HOSEYA
1 Yehoba wisambile ne Hoseya* mwana wa kwa Beli mu moba a kwa Uziya,+ Yotamo,+ Ahaza+ ne Hezekiya,+ bamfumu ba Yuda,+ ne mu moba a kwa Yeloboma+ mwana wa kwa Yehoashi,+ mfumu wa Isalela. 2 Yehoba byo esambilenga ne Hoseya, Yehoba waambijile Hoseya amba: “Yanga ukasongole mwanamukazhi pite* ne kwikala na baana ba mu bupite* bwanji, mambo bantu ba mu kyalo bekileka kumukookela Yehoba na mambo a bupite.”*+
3 Onkao mambo, wayile na kusongola Goma mwana wa kwa Dibilaimu, ne aye waimichile ne kusema mwana wa mulume.
4 Kepo Yehoba amwambijile’mba: “Umutumbe’mba Yezelela,* mambo mu kakimyetu kacheche kashalako, amiwa nkakambula kisaka kya kwa Yehu+ na mambo a mashi aichijile Yezelela, kabiji nkonauna bufumu bwa bena Isalela.+ 5 Pa joja juba, amiwa nkachimwina mata a mukanda a bena Isalela mu Kimpachiko* kya Yezelela.”
6 Goma waimichile jibiji ne kusema mwana wa mukazhi. Lesa wamwambijile’mba: “Umutumbe’mba Lo-luhama,* mambo bena Isalela kechi nkebobilapo lusa jibiji ne,+ amiwa nkebapangamo.+ 7 Pakuba bena Yuda nkebobila lusa+ kabiji nkebapulusha amiwa Yehoba Lesa wabo;+ kechi nkebapulusha na buta bwa mukanda, mpoko, nkondo, bambili nangwa na boba bendapo ne.”+
8 Byo asumwine Lo-luhama, waimichile jikwabo ne kusema mwana wa mulume. 9 Ponkapo Lesa wamwambijile’mba: “Umutumbe’mba Lo-ammi,* mambo anweba kechi mwi bantu bami ne, ne amiwa kechi yami Lesa wenu ne.
10 “Kabiji bantu* ba mu Isalela bakavula bingi nobe busenga bwa ku kalunga ka mema bo bakonsha kubula kupima nangwa kubala.+ Kabiji ku mpunzha ko bebambijile’mba, ‘Anweba kechi mwi bantu bami ne,’+ bakebambila’mba, ‘Baana ba Lesa mumi.’+ 11 Kabiji bena Yuda ne bena Isalela bakomvwañana+ ne kwisajila bene ntangi ne kufuma mu kyalo, mambo jikekala ke juba janema bingi kwi Yezelela.+
2 “Ambilai balongo benu amba, ‘Anweba mwi bantu* bami!’+
Kabiji ambilai banyenga yenu amba, ‘Anweba mwi banabakazhi bo baubila lusa!’*+
2 Fwishai inenu na mambo; mufwishai nao,
Mambo aye kechi mukazhami ne,+ ne amiwa kechi nemwatawanji ne.
Aye wafwainwa kuleka kuba bupite*
Kabiji kechi wafwainwa kuba bukende ne,
3 Mambo inge abule kuleka, amiwa nkamuvuula ne kumushatu byonka byo asemenwe,
Kumushatu nobe kiselebwa,
Nkamwalula kwikala mpunzha mwabula mema,
Ne kumulengela kufwa na kilaka.
4 Kabiji baana banji kechi nkebobila lusa ne,
Mambo bo baana ba mu bupite.*
Awa wibemichile wauba bintu bya bumvu,+ mambo waambile’mba,
‘Amiwa nkapupila bakambwe bami,+
Bonka bampa kajo ne mema,
Bivwalo bya boya bwa mukooko ne bisapi bya linenyi, manyi ne bya kutoma.’
6 Onkao mambo, amiwa nkasasa miba mu jishinda janji;
Kabiji nkamuzhokolosha na nsakwa ya mabwe,
Pa kuba’mba akabule kutaana mwa kupichila.
7 Aye ukapupila bakambwe banji, pano bino kechi ukebataana ne;+
Ukebakebakeba, bino kechi ukebamona ne.
Ponkapo ukamba’mba, ‘Nsakubwela ku mwatawami mutanshi,+
Mambo naikelenga bingi bulongo pa kyokya kimye kukila luno.’+
8 Aye kechi wayukile’mba yami namupelenga kajo,+ binyu bya katataka ne manyi ne,
Ne kuba’mba yami namupele siliva wavula
Ne ngolode ye baingijishenga pa kupopwela Baela ne.+
9 ‘Onkao mambo, amiwa nkeya na kumwangata kajo kami mu kimye kyo kapilamo
Ne binyu byami bya katataka mu kimye kyo bebifiinamo,+
Kabiji nkamwangata bivwalo byami bya boya bwa mukooko ne bisapi byami bya linenyi byo avwalanga.
10 Pano nkamuvuula ne kumushatu matakotu ku meso a bakambwe banji,
Kabiji kafwako muntu nangwa umo ukamupokolola mu kuboko kwami ne.+
11 Nkapwisha lusekelo lwanji lonse,
Bijiilo byanji,+ kutentama kwa bañondo banji, masabado anji ne bijiilo byanji bikwabo byonsetu.
12 Kabiji amiwa nkonauna bichi byanji bya miñanzañanza ne mikuyu, byo aambilengapo amba:
“Bino bichi yo mfweto yami, yo bampele bakambwe bami”;
Nkebyalula ke jisaka,
Kabiji banyama ba mungye bakebija.
