda mutanshi ke mulambo wa bubi ne kumukingya pa nshingo kwa kubula kumuchibako mutwe. 9 Kabiji akasanse mashi amo a mulambo wa bubi ku mbaji ya kya kusokelapo bitapisho, bino mashi akashalapo akeetulwile kunshi ya kya kusokelapo bitapisho.+ Uno ke mulambo wa bubi. 10 Akalambule nkunda mukwabo ke mulambo wa kusoka monkatu mo bobila kimye kyonse;+ kabiji ñanga ukamufuchilako mambo anji o alengele, ne mambo anji akalekelwa.+

11 “‘Kabiji umvwe wakankalwa kupana tutela tubiji nangwa twana twa nkunda tubiji, wafwainwa kuleta kipimo kimo kya bunga bwalamba kya mu bipimo jikumi bitwela mu efa*+ kwikala ke mulambo wa bubi. Kechi wafwainwa kubikako manyi nangwa binunka bulongo ne, mambo uno ke mulambo wa bubi. 12 Akalete bunga kwi ñanga, ne ñanga ukakamunapo mukono umo kwikala mulambo* wa kuvulukilako ne kumusoka pa kya kusokelapo bitapisho nobe milambo ya kusoka pa mujilo kwi Yehoba. Uno ke mulambo wa bubi. 13 Kabiji ñanga ukamufuchilako mambo o alengele, ne mambo onse o alengele a uno mutundu, akalekelwa.+ Bikashalapo bya uno mulambo bikekala bya ñanga,+ byonkatu byo boba na mulambo wa kajo.’”+

14 Kabiji Yehoba watwajijile kubuula Mosesa amba: 15 “Umvwe muntu* walenga mambo a kuzhilulula bintu byazhila bya Yehoba kwa kubula kuyuka kabiji wabula kwikala wa kishinka, akalete kwi Yehoba+ mukooko mulume wabula bulema kwikala ke mulambo wa mambo;+ mutengo waesakana na mali a mashekele* a siliva monka mwayila kipimo kya shekele wa pa mpunzha yazhila.*+ 16 Kabiji ukafuta pa mambo o alengele mpunzha yazhila, kabiji pa mutengo wa mulambo akasubulepo kipimo kimo kya pa bitanu.+ Akekipane ku ñanga, kuba’mba ñanga akamufuchileko mambo+ na mulambo wa mukooko mulume kwikala ke mulambo wa mambo, ne mambo anji akalekelwa.+

17 “Umvwe muntu* walenga mambo kupichila mu kuba bintu Yehoba byo akambizhe’mba kechi bafwainwa kwibyuba ne, nangwa kya kuba kechi wayuka kino ne, ukekala na mambo kabiji bakamuzhachisha.+ 18 Wafwainwa kuleta mukooko mulume wabula bulema kwi ñanga kwesakana na mutengo ye bakamutongwela, kwikala ke mulambo wa mambo.+ Kepo ñanga akamufuchilako mambo o alengele kwa kubula kuyuka, ne mambo anji akalekelwa. 19 Uno ke mulambo wa mambo. Mambo wazhatwa nao pa kumulenga mambo Yehoba.”

6 Yehoba watwajijile kwambila Mosesa amba: 2 “Umvwe muntu* walenga mambo kabiji wabula kwikala wa kishinka kwi Yehoba+ kupichila mu kujimbaika mukwabo pa mambo a bintu byo amupele amba amulamineko+ nangwa kintu kyo bamupele nangwa waiba nangwa waja kintu kya mukwabo mu lunkanankana, 3 nangwa watola kintu kyaeleka ne kubepa ne kuchipa bubela pa mambo o alengele a uno mutundu,+ abino byo byo afwainwa kuba: 4 Umvwe walenga mambo ne kufwa nao, wafwainwa kubwezha kintu kyo aibile, kintu kyo atambwile mu bujimuku, kyo asendele mu lunkanankana, kintu kyo bamupele amba ekilame nangwa kintu kyaelekele kyo atolele, 5 nangwa kintu kyonse kyo achipile bubela, wafwainwa kufuta byonse+ ne kunungapo kimo pa bitanu. Ukekipana ku mwinakyo pa jonka juba jo bakamutaana na mambo. 6 Kabiji akalete mulambo wanji wa mambo kwi ñanga, mukooko mulume wabula bulema wa mu jitanga waesakana na mutengo ye bakamutongwela, kwikala mulambo wa mambo kwi Yehoba.+ 7 Ñanga ukamufuchilako mambo anji ku meso a Yehoba ne mambo anji o alengele pa kintu kyonse kyo aubile kyamulengejile kufwa nao, akalekelwa.”+

8 Yehoba waambijile Mosesa amba: 9 “Kambizha Alona ne baana banji amba, ‘Uno ye muzhilo wa mulambo wa kusoka:+ Mulambo wa kusoka ukekala ponka pa kyoto kya kusokelapo bitapisho bufuku bonse kufikatu ne lukelo, kabiji mujilo akateemengatu pa kya kusokelapo bitapisho. 10 Ñanga akavwale kivwalo kyanji kya linenyi+ kya kwingijilamo mwingilo kabiji akavwale kaputula*+ ka kisapi kya linenyi. Kepo akawole buto*+ bwa mulambo wa kusoka ukapiila pa kya kusokelapo bitapisho ne kwibulumbika kunsa ya kya kusokelapo bitapisho. 11 Kabiji akavuule bivwalo byanji+ ne kuvwala bingi kabiji akashikule buto ne kwibutaya ku mpunzha kwatoka pangye ya kampu.+ 12 Mujilo wa pa kya kusokelapo bitapisho akateemengatu kikupu. Kechi wafwainwa kuzhima ne. Ñanga akabikengapo nkunyi+ lukelo pa juba pa juba ne kubikapo mulambo wa kusoka peulu ya nkunyi, ne kusokelapo mafuta a kitapisho kya mulambo wa mutende.+ 13 Mujilo akateemengatu kikupu pa kya kusokelapo bitapisho. Kechi wafwainwa kuzhima ne.

14 “‘Uno ye muzhilo wa mulambo wa kajo:+ Baana ba kwa Alona bakamulete kwi Yehoba kulutwe ya kya kusokelapo bitapisho. 15 Umo pe abo akakamunepo mukono umo wa bunga bwalamba bwa mulambo wa kajo ne manyi amo ne byonse binunka bulongo biji pa mulambo wa kajo, kabiji akebisokele pa kya kusokelapo bitapisho kwikala mulambo* wa kuvulukilako wa bwema bwawama* kwi Yehoba.+ 16 Alona ne baana banji bo bakaja bikashalapo.+ Bakebijiile mu mpunzha yazhila byonka byo baja bashinkwa babula mbizho. Bakebijiile mu kipango kya tente wa lusambakeno.+ 17 Kechi bakebyoshele pamo na kintu kiji na mbizho ne.+ Nebapa kwikala ke byabo byafuma pa milambo yami ya kusoka pa mujilo.+ Ke kintu kyazhijisha,+ byonkatu biji mulambo wa bubi ne mulambo wa mambo. 18 Mwana wa mulume yense wa mu baana ba kwa Alona akebije.+ Kakekala ke kajo kabo ka myaka ne myaka mu bisemi byenu byonse kufuma ku milambo ya Yehoba ya kusoka pa mujilo.+ Kintu kyonse kyo bakakwatako,* kikekala ke kyazhila.’”

19 Yehoba waambijile Mosesa jibiji amba: 20 “Uno ye mulambo Alona ne baana banji ye bakalambula kwi Yehoba pa juba jo bakamushinga manyi:+ kipimo kimo kya bunga bwalamba kya mu bipimo jikumi bitwela mu efa*+ kwikala mulambo wa kajo+ wa kulambula kimye kyonse, kichika kyakyo lukelo ne kichika kikwabo mabanga. 21 Bakamulenge na manyi pa kikango.+ Ukamulete saka wamuvwangakanya na manyi ne kumosha ne kumutebaula bibese bibese kwikala mulambo wa kajo wa bwema bwawama* kwi Yehoba. 22 Ñanga washingwa ukamuswana ukafuma mu baana banji,+ ye ukamulenga. Jino ke jilamuna ja myaka: Mulambo bakamusoke yense pa kumupana kwi Yehoba. 23 Mulambo yense wa kajo ka ñanga bafwainwa kumusokatu yense. Kechi bafwainwa kumuja ne.”

24 Yehoba waambijile jikwabo Mosesa amba: 25 “Buula Alona ne baana banji amba, ‘Uno ye muzhilo wa mulambo wa bubi:+ Pa mpunzha po bepayila mulambo wa kusoka,+ po po bakepayila ne mulambo wa bubi ku meso a Yehoba. Ke kintu kyazhijisha. 26 Ñanga ukalambula mulambo wa bubi ye ukamuja.+ Wafwainwa kumujiila mu mpunzha yazhila, monka mu kipango kya tente wa lusambakeno.+

27 “‘Kintu kyonse kikakwata ku nyama kikekala ke kyazhila, kabiji muntu yense ukasansa mashi amo ku kivwalo kyanji, wafwainwa kuchapila kyo kyo kivwalo kyo asansako mashi mu mpunzha yazhila. 28 Mpuki yo bakatekamo, bakeilalaule. Bino umvwe bakeitekele mu mwipika wa mukuba, bakamovwe ne kumusukulula na mema.

29 “‘Mwanamulume yense wa mu bañanga ye ukamuja.+ Ke kintu kyazhijisha.+ 30 Nangwa byonkabyo, kafwako mulambo wa bubi ye bakaja umvwe mashi anji bealeta ku tente wa lusambakeno mu mpunzha yazhila kwikala wa kufuta mambo ne.+ Bafwainwa kumusoka mu mujilo.

7 “‘Uno ye muzhilo wa mulambo wa mambo:+ Ke kintu kyazhijisha. 2 Nyama wa mulambo wa mambo bakamwipayile pa mpunzha po bepayila mulambo wa kusoka, ne mashi anji+ bakeasanse ku mbaji yonse ya kya kusokelapo bitapisho.+ 3 Akalete mafuta anji onse+ kuvwangakotu ne mafuta a ku mukila, mafuta aji ku mila, 4 ne mafyo abiji ne mafuta ao aji kwipi na musana. Kabiji wafwainwa ne kukaabula mafuta aji ku jichima pamo na aji ku mafyo.+ 5 Ñanga akebisokele pa kya kusokelapo bitapisho kwikala mulambo wa kusoka pa mujilo kwi Yehoba.+ Uno ke mulambo wa mambo. 6 Mwanamulume yense mu bañanga ye ukamuja,+ kabiji wafwainwa kumujiila mu mpunzha yazhila. Ke kintu kyazhijisha.+ 7 Muzhilo wa mulambo wa bubi ye ukengilanga ne ku mulambo wa mambo; bikekala bya ñanga ukamufuchila mambo.+

8 “‘Umvwe ñanga walambwilako muntu mulambo wa kusoka, mwayi+ wa mulambo wa kusoka muntu ye akapana ku ñanga, ukekala wa ñanga.

9 “‘Mulambo wa kajo yense ye bakosha mu kitofu nangwa ye bakanga pa kikango+ ukekala wa ñanga ukamulambula. Ukekala wanji.+ 10 Bino mulambo wa kajo wavwangakana na manyi+ nangwa wauma+ ukekala wa baana ba kwa Alona; bonse bakatambulatu kipimo kimo.

11 “‘Uno ye muzhilo wa kitapisho kya mutende+ muntu kyo akonsha kupana kwi Yehoba: 12 Umvwe muntu akamupane mu kumwesha kusanta,+ akamulambwile pamo na kitapisho kya kusanta kya bashinkwa banzhingwile babula mbizho bavwangakana na manyi, bibebulwa byabula mbizho byo bashingako manyi ne bashinkwa banzhingwile bo balenga na bunga bwalamba bo bavwangako manyi. 13 Ukapana mulambo wanji pamo na bashinkwa banzhingwile baji na mbizho ne mulambo wa kusanta wa bitapisho byanji bya mutende. 14 Pa bino, wafwainwa ne kulambulapo mulambo wazhila kwi Yehoba; bikekala bya ñanga ukasansa mashi a bitapisho bya mutende.+ 15 Nyama ya kitapisho kya kusanta kya bitapisho bya mutende akeije pa juba jo akeilambula. Kechi akashepo nyama kufika lukelo ne.+

16 “‘Umvwe kitapisho kya mulambo wanji kyaikala ke luchipo+ nangwa mulambo wa kwifuukwila,+ bafwainwa kwikija pa juba jonka jo aleta kitapisho kyanji, kabiji bikashalapo bakebije pa juba jikalondelapo. 17 Bino nyama yonse ya kitapisho ikashalapo pa juba ja busatu bakeisoke mu mujilo.+ 18 Pano bino, inge nyama ya kitapisho kyanji kya mutende beija pa juba ja busatu, wiipana kechi ukobilwa bibusa ne. Kabiji kechi bakamubajilakyo ne; ke kintu kya bunya kabiji muntu* ukajako nyama ukazhatwa na mambo.+ 19 Nyama yonse ikakunkula kintu kya muzhilo kechi bakeije ne. Bakeisoke mu mujilo. Muntu yense wabula muzhilo wakonsha kuja nyama yabula muzhilo.

20 “‘Pakuba muntu* yense wa muzhilo ukaja nyama ya kitapisho kya mutende kya Yehoba, awo muntu* bafwainwa kumuchibako* ku balongo banji.+ 21 Inge muntu* wakwata pa kintu kya muzhilo nangwa muntu+ nangwa nyama+ nangwa kintu kyonse kya muzhilo kya bunya+ ne kujapo nyama imo ya kitapisho kya mutende kya Yehoba, awo muntu* bafwainwa kumuchibako* ku balongo banji.’”

22 Yehoba watwajijile kwambila Mosesa amba: 23 “Buula bena Isalela amba, ‘Kechi mukaje mafuta+ a ñombe nangwa a mwana mukooko nangwa a mbuzhi ne. 24 Mafuta a nyama ye bataana wafwa ne mafuta a nyama ye baipaya ku nyama mukwabo kechi mwafwainwa kwiaja ne,+ pano bino, mwakonsha kwiengijisha ku bintu bikwabo. 25 Mambo yense ukaja mafuta a nyama ye akaleta kwikala mulambo ye balambula pa mujilo kwi Yehoba, bafwainwa kumuchibako* ku balongo banji.

26 “‘Kechi mwafwainwa kuja mashi+ a ñonyi nangwa a nyama mu mapunzha enu onse mo mukekalanga ne. 27 Muntu* yense ukaja mashi bafwainwa kumuchibako*+ ku balongo banji.’”

28 Yehoba watwajijile kwambila Mosesa amba: 29 “Buula bena Isalela amba, ‘Muntu yense ukalambula kitapisho kya mutende kwi Yehoba wafwainwa kuleta kipimvwa kimo kya mulambo kufuma ku kitapisho kyanji kya mutende kwi Yehoba.+ 30 Akalete mwine mu maboko anji mafuta+ pamo na kakuji kwikala mulambo wa kusoka pa mujilo kwi Yehoba, kabiji akamupepezhe kwikala mulambo wa kupepezha+ kwi Yehoba. 31 Ñanga akasoke mafuta pa kya kusokelapo bitapisho,+ pakuba kakuji kakekale ka kwa Alona ne baana banji.+

32 “‘Mukape ñanga kijoma kya kilujo kwikala mulambo wazhila kufuma ku bitapisho byenu bya mutende.+ 33 Kijoma kya kilujo mukape mwana wa mulume wa kwa Alona ukalambula mashi a bitapisho bya mutende ne mafuta.+ 34 Amiwa natambula kakuji ka mulambo wa kupepezha ne kijoma kya mulambo wazhila kufuma ku bitapisho bya mutende bya bena Isalela kabiji nebipana kwi Alona ñanga ne ku baana banji kwikala jilamuna ja myaka ne myaka ku bena Isalela.+

35 “‘Akino kyo kipimvwa kya bañanga, kya kwa Alona ne baana banji kyo bebapele pa juba jo bebatongwele kwikala bañanga kwi Yehoba kufuma ku milambo ya kusoka pa mujilo kwi Yehoba.+ 36 Yehoba wakambizhe kwibapa kino kipimvwa ku bena Isalela pa juba jo ebashingile manyi.+ Jino ke jilamuna ja myaka ne myaka ku bisemi byabo byonse.’”

37 Uno ye muzhilo wa mulambo wa kusoka,+ mulambo wa kajo,+ mulambo wa bubi,+ mulambo wa mambo,+ kitapisho kya kwikajika+ ne kitapisho kya mutende,+ 38 byonkatu Yehoba byo akambizhe Mosesa ku Mutumba wa Sinai+ pa juba bena Isalela jo bebakambizhe kuleta milambo yabo kwi Yehoba mu kiselebwa kya Sinai.+

8 Yehoba watwajijile kwambila Mosesa amba: 2 “Senda Alona ne baana banji,+ bivwalo,+ manyi a kushinga,+ ñombe wa mulambo wa bubi, mikooko ilume ibiji ne ntumbe ya bashinkwa babula mbizho,+ 3 kabiji ukonkanye pamo jibumba jonse ku kibelo kya tente wa lusambakeno.”

4 Kabiji Mosesa waubile byonkatu Yehoba byo amukambizhe ne jibumba jakonkene pamo ku kibelo kya tente wa lusambakeno. 5 Kepo Mosesa aambijile jibumba amba: “Abino byo bitukambizha Yehoba amba tube.” 6 Byonkabyo, Mosesa waletele Alona ne baana banji kwipi ne kwibovwa na mema.+ 7 Byo apwishishe kuba kino, wamuvwikile munkukumba,+ wamunyingile mushipi wa kisapi,+ wamuvwikile mukangyo wabula maboko+ ne kumuvwika kajilaya kabula maboko+ ne kwikakasa na mushipi wa kupikula+ wa pa kajilaya kabula maboko ne kumukasaye bulongo. 8 Kabiji wamuvwikile fukuta wa pa kyaji+ ne kubikamo Ulimu ne Tumimu.+ 9 Kabiji wamukashile kitambala+ ku mutwe, ne kulutwe ya kino kitambala wakashijileko kyela kibekauka kya ngolode kya kayukilo kazhila* ka kwipana,+ byonkatu Yehoba byo akambizhe Mosesa.

10 Kepo Mosesa ashikwile manyi a kushinga ne kushinga tente wa lusambakeno ne bintu byonse byajingamo+ ne kwibizhijika. 11 Kabiji wasanshile manyi amo pa kya kusokelapo bitapisho jitanu na jibiji ne kwikishinga manyi ne bipe byakyo byonse ne shomeka ne kya kumutentekapo kuba’mba ebizhijike. 12 Kabiji manyi amo wietulwijile pa mutwe wa kwa Alona ne kumushinga kuba’mba amuzhijike.+

13 Kepo Mosesa aletele baana ba kwa Alona kwipi ne kwibavwika* bivwalo byalepa, kabiji wibanyingile mishipi ya bisapi ne kwibavwika bisochi,+ byonkatu Yehoba byo akambizhe Mosesa.

14 Kabiji waletele ñombe wa mulambo wa bubi, Alona ne baana banji batentekele maboko abo pa mutwe wa ñombe wa mulambo wa bubi.+ 15 Mosesa wamwipayile ne kutumpa munwe wanji mu mashi+ ne kwiashinga ku nsengo yajinga ku mbaji yonse ya kya kusokelapo bitapisho ne kutokesha kya kusokelapo bitapisho ku bubi, bino mashi onse ashajilepo wietulwijile kunshi ya kya kusokelapo bitapisho, pa kuba’mba ekizhijike kwikala kya kufuchilapo mambo. 16 Kepo ashikwile mafuta a ku mila, mafuta ajinga peulu ya jichima, mafyo abiji ne mafuta ao, kabiji Mosesa wiasokele pa kya kusokelapo bitapisho.+ 17 Kabiji bintu byonse byashajilepo ku uno ñombe, mwayi wanji, nyama ne busobe wibisokejile pangye ya kampu,+ byonkatu Yehoba byo akambizhe Mosesa.