13 Yehoba waamba’mba, ‘Amiwa nkamukambula na mambo a moba o apainangamo bitapisho ku bankishi ba Baela,+
Ne moba o avwajilangamo mashikiyo anji ne bivwalo byawamisha ne kupupila bakambwe banji,
Kabiji amiwa yami avulamineko.’+
15 Kufuma pa kyokya kimye kuya ne kulutwe,+ amiwa nkamubwezhezha majimi anji a miñanzañanza,
Kabiji nkalula Kimpachiko* kya Akola+ kwikala ke mwa kutwelela pa kuya mu ntanda ya mulaye;
Aye ukankumbula byonkatu byo ankumbulanga byo ajinga mwanyike,
Ne byonkatu byo ankumbulanga kimye kyo afumine mu kyalo kya Ijipita.’+
17 ‘Amiwa kechi nkamuswisha kutela mazhina a bankishi ba Baela ne,+
Ne mazhina abo kechi bakeavulukapo jibiji ne.+
18 Pa jonkaja juba, amiwa nkalayañana lulayañano na banyama ba mungye,+
Na bañonyi ne na bintu byonse bikalaba panshi na mambo a bantu bami;+
Mu kyalo nkafumyamo mata a mukanda, mapoko ne nkondo,+
19 Obewa ukekala mukazhami myaka ne myaka;
Kabiji nkakusongola monka mwayila bololoke ne bukishinka,
Butemwe bubula kwaluka ne lusa.+
20 Nkakusongola mu bukishinka,
Kabiji ukamuyuka Yehoba.’+
21 Yehoba waamba’mba, ‘Mu joja juba, amiwa nkakumbula,
‘Bintu bya mwiulu nkebipa bintu byo bikeba,
Ne bya mwiulu nabyo bikapa ntanda bintu byo ikeba;+
22 Kabiji ntanda ikapana kajo, binyu bya katataka ne manyi;
23 Aye nkamubyala mu mushiji nobe nkunwa,+
Kabiji nkamubila lusa aye ye babujile kubila lusa;*
Nkambila boba babula bantu* bami namba: “Anweba mwi bantu bami,”+
Ne abo bakañambila’mba: “Anweba mwi Lesa wetu.”’”+
3 Ponkapo Yehoba wañambijile’mba: “Bwela jibiji ukatemwe mwanamukazhi ye bafwalama ku mwanamulume mukwabo kabiji ubena kuba bukende,+ ukamutemwe byonkatu Yehoba byo atemwa bena Isalela+ nangwa kya kuba baongolokela ku balesa bangi+ ne kutemwa kupana bitapisho bya bashinkwa* bo balenga na mañanzañanza auma.”
2 Onkao mambo, namupotele kwikala mukazhami na mali a siliva 15 ne kipimo* kya homela ne kichika wa mbaale. 3 Kepo namwambijile namba: “Obewa usakwikala mukazhami pa moba avula. Kechi wafwainwa kuba bupite* nangwa kulaala na mwanamulume mukwabo ne, kabiji nangwatu amiwa kechi nkalaalapo nobe ne.”
4 Kikekala bino mambo a kuba’mba pa kimye* kyabaya bena Isalela kechi bakekalapo na mfumu,+ kitumbafumu, kupana bitapisho, kwikala na jishiki, na kajilaya kabula maboko+ nangwa na bipashañano bya telafimu* ne.+ 5 Bino byo bikapwa, bena Isalela bakabwela jibiji na kukeba Yehoba Lesa wabo+ ne Davida mfumu wabo;+ kabiji mu moba akapelako bakeya kwi Yehoba saka bazakama na kukeba bibusa byanji.+
4 Anweba bena Isalela, umvwai byaamba Yehoba,
Mambo Yehoba wapamo mambo bantu bekala mu kyalo,+
Mambo mu kyalo kechi muji bukishinka ne butemwe bubula kwaluka ne, kabiji bantu kechi bamuyuka Lesa ne.+
2 Mu kyalo mwakumbanatu kuchipa bubela, kubepa,+ kwipayañana,+
Kwiba ne kuba bukende,+
Kabiji kwichila mashi a bantu kwakumbanatu konse konse.+
3 Na mambo a bino bintu, ntanda ikajila mabingo+
Ne bantu bonse bekalamo bakakonyangala;
Banyama ba mungye, bañonyi,
Ne masabi a mu kalunga ka mema bikavila.
4 “Nangwa byonkabyo, kange muleke muntu nangwa umo apachike nangwa kuzhachisha mukwabo ne,+
Mambo bantu benu bajitu nobe boba bepachika na ñanga.+
5 Onkao mambo, muketuntula mute wansanana,
Ne bangauzhi nabo baketuntwila pamo ne anweba nobe bufuku.
Kabiji inenu nkamwipaya.*
6 Bantu bami bakebepaya,* mambo abo kechi bangyuka ne.
Byo mwakana kungyuka,+
Ne amiwa kechi nkemuswisha kwikala bañanga bami ne;
Kabiji byo mwavulama mizhilo* ya Lesa wenu,+
Ne amiwa, baana benu nkebavulama.
7 Byo bayilenga na kuvujilako, ne bubi bwabo nabo bwayilenga na kuvujilako.+
Nkalula munema wabo kwikala kintu kileta bumvu.*
8 Mu bubi bwa bantu bami mo mo bajiila,
Kabiji bakebesha kuba’mba bantu bobenga* bintu byatama.
9 Kintu kikamwekela bantu kyo kikamwekela ne bañanga;
Amiwa nkebakambula monka mwayila byubilo byabo,
Kabiji nkebakambula monka mwayila bintu byo boba.+
10 Bakaja pano bino kechi bakekuta ne,+
12 Bantu bami bakeba bukwasho ku bankishi babo ba kusonga,
Kabiji boba bintu bibabuula kamama kabo;*
Mambo muchima wa kukeba kuba bupite* wibatwala mungi,
Kabiji bakana kukookela Lesa wabo na mambo a bupite* bwabo.
13 Batapisha bitapisho peulu ya mitumba,+
Kabiji basoka bya kufutumuna pa tutumbatumba,
Munshi ya bichi bya oko, mu bichi bilala buluba butoka ne munshi ya bichi byonse bikatampe,+
Mambo biji na bimfutele byawama.
O ene mambo baana benu ba bakazhi o bobila bupite,*
Ne balokazhi benu o bobila bukende.
14 Baana benu ba bakazhi kechi nkebakambula na mambo a kuba bupite* ne,
Ne balokazhi benu nabo kechi nkebakambula na mambo a kuba bukende ne.
Mambo banabalume baya ku bapite
Kabiji batapisha bitapisho pamo na bapite ba ku nzubo ya Lesa;
Bantu ba uno mutundu babula kumvwina,+ bakonaika.
15 Nangwa kya kuba anweba bena Isalela mubena kuba bupite,*+
Bena Yuda kange bafwilemo na mambo a buno bubi ne.+
Kange muye ku Giligala+ nangwa ku Bete-avena ne,+
Kabiji kange muchipe amba, ‘Byonkatu Yehoba byo aji na bumi!’ ne.+
16 Mambo bena Isalela betota byonkatu bitota ñombe.+
Onkao mambo, Yehoba kechi ukebatangijila ku nsono ya munyemvu* nobe mwana mukooko mulume ne.
17 Bena Efelaimu nabo babena kupopwela bankishi.+
Mulekai obenga bintu byo akeba!
Kabiji bantangi* babo basekela mu bintu byatama.+
19 Luvula ukamusenda,* mu byapi byanji,
Kabiji kikebalenga bingi bumvu na mambo a bitapisho byabo.”
5 “Anweba bañanga, umvwai kino,+
Anweba bena Isalela, telekeshai,
Anweba ba mu kisaka kya mfumu, umvwai,
Mambo anweba bakemuchibila mambo;
Mambo anweba mwaikala ke kitewa mu mpunzha ya Mizipa
Kabiji mwi bukonde bo bata ku mutumba wa Tabola.+
2 Kabiji aba bonse basatuka babena kwipaya bingi bantu,
Kabiji amiwa mbena kwibajimunako* bonse.
3 Bena Efelaimu nebayuka,
Kabiji bena Isalela kechi bafyama kwi amiwa ne.
4 Byubilo byabo bibalengela kubula kubwela kwi Lesa wabo,
Mambo baji na muchima wa kukebesha kuba bupite;*+
Kabiji Yehoba kechi bamuyuka ne.
5 Bwitote bwa bena Isalela bwibazhachisha;+
Bena Isalela ne bena Efelaimu bonse betuntula na mambo a bubi bwabo,
Kabiji bena Yuda betuntwila pamo nabo.+
6 Basendele mikooko yabo ne bañombe babo kuya na kukeba Yehoba,
Pano bino, kechi bamutaaine ne.
Mambo aye wafumineko kwi abo.+
7 Bamusatukila Yehoba,+
Mambo basema baana ba mu bukende.
Onkao mambo, mu ñondotu umo bakebonawina* pamo na bintu* byabo.
8 Vumyai lusengo+ mu Gibea ne ntolompita mu Lama!+
Bijikai mbila ya nkondo ku Bete-avena+ amba, tubena kwimulondela panyuma anweba bena Benjamina!
9 Anweba bena Efelaimu, mukakankamika bantu mu juba ja kwimukambula.+
Naamba bintu bikamweka mu mikoka ya bena Isalela.
10 Babitumbafumu ba mu Yuda bajitu nobe boba batuntulula mipaka.+
Nketulwila bukaji bwami pe abo nobe mema.
11 Bena Efelaimu bebamanyika, bebakambula pa kwibazhachisha,
Mambo abo bafuukwilepo kulondela balwanyi babo.+
12 Onkao mambo, amiwa najinga ku bena Efelaimu nobe kilongolo kija bivwalo
Kabiji ku bena Yuda najinga nobe kintu kyabola.
13 Bena Efelaimu byo bamwene kikola kyabo, ne bena Yuda nabo byo bamwene kilonda kyabo,
Ponkapo bena Efelaimu bayile ku Asilya,+ ne kutuma baluwe kwi mfumu mukatampe.
Pano bino, aye wakankelwe kwimubuka,
Kabiji wakankelwe kupwisha kilonda kyenu.
14 Mambo amiwa nkekala nobe mwana bokwe ku bena Efelaimu,
Kabiji nobe bokwe mukaji ku ba mu kisaka kya Yuda.
15 Nkabwela ku mpunzha yami kufikatu ne byo bakebazhachisha na mambo a bubi bwabo,
Byo bakapitanga mu bya malwa, bakankeba.”+
Witukozhezhe, bino uketukasa pa bilonda.
2 Pa kupitapo moba abiji, aye uketubuka.
Pa juba ja busatu, uketubuusha,
Kabiji tukekala bomi ku meso anji.
3 Twayai twibikisheko, tumuyuke bulongo Yehoba.
Kwa kubula nangwa kuzhinaukatu ne, aye ukeya byonkatu bisela juba;
Ukeya kwi atweba byonkatu binoka mvula,
Byonkatu mvula wa mwela wa mebele byo anekenya mushiji.”
4 “Anweba bena Efelaimu, ñanyi kintu kyo nsakwimuba?
Anweba bena Yuda, ñanyi kintu kyo nsakwimuba?
Mambo butemwe bwenu bubula kwaluka bujitu nobe makumbi a lukelo,
Buji nobe kime kibula kubanda kukunchika.
Luzhachisho lukeya pe anweba, lukasama nobe kyeya.+
6 Mambo amiwa nsekela mu butemwe bubula kwaluka* kechi mu bitapisho ne,
Ne mu kungyuka amiwa Lesa kechi mu milambo ya kusoka ne.+
7 Pano bino, abo baonauna lulayañano lwami byonkatu byuba bantu bakwabo.+
Bansatukila monka mu kyalo kyabo.
9 Jibumba ja bañanga jijitu nobe tupondo twabelamina muntu.
Bepaya bantu mu mukwakwa waya ku Shekema,+
Mambo boba bintu bya bumvu.