18 Mosesa waletele kwipi mukooko mulume wa mulambo wa kusoka, kabiji Alona ne baana banji batentekele maboko abo pa mutwe wa mukooko.+ 19 Kepo Mosesa amwipayile ne kusansa mashi ku mbaji yonse ya kya kusokelapo bitapisho. 20 Watetawile mukooko mu bipimvwa bipimvwa, kabiji Mosesa wasokele mutwe ne bipimvwa ne mafuta.* 21 Waovwele mila ne mikupa na mema, kabiji Mosesa wasokele mukooko yense pa kya kusokelapo bitapisho. Uno wajinga mulambo wa kusoka wa bwema bwawama.* Kabiji wajinga mulambo walambulwa pa mujilo kwi Yehoba, byonkatu Yehoba byo akambizhe Mosesa.

22 Kabiji waletele mukooko mulume wa bubiji wa kwibazhijikila,+ Alona ne baana banji batentekele maboko abo pa mutwe wa mukooko.+ 23 Mosesa wamwipayile ne kushikulapo mashi amo ne kwiashinga ku kalebelebe ka ku kutwi kwa kwa Alona kwa kilujo ne ku kyala kyanji kya kilujo ne ku jina janji jikatampe ja kilujo. 24 Kabiji Mosesa waletele baana ba kwa Alona kulutwe ne kushinga mashi amo ku tulebelebe twa ku matwi abo a kilujo ne pa byala byabo bya kilujo ne pa mana abo akatampe a kilujo; bino Mosesa wasanshile mashi onse ashajilepo ku mbaji yonse ya kya kusokelapo bitapisho.+

25 Kabiji washikwile mafuta, ko kuba’mba mafuta a ku mukila, mafuta onse ajinga peulu ya mila ne ajinga peulu ya jichima, mafyo abiji ne mafuta ao ne kijoma kya kilujo.+ 26 Wafumishe bashinkwa babula mbizho mu ntumbe yajinga ku meso a Yehoba, watolelemo shinkwa umo wanzhingwile wabula mbizho,+ shinkwa umo wanzhingwile wavwangakana na manyi+ ne jibebulwa jimo. Kabiji wibibikile pa bipimvwa bya mafuta ne pa kijoma kya kilujo. 27 Byo apwishishe kuba bino, wabikile bintu byonse byashajilepo mu maboko a kwa Alona ne a baana banji kabiji batendekele kwibipepezha kwikala mulambo wa kupepezha kwi Yehoba. 28 Kepo Mosesa ebitambwile kufuma mu maboko abo ne kwibisoka pa kya kusokelapo bitapisho peulu ya mulambo wa kusoka. Kyajinga kitapisho kya kwibazhijikila kya bwema bwawama.* Uno wajinga mulambo wa kusoka pa mujilo kwi Yehoba.

29 Kepo Mosesa ashikwile kakuji ne kwikapepezha kwikala mulambo wa kupepezha kwi Yehoba.+ Ku mukooko mulume wa kwibazhijikila ko kwafumine kipimvwa kya kwabilapo Mosesa, byonkatu Yehoba byo akambizhe Mosesa.+

30 Kabiji Mosesa washikwile manyi amo a kushinga+ ne mashi amo ajinga pa kya kusokelapo bitapisho, ne kusansa Alona ne bivwalo byanji ne baana banji bo ajinga nabo ne bivwalo byabo. Onkao mambo, wazhijikile Alona ne bivwalo byanji ne baana banji + ne bivwalo byabo.+

31 Kepo Mosesa aambijile Alona ne baana banji amba: “Tekelai+ nyama ku kibelo kya tente wa lusambakeno ne kujiila konkakwa pamo na bashinkwa baji mu ntumbe bakuzhijikila, byonkatu byo bankambizhe’mba, ‘Alona ne baana banji bakaje.’+ 32 Nyama ne bashinkwa bakashalapo mukebisoke mu mujilo.+ 33 Kechi mwafwainwa kufumako ku kibelo kya tente wa lusambakeno pa moba atanu na abiji ne, kufikatu ne moba a kwimuzhijika byo akapwa, mambo pakapita moba atanu na abiji a kwimuzhijika kwikala bañanga.*+ 34 Yehoba witukambizhe’mba tube kintu kyonka kyo twauba lelo kuba’mba emufuchileko mambo enu.+ 35 Mukekalenga konka ku kibelo kya tente wa lusambakeno mute ne bufuku pa moba atanu na abiji,+ kabiji mukengilenga mwingilo wenu kwi Yehoba,+ pa kuba’mba mukabule kufwa; mambo bino byo byo ankambizhe.”

36 Kabiji Alona ne baana banji baubile bintu byonse Yehoba byo akambizhe Mosesa.

9 Pa juba ja butanu na busatu,+ Mosesa waichile Alona ne baana banji ne bakulumpe ba bena Isalela. 2 Waambijile Alona amba: “Senda mwana ñombe wa mulambo wa bubi+ ne mukooko mulume wa mulambo wa kusoka, babula bulema ne kwibaleta kwi Yehoba. 3 Pakuba bena Isalela wibabuule’mba, ‘Shikulai mbuzhi mulume wa mulambo wa bubi ne mwana ñombe ne mwana mukooko mulume, bonse ba mwaka umo, babula bulema bekale mulambo wa kusoka, 4 ne ñombe ne mukooko mulume ba bitapisho bya mutende+ bya kutapisha kwi Yehoba ne mulambo wa kajo+ wavwangakana na manyi, mambo ja lelo Yehoba usakumweka kwi anweba.’”+

5 Onkao mambo, baletele ku tente wa lusambakeno bintu byonse Mosesa byo ebakambizhe. Kepo jibumba jonse jaishile ne kwimana kwi Yehoba. 6 Kabiji Mosesa waambile’mba: “Abino byo bimukambizha Yehoba amba mube, pa kuba’mba lukumo lwa Yehoba lumweke kwi anweba.”+ 7 Kepo Mosesa aambijile Alona amba: “Fwenya ku kya kusokelapo bitapisho ne kulambula mulambo wobe wa bubi+ ne mulambo wobe wa kusoka ne kwifuchila mambo,+ ne mambo a ba mu nzubo yobe; kabiji ulambule mulambo wa bantu+ ne kwibafuchilako mambo abo,+ byonkatu Yehoba byo akambizha.”

8 Ponkapo Alona wayile ku kya kusokelapo bitapisho ne kwipaya mwana ñombe wa mulambo wa bubi bwanji.+ 9 Kepo baana ba kwa Alona bamuletejile mashi,+ ne aye watumpilemo munwe wanji mu mashi ne kwiashinga ku nsengo yajinga ku kya kusokelapo bitapisho, kabiji mashi onse ashajilepo wietulwijile kunshi ya kya kusokelapo bitapisho.+ 10 Wasokele mafuta pa kya kusokelapo bitapisho, mafyo ne mafuta ajinga peulu ya jichima afumine ku mulambo wa bubi, byonkatu Yehoba byo akambizhe Mosesa.+ 11 Kabiji wasokele nyama ne mwayi pangye ya kampu.+

12 Kepo aipayile nyama wa mulambo wa kusoka, ne baana ba kwa Alona bamuletejile mashi ne aye wiasanshile konse kwapela kya kusokelapo bitapisho.+ 13 Bamuletejile bipimvwa bya mulambo wa kusoka pamo na mutwe, ne aye wibisokele pa kya kusokelapo bitapisho. 14 Kabiji waovwele mila ne mikupa ne kwibisokela ponka pa mulambo wa kusoka pa kya kusokelapo bitapisho.

15 Kabiji waletele mulambo wa bantu ne kushikula mbuzhi wa mulambo wabo wa bubi ne kumwipaya, kabiji wamulambwile kwikala mulambo wa bubi byonka byo aubile na mulambo mutanshi. 16 Kabiji waletele mulambo wa kusoka ne kumubila monka mo bobila milambo yonse.+

17 Kabiji waletele mulambo wa kajo+ ne kukamunapo mukono umo mu kuboko kwanji ne kumusoka pa kya kusokelapo bitapisho kununga pa mulambo wa kusoka wa lukelo.+

18 Ponkapo waipayile ñombe ne mukooko mulume wa kitapisho kya mutende kya bantu. Kepo baana ba kwa Alona bamuletejile mashi, ne aye wiasanshile konse kwapela kya kusokelapo bitapisho.+ 19 Pakuba mafuta a ñombe,+ a ku mukila wa mukooko mulume ne mafuta avweta pa bya munda, mafyo ne mafuta ajinga peulu ya jichima,+ 20 wiabikile peulu ya tukuji, kepo ebisokele pa kya kusokelapo bitapisho.+ 21 Pakuba tukuji ne kijoma kya ku kilujo, Alona wibipepezhe kwikala mulambo wa kupepezha kwi Yehoba, byonkatu byo akambizhe Mosesa.+

22 Kepo Alona atanyikile maboko anji ku bantu ne kwibapesha+ kabiji waikijile kufuma po alambwijilenga mulambo wa bubi ne mulambo wa kusoka ne bitapisho bya mutende. 23 Byo bapwishishe kuba bino, Mosesa ne Alona batwelele mu tente wa lusambakeno, ne pa kulupukamo bapesheshe bantu.+

Kabiji lukumo lwa Yehoba lwamwekele ku bantu bonse,+ 24 mujilo wafumine kwi Yehoba+ wasokele mulambo wa kusoka ne mafuta ajinga pa kya kusokelapo bitapisho. Bantu bonse byo bamwene kino, batatwile kubijika ne kupona panshi kinkuvumene.+

10 Kepo baana ba kwa Alona ba Nadaba ne Abihu+ bonse bashikwile bya kwapwilamo mujilo ne kubikamo bya kufutumuna.+ Kabiji batendekele kwibilambula kwi Yehoba na mujilo ungi+ ye abujile kwibakambizha. 2 Ponkapo mujilo wafumine kwi Yehoba ne kwibasoka,+ kabiji bafwijile konka ku meso a Yehoba.+ 3 Kepo Mosesa aambijile Alona amba: “Abino byo byaamba Yehoba amba, ‘Amiwa nkekala wazhila ku bonse baji kwipi ne amiwa+ kabiji nkatumbijikwa ku bantu bonse.’” Kabiji Alona wazhindaminetu nzoo.

4 Onkao mambo, Mosesa waichile Mishela ne Elezafwana baana ba kwa Uziela+ shanji Alona wa mwanyike ne kwibambila’mba: “Iyai mushikule balongo benu mwibafumye mu mpunzha yazhila ne kwibatwala pangye ya kampu.” 5 Ponkapo baishile ne kwibasendela bano banabalume mu minkukumba yabo ne kwibatwala pangye ya kampu, byonkatu Mosesa byo ebabuujile.

6 Kepo Mosesa aambijile Alona ne baana banji bakwabo, Eleaza ne Itamala amba: “Kange muleke nsuki yenu izakalale nangwa kutabula bivwalo byenu ne,+ pa kuba’mba mubule kufwa, ne kuba’mba Lesa abule kuzhingijila jibumba jonse. Balongo benu bonse bena Isalela bakajila bano bantu Yehoba bo aipaya na mujilo. 7 Kechi mwafwainwa kufuma ku kibelo kya tente wa lusambakeno ne, kuchina’mba mwakafwa, mambo manyi a kushinga a Yehoba aji pe anweba.”+ Onkao mambo, baubile byonkatu bibambijile Mosesa.

8 Kepo Yehoba aambijile Alona amba: 9 “Pa kutwela mu tente wa lusambakeno kechi wafwainwa kutoma binyu nangwa maalwa akwabo ne,+ obewa ne baana bobe bo uji nabo, kuchina’mba mwakafwa. Jino ke jilamuna ja myaka ku bisemi byenu byonse. 10 Akino kyo kikapusanya kintu kyazhila ne kyabula kuzhila, kya muzhilo ne kyabula muzhilo,+ 11 ne kufunjisha bena Isalela malamuna onse Yehoba o ebabuula kupichila mwi Mosesa.”+

12 Kabiji Mosesa waambijile Alona ne baana banji bashajilepo ba Eleaza ne Itamala amba: “Shikulai mulambo wa kajo washajilepo kufuma ku milambo ya Yehoba ya kusoka pa mujilo, muje bashinkwa babula mbizho baji kwipi na kya kusokelapo bitapisho,+ mambo ke kintu kyazhijisha.+ 13 Wafwainwa kwibijiila mu mpunzha yazhila,+ mambo ko kajo kobe ne ka baana bobe kafuma ku mulambo wa Yehoba wa kusoka pa mujilo; mambo abino byo byo bankambizhe. 14 Kabiji ukajiile kakuji ka mulambo wa kupepezha ne kijoma kya mulambo wazhila+ mu mpunzha yatoka, obewa, baana bobe ba balume ne baana bobe ba bakazhi,+ mambo bino bintu bebipana kwi obewa kwikala kajo kobe ne ka baana bobe kufuma ku bitapisho bya mutende bya bena Isalela. 15 Bakalete kijoma kya mulambo wazhila ne kakuji ka mulambo wa kupepezha pamo na milambo ya mafuta ya kusoka pa mujilo kuba’mba bakapepezhe mulambo wa kupepezha kwi Yehoba; kabiji kakekala kajo kobe ka myaka ne ka baana bobe bo uji nabo,+ byonkatu Yehoba byo akambizha.”

16 Kabiji Mosesa wakebelekebele mbuzhi wa mulambo wa bubi+ ne kutaana’mba bamusoka kala. Ponkapo wibazhingijile ba Eleaza ne Itamala baana ba kwa Alona bashajilepo, ne kwibashikisha’mba: 17 “Mambo ka o mwaji kubujila kujiila nyama wa mulambo wa bubi mu mpunzha yazhila,+ byo aji wazhijisha kabiji bamupana kwi anweba kuba’mba bemutwike mambo a jibumba ne kwijifuchilako mambo kwi Yehoba? 18 Pakuba mashi anji kechi bealeta mu mpunzha yazhila ne.+ Mwaji kufwainwa kujiila mu mpunzha yazhila byonkatu byo bankambizhe.” 19 Alona wakumbwile Mosesa amba: “Talai, lelo jino baji kulambula mulambo wabo wa bubi ne mulambo wa kusoka kwi Yehoba,+ nangwa byonkabyo, bino bintu byammwekela. Umvwe lelo naji kuja nyama ya mulambo wa bubi, nanchi inge naji kutokesha Yehoba ku muchima nyi?” 20 Mosesa byo aumvwine kino, kyamutokeshe ku muchima.

11 Kepo Yehoba aambijile Mosesa ne Alona amba: 2 “Buulai bena Isalela amba, ‘Abino byo bilengwa byumi biji pano pa ntanda* byo mwakonsha kuja:+ 3 Mwakonsha kuja nyama yense uji na mikono yalenduka ne kupasana kabiji usheñununa kajo.

4 “‘Bino kechi mwafwainwa kuja bano banyama basheñununa kajo nangwa baji na mikono yalenduka ne: ngamela, usheñununa kajo bino kechi walenduka mikono ne. Ke wa muzhilo kwi anweba.+ 5 Kibila+ naye usheñununa kajo, bino kechi uji na mikono yalenduka ne. Ke wa muzhilo kwi anweba. 6 Kalulu nako kasheñununa kajo, bino kechi kaji na mikono yalenduka ne. Ke ka muzhilo kwi anweba. 7 Nkumba+ naye nangwa kya kuba uji na mikono yalenduka ne kupasana, bino kechi usheñununa kajo ne. Ke wa muzhilo kwi anweba. 8 Kechi mwafwainwa kuja nyama ya bano banyama nangwa kukwata pa mibiji yabo yafwa ne. Bo ba muzhilo kwi anweba.+

9 “‘Abino byo bintu bya mu mema byo mwakonsha kuja: Kintu kyonse kya mu mema kiji na towelo ne mabamba kya mu tulunga twa mema nangwa mu mikola, mwakonsha kuja.+ 10 Bino kintu kyonse kya mu tulunga twa mema ne mu mikola kyabula towelo ne mabamba kya mu bilengwa* byonse byenda bisamba ne bilengwa byumi byonse bikwabo bya mu mema, kyo kya bunya kwi anweba. 11 Bikekale ke bya bunya kwi anweba kabiji kechi mwafwainwa kuja nyama yabyo ne,+ kabiji mibiji yabyo yafwa ikekale ke ya bunya kwi anweba. 12 Bintu byonse bya mu mema byabula towelo ne mabamba byo bya bunya kwi anweba.

13 “‘Abano bo bañonyi batumbuka ba bunya kwi anweba; kechi mwafwainwa kwibaja ne, mambo bo ba bunya: mpungu,+ nkwashi, jikubi mukatampe,+ 14 kibimbe ne mitundu yonse ya biswakozhi, 15 mitundu yonse ya bikwangala, 16 osetelechi, kapwa, kabwilile, mitundu yonse ya tubemba, 17 kapwa kakacheche, mulondwe, jikwikwi, 18 kafutubiji, pelekanyi, jikubi mucheche, 19 ñendabwala, ne mitundu yonse ya tukonge tukatampe, susute ne mujima. 20 Bilengwa* byonse biji na byapi byenda kisamba bikalaba panshi byo bya bunya kwi anweba.

21 “‘Bilengwa biji na byapi byenda kisamba bikalaba panshi byo mwakonsha kujatu ke byobya biji na mikupa ne matooto a kubotaukilako panshi. 22 Abino byo byo mwakonsha kuja: mitundu yapusana pusana ya nzhiye itumbuka, nzhiye ikwabo yo baja,+ nyenze ne batete. 23 Bilengwa byonse byenda kisamba biji na byapi ne maulu ana byo bya bunya kwi anweba. 24 Abino byakonsha kwimulengela kwikala ba muzhilo. Muntu yense ukakwata pa mibiji yabyo yafwa, ukekala wa muzhilo kufikatu ne mabanga.+ 25 Muntu yense ukasenda mibiji yabyo yafwa, wafwainwa kuchapa bivwalo byanji;+ ukekala wa muzhilo kufikatu ne mabanga.

26 “‘Nyama yense uji na mikono yalenduka yabula kupasana, kabiji ubula kusheñununa kajo, ye wa muzhilo kwi anweba. Muntu yense ukamukwata ukekala wa muzhilo.+ 27 Bilengwa byonse byumi biji na makabo byenda na mikupa ina, byo bya muzhilo kwi anweba. Muntu yense ukakwata pa mibiji yabyo yafwa, ukekala wa muzhilo kufikatu ne mabanga. 28 Yense ukasenda mibiji yabyo yafwa, wafwainwa kuchapa bivwalo byanji+ kabiji ukekala wa muzhilo kufikatu ne mabanga.+ Byo bya muzhilo kwi anweba.

29 “‘Abino byo bilengwa bikalaba panshi biji pano pa ntanda bya muzhilo kwi anweba: mfuko, mpuku+ ne mitundu yonse ya ba mansobela, 30 malengela, japatama, nsamba, kitombwe ne longolo. 31 Abino byo bilengwa byenda kisamba bya muzhilo kwi anweba.+ Muntu yense ukakwata pa mibiji yabyo yafwa, ukekala wa muzhilo kufikatu ne mabanga.+

32 “‘Kintu kyonse kyo bikaponenapo inge byafwa kikekala kya muzhilo, nangwa kipe kya kichi, nangwa kivwalo, kiseba nangwa jisaka. Kipe kyonse kyo bengijisha bafwainwa kwikitwezha mu mema, kabiji kikekala kya muzhilo kufikatu ne mabanga; apa bino kikekale kyabula muzhilo. 33 Umvwe byaponena pa kipe kya buchimba, akyo kipe mukekilalaule ne bintu byonse byajinga mu kyokyo kipe bikekala bya muzhilo.+ 34 Kajo konse kukasampukila mema a mu kyokyo kipe, kakekala ka muzhilo ne bintu byonse byo batoma biji mu kyokyo kipe bikekala bya muzhilo. 35 Kintu kyonse pakaponena mibiji yabyo yafwa, kikekala kya muzhilo. Nangwa kitofu nangwa kakitofu kacheche, mwafwainwa kwibilalaula. Byo bya muzhilo kabiji bikatwajijila kwikala bya muzhilo kwi anweba. 36 Kanatu nsulo ya mema ne mishima* byo bikatwajijila kwikala byabula muzhilo, bino muntu yense ukakwata ku mibiji yabyo yafwa, ukekala wa muzhilo. 37 Umvwe mibiji yabyo yafwa yaponena pa nkunwa ya kubyala, ikekala yabula muzhilo. 38 Bino umvwe babika mema pa yoyo nkunwa ne lubaji lwa mubiji wa bino bintu wafwa waponenapo, ayo nkunwa ikekala ya muzhilo kwi anweba.

39 “‘Pano umvwe nyama ye muja wafwa, muntu yense ukakwata ku mubiji wanji wafwa ukekala wa muzhilo kufikatu ne mabanga.+ 40 Yense ukajako ku mubiji wanji wafwa, wafwainwa kuchapa bivwalo byanji, kabiji ukekala wa muzhilo kufikatu ne mabanga.+ Muntu yense ukasenda mubiji wa nyama wafwa, wafwainwa kuchapa bivwalo byanji, kabiji ukekala wa muzhilo kufikatu ne mabanga. 41 Bilengwa byonse byenda kisamba biji pano pa ntanda byo bya bunya.+ Kechi mwafwainwa kwibija ne. 42 Kechi mwafwainwa kuja kilengwa kyonse kyendela mu jivumo, kilengwa kyonse kikalaba na maulu ana nangwa bilengwa biji pano pa ntanda byenda bisamba biji na maulu avula ne, mambo byo bya bunya.+ 43 Kange mwilengele* kwikala ba bunya na mambo a bino bilengwa ne, kabiji kange mwizhilulule ne kwikala ba muzhilo na mambo a abyo ne.+ 44 Mambo amiwa yami Yehoba Lesa wenu,+ kabiji mwafwainwa kwizhijika ne kwikala bazhila+ mambo amiwa nazhila.+ Onkao mambo, kechi mwafwainwa kwikala ba muzhilo na mambo a bilengwa byenda kisamba biji pano pa ntanda ne. 45 Mambo amiwa yami Yehoba, yenka ubena kwimutangijila kwimufumya mu kyalo kya Ijipita kuba’mba ngikale Lesa wenu,+ kabiji mwafwainwa kwikala bazhila,+ mambo amiwa nazhila.+

46 “‘Uno ye muzhilo wa banyama ne bañonyi ne bilengwa* byonse byumi bya mu mema, ne bilengwa* byonse byenda kisamba biji pano pa ntanda, 47 pa kuba’mba pekale lupusano pa bintu bya muzhilo ne byabula muzhilo, pakachi ka bilengwa byumi byo mwakonsha kuja ne byo mwakonsha kubula kuja.’”+

12 Yehoba waambijile Mosesa amba: 2 “Buula bena Isalela amba, ‘Umvwe mwanamukazhi waimita* ne kusema mwana wa mulume ukekala wa muzhilo pa moba atanu na abiji, byonkatu byo ekala moba o ayilamo ku mwenzhi.+ 3 Pa juba ja butanu na busatu, mwana bakamuchibe kalomolomo.+ 4 Kabiji inanji akatwajijile kwitokesha aye mwine ku mashi anji pa moba 33. Kechi wafwainwa kukwata ku kintu kyazhila ne, kabiji kechi wafwainwa kutwela mu mpunzha yazhila ne, poso moba a kwitokesheshamo apwa.

5 “‘Pano umvwe wasema mwana wa mukazhi, ukekala wa muzhilo pa moba 14, byonkatu byo ekala moba o ayilamo ku mwenzhi. Kabiji akatwajijile kwitokesha aye mwine ku mashi anji pa moba 66. 6 Kabiji moba anji a kwitokesheshamo na mambo a mwana wa mulume nangwa wa mukazhi byo akapwa, akalete kwi ñanga mwana mukooko mulume wa mwaka umo wa mulambo wa kusoka+ ne kaana ka nkunda nangwa katela ka mulambo wa bubi ku kibelo kya tente wa lusambakeno. 7 Akamulete kwi Yehoba ne kumufuchilako mambo, ne aye ukekala wabula wa muzhilo na mambo a kupita mashi anji. Uno ye muzhilo wa mwanamukazhi wasema mwana wa mulume nangwa wa mukazhi. 8 Bino umvwe wakankalwa kuleta mukooko, wafwainwa kuleta tutela tubiji nangwa twana twa nkunda tubiji,+ kamo ka mulambo wa kusoka, kakwabo ka mulambo wa bubi kabiji ñanga ukamufuchilako mambo anji, ne aye ukekala wabula wa muzhilo.’”

13 Yehoba watwajijile kwambila Mosesa ne Alona amba: 2 “Umvwe muntu uji na kintu kyavimba,* kitumbwatumbwa nangwa kibazhi pa kikoba kyanji kabiji kyaaluka ke kikola kya mbumba*+ pa kikoba kyanji, bafwainwa kumuleta kwi Alona ñanga nangwa ku umo wa mu baana banji bañanga.+ 3 Ñanga ukatalatala kikola kiji pa kikoba kyanji. Umvwe masense a pa kikola aaluka ke atoka kabiji kikola kyazhika kupitaila pa kikoba, ko kuba’mba akyo kikola ke mbumba. Ñanga akekitaletale ne kutela yewo muntu amba wa muzhilo. 4 Bino umvwe kibazhi kiji pa kikoba kyanji kyatoka kabiji kechi kyazhika kupitaila pa kikoba ne, ne masense abo kechi aaluka ke atoka ne, ñanga akabike muntu uji na kikola kwa bunke pa moba atanu na abiji.+ 5 Kabiji ñanga akamutaletale pa juba ja butanu na bubiji, kabiji inge wataana’mba kikola kyapwa kabiji kechi kyakumbana pa kikoba ne, ñanga akabike yewo muntu jibiji kwa bunke pa moba akwabo atanu na abiji.

6 “Ñanga akamutaletale jikwabo pa juba ja butanu na bubiji, kabiji umvwe kikola kyazhimañana kwa kubula kukumbana pa kikoba, ñanga akatele yewo muntu amba wabula wa muzhilo;+ kyajingatu kitumbwatumbwa. Kabiji uno muntu akachape bivwalo byanji ne kwikala wabula wa muzhilo. 7 Bino umvwe kitumbwatumbwa* kyakumbana pa kikoba saka aya kala kwi ñanga kuba’mba amutokeshe, akaye jikwabo* kwi ñanga amba akamumone. 8 Ñanga akekitaletale, umvwe kitumbwatumbwa kyakumbana pa kikoba, ñanga akatele yewo muntu amba wa muzhilo. Ino ke mbumba.+

9 “Umvwe muntu waikala na kikola kya mbumba, bafwainwa kumuleta kwi ñanga, 10 kabiji ñanga akamutaletale.+ Umvwe pa kikoba paji kintu kitoka kyavimba kyalengela ne masense kutoka kabiji ponka pavimba paikala kilonda,+ 11 ino ke mbumba ibula kupwa iji pa kikoba kyanji, kabiji ñanga akatele yewo muntu amba wa muzhilo. Kechi wafwainwa kumubika kwa bunke ne,+ mambo ye wa muzhilo. 12 Pano umvwe mbumba yakumbana kikoba kyonse, kabiji yakumbana kufuma ku mutwe kufika ne ku maulu, ne ponse pakonsha kumona ñanga, 13 kabiji ñanga wamutalatala ne kumona’mba mbumba yakumbana kikoba kyanji kyonse, akatele yewo muntu wakolwa amba ye wabula wa muzhilo.* Kikoba kyonse kyatoka, ne aye ye wabula wa muzhilo. 14 Bino umvwe pa kikoba paikala kilonda, ukekala wa muzhilo. 15 Umvwe ñanga wamona kilonda, akatele yewo muntu amba wa muzhilo.+ Kilonda kikekala kya muzhilo. Ino ke mbumba.+ 16 Bino umvwe kilonda kyatoka jikwabo, awo muntu wafwainwa kuya kwi ñanga. 17 Ñanga akamutaletale+ kabiji umvwe kikola kyatoka, ñanga akatele yewo muntu wakolwa amba ye wabula wa muzhilo. Kechi wa muzhilo ne.

18 “Umvwe muntu waikala na kasungupute pa kikoba kyanji kabiji kapwa, 19 bino pajinga kasungupute patoka ne kuvimba nangwa paikala kibazhi kyachiluluka, wafwainwa kuya kwi ñanga. 20 Ñanga akekitaletale,+ kabiji umvwe kyazhika kupitaila pa kikoba ne masense aaluka ke atoka, ñanga akatele yewo muntu amba wa muzhilo. Kino ke kikola kya mbumba kyaikela pajinga kasungupute. 21 Bino umvwe ñanga wikitalatala ne kumona’mba kechi paji masense atoka ne, kabiji kechi kyazhika kupitaila pa kikoba ne, kabiji kyazhimañana, ñanga wafwainwa kubika yewo muntu kwa bunke pa moba atanu na abiji.+ 22 Kabiji umvwe kyakumbana kikoba kyonse, ñanga akatele yewo muntu amba wa muzhilo. Kino ke kikola. 23 Pakuba umvwe kibazhi kijitu pa mpunzha imo kabiji kechi kyakumbana kikoba kyonse ne, kino ke kilondatu kiji pajinga kasungupute, kabiji ñanga akatele yewo muntu amba kechi wa muzhilo ne.+

24 “Nangwa umvwe muntu wapiile kabiji waikala na mukovu ne pa mukovu paikala kibazhi kyachiluluka nangwa kitoka, 25 ñanga akekitaletale. Umvwe masense a pa kibazhi aaluka ke atoka ne kuzhika kupitaila pa kikoba, ko kuba’mba ino ke mbumba iji pa mukovu kabiji ñanga akatele yewo muntu amba wa muzhilo. Kino ke kikola kya mbumba. 26 Bino umvwe ñanga wikitalatala ne kumona’mba pa kibazhi kechi paji masense atoka ne, kabiji kechi kyazhika kupitaila pa kikoba ne, kabiji kyazhimañana, ñanga akabike yewo muntu kwa bunke pa moba atanu na abiji.+ 27 Ñanga akamutaletale pa juba ja butanu na bubiji kabiji umvwe kyakumbana pa kikoba, ñanga akatele yewo muntu amba wa muzhilo. Kino ke kikola kya mbumba. 28 Pakuba umvwe kibazhi kijitu pa mpunzha imo kabiji kechi kyakumbana kikoba kyonse ne, kabiji kyazhimañana, ko kuba’mba mukovu wavimbiletu, kabiji ñanga akatele yewo muntu amba kechi wa muzhilo ne, mambo ke kuvimbatu kuji pa mukovu.

29 “Umvwe mwanamulume nangwa mwanamukazhi waikala na kikola ku mutwe nangwa ku kalevu, 30 ñanga akataletale kyokyo kikola.+ Umvwe kyamweka kuzhika kupitaila pa kikoba kya kuba nsuki nangwa bwevu byapela ne kwaluka bya kibobo, ñanga akatele yewo muntu amba wa muzhilo; kino ke kikola kya pa kikoba kya ku mutwe nangwa ku bwevu. Ino ke mbumba ya ku mutwe nangwa ya ku kalevu. 31 Bino umvwe ñanga wamona’mba kikola kechi kyazhika kupitaila pa kikoba ne, kabiji kechi paji nsuki ifita ne, ñanga akabike yewo muntu wakolwa kwa bunke pa moba atanu na abiji.+ 32 Kabiji ñanga akataletale kyokyo kikola jikwabo pa juba ja butanu na bubiji, umvwe kikola kechi kyakumbana konse ne, kabiji kechi paji nsuki ya kibobo ne, kabiji kechi kyazhika kupitaila pa kikoba ne, 33 awo muntu wafwainwa kutenda nsuki, bino paji kikola kechi wafwainwa kutendapo ne. Kepo ñanga akabike yewo muntu wakolwa kwa bunke pa moba atanu na abiji.

34 “Ñanga akataletale jikwabo paji kilonda pa juba ja butanu na bubiji, umvwe kikola kiji pa kikoba kya ku mutwe ne ku myevu kechi kyakumbana pa kikoba ne, kabiji kechi kyazhika kupitaila pa kikoba ne, ñanga akatele yewo muntu amba ye wabula wa muzhilo, kabiji wafwainwa kuchapa bivwalo byanji ne kwikala wabula wa muzhilo. 35 Pakuba umvwe kikola kyakumbana pa kikoba saka bamutokesha kala, 36 ñanga akamutaletale, kabiji umvwe kikola kyakumbana pa kikoba, ñanga kechi wafwainwa kutalatala nsuki ya kibobo ne; awo muntu ke wa muzhilo. 37 Bino umvwe pa kumutalatala wataana’mba kikola kechi kyakumbana pa kikoba ne, kabiji kechi pamena nsuki ifiita ne, ko kuba’mba kikola kyapwa. Awo muntu ye wabula wa muzhilo kabiji ñanga akamutele’mba ye wabula wa muzhilo.+

38 “Umvwe mwanamulume nangwa mwanamukazhi waikala na bibazhi pa kikoba* ne byobyo bibazhi byatoka, 39 ñanga akebitaletale.+ Umvwe bibazhi bitoka biji pa kikoba byamweka kutokoloka, abino ke binyankalatu biji pa kikoba. Awo muntu kechi wa muzhilo ne.

40 “Umvwe nsuki ya muntu yasebeka mu mutwe wanji ne kwikala na jibala, ye wabula wa muzhilo. 41 Umvwe nsuki yanji yasebekela ku kilungi kabiji waikala na jibala, kechi wa muzhilo ne. 42 Pakuba umvwe pa jibala nangwa pa kilungi paikala kilonda kyachiluluka, ino ke mbumba iji pa kikoba kyanji kya mu mutwe nangwa pa kilungi kyanji. 43 Ñanga akamutaletale, umvwe pa mutwe wanji nangwa pa kilungi kyanji paji jibala pavimba ne kuchiluluka na mambo a kikola, kabiji kibena kumweka nobe mbumba iji pa kikoba kyanji, 44 ko kuba’mba uji na mbumba. Ye wa muzhilo, kabiji ñanga akamutele’mba wa muzhilo na mambo a kikola kiji pa mutwe wanji. 45 Kabiji muntu uji na kikola kya mbumba, wafwainwa kutabaula bivwalo byanji, nsuki yanji yafwainwa kuzakalala kabiji wafwainwa kuvweta pa ntomombo yanji saka abijika amba, ‘Ne wa muzhilo, ne wa muzhilo!’ 46 Ukekala wa muzhilo moba onse o akekala na kino kikola. Byo aji wa muzhilo, wafwainwa kwikala kwa bunke. Akekalenga pangye ya kampu.+

47 “Umvwe kikola kya mbumba kyatamisha kivwalo kyo balenga na boya nangwa na kisapi kya linenyi, 48 nangwa kisapi kya linenyi kyo bapikula na tonge nangwa boya nangwa kiseba nangwa kintu kyonse kyo balenga na kiseba, 49 ne musombelo wa manzhamatamba ne wachiluluka wa kikola wasombesha kivwalo, kiseba, tonge ye bapikwila kisapi, nangwa kintutu kikwabo kyo balenga na kiseba, kyasombela na mambo a mbumba, bafwainwa kwikimwesha ku ñanga. 50 Ñanga akataletale kikola, kabiji wafwainwa kubika kyokyo kintu kiji na kikola kwa bunke pa moba atanu na abiji.+ 51 Byo akekitalatala pa juba ja butanu na bubiji ne kumona’mba kikola kyakumbana ku kivwalo, ku tonge ye bapikwila kisapi, nangwa ku kiseba (nangwa kya kuba kiseba bekingijisha ku mwingilo wa byepi nangwa wa byepi) kino ke kikola kya mbumba isambukila kabiji kyo kya muzhilo.+ 52 Wafwainwa kusoka kivwalo, nangwa tonge ye bapikwila kisapi nangwa boya nangwa kisapi kya linenyi nangwa kintu kyo balenga na kiseba kiji na kikola, mambo ino yo mbumba isambukila. Bafwainwa kwikisoka mu mujilo.

53 “Umvwe ñanga wikitalatala ne kutaana’mba kikola kechi kyakumbana ku kivwalo, nangwa ku tonge ye bapikwila kisapi nangwa ku kintu kyo balenga na kiseba ne, 54 ñanga akakambizhe amba bachape kyokyo kintu kyasombela kabiji akekibike kwa bunke pa moba akwabo atanu na abiji. 55 Kabiji ñanga akataletale kyokyo kintu kyasombela pa kupwisha kwikichapa bulongo. Umvwe byasombelako kechi byaaluka ne, nangwa kya kuba kikola kechi kyakumbana ne, kikekala kya muzhilo. Wafwainwa kwikisoka mu mujilo, mambo bekija mukachi nangwa pangye.

56 “Bino umvwe ñanga wikitalatala ne pasombejile pazhimañana pa kupwisha kwikichapa bulongo, wafwainwa kutetululapo pa kivwalo nangwa pa kiseba nangwa pa tonge ye bapikwila kisapi. 57 Nangwa byonkabyo, umvwe kikola kyatwajijila kumweka ne kukumbana ku lubaji lukwabo lwa kivwalo nangwa lwa tonge ye bapikwila kisapi nangwa ku kintu kyo balenga na kiseba, wafwainwa kusoka mu mujilo kintu kyonse kyasombela.+ 58 Bino umvwe musombelo waleka kumweka pa kivwalo nangwa pa tonge ye bapikwila kisapi nangwa pa kintu kyo balenga na kiseba kyo wachapa, wafwainwa kwikichapa ja bubiji, kabiji kikekala kyabula muzhilo.

59 “Uno ye muzhilo wa kikola kya mbumba kiji ku kivwalo kya boya nangwa kya linenyi nangwa ku tonge ye bapikwila kisapi nangwa ku kintu kyo balenga na kiseba kuba’mba kitelwe’mba kyabula muzhilo nangwa kya muzhilo.”

14 Yehoba watwajijile kwambila Mosesa amba: 2 “Uno ye muzhilo wa kulondela pa kutokesha muntu uji na mbumba pa juba jo bakamuleta kwi ñanga.+ 3 Ñanga akalupuke pangye ya kampu ne kumutalatala. Umvwe muntu wa mbumba bamubuka, 4 ñanga akamukambizhe kuleta tuñonyi tubiji tumi twabula muzhilo ne kichi kya sida, tonge wachijisha ne kakichi ka isopi bya kumutokesheshako.+ 5 Ñanga akakambizhe amba kañonyi kamo bekepayile pa kipe kya buchimba peulu ya mema o batapula katataka. 6 Bino wafwainwa kutambula kañonyi komi pamo na kichi kya sida, tonge wachijisha ne kakichi ka isopi ne kwibitumpa byonse pamo mu mashi a kañonyi ko baipayila peulu ya mema o batapula katataka. 7 Kabiji akasanse ano mashi pa muntu ubena kukeba kwitokesha ku mbumba bimye bitanu na bibiji kabiji akamutele’mba wabula wa muzhilo, kabiji akalekeko kañonyi komi kakaye mungye.+

8 “Awa ubena kwitokesha wafwainwa kuchapa bivwalo byanji ne kutenda nsuki yanji yonse ne kowa na mema, kabiji ukekala wabula muzhilo. Inge wapwisha kuba bino, wakonsha kutwela mu kampu, bino ukekalanga pangye ya tente wanji moba atanu na abiji. 9 Pa juba ja butanu na bubiji, akatende nsuki yanji yonse ne myevu yanji ne bikiki byanji. Inge wapwisha kutenda nsuki yonse, akachape bivwalo byanji ne kowa na mema kabiji kechi ukekala wa muzhilo ne.