10 Namona kintu kyatama bingi mu bena Isalela.
11 Ne anweba bena Yuda, bemutongwela kimye kya kwimunowa,
Kimye kyo nkabwezha jibiji bantu bami bo batwajile mu buzha.”+
7 “Kimye kyonse kyo nkeba kubuka bena Isalela,
Bubi bwa bena Efelaimu busoloka,+
Ne bubi bwa bena Samaliya;+
2 Pano bino, abo kechi balangulukapo mu michima yabo amba amiwa nkavuluka bubi bwabo bonse ne.+
Byubilo byabo byatama bibazhokoloka;
Biji konka ku meso ami.
3 Basangajika mfumu na bubi bwabo,
Ne babitumbafumu na bujimbijimbi bwabo.
4 Abo bonse bo bankende,
Bateema nobe kitofu kyaambula yewa usoka bashinkwa,
Yenka uleka kusonsela pa mujilo kimye kyo abena kukanda muvuba kufikatu ne byo atutumuka.
5 Pa juba ja kijiilo kya mfumu wetu, babitumbafumu bakolwa
Kabiji binyu bibalengela kuzhingila.+
Aye wisampa bulunda na bamwenga.
6 Mambo abo beya, michima yabo saka yatwa kyuya nobe kitofu.*
Awa usoka bashinkwa ulaala bufuku bonse;
Lukelo kitofu kiteematu nobe lubebe lwa mujilo.
7 Bonse batwa kyuya nobe kitofu,
Kabiji bonauna bantangi* babo.
8 Bena Efelaimu bakwatankana na bisaka bya bantu.+
Bena Efelaimu baji nobe shinkwa wanzhingwile ye babula kwalula pa kusoka.
9 Bebapwisha bulume ku bantu bangi,+ pano bino abo bene kechi bayuka ne.
Kabiji mitwe yabo yatokatu too na mvwi, pano bino abo bene kechi bayuka ne.
10 Bwitote bwa bena Isalela bwibashinawina abo bene,+
Pano bino, kechi babwela kwi Yehoba Lesa wabo ne,+
Kabiji kechi bamukeba nangwa kya kuba bino bintu byonse bibamwekela ne.
11 Bena Efelaimu bajitu nobe nkunda wakosama, wabula maana.*+
Bajijila bena Ijipita;+ kabiji baya ku Asilya.+
12 Konse ko bakaya, amiwa nkebata bukonde.
Nkebekizha panshi nobe bañonyi.
Nkebakambula kwesakana na lujimuno lo nebajimwineko kala.+
13 Malwa abo, mambo bannyema amiwa!
Bakonaika, mambo bandenga mambo!
Nakebelenga kwibapokolola, pano bino, baamba bya bubela pe amiwa.+
14 Kechi bakebele bukwasho kwi amiwa na muchima wabo yense ne,+
Nangwa kya kuba bajijilenga pa myanya yabo.
Bechibawilenga bene na mambo a kajo ne binyu bya katataka;
Bansatukila.
15 Nangwa kya kuba nebakwashishe ne kwibakosesha,
Abo bansatukila, babena kulangulukatu kuba bintu byatama.
16 Bapimpwile byubilo byabo, bino kechi mwayila mpopwelo ya kine ne;
Bebalengulwile nobe buta bwa mukanda bwavwela.+
Babitumbafumu babo bakafwa na mpoko na mambo a bintu byatama bifuma mu tunwa twabo.
Na mambo a kino, bakebobanga mwenga mu kyalo kya Ijipita.”+
8 “Someka lusengo ku kanwa kobe!+
Mulwanyi waiya na kulukuka nzubo ya Yehoba nobe mpungu,+
Mambo bazhilulula lulayañano lwami+ kabiji balala mizhilo yami.+
2 Banjijila amba, ‘Anweba Lesa wetu, atweba bena Isalela twimuyuka!’+
3 Bena Isalela bakana bintu byawama.+
Mulwanyi ebapupile.
4 Betongwela bamfumu abo bene kwa kubula kungipuzha amiwa.
Batongola babitumbafumu, pano bino, amiwa kechi nebayuka ne.
5 Anweba bena Samaliya, ñombe wenu ye mwalenga namukana.+
Amiwa nemubuukila bukaji.+
Nanchi mukatwajijila kuba bintu byatama kufika ñanyi kimye?
6 Mambo uno ñombe wafuma ku bena Isalela.
Sendwe wa bya kulengalenga ye wamulengele, kechi ye Lesa ne;
Ñombe wa bena Samaliya bakamulalaula.
Kafwako lunenge nangwa umo ukekala na kajo kapya* ne;+
Bintu byonse bikamena, kechi bikapanga kajo ne.
Kabiji inge kukekala bimo bikapanga kajo, bantu bafuma ku byalo bingi* bo bakekaja.+
Bakekala mu bisaka bya bantu,+
Nobe kipe kyo balengulula.
9 Mambo abo baya ku Asilya+ nobe mbongolo wafuma pa kipanyi kya bakwabo.
Bena Efelaimu bapa banabakazhi mali kuba’mba bekale bakambwe babo.+
10 Nangwa kya kuba bakambwe babo bafuma mu bisaka bya bantu,
Amiwa nkebakonkanya pamo;
Bakamanamanga+ na mambo a bya malwa bibaletela mfumu ne babitumbafumu.
11 Mambo bena Efelaimu bavuzha bya kusokelapo bitapisho kabiji bibalengela kulenga mambo.+
Baikala na bya kusokelapo bitapisho byavula kabiji bibalengela kulenga mambo.+
13 Bapana bitapisho bya bupe kwi amiwa, kabiji baja nyama,
Pano bino, amiwa Yehoba kechi mmwenamo lusekelo ne.+
Kabiji amiwa nkavuluka bubi bwabo ne kwibakambula na mambo a bubi bwabo.+
14 Bena Isalela bavulama Mulenga wabo+ kabiji bashimika mazubo a balesa bangi,+
Kabiji bena Yuda bakekala na mizhi yavula iji na masakwa akosa.+
Pano bino, amiwa nkatuma mujilo mu mizhi yabo,
Ne kusoka byamba byonse bijimo.”+
9 “Anweba bena Isalela, kange musekele ne,+
Kange musangalale byonka bisangalala mitundu ya bantu ne.