10 “Pa juba ja butanu na busatu, akashikule baana ba mikooko balume babiji babula bulema ne mwana mukooko mukazhi+ umo wa mwaka umo wabula bulema, ne bipimo bisatu bya bunga bwalamba bwavwangakana na manyi bya mu bipimo jikumi bitwela mu efa* kwikala mulambo wa kajo,+ ne logu* umo wa manyi.+ 11 Ñanga ukamutela’mba wabula muzhilo, kabiji akamulete kwi Yehoba awo muntu ubena kwitokesha mwine pamo na milambo yanji konka ku kibelo kya tente wa lusambakeno. 12 Ñanga akashikule mwana mukooko mulume umo pamo na logu umo wa manyi ne kumulambula kwikala mulambo wa mambo,+ ne aye akamupepezhe kwikala mulambo wa kupepezha kwi Yehoba.+ 13 Kabiji akepayile mwana mukooko mulume mu mpunzha yazhila ponka po bepayila mulambo wa bubi ne mulambo wa kusoka,+ mambo mulambo wa bubi ukekala wa ñanga byonkatu biji mulambo wa mambo.+ Ke kintu kyazhijisha.+

14 “Kabiji ñanga akashikulepo mashi amo a mulambo wa mambo ne kwiashinga ku kalebelebe ka ku kutwi kwa kilujo kwa muntu ubena kwitokesha ne pa kyala kya ku kuboko kwanji kwa kilujo ne pa jina jikatampe ja ku kulu kwanji kwa kilujo. 15 Kabiji ñanga akashikule logu umo wa manyi+ ne kwitulwila manyi amo mu kuboko kwanji mwine kwa kipiko. 16 Apa bino, ñanga akatumpemo munwe wanji wa kilujo mu manyi aji mu kuboko kwanji kwa kipiko ne kusansapo amo na munwe wanji bimye bitanu na bibiji kwi Yehoba. 17 Kabiji ñanga akashinge manyi amo akashalapo mu kuboko kwanji ku kalebelebe ka ku kutwi kwa kilujo kwa muntu ubena kwitokesha ne pa kyala kyanji kya kilujo ne pa jina jikatampe ja ku kulu kwa kilujo ponka po ashingile mashi a mulambo wa mambo. 18 Manyi akashalamo mu kuboko kwa ñanga akeashinge pa mutwe wa muntu ubena kwitokesha, kabiji ñanga ukamufuchilako mambo anji kwi Yehoba.+

19 “Ñanga akalambule mulambo wa bubi+ ne kufuchilako mambo muntu wakeba kwitokesha. Inge wapwisha kuba bino, akepaye nyama wa mulambo wa kusoka. 20 Kabiji ñanga akalambule mulambo wa kusoka ne mulambo wa kajo+ pa kya kusokelapo bitapisho ne ñanga akamufuchileko mambo anji,+ ne aye ukekala wabula muzhilo.+

21 “Pano bino, umvwe awo muntu muyanji kabiji kechi uji na bintu byavula ne, akalete mwana mukooko mulume kwikala mulambo wa bubi kuba’mba bakamupepezhe, pa kuba’mba bakamufuchileko mambo anji, kabiji akalete kipimo kimo kya bunga bwalamba bwavwangakana na manyi kya mu bipimo jikumi bitwela mu efa* kwikala mulambo wa kajo, mutumwa wa manyi, 22 ne tutela tubiji nangwa twana twa nkunda tubiji kwesakana na bintu byo aji nabyo. Kamo kakekala ka mulambo wa bubi, ne kakwabo kakekala ka mulambo wa kusoka.+ 23 Pa juba ja butanu na busatu,+ aketulete kuba’mba bakamutokeshe kwi ñanga konka ku kibelo kya tente wa lusambakeno ku meso a Yehoba.+

24 “Ñanga akashikule mwana mukooko mulume wa mulambo wa mambo+ ne logu umo wa manyi kabiji akebipepezhe kwikala mulambo wa kupepezha kwi Yehoba.+ 25 Kabiji akepaye mwana mukooko mulume wa mulambo wa mambo, kabiji ñanga akashikulepo mashi amo a mulambo wa mambo ne kwiashinga ku kalebelebe ka ku kutwi kwa kilujo kwa muntu ubena kwitokesha ne pa kyala kya ku kuboko kwanji kwa kilujo ne pa jina jikatampe ja ku kulu kwa kilujo.+ 26 Ñanga aketulwilepo manyi amo mu kuboko kwanji mwine kwa kipiko,+ 27 kabiji akasansepo na munwe wanji wa kilujo manyi amo aji mu kuboko kwanji kwa kipiko bimye bitanu na bibiji kwi Yehoba. 28 Kabiji ñanga akashinge manyi amo aji mu kuboko kwanji ku kalebelebe ka ku kutwi kwa kilujo kwa muntu ubena kwitokesha ne pa kyala kya ku kuboko kwanji kwa kilujo ne pa jina jikatampe ja ku kulu kwanji kwa kilujo, pantutu pamo po akashinga mashi a mulambo wa mambo. 29 Kepo ñanga akashinge manyi akashala mu kuboko kwanji pa mutwe wa muntu ubena kwitokesha, kuba’mba amufuchileko mambo anji kwi Yehoba.

30 “Akalambule katela kamo nangwa mwana nkunda umo, kwesakana na bintu byo aji nabyo,+ 31 byo akonsha kupana kwikala mulambo wa bubi ne mukwabo kwikala mulambo wa kusoka+ pamo na mulambo wa kajo; kabiji ñanga ukafuchilako mambo a muntu ubena kwitokesha kwi Yehoba.+

32 “Uno ye muzhilo wa muntu wajinga na kikola kya mbumba, bino wabula bintu bya kupana kuba’mba bamutokeshe.”

33 Kabiji Yehoba waambijile Mosesa ne Alona amba: 34 “Byo mukatwela mu kyalo kya Kenana+ kyo mbena kwimupa kwikala ke kyenu,+ kabiji nalengela nzubo iji mu kyalo kyobe kwikala na kikola kya mbumba,+ 35 mwina nzubo wafwainwa kuya na kubuula ñanga amba, ‘Mu nzubo yami muji kintu kiji nobe kikola.’ 36 Ñanga akakambizhe amba bafumyemo bintu byonse mu nzubo saka akyangye kutwelamo na kutalatala kikola, pa kuba’mba akabule kutela bintu byonse biji mu nzubo amba bya muzhilo; inge wafumyamo bintu byonse, ñanga po po akatwela mu nzubo na kwiitalatala. 37 Akataletale pa mpunzha paji kikola kabiji umvwe lubumbulu uji na musombelo wa manzhamatamba nangwa panekuka pachiluluka kabiji papokoka, 38 ñanga akalupukemo mu nzubo ne kuya ku kibelo kya nzubo kabiji akashinkemo mu nzubo pa moba atanu na abiji.+

39 “Kabiji ñanga akabweleko pa juba ja butanu na bubiji ne kutalatala. Umvwe kikola kyakumbana lubumbulu yense wa nzubo, 40 ñanga akakambizhe’mba bafumyemo mabwe aji na kikola ne kwiataya pangye ya muzhi ku mpunzha ya muzhilo. 41 Kepo akakambizha amba bapale bulongo mu nzubo kabiji maloba o bakapalamo bakeatwale pangye ya muzhi ku mpunzha ya muzhilo. 42 Pa kupwisha kuba bino, bakashikule mabwe angi ne kwiakula mo bafumishe mabwe, kabiji wafwainwa kwingijisha mulobwe ungi ne kwiimasa nzubo.

43 “Bino umvwe kikola kyabwela jibiji mu nzubo saka bafumyamo kala mabwe ne kwiipala ne kwiimasa jibiji, 44 ñanga akatwelemo ne kwiitalatala. Umvwe kikola kyakumbana nzubo yonse, ko kuba’mba ke mbumba isambukila+ iji mu nzubo. Nzubo ikekala ya muzhilo. 45 Ino nzubo akeikundule, ko kuba’mba mabwe ayo, bichi byayo ne maloba onse a ku nzubo ne kwibitwala pangye ya muzhi ku mpunzha ya muzhilo.+ 46 Bino yense ukatwelamo mu nzubo mu oa moba o bakeishinka,+ ukekala wa muzhilo kufikatu ne mabanga.+ 47 Kabiji yense ukalaalamo mu nzubo wafwainwa kuchapa bivwalo byanji ne yense ukajiilamo mu yoyo nzubo wafwainwa kuchapa bivwalo byanji.

48 “Pano bino, umvwe ñanga waiya ne kumona’mba kikola kechi kyakumbana mu nzubo kufuma kimye kyo beimashile ne, ñanga akatele yoyo nzubo amba kechi ya muzhilo ne, mambo kikola kyapwa. 49 Pa kuba’mba atokeshe nzubo ku kikola,* wafwainwa kushikula tuñonyi tubiji, kichi kya sida, tonge wachijisha ne kakichi ka isopi.+ 50 Akepayile kañonyi kamo pa kipe kya buchimba peulu ya mema o batapula katataka. 51 Kepo akasende kichi kya sida, kakichi ka isopi, tonge wachijisha, kañonyi komi ne kwibitumpa mu mashi a kañonyi ko aipaya ne mu mema o batapula katataka, kabiji akeasanse ku nzubo bimye bitanu na bibiji.+ 52 Kabiji akatokeshe nzubo ku kikola* na mashi a kañonyi, na mema o batapula katataka, na kañonyi komi, na kichi kya sida, na kakichi ka isopi ne na tonge wachijisha. 53 Apa bino, akalekeko aka kañonyi komi kakaye mungye ne kufuchilako nzubo, kabiji ikekala yabula muzhilo.

54 “Uno ye muzhilo wa kikola kyonse kya mbumba, kikola kya pa kikoba kya ku mutwe nangwa kya ku myevu,+ 55 mbumba ya ku kivwalo+ nangwa ya mu nzubo,+ 56 ne kuvimba, bitumbwatumbwa ne bibazhibibazhi,+ 57 kuba’mba muyuke kintu kya muzhilo ne kyabula muzhilo.+ Uno ye muzhilo wa mbumba.”+

15 Yehoba watwajijile kwambila Mosesa ne Alona amba: 2 “Buulai bena Isalela amba, ‘Umvwe mwanamulume wakolwa kikola kya kusuuma ku bya bulume,* kino kikola kikamulengela kwikala wa muzhilo.+ 3 Ye wa muzhilo na mambo a kikola kyanji, nangwa kikola kya kusuuma ku bya bulume kyatwajijila nangwa umvwe kyaleka kusuuma, ukekala wa muzhilo.

4 “‘Mwanya yense ukalaalapo muntu uji na kikola kya kusuuma, ukekala wa muzhilo ne kintu kyonse kyo akekalapo kikekala kya muzhilo. 5 Muntu yense ukakwata ku mwanya wanji wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga.+ 6 Muntu yense ukekala paji kwikala muntu uji na kikola kya kusuuma, wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga. 7 Muntu yense ukakwata pa mubiji wa muntu uji na kikola kya kusuuma, wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga. 8 Umvwe muntu uji na kikola kya kusuuma washipila muntu mate, awo muntu ye bashipila wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga. 9 Kya kwikalapo pa nyama kyonse kikekalapo muntu uji na kikola kya kusuuma, kikekala kya muzhilo. 10 Muntu yense ukakwata ku kintu kyonse kyo akekalapo, ukekala wa muzhilo kufikatu ne mabanga, kabiji yense ukasenda byo byo bintu akachape bivwalo byanji ne kowa na mema, kabiji ukekala wa muzhilo kufikatu ne mabanga. 11 Umvwe muntu uji na kikola kya kusuuma+ wabula kowa ku maboko na mema kabiji wakwata muntu, awo muntu ye akwata wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga. 12 Kipe kyonse kya buchimba kyo akakwatako muntu uji na kikola kya kusuuma, bafwainwa kwikilalaula, ne kipe kyonse kya kichi bafwainwa kwikyovwa na mema.+

13 “‘Umvwe kikola kya kusuuma kyajinga na muntu kyapwa, kabiji waikala wabula wa muzhilo ku kino kikola, akabale moba atanu na abiji a kwitokesheshamo, kabiji wafwainwa kuchapa bivwalo byanji ne kowa na mema o batapula katataka, kabiji ukekala wabula wa muzhilo.+ 14 Pa juba ja butanu na busatu, wafwainwa kuleta tutela tubiji+ nangwa twana twa nkunda tubiji ne kwiya kwi Yehoba konka ku kibelo kya tente wa lusambakeno ne kwitupana kwi ñanga. 15 Kabiji ñanga aketulambule, kamo kakekala ka mulambo wa bubi ne kakwabo kakekala ka mulambo wa kusoka, kabiji ñanga akamufuchileko mambo anji kwi Yehoba na mambo a kikola kyanji kya kusuuma.

16 “‘Kabiji umvwe mwanamulume witayila malume, wafwainwa kowa na mema mubiji wanji yense, kabiji ukekala wa muzhilo kufikatu ne mabanga.+ 17 Wafwainwa kuchapa kivwalo kyonse ne kintu kyonse kyo balenga na kiseba ko aji kutayila malume, kabiji kikekala kya muzhilo kufikatu ne mabanga.

18 “‘Umvwe mwanamulume walaala na mwanamukazhi, kabiji watayila malume, bafwainwa kowa na mema, kabiji bakekala ba muzhilo kufikatu ne mabanga.+

19 “‘Umvwe mwanamukazhi ubena kupita mashi, ukatwajijila kwikala wa muzhilo moba atanu na abiji na mambo a kuya ku mwenzhi.+ Muntu yense ukamukwata ukekala wa muzhilo kufikatu ne mabanga.+ 20 Kintu kyonse kyo akalaalapo moba o aji ku mwenzhi kikekala kya muzhilo, ne kintu kyonse kyo akekalapo kikekala kya muzhilo.+ 21 Muntu yense ukakwata ku mwanya wanji wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga. 22 Muntu yense ukakwata ku kintu kyo aji kwikalapo wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga. 23 Umvwe waji kwikala pa mwanya nangwa pa kintu kikwabo, mwanamulume ukakwatako ukekala wa muzhilo kufikatu ne mabanga.+ 24 Kabiji umvwe mwanamulume walaala nanji ne mashi anji a ku mwenzhi amushimukila,+ ukekala wa muzhilo moba atanu na abiji, kabiji mwanya yense po akalaala ukekala wa muzhilo.

25 “‘Umvwe mwanamukazhi ubena kupita mashi moba avula+ o abula kuya ku mwenzhi+ nangwa ubena kusuuma kupitaila moba o ayilamo ku mwenzhi, ukekala wa muzhilo moba onse a kusuuma kwanji byonkatu byo ekala wa muzhilo moba o aji ku mwenzhi. 26 Mwanya yense po akalaala moba o abena kupita mashi, ukekala wa muzhilo byonkatu byo kikala umvwe uji ku mwenzhi,+ ne kintu kyonse kyo akekalapo kikekala kya muzhilo byonkatu byo kikala umvwe uji ku mwenzhi. 27 Muntu yense ukakwata pa bino bintu ukekala wa muzhilo, kabiji wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga.+

28 “‘Pano bino, umvwe mwanamukazhi wikileka kupita mashi, akabale moba atanu na abiji, apa bino akekale wabula muzhilo.+ 29 Pa juba ja butanu na busatu, akasende tutela tubiji nangwa twana twa nkunda tubiji+ ne kwituleta kwi ñanga konka ku kibelo kya tente wa lusambakeno.+ 30 Ñanga akalambule kamo kwikala mulambo wa bubi ne kakwabo kwikala mulambo wa kusoka, kabiji ñanga akamufuchileko mambo anji kwi Yehoba na mambo a kusuuma kwanji kwamulengejile kwikala wa muzhilo.+

31 “‘Onkao mambo, mwafwainwa kukwasha bena Isalela kubula kwikala ba muzhilo, kuchina’mba bakafwa na mambo a kwikala ba muzhilo ne kuzhilulula tente wami wa lusambakeno uji mukachi kabo.+

32 “‘Uno ye muzhilo wa mwanamulume uji na kikola kya kusuuma, mwanamulume waikala wa muzhilo na mambo a kwitayila malume,+ 33 mwanamukazhi uji ku mwenzhi,+ mwanamulume nangwa mwanamukazhi ubena kusuuma+ ne mwanamulume wilaala na mwanamukazhi wa muzhilo.’”

16 Yehoba waambijile Mosesa baana ba kwa Alona babiji byo bafwile na mambo a kufwenya kwipi kwi Yehoba.+ 2 Yehoba waambijile Mosesa amba: “Buula Alona kolojobe kuba’mba kechi akatwelenga mu mpunzha yazhila pa kimye kyonse+ mukachi ka kipembe+ kulutwe ya Jikwachi ne, pa kuba’mba akabule kufwa,+ mambo nkamweka mu jikumbi+ peulu ya kizhiko.+

3 “Abino byo bintu Alona byo afwainwa kuleta pa kwiya mu mpunzha yazhila: mwana ñombe wa mulambo wa bubi+ ne mukooko mulume wa mulambo wa kusoka.+ 4 Wafwainwa kuvwala kivwalo kyazhila kyalepa kya kisapi kya linenyi,+ kabiji kaputula* ka kisapi kya linenyi+ kafwainwa kuvweta mubiji* wanji, kabiji wafwainwa kwinyinga mushipi wa kisapi kya linenyi+ ne kukasa kitambala+ ku mutwe. Abino ke bivwalo byazhila.+ Akowe na mema+ ne kwibivwala.

5 “Wafwainwa kutambula ku jibumba ja bena Isalela+ baana ba bambuzhi balume babiji kwikala mulambo wa bubi ne mukooko mulume wa mulambo wa kusoka.

6 “Alona wafwainwa kwilambwila ñombe kwikala mulambo wa bubi, kabiji akefuchileko mambo anji mwine+ ne a ba mu nzubo yanji.

7 “Akasende bambuzhi babiji ne kwibemika kwi Yehoba konka ku kibelo kya tente wa lusambakeno. 8 Kabiji Alona akate bubale pa bano bambuzhi babiji, bubale bumo bwa kwa Yehoba ne bubale bukwabo bwa kwa Azazela.* 9 Alona akalete mbuzhi ye bakakwata ku bubale+ bwa kwa Yehoba ne kumulambula kwikala mulambo wa bubi. 10 Pakuba mbuzhi ye bakakwata ku bubale bwa kwa Azazela bakamulete ne kumwimika kwi Yehoba kwikala wa kufuchilapo mambo kabiji bakamuleke akaye mu kiselebwa kwi Azazela.+

11 “Alona akalete ñombe wa mulambo wa bubi ne kwifuchilako mambo anji aye mwine ne ba mu nzubo yanji; apa bino, akepaye ñombe wa mulambo wanji wa bubi.+

12 “Akashikule kya kwapwilapo mujilo+ ne kuyuzhapo makala aji pa kya kusokelapo bitapisho+ kiji ku meso a Yehoba ne mikono ibiji ya bya kufutumuna binunka bulongo+ ne kwibileta mukachi ka kipembe.+ 13 Kabiji akabike bya kufutumuna pa mujilo kwi Yehoba,+ ne bwishi bwa bya kufutumuna bukavwete kizhiko kya Jikwachi+ ja Lushimuno,+ pa kuba’mba akabule kufwa.

14 “Kabiji akashikulepo mashi amo a ñombe+ ne kwiasansa na munwe wanji kulutwe ya kizhiko ku musela, ne mashi akwabo akeasanse na munwe wanji bimye bitanu na bibiji kulutwe ya kizhiko.+

15 “Kabiji akepaye mbuzhi wa mulambo wa bubi wa bantu+ ne kuleta mashi mukachi ka kipembe+ ne kwiasansa kulutwe ya kizhiko byonkatu byo aubile na mashi a ñombe.+

16 “Kabiji wafwainwa kufuchilako mambo mpunzha yazhila na mambo a kwizhilulula kwa bena Isalela ne mizhilulwila yabo ne bubi bwabo,+ kabiji abino byo byo afwainwa kuba ku tente wa lusambakeno uji mukachi kabo na mambo a kwizhilulula kwabo.

17 “Kafwako muntu nangwa umo wafwainwa kutwela mu tente wa lusambakeno kimye kyo akatwelanga na kufuchilako bantu mambo mu mpunzha yazhila, kufikatu ne byo akalupukamo. Akefuchileko mambo anji aye mwine ne a ba mu nzubo yanji+ ne a kipwilo kyonse kya bena Isalela.+

18 “Akalupuke ne kuya ku kya kusokelapo bitapisho+ kiji ku meso a Yehoba ne kwikifuchilako mambo, kabiji akashikulepo mashi amo a ñombe ne a mbuzhi ne kwiashinga ku nsengo iji ku mbaji yonse ya kya kusokelapo bitapisho. 19 Kabiji akasanse mashi amo na munwe wanji pa kya kusokelapo bitapisho bimye bitanu na bibiji ne kwikitokesha ne kwikizhijika ku kwizhilulula kwa bena Isalela.

20 “Umvwe wapwisha kufuchilako mambo+ mpunzha yazhila ne tente wa lusambakeno ne kya kusokelapo bitapisho,+ akalete mbuzhi mumi.+ 21 Alona akatenteke maboko anji pa mutwe wa mbuzhi mumi ne kusolwela ponka mambo a bena Isalela onse, mizhilulwila yabo yonse ne bubi bwabo bonse ne kwibibika pa mutwe wa mbuzhi+ ne kumutwala mu kiselebwa ku muntu ye basajila jimo kuba kino.* 22 Uno mbuzhi ukasenda bubi bwabo bonse+ mu kiselebwa+ kabiji akaleke uno mbuzhi akaye mu kiselebwa.+

23 “Kepo Alona akatwele mu tente wa lusambakeno ne kuvuula bivwalo bya kisapi kya linenyi byo akavwala pa kutwela mu mpunzha yazhila kabiji akebitule panshi monkamwa. 24 Wafwainwa mwine* kowela+ mu mpunzha yazhila ne kuvwala bivwalo byanji;+ kabiji akalupukemo ne kulambula mulambo wanji wa kusoka+ ne mulambo wa kusoka wa bantu+ ne kwifuchilako mambo anji aye mwine ne a bantu.+ 25 Kabiji akasoke mafuta a mulambo wa bubi pa kya kusokelapo bitapisho.

26 “Mwanamulume ukatwala mbuzhi wa kwa Azazela+ akachape bivwalo byanji ne kowa na mema, kabiji inge wapwisha kuba bino, wakonsha kutwela mu kampu.

27 “Kabiji ñombe wa mulambo wa bubi ne mbuzhi wa mulambo wa bubi, bene bena mashi akufuchilako mambo bo bakaleta mu mpunzha yazhila, bakebatwale pangye ya kampu, kabiji myayi yabo, nyama yabo ne busobe bwabo bakebisoke mu mujilo.+ 28 Muntu ukebisoka akachape bivwalo byanji ne kowa na mema, kabiji inge wapwisha kuba bino, wakonsha kutwela mu kampu.

29 “Jino jikekala jilamuna jenu ja myaka: Mu ñondo wa butanu na bubiji pa juba ja bujikumi ja ñondo mukemanyike anwe bene,* kabiji kechi mwafwainwa kwingila mwingilo ne,+ nangwa mwina kyalo nangwa muntu wafuma ku kyalo kingi ye mukekalanga nanji. 30 Pa jino juba, po po bakemufuchilako mambo+ enu kuba’mba bakemutele’mba babula muzhilo. Mukekala babula muzhilo ku bubi bwenu bonse kwi Yehoba.+ 31 Uno ke sabado wa kukokolokelamo anweba, kabiji mukemanyikenga anwe bene.*+ Jino ke jilamuna ja myaka.

32 “Ñanga washingwa+ ne kuzhijikwa* kwingila mwingilo wa buñanga+ ukapingakena pe shanji,+ ye ukafuchilangako bantu mambo ne kuvwala bivwalo bya kisapi kya linenyi,+ ko kuba’mba bivwalo byazhila.+ 33 Akafuchileko mambo nzubo yazhila,+ tente wa lusambakeno+ ne kya kusokelapo bitapisho;+ kabiji ukafuchilako mambo bañanga ne kipwilo kyonse kya bantu.+ 34 Jino jikekala jilamuna jenu ja myaka,+ kuba’mba mukafuchilengako mambo bena Isalela na mambo a bubi bwabo bonse jimo pa mwaka pa mwaka.”+

Onkao mambo, waubile byonkatu Yehoba byo akambizhe Mosesa.

17 Yehoba watwajijile kwambila Mosesa amba: 2 “Buula Alona ne baana banji ne bena Isalela bonse amba, ‘Abino byo byakambizha Yehoba amba:

3 “‘“Umvwe muntu yense mu bena Isalela waipaya ñombe nangwa mwana mukooko nangwa mbuzhi mu kampu nangwa wamwipayila pangye ya kampu, 4 kabiji wabula kumuleta ku kibelo kya tente wa lusambakeno kuba’mba amulambule kwi Yehoba konka ku tente wa lusambakeno wa Yehoba, awo muntu mashi akamushinkamana mwine. Waichila mashi kabiji bafwainwa kumuchibako* ku balongo banji. 5 Kikekala bino, pa kuba’mba bena Isalela bakaletenga kwi Yehoba bitapisho byo batapishisha mungye, ne kwibileta kwi ñanga konka ku kibelo kya tente wa lusambakeno. Bakatapishenga bino bitapisho kwikala bitapisho bya mutende kwi Yehoba.+ 6 Kabiji ñanga akasanse mashi peulu ya kya kusokelapo bitapisho kya Yehoba konka ku kibelo kya tente wa lusambakeno ne kusoka mafuta kwikala bwema bwawama* kwi Yehoba.+ 7 Onkao mambo, kechi bakatapishenga jibiji bitapisho ku bandemona*+ bapasha bambuzhi bo babena kuba nabo bupite ne.+ Jino ke jilamuna jenu ja myaka ne myaka ne ku bisemi byenu byonse bya kulutwe.”’

8 “Wafwainwa kwibambila’mba, ‘Muntu yense mu bena Isalela nangwa muntu wafuma ku kyalo kingi ye mwikala nanji ukalambula mulambo wa kusoka nangwa kitapisho 9 kwa kubula kwikileta konka ku kibelo kya tente wa lusambakeno kuba’mba ekilambule kwi Yehoba, bafwainwa kumuchibako* ku balongo banji.+

10 “‘Muntu yense mu bena Isalela nangwa muntu wafuma ku kyalo kingi ye mwikala nanji waja mashi a byepi nangwa a byepi,+ nkakana awa* yense ukaja mashi kabiji nkamuchibako* ku balongo banji. 11 Mambo bumi* bwa kintu kyumi buji mu mashi,+ kabiji amiwa neapana pa kya kusokelapo bitapisho+ kwikala a kufuchilako mambo enu,*+ mambo mashi o afuchilako mambo na mambo a bumi* buji mu mashi. 12 O ene mambo o nabuujila bena Isalela namba: “Kafwako* nangwa umo wafwainwa kuja mashi ne, nangwa muntu wafuma ku kyalo kingi ye mwikala nanji+ kechi wafwainwa kuja mashi ne.”+

13 “‘Umvwe mwina Isalela nangwa muntu wafuma ku kyalo kingi ye mwikala nanji waya na kusonsola kabiji wakwata nyama wa mungye nangwa kañonyi ka kuja, wafwainwa kusuumisha mashi+ ako ne kuzhiikapo maloba. 14 Bumi* bwa kintu kyonse kyumi o mashi, mambo bumi* buji mu mashi. Onkao mambo, naambijile bena Isalela namba: “Kechi mukaje mashi a kintu kyonse kyumi ne, mambo bumi* bwa kintu kyonse kyumi o mashi. Yense ukeaja bakamuchibako.”*+ 15 Umvwe mwina kyalo nangwa muntu* wafuma ku kyalo kingi waja nyama wifwila nangwa ye batabaula ku nyama wa mungye,+ wafwainwa kuchapa bivwalo byanji ne kowa na mema, kabiji ukekala wa muzhilo kufikatu ne mabanga,+ kepo akekala wabula wa muzhilo. 16 Bino umvwe wabula kwibichapa kabiji wabula kowa mwine,* bakamutwika mambo anji.’”+

18 Yehoba watwajijile kwambila Mosesa amba: 2 “Buula bena Isalela amba, ‘Amiwa yami Yehoba Lesa wenu.+ 3 Kechi mwafwainwa kuba byonka byo boba ba mu kyalo kya Ijipita mo mwaikalanga ne, kabiji kechi mukoobenga byonka byuba ba mu kyalo kya Kenana mo mbena kwimutwala ne.+ Kechi mwafwainwa kulondela malamuna abo ne. 4 Mwafwainwa kulondela mizhilo yami ne kulama malamuna ami ne kwendela monka.+ Amiwa yami Yehoba Lesa wenu. 5 Mwafwainwa kulama malamuna ami ne mizhilo yami; yense ukebilondelanga ukekala na bumi na mambo a kwibilondela.+ Amiwa yami Yehoba.

6 “‘Kafwako mwanamulume mwi anweba wafwainwa kufwenya kwipi na mulongo wanji ne kwilaala nanji ne.*+ Amiwa yami Yehoba. 7 Kechi wafwainwa kwilaala na bashobe ne, kabiji kechi wafwainwa kwilaala na bainobe ne. Mambo bo bainobe, kabiji kechi wafwainwa kwilaala nabo ne.

8 “‘Kechi wafwainwa kulaala na ba muka bashobe ne.+ Mambo ko kulengesha bumvu* bashobe.

9 “‘Kechi wafwainwa kulaala na nyenga yobe ne, nangwa mwana wa mukazhi wa bashobe nangwa mwana wa mukazhi wa bainobe nangwa ye wasemwa nanji mu kisemi kimo nangwa wasemwa mu jivumo jingi ne.+

10 “‘Kechi wafwainwa kwilaala na munkanobe wa mukazhi wasemwa ku mwanobe wa mulume nangwa ku mwanobe wa mukazhi ne, mambo ko kwilengesha bumvu.

11 “‘Kechi wafwainwa kwilaala na mwana wa mukazhi wa ba muka bashobe ne, mwana wa bashobe, mambo ye nyenga yobe.

12 “‘Kechi wafwainwa kwilaala na nyenga ya bashobe ne. Mambo wasemwa na bashobe.+

13 “‘Kechi wafwainwa kwilaala na nkasa nangwa bakolojabo bainobe ne, mambo wasemwa na bainobe.

14 “‘Kechi wafwainwa kulengesha bumvu* bashobe ba banyike nangwa ba bakulumpe kupichila mu kwilaala na bakazhi babo ne. Mambo bo bainobe.+

15 “‘Kechi wafwainwa kwilaala na muko wobe wa mukazhi ne.+ Mambo ye muka mwanobe kabiji kechi wafwainwa kwilaala nanji ne.

16 “‘Kechi wafwainwa kwilaala na muka kolojobe nangwa muka nkasobe wa mulume ne,+ mambo ko kulengesha kolojobe nangwa nkasobe bumvu.*

17 “‘Umvwe wasongola mwanamukazhi, kechi wafwainwa kwilaala na mwananji wa mukazhi ne.+ Kechi wafwainwa kusenda munkananji wa mukazhi wasemwa ku mwananji wa mulume nangwa ku mwananji wa mukazhi kuba’mba wilaale nanji ne. Mambo ke balongo na balongo; kino ke kyubilo kya bunya.*

18 “‘Kechi wafwainwa kusongola mwanamukazhi kumupajika ku nkasanji nangwa kolojanji+ ne kulaala nanji, mukazhobe saka akiji mumi ne.

19 “‘Kechi wafwainwa kufwenya ku mwanamukazhi kimye kyo aji ku mwenzhi kuba’mba wilaale nanji ne.+

20 “‘Kabiji kechi wafwainwa kwilaala na muka mukwenu* ne kwizhilulula ne.+

21 “‘Kabiji kechi wafwainwa kuswisha mwanobe nangwa umo kumulambula* kwi Moleka+ ne. Kechi wafwainwa kuzhilulula jizhina ja Lesa wobe mu jino jishinda ne.+ Amiwa yami Yehoba.

22 “‘Kechi wafwainwa kwilaala na mwanamulume mukwenu byonkatu byo wilaala na mwanamukazhi ne.+ Kino ke kintu kya bunya.

23 “‘Mwanamulume kechi wafwainwa kwilaala na nyama ne kwizhilulula ne; kabiji mwanamukazhi kechi wafwainwa kwipana ku nyama ne kwilaala nanji ne.+ Mambo kino ke kimalwamalwa.

24 “‘Kechi ukezhilulule na bino bintu ne, mambo bino bintu byo byalengela bisaka byo mbena kupanga kwi anweba kwizhilulula.+ 25 Onkao mambo, kyalo kyaikala ke kya muzhilo, kabiji nkekikabisha na mambo a bubi bwakyo, ne bangikazhi bakebapangamo mu kyalo.+ 26 Pakuba anweba mwafwainwa kulama malamuna ami ne mizhilo yami+ kabiji kechi mwafwainwa kuba bino bintu bya bunya ne, nangwa mwine mwina kyalo nangwa muntu wafuma ku kyalo kingi ye mwikala nanji.+ 27 Mambo abino bintu bya bunya byo byo baubanga banabalume baikalanga mu kino kyalo anweba saka mukyangye kwikalamo,+ onkao mambo, kyalo kyaikala kya muzhilo. 28 Kyalo po po kikabula kwimulasa na mambo a kwikizhilulula byonkatu byo kyalashile bisaka byajingamo saka mukyangye kwikalamo ne. 29 Umvwe muntu yense akobe bino bintu bya bunya, aba* bonse bakebyuba bafwainwa kwibachibako* ku balongo babo. 30 Mwafwainwa kulama mulaye wenu kwi amiwa kupichila mu kubula kuba bisho byonse bya bunya byo baubilenga saka mukyangye kwiya,+ pa kuba’mba mukabule kwizhilulula na bino bintu. Amiwa yami Yehoba Lesa wenu.’”

19 Yehoba waambijile Mosesa amba: 2 “Buula jibumba jonse ja bena Isalela amba, ‘Mwafwainwa kwikala bazhila, mambo amiwa Yehoba Lesa wenu, nazhila.+

3 “‘Muntu yense wafwainwa kunemeka* bainanji ne bashanji,+ kabiji mukalamenga masabado ami.+ Amiwa yami Yehoba Lesa wenu. 4 Kechi mwafwainwa kwingijila balesa batutu+ nangwa kulenga balesa ba kyela ne.+ Amiwa yami Yehoba Lesa wenu.

5 “‘Umvwe mwatapisha kitapisho kya mutende kwi Yehoba,+ mwafwainwa kwikitapisha mu jishinda jikemulengela kubilwa bibusa.+ 6 Mwafwainwa kwikija pa juba jonka jo mwikitapisha ne pa juba jikalondelapo, pakuba abya bikashalapo pa juba ja busatu mwafwainwa kwibisoka mu mujilo.+ 7 Bino umvwe bebija pa juba ja busatu, ke kintu kya bunya, kabiji kechi kikatambulwa ne. 8 Muntu ukebija ukatwikwa mambo anji, mambo wazhilulula kintu kyazhila kya kwa Yehoba, kabiji awo muntu* bafwainwa kumuchibako* ku balongo banji.

9 “‘Byo mukanowanga kajo mu kyalo kyenu, kechi mukanowe kufika ne kwapela majimi enu onse ne, kabiji kechi mukapupule kajo kakashalamo ne.+ 10 Kabiji kechi mukaape mañanzañanza a mu majimi enu akashalamo ne, nangwa kutolaula mañanzañanza akalakachila panshi ne. Mukeashe kwikala a bayanji*+ ne bantu bafuma ku byalo bingi. Amiwa yami Yehoba Lesa wenu.

11 “‘Kechi mwafwainwa kwiba ne,+ kechi mwafwainwa kujimbaikañana ne,+ kabiji kechi mwafwainwa kwibepelanga anwe bene na bene ne. 12 Kechi mwafwainwa kuchipa bubela mu jizhina jami ne,+ kabiji kechi mwafwainwa kupelula jizhina ja Lesa wenu ne. Amiwa yami Yehoba. 13 Kechi wafwainwa kujimbaika mukwenu ne,+ kabiji kechi wafwainwa kwiba ne.+ Mfweto ya muntu wa kwingijila, kechi wafwainwa kwikala nayo bufuku bonse kufika ne lukelo ne.+

14 “‘Kechi wafwainwa kufinga* muntu washinka matwi nangwa kubika mu jishinda kintu kyakonsha kwituntulako mpofu ne,+ wafwainwa kwakamwa Lesa wobe.+ Amiwa yami Yehoba.

15 “‘Kechi mwafwainwa kuchibila mambo mungi ne. Kechi wafwainwa kumwesha misalululo ku muntu muyanji nangwa kunemekako munonshi ne.+ Wafwainwa kuchiba mambo a mukwenu monka mo aolokela.

16 “‘Kechi wafwainwa kupitañana na kuba luntepentepe mu balongo bobe ne.+ Kechi wafwainwa kwimena bumi* bwa mukwenu* ne.+ Amiwa yami Yehoba.

17 “‘Kechi wafwainwa kushikwa mulongo wobe mu muchima wobe ne.+ Wafwainwa kumufundako mukwenu+ pa kuba’mba ukabule kutwikwa bubi bwanji.

18 “‘Kechi wafwainwa kushinkanya ne,+ nangwa kwikala na mfika na bakwenu ne, kabiji wafwainwa kutemwa mukwenu byonka byo witemwa obe mwine.+ Amiwa yami Yehoba.

19 “‘Mwafwainwa kulama malamuna ami: Kechi wafwainwa kuleka banyama bobe ba kulela kwisampama na banyama ba mutundu ungi ne. Kechi wafwainwa kubyala nkunwa ya mitundu ibiji mu bujimi bobe ne,+ kabiji kechi wafwainwa kuvwala kivwalo kyo bapikula na tonge wa mitundu ibiji ne.+

20 “‘Umvwe mwanamulume wilaala na muzha wa mukazhi ye babajikila ku mwanamulume ungi, bino bakyangye kumukuula nangwa kumupa bwana bwa bene, bafwainwa kwibakambula. Nangwa byonkabyo, kechi bafwainwa kwibepaya ne, mambo mwanamukazhi kechi wajinga na bwana bwa bene ne. 21 Mwanamulume wafwainwa kuleta mulambo wa mambo kwi Yehoba konka ku kibelo kya tente wa lusambakeno, ko kuba’mba mukooko mulume wa mulambo wa mambo.+ 22 Ñanga akamufuchileko mambo anji na mukooko mulume wa mulambo wa mambo kwi Yehoba na mambo o alengele, kabiji bakamulekelako mambo o alengele.

23 “‘Byo mukatwela mu kyo kya kyalo ne kujimba bichi byonse bya bipangwa, abya bipangwa mukebitalenga nobe bya muzhilo kabiji bintu byo bakanya. Bakemukanya kujako myaka isatu. Kange mukajeko ne. 24 Bino mu mwaka wa buna bipangwa byabyo bikekala byazhila bya kusangalelamo kwi Yehoba.+ 25 Kepo mu mwaka wa butanu mukaje bipangwa byabyo ne kwibivwanga ku byo mukanowanga. Amiwa yami Yehoba Lesa wenu.

26 “‘Kechi mwafwainwa kuja kintu kiji na mashi ne.+

“‘Kechi mwafwainwa kuba bya lubuko nangwa bya buñanga ne.+

27 “‘Kechi mwafwainwa kutenda* bimpolobela* nangwa kutenda kunsa ya myevu ne.+

28 “‘Kechi mwafwainwa kwichibaula pa mibiji yenu na mambo a muntu* wafwa ne,+ kabiji kechi mwafwainwa kwinemba nembo ne. Amiwa yami Yehoba.

29 “‘Kechi wafwainwa kupelula mwanobe wa mukazhi kupichila mu kumulengela kwikala pite ne,+ pa kuba’mba mu kyalo mukabule kwikala bupite, kabiji mukabule kuyula byubilo byatama.+

30 “‘Mwafwainwa kulama masabado ami,+ ne kunemeka* nzubo yami yazhila. Amiwa yami Yehoba.

31 “‘Kechi wafwainwa kuya ku bantu besamba na mipashi+ nangwa bamba bikamweka kulutwe+ ne, kuba’mba bakabule kwimulengela kwikala ba muzhilo. Amiwa yami Yehoba Lesa wenu.

32 “‘Wafwainwa kushingika mukote wa mvwi,+ kabiji wafwainwa kunemeka mukote+ ne kwakamwa Lesa wobe.+ Amiwa yami Yehoba.

33 “‘Inge muntu wafuma ku kyalo kingi akekalenga ne anweba mu kyalo kyenu, kange mukamumanyikenga ne.+ 34 Muntu wafuma ku kyalo kingi ye mukekala nanji mwafwainwa kumumonanga nobe mwina kyalo ye mwikala nanji;+ kabiji mwafwainwa kumutemwa byonkatu byo mwitemwa anwe bene, mambo ne anweba mwajinga benyi mu kyalo kya Ijipita.+ Amiwa yami Yehoba Lesa wenu.

35 “‘Kechi mwafwainwa kwingijisha bipimo bya bujimbijimbi pa kupima bula, kinemenezhi nangwa bintu biji nobe mema ne.+ 36 Mwafwainwa kwingijisha mashikelu awama, bya kupiminako kinemenezhi byawama, kipimo kyawama kya kupiminako bintu byauma,* ne kya kupiminako bintu bya mema mema.*+ Amiwa yami Yehoba Lesa wenu wimufumishe mu kyalo kya Ijipita. 37 Onkao mambo, mwafwainwa kulama malamuna ami onse ne mizhilo yami yonse ne kwiilondela.+ Amiwa yami Yehoba.’”