Mambo mwamusatukila Lesa wenu pa kuba bupite.*+
Mwatemwa kutambula mfweto ya mu bupite bwenu pa bipujilo byonse bya kajo.+
2 Pano bino, kipujilo ne kya kufiinamo mañanzañanza kechi bikebajiisha ne,
Kabiji binyu bya katataka bikapwa.+
3 Abo kechi bakatwajijila kwikala mu kyalo kya kwa Yehoba ne;+
Pakuba bena Efelaimu bakabwela ku Ijipita,
Kabiji bakajanga bintu bya muzhilo mu Asilya.+
4 Kechi baketululapo milambo ya binyu kwi Yehoba ne;+
Bitapisho byabo kechi bikamutokeshanga ku muchima ne.+
Bijitu nobe kajo ka pa majila;
Aba bonse bakekaja, bakezhilulula bene.
Mambo kajo kabo kakekalatu kabo bene* kwapwa;
Kechi bakekaleta mu nzubo ya Yehoba ne.
5 Nanchi mukooba byepi pa juba ja kupwila pamo,*
Pa juba ja kijiilo kya Yehoba?
6 Mambo umvwai! abo bakanyema na mambo a lonaiko.+
Bakebakonkanya pamo ku bena Ijipita,+ kabiji bakebazhiika ku bena Memfisa.+
Bichi bya miba bikapingakena pa bintu byabo bya buneme bya siliva,
Kabiji miba ikamena mu matente abo.
7 Juba ja kwibazhachisha jikafika,+
Moba a kushinkanya nabo akafika,
Kabiji bena Isalela bakayuka kino.
Ngauzhi wabo ukakosama, ne muntu waula ukakonya;
Mambo bubi bwenu bwavula bingi, kwimushikwa nako kwabaya bingi.”
8 Kasopa+ wa bena Efelaimu wajinga ne Lesa wami.+
Pano bino, mashinda onse a bangauzhi+ banji aji nobe tukose twa yewa ukwata tuñonyi;
Mu nzubo ya Lesa wanji muji kwishikwa.
9 Bakizhamo kuba bintu byatama byonka byo kyajinga mu moba a Gibea.+
Aye ukavuluka bubi bwabo ne kwibakambula pa bubi bwabo.+
10 “Byo nataaine bena Isalela, kyajingatu nobe nataana mañanzañanza mu kiselebwa.+
Byo namwene bashakulu bobe, kyajingatu nobe namona makuyu atanshi kupanga ku kichi kya mukuyu.
Pano bino, abo bayile kwi Baela wa ku Peola;+
Bepaine abo bene ku nkishi wa bunya,*
Kabiji baikele ba bunya nobe+ kyonkakya kintu kyo batemenwe.
11 Lukumo lwa bena Efelaimu lwapwa byonkatu bitumbuka kañonyi;
Kafwako kusema baana, kwikala na jimi nangwa kwimita ne.+
12 Nangwa kya kuba basema baana,
Amiwa nkebalengela kufwa, kafwako nangwa umo ukashalapo ne;+
Kikebatamina bingi byo nkebalengulula!+
13 Namwenenga bena Efelaimu baikalanga mu mpunzha mujiila banyama, nobe bena Tila;+
Bena Efelaimu bafwainwa kuleta baana babo kuba’mba bebepaye.”
14 Anweba Yehoba, bapai bintu byo mwafwainwa kwibapa;
Bapai jivumo jipulumuna ne mabele abula kusansa.*
15 “Bubi bwabo bonse bebubijilenga mu Giligala,+ mambo konkakwa nebashikilwe bingi.
Amiwa nkebapangamo mu nzubo yami na mambo a byubilo byabo byatama.+
Kechi nkebatemwapo jibiji ne;+
Babitumbafumu babo bonse betota.
16 Bena Efelaimu bakebepaya.+
Muzhazhi wabo ukooma, kabiji kechi bakapangapo bipangwa jibiji ne.
Nangwa kya kuba bakaseme, amiwa nkepaya baana babo bo batemwa.”
10 “Bena Isalela baji nobe kichi kya miñanzañanza kyatama kipanga* bipangwa.+
Inge bipangwa byabo byavula ne bitapisho byabo nabyo bivula;+
Umvwe kyalo kyabo kyaikala na bintu byawama, ne mashiki abo azhila nao beawamisha.+
Kuji umo ukeya kulalaula bya kusokelapo bitapisho byabo ne konauna mashiki abo.
3 Abo bakamba’mba, ‘Kechi tuji na mfumu ne,+ mambo kechi twamwakamwa Yehoba ne.
Kabiji amba ñanyi kintu kyakonsha kwitubila mfumu?’
4 Bamba byatutu ne kuchipa bubela,+ ne kulaya lulayañano;
Onkao mambo, bintu byo bakebazhachisha bikekala nobe nsono ifwana imena mu majimi.+
5 Bantu bekala mu Samaliya bakachina na mambo a mwana ñombe nkishi wa bena Bete-avena.+
Bantu bekalamo bakajila mabingo na mambo a aye,
Byonkatu byo kikekala ku bañanga ba balesa bangi basangalelanga mwi aye ne kumupa lukumo,
Mambo bakamutwala mu buzha.
6 Bakamutwala ku Asilya kwikala ke kya bupe ku mfumu mukatampe.+
Bena Efelaimu bakebalengesha bumvu,
Ne bena Isalela nabo bakebalengesha bumvu na mambo a kulondela bintu bya bubela byo bebabuujilenga.+
7 Bena Samaliya ne mfumu wabo bakebepaya,*+
Nobe kamusampi ko batema kabena kutumpauka peulu ya mema.