20 Yehoba watwajijile kwambila Mosesa amba: 2 “Buula bena Isalela amba, ‘Mwina Isalela ne muntu yense wafuma ku kyalo kingi wikala mu bena Isalela ukapana mwananji kwi Moleka, bafwainwa kumwipaya.+ Bantu ba mu kyalo bakamwase mabwe akafwe. 3 Amiwa nkamukana awo muntu kabiji nkamuchibako* ku balongo banji mambo wapana mwananji kwi Moleka kabiji wazhilulula mpunzha yami yazhila+ ne kupelula jizhina jami. 4 Umvwe bantu ba mu kyalo bavulañanyako ku kintu kyauba yewo muntu kya kupana mwananji kwi Moleka kabiji babula kumwipaya,+ 5 amiwa nkamukana awo muntu ne kisemi kyanji.+ Kabiji awo muntu nkamuchibako* ku balongo banji pamo na bonse bakenunga kwi aye mu kuba bupite na Moleka.

6 “‘Muntu* ukepuzha bantu besamba na mipashi+ ne bamba bikamweka kulutwe+ ukekala wabula bukishinka kwi amiwa,* kine awo muntu* nkamukana ne kumuchibako* ku balongo banji.+

7 “‘Mwafwainwa kwizhijika ne kwikala bazhila,+ mambo amiwa yami Yehoba Lesa wenu. 8 Kabiji mwafwainwa kulama malamuna ami ne kwialondela.+ Amiwa yami Yehoba, ubena kwimuzhijika.+

9 “‘Umvwe muntu wafinga* bashanji nangwa bainanji, bafwainwa kumwipaya.+ Kabiji mashi anji akamushinkamana mwine, mambo wafinga bashanji nangwa bainanji.

10 “‘Pa mambo a mwanamulume wauba bukende na muka mukwabo: Awa wauba bukende na muka mukwabo bafwainwa kumwipaya, bonse babiji mwanamulume ne mwanamukazhi.+ 11 Mwanamulume wilaala na muka bashanji, walengesha bumvu* bashanji.+ Bonse babiji bafwainwa kwibepaya. Mashi abo akebashinkamana abo bene. 12 Umvwe mwanamulume wilaala na mulokazhi wanji, bonse babiji bafwainwa kwibepaya. Bauba kimalwamalwa. Kabiji mashi abo akebashinkamana abo bene.+

13 “‘Umvwe mwanamulume walaala na mwanamulume mukwabo byonkatu byo balaala na mwanamukazhi, bonse babiji bauba kintu kya bunya.+ Bafwainwa kwibepaya. Kabiji mashi abo akebashinkamana abo bene.

14 “‘Umvwe mwanamulume wapajika mwana ne inanji, kino ke kyubilo kya bunya.*+ Bonse basatu bafwainwa kwibasoka mu mujilo+ pa kuba’mba byubilo bya bunya bibule kutwajijila mukachi kenu.

15 “‘Umvwe mwanamulume walaala na nyama, bafwainwa kumwipaya, kabiji mwafwainwa kwipaya ne yewo nyama pamo.+ 16 Umvwe mwanamukazhi wipana ku nyama kuba’mba elaale nanji,+ mwafwainwa kwipaya yewo mwanamukazhi ne nyama pamo. Bafwainwa kwibepaya. Kabiji mashi abo akebashinkamana abo bene.

17 “‘Umvwe mwanamulume wilaala na nyenga yanji, ko kuba’mba mwana bashanji nangwa wa bainanji kabiji wamona bya bwanabukazhi bya nyenga yanji ne nyenga yanji naye wamona byendelwa byanji, ke kintu kya bumvu.+ Onkao mambo, bafwainwa kwibachibako* baana ba bantu babo saka bamonako. Walengesha bumvu* nyenga yanji. Wafwainwa kutwikwa mambo anji.

18 “‘Umvwe mwanamulume walaala na mwanamukazhi uji ku mwenzhi, bonse babiji kechi banemeka mashi a mwanamukazhi ne.+ Onkao mambo, bonse babiji bafwainwa kwibachibako* ku balongo babo.

19 “‘Kechi wafwainwa kwilaala na bainobe ba bakulumpe nangwa ba banyike nangwa bashobenkazhi ne, mambo kuba kino ke kulengesha bumvu mulongo wobe.+ Bafwainwa kutwikwa mambo abo. 20 Mwanamulume wilaala na ba muka bashanji ba bakulumpe nangwa ba banyike walengesha bashanji ba bakulumpe nangwa ba banyike bumvu.*+ Bafwainwa kutwikwa mambo abo. Kabiji bakafwa kwa kubula kusemapo mwana. 21 Umvwe mwanamulume wasongola muka kolojanji nangwa nkasanji, ke kintu kya bunya bingi.+ Walengesha kolojanji nangwa nkasanji bumvu.* Kechi bakasemapo baana ne.

22 “‘Mwafwainwa kulama malamuna ami onse ne mizhilo yami yonse+ ne kwiilondela+ pa kuba’mba bakabule kwimulasa mu kyalo mo mbena kwimutwala amba mukekalemo.+ 23 Kechi mwafwainwa kulondela malamuna a bisaka bya bantu byo mbena kupanga kwi anweba ne;+ mambo abo bauba bino bintu byonse kabiji nebashikwa.+ 24 O ene mambo o nemubuujile namba: “Mukatambule kyalo kyabo, kabiji nkekipana kwi anweba kwikala ke kyenu, kyalo kyavula mukaka ne buki.+ Amiwa yami Yehoba Lesa wenu wimusala mu mitundu ya bantu.”+ 25 Mwafwainwa kupusanya nyama wabula wa muzhilo ne wa muzhilo, ñonyi wa muzhilo ne wabula wa muzhilo;+ kabiji kechi mwafwainwa kwikala ba bunya na mambo a nyama nangwa ñonyi nangwa kyonse kikalaba panshi byo nemusajila amba bya muzhilo ne.+ 26 Mwafwainwa kwikala bazhila kwi amiwa, mambo amiwa Yehoba, nazhila,+ kabiji nemusala mu bisaka bya bantu kuba’mba mwikale bantu bami.+

27 “‘Mwanamulume nangwa mwanamukazhi yense wisamba na mipashi nangwa uji na mupashi wa kwambila jimo bya kulutwe,* bafwainwa kumwipaya.+ Bakebepaye ku bantu na mabwe. Kabiji mashi abo akebashinkamana abo bene.’”

21 Yehoba waambijile Mosesa amba: “Buula baana ba kwa Alona bañanga amba, ‘Kafwako muntu nangwa umo wafwainwa kwizhilulula na mambo a muntu* wafwa wa mu balongo banji ne.+ 2 Bino wakonsha kuba kino umvwe mulongo wanji wa mu kisemi kimo, nabiji bainanji, bashanji, mwananji wa mulume, mwananji wa mukazhi, kolojanji nangwa nkasanji wa mulume. 3 Kabiji wakonsha kwizhilulula na mambo a nyenga yanji, umvwe nyenga yanji kisungu, wa mu kisemi kimo kabiji ukyangye kusongolwa. 4 Kechi wakonsha kwizhilulula ne kwipelula aye mwine na mambo a mwanamukazhi wasongolwa ku mukwabo wa mu balongo banji ne. 5 Kechi bafwainwa kutenda kakuku mutwe+ nangwa kutenda kunsa ya myevu yabo nangwa kwichibaula pa mibiji yabo ne.+ 6 Bafwainwa kwikala bazhila kwi Lesa wabo+ kabiji kechi bafwainwa kupelula jizhina ja Lesa wabo ne,+ mambo bo balambula milambo ya kusoka pa mujilo kwi Yehoba, shinkwa* wa Lesa wabo, bafwainwa kwikala bazhila.+ 7 Kechi bafwainwa kusongola pite,+ mwanamukazhi ye bazhilulula nangwa mwanamukazhi ye bakaana ku mwatawanji ne,+ mambo ñanga ye wazhila kwi Lesa wanji. 8 Wafwainwa kumuzhijika,+ mambo ye ulambula kajo ka Lesa wobe. Aye wafwainwa kwikala wazhila kwi obewa, mambo amiwa Yehoba, mbena kwimuzhijika, nazhila.+

9 “‘Umvwe mwana wa mukazhi wa kwa ñanga wizhilulula aye mwine na mambo a kuba bupite, ko kuba’mba wazhilulula bashanji. Bafwainwa kumusoka mu mujilo.+

10 “‘Ñanga mwine mukatampe wa mu balongo banji ye bashinga manyi pa mutwe+ kabiji ye bazhijika* kuba’mba avwalenga bivwalo bya buñanga,+ kechi wafwainwa kwikala na nsuki yazakalala nangwa kutabula bivwalo byanji ne.+ 11 Kechi wafwainwa kufwenya ku bwipi na muntu* wafwa ne;+ kechi wafwainwa kwizhilulula nangwa na bashanji nangwa bainanji ne. 12 Kechi wafwainwa kulupukamo mu nzubo yazhila ne, kabiji kechi wafwainwa kuzhilulula nzubo yazhila ya Lesa ne,+ mambo kayukilo ka kwipana ne manyi a kushinga a Lesa wanji biji pe aye.+ Amiwa yami Yehoba.

13 “‘Wafwainwa kusongola mwanamukazhi kisungu.+ 14 Kechi akasongole mwanamukazhi wafwilwa, mwanamukazhi ye bakana, ye bazhilulula nangwa pite ne; bino wafwainwa kusongola kisungu wa mu bena Isalela kwikala mukazhanji. 15 Kechi wafwainwa kuzhilulula baana* banji mu bena Isalela ne,+ mambo amiwa yami Yehoba mbena kumuzhijika.’”

16 Yehoba watwajijile kwambila Mosesa amba: 17 “Buula Alona amba, ‘Kafwako wa mu baana* bobe ba mu bisemi byonse bya kulutwe walemana wafwainwa kufwenya kwipi ne kulambula kajo ka Lesa wanji ne. 18 Umvwe kuji mwanamulume walemana kechi wafwainwa kufwenya kwipi ne: ko kuba’mba mwanamulume mpofu nangwa kilema nangwa walemana kilungi* nangwa uji na kulu nangwa kuboko kumo kwalepa, 19 mwanamulume walemana kulu nangwa kuboko, 20 uji na ntunda nangwa watola* nangwa walemana jiso nangwa uji na nkwasa nangwa uji na biseseya nangwa walemana byendelwa.+ 21 Kafwako mwanamulume yense walemana wa mu baana* ba kwa Alona ñanga, wafwainwa kufwenya kwipi ne kulambula kwi Yehoba milambo ya kusoka pa mujilo ne. Na mambo a kuba’mba walemana, kechi wafwainwa kufwenya kwipi ne kulambula kajo ka Lesa wanji ne. 22 Wakonsha kuja kajo ka Lesa wanji kafuma ku milambo yazhijisha+ ne ku milambo yazhila.+ 23 Nangwa byonkabyo, kechi wafwainwa kufwenya kwipi na kipembe ne,+ kabiji kechi wafwainwa kufwenya kwipi na kya kusokelapo bitapisho ne,+ mambo walemana; kabiji kechi wafwainwa kuzhilulula nzubo yami yazhila ne,+ mambo amiwa yami Yehoba mbena kwibazhijika.’”+

24 Onkao mambo, Mosesa wabuujile Alona ne baana banji ba balume ne bena Isalela bonse.

22 Kabiji Yehoba waambijile Mosesa amba: 2 “Buula Alona ne baana banji amba bafwainwa kujimuka pa kwingijisha* milambo yazhila ya bena Isalela, kabiji kechi bafwainwa kuzhilulula jizhina jami jazhila+ na mambo a bintu byo babena kuzhijika kwi amiwa ne.+ Amiwa yami Yehoba. 3 Wibabuule’mba, ‘Ku bisemi byenu byonse bya kulutwe, mwanenu yense ukafwenya kwipi ku milambo yazhila bena Isalela yo bakazhijika kwi Yehoba saka aji wa muzhilo, awo muntu* bafwainwa kumuchibako* kwi amiwa.+ Amiwa yami Yehoba. 4 Kafwako muntu wa mu baana ba kwa Alona uji na mbumba+ nangwa uji na kikola kya kusuuma+ wafwainwa kuja ku milambo yazhila kufikatu ne byo akekala wabula wa muzhilo,+ nangwa muntu ukakwata muntu* wafwa ukekala wa muzhilo,+ nangwa mwanamulume witayila malume,+ 5 nangwa mwanamulume wakwata bilengwa byenda kisamba+ nangwa ukakwata muntu ukekala wa muzhilo na mambo a bintu bikwabo, wakonsha kumulengela kwikala wa muzhilo.+ 6 Muntu* ukakwata ku bino bintu byonse ukekala wa muzhilo kufikatu ne mabanga kabiji kechi wafwainwa kuja milambo yazhila ne, bino wafwainwa kowa mema.+ 7 Umvwe juba jazhika, ukekala wabula wa muzhilo kabiji inge wapwisha kuba bino, wakonsha kuja milambo yazhila, mambo ko kajo kanji.+ 8 Kabiji kechi wafwainwa kuja nyama wifwila nangwa kintu kyo batabaula ku nyama mukaji wa mungye ne kwizhilulula na mambo a bino ne.+ Amiwa yami Yehoba.

9 “‘Bafwainwa kulama mulaye wabo kwi amiwa kuba’mba bakabule kwikala na mambo ne kufwa na mambo a kumuzhilulula. Amiwa yami Yehoba mbena kwibazhijika.

10 “‘Kafwako muntu* ye babula kuswisha wafwainwa kuja kintu kyazhila ne.+ Kafwako mwenyi wa ñanga nangwa wa mwingilo wafwainwa kuja kintu kyazhila ne. 11 Umvwe ñanga wapota muntu* na mali anji, awo muntu wakonsha kujako. Bazha basemenwa mu nzubo yanji nabo bakonsha kujako kajo kanji.+ 12 Umvwe mwana wa mukazhi wa ñanga wasongolwa ku muntu wabula ñanga,* kechi wafwainwa kujako bya bupe byazhila ne. 13 Pakuba umvwe mwana wa mukazhi wa ñanga wafwilwa nangwa bamukana kabiji kechi wasemapo mwana ne, kabiji wabwela ku nzubo ya bashanji byonkatu byo ajinga saka akiji nsongwakazhi, wakonsha kujako kajo ka bashanji;+ bino kafwako muntu* ye babula kuswisha wafwainwa kujako ne.

14 “‘Umvwe muntu waja milambo yazhila kwa kubula kuyuka, wafwainwa kubikapo kipimo kya butanu kya pa mulambo wazhila ne kupana mulambo wazhila kwi ñanga.+ 15 Onkao mambo, kechi bafwainwa kuzhilulula milambo yazhila ya bena Isalela yo balambula kwi Yehoba,+ 16 ne kwiletela lukabisho bene na mambo a kuja bintu byazhila ne; mambo amiwa yami Yehoba mbena kwibazhijika.’”

17 Yehoba watwajijile kwambila Mosesa amba: 18 “Buula Alona ne baana banji ne bena Isalela bonse amba, ‘Mwina Isalela nangwa muntu wafuma ku kyalo kingi wikala mu bena Isalela inge wapana mulambo wa kusoka+ kwi Yehoba kuba’mba afikizhe luchipo lwanji nangwa kulambula mulambo wa kwifuukwila,+ 19 wafwainwa kulambula ñombe mulume wabula bulema,+ baana ba mikooko balume nangwa bambuzhi, kuba’mba bakamubile bibusa. 20 Kechi mwafwainwa kulambula kilelwa kiji na bulema ne,+ mambo kikemulengela kubula kwimubila bibusa.

21 “‘Inge muntu watapisha kitapisho kya mutende+ kwi Yehoba kwikala kya luchipo nangwa kwikala mulambo wa kwifuukwila, kyafwainwa kwikala kya ñombe wabula bulema nangwa mukooko, kuba’mba obilwe bibusa. Kechi wafwainwa kwikala na bulema nangwa pachechetu ne. 22 Nyama wa mulambo kechi wafwainwa kwikala wasabika meso, wachimuka, uji na kilonda, kitumbwatumbwa, nkwasa, nangwa biseseya ne; kechi mwafwainwa kulambula bano banyama kwi Yehoba nangwa kwibalambula kwi Yehoba pa kya kusokelapo bitapisho ne. 23 Mwakonsha kulambula ñombe nangwa mukooko uji na kulu kwalepa nangwa kwaipipa kwikala mulambo wa kwifuukwila, pano bino, umvwe mulambo wa kuchipa, kechi bakamuswa ne. 24 Kechi mwafwainwa kulambula kwi Yehoba nyama uji na byendelwa byaonaika, nangwa byo bashiba nangwa byo bavingaula nangwa byo bachiba ne, kabiji kechi mwafwainwa kulambula banyama ba uno mutundu mu kyalo kyenu ne. 25 Kechi mwafwainwa kulambula banyama ba uno mutundu bo mukatambula ku bantu bafuma ku kyalo kingi kwikala kajo ka kulambula kwi Lesa wenu ne, mambo batama kabiji balemana. Kechi bakemulengela kwimubila bibusa ne.’”

26 Yehoba waambijile Mosesa jibiji amba: 27 “Umvwe mwana ñombe nangwa mwana mukooko mulume nangwa mbuzhi wasemwa, ukekala na inanji pa moba atanu na abiji,+ bino pa juba ja butanu na busatu ne kuya kulutwe ukatambwilwa kwikala mulambo wa kusoka pa mujilo kwi Yehoba. 28 Pakuba ñombe nangwa mukooko, kechi mwafwainwa kumwipayila pamo na mwananji pa juba jimo ne.+

29 “Umvwe mwatapisha kitapisho kya kusanta kwi Yehoba,+ mwafwainwa kwikitapisha pa kuba’mba bemubile bibusa. 30 Mwafwainwa kwikija pa jonkajo juba. Kechi mwafwainwa kushapo bimo kufika lukelo ne.+ Amiwa yami Yehoba.

31 “Mwafwainwa kulama mikambizho yami ne kwiilondela.+ Amiwa yami Yehoba. 32 Kechi mwafwainwa kuzhilulula jizhina jami jazhila ne,+ kabiji nafwainwa kuzhijikwa mu bena Isalela.+ Amiwa yami Yehoba, ubena kwimuzhijika,+ 33 yenka ubena kwimufumya mu kyalo kya Ijipita kuba’mba ngikale Lesa wenu.+ Amiwa yami Yehoba.”

23 Yehoba watwajijile kwambila Mosesa amba: 2 “Buula bena Isalela amba, ‘Bijiilo+ bya Yehoba byo mwafwainwa kwikala nabyo+ ke kushonkena kwazhila. Abino byo bijiilo byami:

3 “‘Mwakonsha kwingila mwingilo pa moba atanu na jimo, bino juba ja butanu na bubiji ke ja sabado ja kukokoloka,+ ko kushonkena kwazhila. Kechi mukengilenga mwingilo nangwa umotu ne. Jino ke juba ja sabado kwi Yehoba konse ko mukekalanga.+

4 “‘Abino byo bijiilo bya Yehoba, ko kushonkena kwazhila, byo mwafwainwa kutayila mbila pa bimye byabyo byatongolwa: 5 Mu ñondo mutanshi pa juba ja bu 14,+ kimye kya muntuwa muntuwa,* jikekala ja Kijiilo kya Lupitailo+ kwi Yehoba.

6 “‘Pa juba ja bu 15 ja uno ñondo jikekala ja Kijiilo kya Bashinkwa Babula Mbizho kwi Yehoba.+ Pa moba atanu na abiji mukajenga bashinkwa babula mbizho.+ 7 Pa juba jitanshi mukekale na kushonkena kwazhila.+ Kechi mwafwainwa kwingila mwingilo wakosa nangwa umotu ne. 8 Bino mukalambulenga mulambo wa kusoka pa mujilo kwi Yehoba pa moba atanu na abiji. Kukekala kushonkena kwazhila pa juba ja butanu na bubiji. Kechi mwafwainwa kwingila mwingilo wakosa nangwa umotu ne.’”

9 Yehoba watwajijile kwambila Mosesa amba: 10 “Buula bena Isalela amba, ‘Byo mukafika mu kyalo kyo mbena kwimupa ne byo mukanowa kajo, mwafwainwa kuleta kikuta kya kajo ka nsomo+ kwi ñanga.+ 11 Kabiji ñanga akapepezhe kino kikuta kwi Yehoba kuba’mba mukobilwe bibusa. Ñanga akekipepezhe pa juba jikalondelapo kufuma pa ja Sabado. 12 Pa juba jo bakapepezha kikuta kya kajo, mwafwainwa kulambula mwana mukooko mulume wabula bulema wa mwaka umo, kwikala mulambo wa kusoka kwi Yehoba. 13 Kabiji mulambo wanji wa kajo akekale wa bipimo bibiji bya bunga bwalamba bwavwangakana na manyi bya mu bipimo jikumi bitwela mu efa* kwikala mulambo wa kusoka pa mujilo kwi Yehoba wa bwema bwawama.* Kabiji mulambo wanji wa binyu akekale kipimo kimo kya mu bipimo bina bitwela mu hini* wa binyu. 14 Kechi wafwainwa kuja shinkwa wa kajo ka kukanga nangwa kajo kakatataka jino juba saka jikyangye kufika ne, posotu byo mukaleta mulambo wa Lesa wenu. Jino ke jilamuna ja myaka ne myaka ku bisemi byenu byonse konse konse ko mukekalanga.

15 “‘Mukabale masabado atanu na abiji kufuma pa juba ja Sabado, kufuma pa juba jo mukaleta kikuta kya kajo ka mulambo wa kupepezha.+ Yafwainwa kwikala milungu ituntulu. 16 Mukabale moba 50+ kufika pa juba jikalondelapo kufuma pa ja Sabado wa butanu na bubiji, kepo mukalambule kwi Yehoba mulambo wa kajo kakatataka.+ 17 Mukalete bashinkwa babiji ba mulambo wa kupepezha kufuma mu mapunzha enu mo mukekalanga. Bano bashinkwa bafwainwa kulengwa na bipimo bibiji bya bunga bya mu bipimo jikumi bitwela mu efa.* Mukabikeko mbizho+ ne kwibosha kwikala kajo ka nsomo kwi Yehoba.+ 18 Mukalambule bashinkwa pamo na baana ba mikooko balume babula bulema batanu na babiji ba mwaka umo ne mwana ñombe umo ne mikooko ilume ibiji.+ Bakekale ke mulambo wa kusoka kwi Yehoba pamo na mulambo wa kajo ne mulambo wa binyu, kwikala mulambo wa kusoka pa mujilo wa bwema bwawama* kwi Yehoba. 19 Kabiji mwafwainwa kulambula mwana mbuzhi umo kwikala mulambo wa bubi+ ne baana ba mikooko babiji balume kwikala kitapisho kya mutende.+ 20 Ñanga akebapepezhe pamo na bashinkwa ba kajo ka nsomo kwikala mulambo wa kupepezha kwi Yehoba pamo na baana ba mikooko babiji balume. Byafwainwa kwikala bintu byazhila kwi Yehoba bya kwa ñanga.+ 21 Pa jino juba, mukataye mbila ya kuba’mba mukekala na kushonkena kwazhila.+ Kechi mukengile mwingilo wakosa nangwa umotu ne. Jino ke jilamuna ja myaka ne myaka ku bisemi byenu byonse mu mapunzha enu onse mo mukekalanga.

22 “‘Byo mukanowanga kajo mu kyalo kyenu, kechi mwafwainwa kunowa kajo konse kufika ne kwapela majimi enu ne, kabiji kechi mwafwainwa kupupula kajo kakashalamo ne.+ Mukekashe kwikala ka muyanji*+ ne muntu wafuma ku kyalo kingi.+ Amiwa yami Yehoba Lesa wenu.’”

23 Yehoba watwajijile kwambila Mosesa amba: 24 “Buula bena Isalela amba, ‘Mu ñondo wa butanu na bubiji, pa juba jitanshi ja ñondo, mukakokoloke, kikekala kya kuvulukilako kikayukanyikilwa ku kuvuma kwa ntolompita,+ ko kushonkena kwazhila. 25 Kechi mukengile mwingilo wakosa nangwa umotu ne, kabiji mukalambule mulambo wa kusoka pa mujilo kwi Yehoba.’”

26 Yehoba waambijile Mosesa jibiji amba: 27 “Pano bino, juba ja bujikumi mu ñondo wa butanu na bubiji, jikekala Juba ja Kufuchila Mambo.+ Mukekale na kushonkena kwazhila, kabiji mukemanyike anwe bene*+ ne kulambula mulambo wa kusoka pa mujilo kwi Yehoba. 28 Kechi mukengile mwingilo nangwa umotu pa jino juba ne, mambo ke juba ja kwimufuchilako+ mambo enu kwi Yehoba Lesa wenu. 29 Muntu* yense ukabula kwimanyika mwine* pa jino juba, bakamuchibeko* ku bantu banji.+ 30 Kabiji nkonauna muntu* yense ukengila mwingilo pa jino juba. 31 Kechi mwafwainwa kwingila mwingilo nangwa umotu ne. Jino ke jilamuna ja myaka ku bisemi byenu byonse konse ko mukekalanga. 32 Jino ke juba ja sabado ja kukokolokelamo anweba, kabiji mukemanyike anwe bene*+ pa juba ja butanu na buna ja ñondo kimye kya mabanga. Mwafwainwa kulama sabado kutendeka mabanga kukafika ne ku mabanga a juba jikwabo.”

33 Yehoba watwajijile kwambila Mosesa amba: 34 “Buula bena Isalela amba, ‘Juba ja bu 15 ja uno ñondo wa butanu na bubiji jikekala ke ja Kijiilo kya Mimba* kya moba atanu na abiji kwi Yehoba.+ 35 Kukekala kushonkena kwazhila pa juba jitanshi, kabiji kechi mwafwainwa kwingila mwingilo wakosa nangwa umotu ne. 36 Pa moba atanu na abiji mwafwainwa kulambula mulambo wa kusoka pa mujilo kwi Yehoba. Pa juba ja butanu na busatu, mwafwainwa kwikala na kushonkena kwazhila,+ kabiji mukalambule mulambo wa kusoka pa mujilo kwi Yehoba. Kuno ke kubuñana kwazhila. Kechi mukengile mwingilo wakosa nangwa umotu ne.

37 “‘Abino byo bijiilo+ bya Yehoba byo mukatayilanga mbila kwikala kushonkena kwazhila+ kwa kulambwilamo mulambo wa kusoka pa mujilo kwi Yehoba: mulambo wa kusoka,+ mulambo wa kajo+ wa kitapisho ne milambo ya binyu,+ monka mwayila bikebewa pa juba pa juba. 38 Abino byo byanungwa pa byo mukalambulanga pa masabado a Yehoba,+ bya bupe byenu,+ milambo yenu ya luchipo+ ne milambo yenu ya kwifuukwila+ yo mwafwainwa kupana kwi Yehoba. 39 Pano bino, pa juba ja bu 15 ja uno ñondo wa butanu na bubiji, byo mukabungizha kajo ka mu kyalo, mukekale na kijiilo kya Yehoba pa moba atanu na abiji.+ Juba jitanshi jikekala ja kukokoloka kabiji juba ja butanu na busatu najo jikekala ja kukokoloka.+ 40 Pa juba jitanshi, mukashikule bipangwa bya ku bichi bikatampe, mapambo a bisonga,+ misampi ya bichi biji na mabuula avula ne misombo ya mu kimpachiko* kabiji mukasangalale+ kwi Yehoba Lesa wenu pa moba atanu na abiji.+ 41 Mukekalenga na kino kijiilo kwi Yehoba moba atanu na abiji pa mwaka pa mwaka.+ Jino ke jilamuna ja myaka ku bisemi byenu byonse bya kulutwe, mukekalenga nakyo mu ñondo wa butanu na bubiji. 42 Mukekalenga mu mimba moba atanu na abiji.+ Bena Isalela bonse bakekalenga mu mimba, 43 pa kuba’mba bisemi byenu bya kulutwe bikayuke’mba

+ mu mimba mo mo naikezhe bena Isalela kimye kyo nebafumishe mu kyalo kya Ijipita.+ Amiwa yami Yehoba Lesa wenu.’”

44 Onkao mambo, Mosesa wabuujile bena Isalela bijiilo bya Yehoba.

24 Yehoba watwajijile kwambila Mosesa amba: 2 “Kambizha bena Isalela amba balete kwi obewa manyi awamisha a maolivi o batwa a kubika mu malampi pa kuba’mba ateemengatu kimye kyonse.+ 3 Pangye ya kipembe kya Lushimuno kiji mu tente wa lusambakeno, Alona akabikengapo malampi akateemanga kimye kyonse mabanga kufikatu ne lukelo kwi Yehoba. Jino ke jilamuna ja myaka ne myaka ku bisemi byenu byonse. 4 Malampi akeatanchikenga bulongo kimye kyonse pa kya kutulapo malampi+ kya ngolode yawamisha kiji kwi Yehoba.

5 “Ukashikule bunga bwalamba ne kulengako bashinkwa banzhingwile 12 ne kwibosha. Ukengijishe bipimo bibiji bya mu bipimo jikumi bitwela mu efa* ku shinkwa umo umo. 6 Ukebatanchike mu mikuku ibiji, mu mukuku umo batanu na umo+ ponka pa tebulu wa ngolode yawamisha kwi Yehoba.+ 7 Ukabikepo ne binunka bulongo byawamisha pa mikuku yonse ibiji kabiji bikekala ke kajo ka kuvulukilako ka mulambo*+ wa kusoka pa mujilo kwi Yehoba. 8 Pa moba onse a Sabado, akebitanchikenga bulongo kwi Yehoba.+ Luno ke lulayañano lwa myaka ku bena Isalela. 9 Kano kajo kakekala ka kwa Alona ne baana banji + kabiji bakekajiile mu mpunzha yazhila+ mambo ke kintu kyazhijisha kwi aye kyafuma ku milambo ilambulwa pa mujilo kwi Yehoba, jino ke jilamuna ja myaka.”

10 Mu bena Isalela mwajinga mwana wa mulume wa mwanamukazhi mwina Isalela ne mwanamulume mwina Ijipita,+ kabiji watatwile kulwa na mukwabo mwina Isalela monka mu kampu. 11 Mwana wa mwanamukazhi mwina Isalela watendekele kwendeleka Jizhina* ja Lesa ne kwijifinga.*+ Onkao mambo, bamuletele kwi Mosesa.+ Inanji wajinga Shelomita mwana wa kwa Dibile wa mu mukoka wa bena Danyi. 12 Bamubikile mu kaleya kufikatu ne kimye Yehoba kyo ebabuujile byo afuukwile.+

13 Kepo Yehoba aambijile Mosesa amba: 14 “Mulupwile pangye ya kampu awa wafingañene, kabiji bonse bamumvwine batenteke maboko abo pa mutwe wanji, ne jibumba jonse jikamwase mabwe.+ 15 Kabiji ubuule bena Isalela amba, ‘Umvwe muntu wafinga Lesa wanji, ukatwikwa na bubi bwanji. 16 Onkao mambo, muntu wendeleka jizhina ja Yehoba bafwainwa kumwipaya.+ Jibumba jonse jafwainwa kumwasa mabwe. Muntu wafuma ku kyalo kingi bafwainwa kumwipaya byonkatu byo bafwainwa kwipaya mwina kyalo na mambo a kwendeleka Jizhina ja Lesa.

17 “‘Umvwe muntu waipaya mukwabo naye bafwainwa kumwipaya.+ 18 Muntu yense ukatapa ne kwipaya nyama wa kulela* wafwainwa kupingakenyapo nyama mukwabo, bumi* pa bumi bukwabo. 19 Umvwe muntu wakozha mukwabo, naye kumukozha byonka byo akozha mukwabo.+ 20 Wachimuna mukwabo naye kumuchimuna, wasaba mukwabo jiso naye kumusaba jiso, wazokola mukwabo jiino naye kumuzokola jiino, byonka byo akozha mukwabo naye byo byo bakamukozha.+ 21 Muntu ukapuma nyama ne kumwipaya wafwainwa kupingakenyapo nyama mukwabo,+ pakuba muntu ukapuma mukwabo ne kumwipaya naye bafwainwa kumwipaya.+

22 “‘Mukekale na muzhilo umotu na muntu wafuma ku kyalo kingi nangwa mwina kyalo,+ mambo amiwa yami Yehoba Lesa wenu.’”

23 Kepo Mosesa abuujile bena Isalela ne abo bamulupwijile pangye ya kampu awa muntu wafingañene kabiji bamwashile mabwe.+ Onkao mambo, bena Isalela baubiletu byonka Yehoba byo akambizhe Mosesa.

25 Yehoba waambijile jibiji Mosesa ku Mutumba wa Sinai amba: 2 “Buula bena Isalela amba, ‘Byo mukafika mu kyalo kyo mbena kwimupa,+ mukaleke bujimi bukalaluke ne kulama sabado kwi Yehoba.+ 3 Mukajimenga ne kubyala mu majimi enu pa myaka itanu na umo, kabiji pa myaka itanu na umo mukawamishenga misampi ya bichi byenu bya miñanzañanza ne kubungizha kajo ka mu kyalo.+ 4 Bino mu mwaka wa butanu na bubiji ukekala ke mwaka wa sabado wa kulaluka bujimi, ye sabado kwi Yehoba. Kechi mukabyale nkunwa mu majimi enu nangwa kuwamisha misampi ya bichi byenu bya miñanzañanza ne. 5 Kechi mwafwainwa kunowa kajo kakemenenatu kene mu majimi ne, kabiji kechi mukaape mañanzañanza akapanga ku muñanzañanza ye mukabula kuwamisha misampi ne. Bujimi bukalaluke mwaka umo. 6 Pano bino, mwakonsha kuja kajo kakamena mu bujimi mu mwaka wa sabado; obewa, bazha bobe ba balume ne ba bakazhi, ba mingilo bobe ne bantu bafuma ku byalo bingi bo wikala nabo bakonsha kujako, 7 ne banyama ba kulela ne banyama ba mungye baji mu kyalo kyobe. Bintu byonse bikamena mu mushiji bikekala ke kajo kenu.

8 “‘Ukabale masabado atanu na abiji a myaka, ko kuba’mba bimye bitanu na bibiji biiye bimye bitanu na bibiji bya myaka kuvwanga pamo ke myaka 49 ikekala moba a masabado atanu na abiji a myaka. 9 Kepo ukavumye lusengo akavume na jiwi jakanza mu ñondo wa butanu na bubiji pa juba ja bujikumi ja ñondo; pa Juba ja Kufuchilamo Mambo,+ mwafwainwa kumona’mba kuvuma kwa lusengo kwaumvwanyika mu kyalo kyenu kyonse. 10 Mwafwainwa kuzhijika mwaka wa bu 50 ne kutaya mbila ya kukasuluka kwa bantu bonse mu kyalo.+ Uno ukekala mwaka wenu wa Bwana bwa Bene,* anweba bonse pa muntu pa muntu mukabwele ku mapunzha enu ne ku bisemi byenu.+ 11 Mwaka wa bu 50 ukekala wa Bwana bwa Bene kwi anweba. Kechi mukajime nangwa kunowa kajo kakemenenatu kene nangwa kwapa mañanzañanza akapanga ku miñanzañanza yo mukabula kuwamisha misampi ne.+ 12 Mambo ye mwaka wa Bwana bwa Bene. Ukekala ke wazhila kwi anweba. Mukajengatu kajo kakemenena mu mushiji.+

13 “‘Mu uno mwaka wa Bwana bwa Bene, anweba bonse pa muntu pa muntu mwafwainwa kubwela ku mapunzha enu.+ 14 Inge mwapotesha kintu ku mukwenu nangwa mwapota kintu kwi aye, kange mukejimukilenga ne.+ 15 Pa kupota bujimi ku mukwenu mwafwainwa kubala myaka ikapitapo kufuma pa mwaka wa Bwana bwa Bene, kabiji akemupoteshe kwesakana na myaka ya kajo ikashalako.+ 16 Umvwe kukashala myaka yavula, akanungeko mutengo, kabiji inge kukashala myaka icheche akabwezheko mutengo, mambo ubena kukupotesha kwesakana na kajo kakafuma mu bujimi. 17 Kafwako nangwa umo mwi anweba wafwainwa kujimukila mukwabo ne,+ kabiji mwafwainwa kwakamwa Lesa wenu,+ mambo amiwa yami Yehoba Lesa wenu.+ 18 Umvwe mwalama malamuna ami ne kulondela mizhilo yami, mukekalanga mu kyalo kwa kubula wa kwimukatazha.+ 19 Kyalo kikemupanga kajo,+ ne anweba mukajanga ne kwikuta, kabiji mukekalanga kwa kubula wa kwimukatazha.+

20 “‘Bino umvwe mukashikishe’mba: “Tukaja ka mu mwaka wa butanu na bubiji byo tukabula kujima ne kubungizha kajo ketu?”+ 21 Amiwa nketulwila bibusa byami pe anweba mu mwaka wa butanu na bumo, kabiji mushiji ukamenesha kajo kavula ka kuja pa myaka isatu.+ 22 Kepo mukajima mu mwaka wa butanu na busatu kabiji mukajanga kajo ka mulaluke kufikatu ne mu mwaka wa butanu na buna. Mukajangatu kajo ka mulaluke poso kajo kapya kakapye.

23 “‘Kechi mwafwainwa kupotesha mushiji kikupu ne,+ mambo mushiji wami.+ Mambo kwesakana na byo nemumona, anweba mwi benyi kabiji mwi bakañenda.+ 24 Mu kyalo kyonse mo mukekalanga, mukekalenga na luusa lwa kumupotolola mushiji.

25 “‘Umvwe mulongo wobe waikala muyanji kabiji wapotesha lubaji lumo lwa mushiji wanji, mulongo wanji wa mu kisemi wa kumukuula wafwainwa kwiya ne kupotolola mushiji wapoteshe mulongo wanji.+ 26 Umvwe muntu kechi uji na wa kumukuula ne, bino aye mwine waikala nonshi kabiji wataana bintu bya kukuujilamo mushiji ye apoteshe, 27 wafwainwa kubala mutengo wa myaka yapitapo kufuma po amupoteshe ne kubwezha mali a yoyo myaka ku muntu ye apotesheko. Kepo akabwele ku mpunzha yanji.+

28 “‘Bino umvwe wakankalwa kutaana bintu bya kumukuujilamo, mushiji ye apoteshe ukatwajijila kwikala wa muntu wamupotele kukafikatu ne mu mwaka wa Bwana bwa Bene;+ kabiji mu mwaka wa Bwana bwa Bene bakamubwezhezheye, ne aye ukabwela ku mpunzha yanji.+

29 “‘Umvwe muntu wapotesha nzubo yanji iji mu muzhi ye bazhokoloshako nsakwa, ukatwajijila kwikala na luusa lwanji lwa kwiikuula kufikatu ne ku mpelo ya mwaka kufuma kimye kyo eipoteshe; ukekala na luusa lwa kwiikuula+ mwaka yense mutuntulu. 30 Bino umvwe wabula kwiikuula ku mpelo ya mwaka yense mutuntulu, nzubo iji mu muzhi ye bazhokoloshako nsakwa ikekala ke yanji kikupu awa wiipotele ne bisemi byanji byonse bya kulutwe. Kechi bafwainwa kwiikasulula mu mwaka wa Bwana bwa Bene ne. 31 Nangwa byonkabyo, mazubo aji mu mizhi yabula nsakwa bafwainwa kwiamona byonka byo bamona mushiji wa mu kyalo. Luusa lwa kwiakuula lwafwainwa kutwajijila kabiji akakasululwa mu mwaka wa Bwana bwa Bene.

32 “‘Bino mazubo a bena Levi aji mu mizhi yabo,+ bena Levi bakatwajijila kwikala na luusa lwa kwiakuula. 33 Umvwe bintu bya bena Levi babula kwibipotolola, nzubo ya mu muzhi yo bapoteshe nayo bakeikasulule mu mwaka wa Bwana bwa Bene,+ mambo mazubo a mu mizhi ya bena Levi byo bintu byabo mu bena Isalela.+ 34 Pano bino, mapunzha mwa kujiishisha banyama+ azhokoloka mizhi yabo kechi bafwainwa kwiapotesha ne, mambo bo bunonshi bwabo bwa kikupu.