8 Mapunzha atuntama a bena Bete-avena,+ alengela bena Isalela kulenga mambo,+ bakeonauna,+
Miba ne tubichi tuji na mabuula a miba bikamena pa bya kusokelapo bitapisho byabo.+
Bantu bakambila mitumba amba, ‘Tuzhikilaimo!’
Kabiji bakambila tutumbatumba amba, ‘Tuponenai!’+
9 Anweba bena Isalela, mwalenga mambo kufumatu mu moba a bena Gibea.+
Mwatwajijila kulenga mambo konkakwa.
Nkondo kechi ibafikijile* bantu babula koloka ba mu Gibea ne.
10 Nkebakambula po nkakebela.
Kabiji bakebalukuka ku bantu,
Kimye bubi bwabo bubiji kyo bukebanankama.*
11 Bena Efelaimu bajinga nobe mwana ñombe mukazhi ye bafunjisha, watemenwe kupuula kajo,
Onkao mambo, amiwa kechi nakobekelemo kintu mu nshingo yanji yamwekelenga bulongo ne.
Pano nkalengela muntu umo kwibengijisha* bena Efelaimu.+
Bena Yuda bakajimanga; bena Yakoba bakapumaunanga masengele.
12 Byalai nkunwa ya bololoke ne kunowa butemwe bubula kwaluka.
Sengelai mushiji wa kubyalapo kajo+
Saka kukiji kimye kya kumukeba Yehoba,+
Poso akeye ne kwimufunjisha bololoke.+
13 Pakuba anweba mwajima bubi,
Mwanowa bintu byabula koloka,+
Kabiji mwaja kajo kafuma mu bujimbijimbi;
Mambo mwaketekela mu mashinda enu anwe bene,
Ne mu kuvula kwa babiyangala benu.
14 Mu bantu benu mukekala kiwowo,
Kabiji mizhi yenu iji na masakwa akosa bakeyonauna yonse,+
Byonkatu byaonawine Shalamana wa mu kisemi kya kwa Bete-abele,
Mu juba ja nkondo kimye banabakazhi kyo bebepayijile pamo na baana babo.
15 Bino byo bikemumwekela ne anweba bena Betele+ na mambo a bubi bwenu.
Mfumu wa bena Isalela bakamwipaya* lukelokelo.”+
Batwajijile na kutapisha bitapisho ku bankishi ba Baela+
Kabiji bapainenga bitapisho ku bankishi ba kusonga.+
3 Pano bino, amiwa yami nafunjishe bena Efelaimu+ bya kwenda saka nebakwata ku maboko;+
Kabiji abo kechi bayukile’mba yami nebabukile ne.
4 Nebatangijilenga na ntambo ya bantu* ne na mizhinge ya butemwe;+
Najinga kwi abo nobe muntu wafumishe kikonkoji mu nshingo yabo,
Kabiji bonse nebapelenga kajo.
5 Abo kechi bakabwela ku kyalo kya Ijipita ne, pano bino, Asilya ukekala mfumu wabo,+
Mambo bakaine kubwela kwi amiwa.+
6 Mpoko ikapita mu mizhi yabo+
Ne konauna mipingilo ya mizhi ne kutapa bantu bajimo na mambo a milanguluko yabo yatama.+
7 Bantu bami bakanatu nsalansala kwikala ba kishinka kwi amiwa.+
Umvwe bebeta kubwela ku mwine wa mwiulu,* kafwako nangwa umo wimana ne.
8 Anweba bena Efelaimu, nakonsha kwimulekelela byepi?+
Anweba bena Isalela, nakonsha kwimupana byepi ku balwanyi benu?
Nakonsha kwimuba byepi byonka byo naubile muzhi wa Adima?
Nakonsha kwimwalula byepi nobe muzhi wa Zeboimu?+
9 Kechi nkemuzhingijilapo jibiji ne.
Kabiji bena Efelaimu kechi nkebonauna jibiji ne,+
Mambo amiwa yami Lesa, kechi nji nobe muntu ne,
Amiwa Nazhila nji ne anweba;
Kabiji kechi nkemubuukila bukaji ne.
10 Bakalondelanga Yehoba, ne aye ukabuluma nobe bokwe;+
Inge wabuluma, baana banji bakeya saka bazakama kufuma ku muzhika.”+
11 Yehoba waamba’mba, “Bakazakamanga nobe kañonyi kimye kyo bakafuma mu Ijipita,
Nobe nkunda wafuma mu kyalo kya Asilya;+
Kabiji nkebekazha mu mazubo abo.+
12 Bena Efelaimu bambatu bya bubela pe amiwa,
Kabiji bena Isalela nabo bambatu bya bujimbijimbi.+
Pakuba bena Yuda batwajijila kwenda na Lesa,
Kabiji baikala ba kishinka ku Mwine Wazhila.”+
12 “Bena Efelaimu babena kujatu mwela.
Juba jonse balondelatu mwela wa ku musela.
Baji bingi na bubela kabiji bambanzhi.
Bomvwañana na bena Asilya+ ne kutwala manyi ku Ijipita.+
2 Yehoba ukachibila mambo bena Yuda;+
Ukakambula Yakoba monka mwayila mashinda anji,
Kabiji ukamufweta monka mwayila byubilo byanji.+
3 Byo ajinga munda, wakwachile kolojanji ku kashiko,+
Kabiji na bulume bwanji bonse walwile ne Lesa.+
4 Watwajijile kulwa na malaika kabiji wamushinjile.
Aye wajijile kabiji walombele kuba’mba amubile bibusa.”+
Wataaine Lesa ku Betele kabiji konkakwa Lesa wisambile ne atweba,+
5 Yehoba Lesa wa mabumba,+
Yehoba jo jizhina janji ja kumuvulukilako.+
6 “Onkao mambo, bwelai kwi Lesa wenu,+
Ikalai na butemwe bubula kwaluka ne kuba byaoloka,+
Kabiji ketekelainga mwi Lesa wenu kimye kyonse.