35 “‘Umvwe mulongo wobe ye wikala nanji kipikipi waikala muyanji kabiji wakankalwa kwilama mwine, wafwainwa kumulama+ byonka byo wakonsha kulama muntu wafuma ku kyalo kingi ne kañenda,+ kuba’mba atwajijile kwikala na bumi pamo ne obewa. 36 Kechi ukamunungilepo nsubu ne kunonkela* pe aye ne.+ Wafwainwa kwakamwa Lesa wobe,+ kabiji mulongo wobe ukatwajijila kwikala na bumi pamo ne obewa. 37 Kechi wafwainwa kukongwesha mali mulongo wobe kuba’mba ukamwenemo nsubu+ nangwa kumupa kajo kuba’mba ukamwenemo ne. 38 Amiwa yami Yehoba Lesa wenu wimufumishe mu kyalo kya Ijipita+ kuba’mba nemupe kyalo kya Kenana kumwesha’mba yami Lesa wenu.+

39 “‘Umvwe mulongo wobe ye wikala nanji kipikipi waikala muyanji kabiji wipotesha mwine kwi obewa,+ kechi wafwainwa kumukanjikizha kwingila mingilo ya buzha ne.+ 40 Wafwainwa kumwingijisha nobe muntu wa mwingilo,+ nobe kañenda. Wafwainwa kukwingijila kufika mu mwaka wa Bwana bwa Bene. 41 Kepo akafumako kwi obewa, aye pamo ne baana* banji bo aji nabo ne kubwela ku kisemi kyanji. Wafwainwa kubwela ku mushiji wa bashakulu banji.+ 42 Mambo bo bazha bami bo nafumishe mu kyalo kya Ijipita.+ Kechi bafwainwa kwipotesha abo bene byonka byo bapotesha muzha ne. 43 Kechi wafwainwa kumuyanjisha ne,+ kabiji wafwainwa kwakamwa Lesa wobe.+ 44 Bazha benu ba balume ne ba bakazhi bakafuma mu bisaka bya bantu bikemuzhokoloka, mu bino bisaka mo mo mukapota muzha wa mulume nangwa wa mukazhi. 45 Kabiji mwakonsha kupota bazha mu benyi bo mukekala nabo+ ne mu bisemi byabo bikasemekelwa monka mu kyalo kyenu, kabiji bakekala ke bunonshi bwenu. 46 Mukebashilenga baana benu bakemulondelanga panyuma kwikala bunonshi bwabo bwa kikupu. Mwakonsha kwibengijisha kwikala ba mingilo, bino kechi mwafwainwa kumanyika balongo benu bena Isalela ne.+

47 “‘Bino umvwe muntu wafuma ku kyalo kingi nangwa kañenda uji mukachi kenu, waikala nonshi ne mulongo wobe ye ekala nanji kipikipi waikala muyanji, kabiji wipotesha mwine ku muntu wafuma ku kyalo kingi nangwa ku kañenda uji mukachi kenu, nangwa ku mulongo wa muntu wafuma ku kyalo kingi, 48 ukatwajijila kwikala na luusa lwa kumukuula inge wipotesha mwine. Mulongo wanji umo wakonsha kumukuula,+ 49 nangwa bamwisho wanji nangwa muvyala wanji wakonsha kumukuula, nangwa mulongo* wanji yense nangwa wa mu kisemi kyanji wakonsha kumukuula.

“‘Nangwa umvwe aye mwine waikala nonshi wakonsha kwikuula aye mwine.+ 50 Aye ne yewo wamupotele bafwainwa kubala kimye kufuma mu mwaka ye epoteshe kufika mu mwaka wa Bwana bwa Bene,+ kabiji mali o epoteshe afwainwa kwesakana na myaka.+ Mu yoyo myaka, moba anji a kwingila afwainwa kubalwa byonka byo babala kimye kya wa mwingilo.+ 51 Umvwe kwakishala myaka yavula, wafwainwa kupana mali anji a kwikuujilamo kwesakana na myaka yashalako. 52 Bino umvwe kwashala myaka icheche kufika mu mwaka wa Bwana bwa Bene, wafwainwa kwibajila aye mwine ne kupana mali a kwikuujilamo mwine kwesakana na myaka yashalako. 53 Wafwainwa kutwajijila na kumwingijila pa mwaka pa mwaka byonka bingila wa mwingilo; kabiji wafwainwa kumona’mba kechi ubena kumuyanjisha ne.+ 54 Pano bino, umvwe wakankalwa kwikuula aye mwine mu ano mashinda, ukakasuluka mu mwaka wa Bwana bwa Bene+ aye ne baana* banji bo aji nabo.

55 “‘Mambo bena Isalela bo bazha bami. Bo bazha bami bo nafumishe mu kyalo kya Ijipita.+ Amiwa yami Yehoba Lesa wenu.

26 “‘Kechi mukelengele balesa batutu ne,+ kabiji kechi mukeimikile kipashañano kya kusonga+ nangwa jishiki jazhila ne, kabiji kechi mukemike jibwe+ mu kyalo kyenu kuba’mba mukejilambilenga ne;+ mambo amiwa yami Yehoba Lesa wenu. 2 Mukalamenga masabado ami ne kunemeka* nzubo yami yazhila. Amiwa yami Yehoba.

3 “‘Umvwe mukatwajijile kulama malamuna ami ne mikambizho yami ne kwiilondela,+ 4 nkemupa mvula mu kimye kyayo+ kabiji mu kyalo mukekala kajo+ ne bichi bya mu majimi bikapanganga bipangwa. 5 Mukapulanga kajo kufika ne mu kimye kya kwapa mañanzañanza kabiji mukaapa mañanzañanza kufika ne mu kimye kya kubyajilamo; mukaja kajo kenu ne kwikuta kabiji mukekalanga mu kyalo kyenu kwa kubula wa kwimukatazha.+ 6 Nkabika mutende mu kyalo+ kabiji mukalaalanga kwa kubula muntu wa kwimulengesha moyo;+ ne mu kyalo nkapangamo banyama bakaji ba mungye kabiji kafwako ye mukalwa nanji na mpoko ya nkondo mu kyalo kyenu ne. 7 Kine mukapupilanga balwanyi benu ne abo mukebashinda na mpoko. 8 Bantu batanu mwi anweba bakapupilanga balwanyi 100 ne bantu 100 mwi anweba bakapupilanga balwanyi 10,000 kabiji balwanyi benu mukebashinda na mpoko.+

9 “‘Nkemubila bibusa* ne kwimulengela kusemununa ne kuvula,+ kabiji nkalama lulayañano lo nalayañana ne anweba.+ 10 Byo mukajanga kajo ka mulaluke, mukakebanga kupwisha ka kala kuba’mba mwikale na pa kubika kajo ka katataka. 11 Kabiji nkabika tente wami wa lusambakeno mukachi kenu+ kabiji amiwa* kechi nkemukana ne. 12 Nkendanga mukachi kenu kabiji nkekala Lesa wenu+ ne anweba mukekala bantu bami.+ 13 Amiwa yami Yehoba Lesa wenu wimufumishe mu kyalo kya Ijipita kuba’mba mubule kutwajijila kwikala bazha babo, kabiji nachimawine bikonkoji byenu ne kwimulengela kwenda saka mwainuka.*

14 “‘Pano bino, umvwe mukabule kuñumvwina nangwa kulama mikambizho yami yonse,+ 15 kabiji umvwe anweba* mukakane malamuna ami+ ne kushikwa mizhilo yami ne kubula kulama mikambizho yami yonse ne konauna lulayañano lwami,+ 16 amiwa nkemuba bino: nkemukabisha na bya malwa, na kikola kya lunkunzha ne na kikola kya mashika ne kulengela meso enu kuleka kumona kabiji bumi* bwenu bukayangatu na kunyonga. Mukabyala nkunwa kyatu mambo balwanyi benu bakajanga kajo kenu.+ 17 Nkemukana kabiji balwanyi benu bakemushinda;+ ne boba bemushikwa bakemunyataulanga+ kabiji mukanyemanga kwa kubula muntu ubena kwimupangisha.+

18 “‘Umvwe bino byonse byabula kwimulengela kuñumvwina, nkemukambula bimye bitanu na bibiji na mambo a bubi bwenu. 19 Nkemuchiba kazanga ne kulengela jiulu jenu kwikala nobe kyela kya kapotwe+ ne mushiji wenu kwikala nobe mukuba. 20 Kabiji ngovu yenu ikonaikangatu, mambo mu mushiji wenu kafwako bikafumangamo ne,+ ne bichi bya mu majimi kechi bikapanganga bipangwa ne.

21 “‘Bino umvwe mukatwajijile kundengulula ne kukana kuñumvwina, nkemukambula bimye bitanu na bibiji nangwa kukilapo kwesakana na bubi bwenu. 22 Nkemutumina banyama bakaji ba mungye,+ kabiji bakemwipayila baana benu+ ne kuvizha banyama benu ba kulela ne kwimulengela kushalatu bacheche kabiji mu mikwakwa yenu kechi mukendanga bantu ne.+

23 “‘Umvwe kya kuba bino byonse bikabule kwimulengela kuswa byo nkemololako+ kabiji mukatwajijile kundengulula, 24 amiwa nkemukana, kabiji nkemukambula bimye bitanu na bibiji na mambo a bubi bwenu. 25 Nkaleta mpoko ya kushinkanya ne anweba na mambo a konauna lulayañano lwami.+ Umvwe mukekonkanye pamo mu mizhi yenu, nkatuma kikola mukachi kenu+ kabiji nkemupana mu maboko a balwanyi benu.+ 26 Byo nkonauna kufuma* shinkwa* wenu,+ banabakazhi jikumi bakoshanga shinkwa wenu mu kitofu kimo ne kwabanya shinkwa na kipimo;+ mukajanga, bino kechi mukekutanga ne.+

27 “‘Inge kya kuba bino byonse bikabule kwimulengela kuñumvwina kabiji mukatwajijile kundengulula, 28 amiwa nkakilamo kwimukana,+ kabiji nkemukambula bimye bitanu na bibiji na mambo a bubi bwenu. 29 Onkao mambo, mukajanga mibiji ya baana benu ba balume ne ya baana benu ba bakazhi.+ 30 Nkonauna mapunzha atuntama+ ne kutetaula bya kusokelapo bya kufutumuna byenu ne kulumbika mibiji yenu yafwa pa mibiji ya bankishi* benu ba bunya,+ kabiji amiwa* nkafumako kwi anweba na mambo a bunya.+ 31 Nkapana mizhi yenu ku mpoko+ ne konauna mazubo enu azhila kabiji kechi nkomvwa bwema bwawama* bwa bitapisho byenu ne. 32 Amiwa nkonauna kyalo,+ ne balwanyi benu bekalamo bakakumya bingi.+ 33 Kabiji nkemupalañenya mu bisaka bya bantu+ kabiji nkemusomwena mpoko yami;+ kabiji kyalo kyenu kikashalatu masala+ ne mizhi yenu ikonaika.

34 “‘Pa kyokya kimye mushiji ukekala na masabado moba onse o akashalatu masala, byo mukekalanga mu kyalo kya balwanyi benu. Pa kyokya kimye kyalo kikakokoloka* kuba’mba kikabwezhe masabado akyo.+ 35 Moba onse o kikashalatu masala, kikalalukanga mambo kechi kyalalukilenga mu kimye kya masabado enu byo mwaikalangamo ne.

36 “‘Kabiji aba bakapuluka,+ nkalengela michima yabo kwikala na moyo mu byalo bya balwanyi babo; kabiji kupona kwa jibuula kukebalengela kunyema, ne abo bakanyema nobe muntu ubena kunyema mpoko kabiji bakapona kwa kubula muntu ubena kwibapangisha.+ 37 Bakenyantanga abo bene na bene byonka byuba bantu babena kunyema mpoko, nangwa kya kuba kafwako ubena kwibapangisha ne. Kabiji kechi mukakonsha kushinda balwanyi benu ne.+ 38 Mukavila monka mu bisaka bya bantu mo mukapalañena+ kabiji kyalo kya balwanyi benu kikemuvizha. 39 Aba bakashalapo mwi anweba bakabolela mu byalo bya balwanyi benu+ na mambo a bubi bwenu. Kine bakabola na mambo a bubi bwa bashabo.+ 40 Kabiji bakasolola bubi bwabo+ ne bubi ne kubula bukishinka kwa bashabo kabiji bakaswa amba kechi baendelenga mu bukishinka ne, mambo bandengulwilenga.+ 41 Ne amiwa ne bakainenga+ ne kwibaleta mu kyalo kya balwanyi babo.+

“‘Kampe michima yabo yabula mukanda* po po ikepelula+ kabiji po po bakaswa kutambula lukabisho lwa bubi bwabo. 42 Kabiji amiwa nkavuluka lulayañano lo nalayañene ne Yakoba,+ ne lo nalayañene ne Izaka.+ Kabiji nkavuluka ne lulayañano lwami lo nalayañene ne Abalahama,+ kabiji nkavuluka kyalo. 43 Kyalo byo bekishile, kyaikelenga na masabado+ kabiji kyashajiletu masala, kabiji batambwilenga lukabisho na mambo a bubi bwabo, mambo abo* bakaine mizhilo yami ne kushikwa malamuna ami.+ 44 Nangwa kya kuba bino byonse bikamweka, byo bakekala mu kyalo kya balwanyi babo, amiwa kechi nkebakana+ nangwa kwibataya kya kuba nkebavizhe bonse ne konauna lulayañano lwami lo nalayañene+ nabo ne, mambo amiwa yami Yehoba Lesa wabo. 45 Na mambo a abo, nkavuluka lulayañano lo nalayañene na bashakulu babo+ bo nafumishe mu kyalo kya Ijipita ne bisaka bya bantu saka bitalako+ kuba’mba ngikale Lesa wabo. Amiwa yami Yehoba.’”

46 Ano o malamuna ne mizhilo Yehoba yo apele bena Isalela pa Mutumba wa Sinai kupichila mwi Mosesa.+

27 Yehoba watwajijile kwambila Mosesa amba: 2 “Buula bena Isalela amba, ‘Umvwe muntu wachipa+ kupana kwi Yehoba mali aesakana na mutengo wa muntu,* 3 mutengo wa mwanamulume kutendekela pa wa myaka 20 kufika ku wa myaka 60 ukekala mashekele* a siliva 50 monka mwayila kipimo kya shekele wa pa mpunzha yazhila.* 4 Bino umvwe mwanamukazhi, mashekele 30 o akekala mutengo wanji. 5 Umvwe muntu uji na myaka kutendekela pa 5 kufika ku 20, mutengo wa mwanamulume ukekala mashekele 20 kabiji mashekele 10 o akekala mutengo wa mwanamukazhi. 6 Umvwe muntu uji na ñondo umo kufika ku myaka itanu, mutengo wa mwanamulume ukekala mashekele a siliva atanu kabiji mutengo wa mwanamukazhi ukekala mashekele a siliva asatu.

7 “‘Umvwe muntu uji na myaka 60 ne kukilapo, mutengo wa mwanamulume ukekala mashekele 15 ne mashekele 10 o akekala mutengo wa mwanamukazhi. 8 Bino umvwe awo muntu muyanji kya kuba wakankalwa kufikizha mutengo ye bamutongwela,+ awo muntu akemane kwi ñanga ne ñanga akamubuule mutengo ye afwainwa kupana. Ñanga akatongole mutengo kwesakana na byakonsha kupana yewo muntu ubena kuchipa.+

9 “‘Umvwe muntu wachipa kupana nyama ye bakonsha kulambula kwi Yehoba, yense ye akapana kwi Yehoba ukekala wazhila. 10 Kechi akamupingizhepo na kintu kikwabo nangwa kumupimpula na kintu kyawama na kyatama ne, nangwa kyatama na kyawama ne. Bino umvwe wamupimpula na nyama mukwabo, bonse babiji, mutanshi ne ye bapingakenyapo bakekala bazhila. 11 Umvwe awo nyama wa muzhilo+ ye bakonsha kubula kupana kwikala mulambo kwi Yehoba, awo muntu akalete nyama kwi ñanga. 12 Ñanga akatongole mutengo wa nyama nangwa wawama nangwa watama. Mutengo ukatongola ñanga ye ukekala mutengo wa nyama. 13 Bino umvwe awo muntu akakebe kumupotolola, akanungepo mali akwabo pa oo akatongola ñanga, jimo pa atanu.+

14 “‘Umvwe muntu akazhijike nzubo yanji kwikala yazhila kwi Yehoba, ñanga akatongole mutengo wa nzubo nangwa yawama nangwa yatama. Mutengo ukatongola ñanga ye ukekala mutengo wa nzubo.+ 15 Bino umvwe awo muntu wazhijika nzubo akakebe kupotolola nzubo yanji, akanungepo mali akwabo pa oo akatongola ñanga, jimo pa atanu, kabiji ikekala yanji jibiji.

16 “‘Umvwe muntu akazhijike mwanzo umo wa bujimi bwanji kwi Yehoba, bakamutongwele mutengo kwesakana na nkunwa ikakebewa kubyalamo: Homela* umo wa nkunwa ya mbaale ukekala 50 mashekele a siliva. 17 Umvwe akazhijike bujimi bwanji monka mu mwaka wa Bwana bwa Bene,*+ mutengo wabo kechi ukapimpulwa ne. 18 Umvwe akazhijike bujimi bwanji pa kupwisha mwaka wa Bwana bwa Bene, ñanga akamutongwele mutengo kwesakana na myaka ikashalako kufika ku mwaka mukwabo wa Bwana bwa Bene, kabiji akafumyeko mali ku mutengo ye akatongola.+ 19 Bino umvwe awo muntu ubena kuzhijika bujimi wakeba kwibupotolola, akanungepo mali akwabo pa oo akatongola ñanga, jimo pa atanu jimo pa atanu, kabiji bujimi bukekala bwanji jibiji. 20 Bino umvwe wabula kwibupotolola ne bujimi bebupotesha ku muntu mukwabo, kechi bakebupotolola jibiji ne. 21 Umvwe bujimi bakebukasulule mu mwaka wa Bwana bwa Bene, bukekala bwazhila kwi Yehoba, ke bujimi bwazhijikwa kwi aye. Bukekala ke bwa bañanga.+

22 “‘Umvwe muntu wapana bujimi kwi Yehoba bo apotele bwabula bwanji bwa buswanyi,+ 23 ñanga akamutongwele mutengo wa bujimi kufika ne ku mwaka wa Bwana bwa Bene, kabiji akapane mutengo watongolwa pa jonkaja juba.+ Kino ke kintu kyazhila kwi Yehoba. 24 Mu mwaka wa Bwana bwa Bene akabwezhe bujimi ku muntu ye apoteleko, yenka mwine mwina bujimi.+

25 “‘Mutengo yense watongolwa wafwainwa kwesakana na mwayila kipimo kya shekele wa pa mpunzha yazhila. Shekele umo wafwainwa kwikala magela* 20.

26 “‘Nangwa byonkabyo, kafwako wafwainwa kuzhijika babeji ba banyama ne, mambo bo babeji ba Yehoba.+ Nangwa ñombe nangwa mukooko, bo ba kwa Yehoba.+ 27 Umvwe awo nyama wa mu banyama ba muzhilo kabiji wamukuula kwesakana na mutengo ye bamutongwela, akanungepo mali akwabo pa oo akatongola ñanga, jimo pa atanu.+ Bino umvwe bakabule kumupotolola, bakamupoteshe pa mutengo ye bamutongwela.

28 “‘Bino kafwako kintu muntu kyo afumya mu bintu byanji kyo apana kwi Yehoba na muchima yense* kyo bafwainwa kupotesha nangwa kupotolola ne, nangwa muntu nangwa nyama nangwa bujimi bwanji ne. Bintu byonse byo bapaine na luchipo ke byazhijisha kwi Yehoba.+ 29 Kabiji muntu ye bazhachisha* amba bamwipaye kechi bafwainwa kumukuula ne.+ Bafwainwa kumwipaya.+

30 “‘Byonse bifikizha mu bujikumi+ bya mu kyalo nangwa kajo ka mu bujimi nangwa bipangwa bya ku bichi, byo bya kwa Yehoba. Ke bintu byazhila kwi Yehoba. 31 Umvwe muntu ubena kukeba kupotolola bintu byanji bimo bifikizha mu bujikumi, akanungepo mali akwabo pa oo akatongola ñanga, jimo pa atanu. 32 Byonse bifikizha mu bujikumi bya bañombe ne mikooko, byonse bipita munshi ya kamama ka kwa kafunga, nyama wa bujikumi, ukekala wazhila kwi Yehoba. 33 Kechi akamutaletale amba amone kana wawama nangwa watama ne. Kabiji kechi wafwainwa kumupimpula na nyama mukwabo ne. Bino umvwe wamupimpula na nyama mukwabo, bonse babiji mutanshi ne ye bapingakenyapo, bakekala bazhila.+ Kechi bakebapotolole ne.’”

34 Ino yo mikambizho ya bena Isalela Yehoba yo apele Mosesa pa Mutumba wa Sinai.+