Kabiji mu mingilo yetu yonse yo twingila, kechi bakataanamo kyatama nangwa bubi ne.’
9 Bino amiwa yami Yehoba Lesa wenu kufumatu kimye kyo mwafuminenga mu kyalo kya Ijipita.+
Nkemulengela kwikala jibiji mu matente
Byonka byo kyaikalanga mu moba a kimye kyatongolwa.*
10 Nesambile na bangauzhi,+
Navuzhizhe bimwesho byabo,
Kabiji naambile bishimpi kupichila mu bangauzhi.
11 Mu Gileada mujitu bujimbijimbi*+ ne bubela.
Batapisha bañombe mu Giligala,+
Kabiji bya kusokelapo bitapisho byabo bijitu nobe mabwe alumbama mu mimpalala ya mu majimi.+
12 Yakoba wanyemejile ku nyaunda* ya Alama;*+
Isalela+ waingijilenga konkakwa kuba’mba bamupe mwanamukazhi,+
Kabiji wafungilenga mikooko kuba’mba bamupe mwanamukazhi.+
13 Yehoba wafumishe bena Isalela mu Ijipita kwingijisha ngauzhi,+
Kabiji ngauzhi wanji wibalaminenga.+
14 Bena Efelaimu balenga mambo akatampe;+
Mashi a bantu bo baipayile ebashinkamana;
Nkambo yabo ukebakambula na mambo a kumwendeleka.”+
13 “Bena Efelaimu byo baambilenga, bantu bazakaminenga;
Mambo batumbalele bingi mu Isalela.+
Pano bino, balengele mambo a kupopwela Baela+ kabiji bafwile.
2 Kabiji balengejilepo ne mambo akwabo
Balengele bipashañano bya kyela* na siliva wabo;+
Balengele bankishi na manono, ino yonse yo mingilo ya basendwe ba bya kulengalenga.
Baambijilenga bankishi amba, ‘Bantu batapisha bitapisho bafyompenga baana ba bañombe.’+
3 Onkao mambo, abo bakekala nobe makumbi amweka lukelo,
Nobe kime kikunchika bukiji,
Nobe muungu ye bolulula ku mwela mukatampe kumufumya pa kipujilo,
Kabiji bakekala nobe bwishi bubena kufumina pa kipenze kya mu musemi.
4 Amiwa yami Yehoba Lesa wenu kufumatu kimye kyo mwafuminenga mu kyalo kya Ijipita;+
Kafwako Lesa mukwabo ye mwayukile ne, mwayukiletu amiwa kwapwa,
Kabiji kafwako mupulushi mukwabo uji nobe amiwa ne.+
5 Amiwa nemukwashishenga mu kiselebwa+ mu kyalo mwabujile mema.
6 Baikuchile na nsono ya munyemvu,+
Baikuchile ne kutendeka kwitota.
Onkao mambo, bamvulamine.+
7 Amiwa nkekala kwi abo nobe mwana bokwe,+
Kabiji nobe kisumpa ubelamina kunsa ya jishinda.
8 Nkebavundumukila nobe mbeyala ubena kukeba baana banji baeleka,
Kabiji nkalala tukuji* twabo.
Nkebaja byonka byuba bokwe;
Bakebatabaula ku nyama wa mungye.
9 Bakemonauna anweba bena Isalela,
Mambo mwangalukijilemo amiwa yenka nkwasho wenu.
10 Pano mfumu wenu uji pi pa kuba’mba emupulushe mu mizhi yenu yonse?+
Kabiji bantangi* benu baji pi, bonka bo mwaambijilenga’mba,
‘Tupai mfumu ne babitumbafumu’?+
12 Bubi bwa bena Efelaimu bebukasa;*
Mambo o balengele bealama.
13 Bisanso bikala na mwanamukazhi ubena kusema bikeya pe abo.
Pano bino, abo bo baana babula maana;
Inge kimye kya kusemwa kyafika, kechi basemwa ne.
Obewa Lufu, lumuna wobe uji pi?+
Obewa Kilende, konauna kobe kuji pi?+
Kechi nkamwesha lusa ne.
15 Nangwa kya kuba ukatenkuma nobe matete,
Mwela wa ku musela ukeya, ye mwela wa Yehoba,
Ukafumina mu kiselebwa, ne kumisha mishima yabo ne tukola twabo.
Aye ukeya na konauna bintu byabo byonse bya buneme.+
16 Bena Samaliya bakebazhachisha+ na mambo a kusatukila Lesa wabo.+
Bakebatapa na mpoko,+
Baana babo bakebonaunatu shata,
Kabiji bakasabaula mavumo a banabakazhi baimita.”
2 Bwelai kwi Yehoba na bino byambo,
Mwambilai’mba, ‘Tulekelaiko mambo etu+ kabiji swai kutambula byawama byo twimupa,
Tukalambula byambo bya lutotelo bya pa tunwa twetu+ byonka byo tulambula milambo ya baana bañombe.*
3 Bena Asilya kechi baketupokolola ne.+
Kechi tukendanga pa bambili ne,+
Kabiji kechi tukambapo jibiji amba, “Anweba Lesa wetu!” ku bankishi bo twalenga ne,
Mambo anweba mubila lusa mwana wabula bashanji.’+
4 Amiwa nkebakwasha kwikala ba kishinka jibiji.+
5 Amiwa nkekala nobe kime ku bena Isalela;
Bakatenkuma nobe buluba
Kabiji bakekizha mizhazhi panshi nobe bichi bya ku Lebanoni.
6 Misampi yabo ikavula,
Buya bwabo bukekala nobe kichi kya maolivi,
Bwema bwabo bukanunkilanga nobe bwa ku Lebanoni.
7 Bakekalanga jibiji mu kimfutele kyanji.
Bakajimanga kajo ne kulala buluba nobe kichi kya miñanzañanza.+
Bakaya nkuwa* nobe binyu bya ku Lebanoni.
8 Bena Efelaimu bakamba’mba, ‘Bankishi baji na ñanyi mwingilo kwi atweba?’+
Amiwa nkebakumbula ne kwibalama.+
Nkekala nobe kichi kya yunipa kyatenkuma.
Yami nkemupanga bipangwa.”
9 Ñanyi uji na maana akwatakanye bino bintu?
Ñanyi uji na maana ayuke bino bintu?
Mambo mashinda a Yehoba aoloka,+
Kabiji bantu baoloka bakendanga monka;
Pakuba boba byatama baketuntula pa kwendamo.
Ngipipishilo ya jizhina ja Hoshaya, jilumbulula’mba “Bampulusha kwi Yehoba; Yehoba Wapulusha.”
Nangwa’mba “uji na byubilo byatama; wa bulalelale.”
Nangwa’mba “byubilo byatama; bulalelale.”
Nangwa’mba “byubilo byatama; bulalelale.”
Kulumbulula’mba “Lesa Ukabyala Nkunwa.”
Nangwa’mba “Musanza.”
Kulumbulula’mba “Ye Babula Kubila Lusa.”
Kulumbulula’mba “Kechi Bantu Bami Ne.”
Mu Kihebelu, “baana ba balume.”
Monai tubyambo twa munshi pa Hs 1:9.
Monai tubyambo twa munshi pa Hs 1:6.
Nangwa’mba “byubilo byatama; bulalelale.”
Nangwa’mba “byubilo byatama; bulalelale.”
Nangwa’mba “waubilenga byubilo byatama; (bulalelale).”
Nangwa’mba “Musanza.”
Nangwa’mba “Baela Wami.”
Nangwa’mba “nkebekazha.”
Kulumbulula’mba “Lesa Ukabyala Nkunwa.”
Monai tubyambo twa munshi pa Hs 1:6.
Monai tubyambo twa munshi pa Hs 1:9.
Ko kuba’mba, bashinkwa bo bengijisha mu bupopweshi bwa bubela.
Homela umo waesakene na malita 220. Monai bya Kulumbulula B14.
Nangwa’mba “kuba byubilo byatama; (bulalelale).”
Mu Kihebelu, “moba avula.”
Nangwa’mba “balesa ba mu nzubo; bankishi.”
Nangwa’mba “nkamonauna.”
Nangwa’mba “bakebonauna.”
Nangwa’mba “mikambizho.”
Nangwa, “Bapimpula lukumo lwami na bumvu.”
Nangwa’mba “basuntwilenga mweo wabo ku.” Monai Mutanchi, “Mweo.”
Nangwa’mba “Bakakizhamo kuba bintu byatama; kuba bupite.”
Nangwa’mba “Byubilo byatama; Bulalelale.”
Mu Kihebelu, “Bisenda muchima.”
Nangwa’mba “kamama kabo ko bapongako.”
Nangwa’mba “byubilo byatama; bulalelale.”
Nangwa’mba “byubilo byatama; bulalelale.”
Nangwa’mba “byubilo byatama; bulalelale.”
Nangwa’mba “byubilo byatama; bulalelale.”
Nangwa’mba “byubilo byatama; bulalelale.”
Mu Kihebelu, “mpunzha yabaya.”
Nangwa’mba “maalwa a wichi.”
Nangwa’mba “Bakizhamo kuba byubilo byatama; kuba bupite.”
Mu Kihebelu, “makebo.”
Nangwa’mba “ukamukumpula.”
Nangwa’mba “Amiwa nkebafundako.”
Nangwa’mba “mwauba byubilo byatama; mwauba bupite.”
Nangwa’mba “byubilo byatama; bulalelale.”
Nangwa, “Mu ñondo umo bakebajiila.”
Nangwa’mba “majimi.”
Mu Kihebelu, “kilungi kyami.”
Nangwa’mba “mu lusa.”
Nangwa, “Mambo michima yabo iji nobe kitofu kimye kyo beya na byambo byabo bya mulambisha.”
Mu Kihebelu, “bamitonyi.”
Mu Kihebelu, “wabula muchima.”
Nangwa’mba “kaimana.”
Nangwa’mba “benyi.”
Nangwa’mba “mikambizho.”
Nangwa, “Bakabwela jibiji.”
Nangwa’mba “byubilo byatama; bulalelale.”
Nangwa’mba “ka mweo wabo.”
Nangwa’mba “ja kijiilo kyenu kyatongolwa.”
Nangwa’mba “lesa wa bunya.”
Nangwa’mba “akopoka.”
Nangwa, “kisemununa.”
Nangwa’mba “yatezhima; mulambisha.”
Mu Kihebelu, “bakebazhindamikapo.”
Nangwa’mba “ibonawine.”
Ko kuba’mba, kimye kyo bakasenda luzhachisho lwabo nobe kikonkoji.
Nangwa’mba “kwibakashila kintu.”
Mu Kihebelu, “bakamuzhindamikapo.”
Ko kuba’mba, bangauzhi ne bakwabo bo batumine na kufunjisha bena Isalela.
Nangwa’mba “ntambo ya lusa,” nabiji yoya ya nsemi.
Ko kuba’mba, ku bupopweshi bo basuntula peulu.
Mu Kihebelu, “lwatwa kyuya.”
Nangwa’mba “mupoteshi.”
Nangwa, “kijiilo.”
Nangwa’mba “bujimuku; bingelekezha.”
Mu Kihebelu, “mpunzha.”
Nangwa’mba “Silya.”
Nangwa’mba “bipashañano bya kusungulula.”
Mu Kihebelu, “kyavweta muchima.”
Mu Kihebelu, “bamitonyi.”
Nangwa’mba “bebulama.”
Nangwa’mba “Shelo,” ko kuba’mba, kilende kya bantu bonse. Monai Mutanchi.
Mu Kihebelu, “tupana baana ba bañombe ba byatunwa byetu.”
Mu Kihebelu, “Bakebavulukanga.”