ZEKALIYA
1 Mu ñondo wa butanu na busatu mu mwaka wa bubiji wa kwa Daliusa,+ byambo bya Yehoba byaishile kwi ngauzhi Zekaliya*+ mwana wa kwa Belekiya, Belekiya mwana wa kwa Ido amba: 2 “Yehoba wibazhingijile bingi bashenu.+
3 “Wibambile’mba, ‘Yehoba wa mabumba waamba’mba: “‘Bwelai kwi amiwa,’ byo byaamba Yehoba wa mabumba, ‘ne amiwa nkabwela kwi anweba,’+ byo byaamba Yehoba wa mabumba.”’
4 “‘Kange mwikale nobe bashenu bo babuujile ku bangauzhi ba kala amba: “Yehoba wa mabumba waamba’mba, ‘Fumaiko* ku mashinda enu a bubi ne ku byubilo byenu byatama.’”’+
“‘Bino abo bakaine kumvwa, kabiji kechi bateleko muchima kwi amiwa ne,’+ byo byaamba Yehoba.
5 “‘Pano bashenu baji pi? Nanchi bangauzhi baikele kikupu nyi? 6 Nangwa byonkabyo, byambo byami ne mikambizho yo nakambizhe bakalume bami bangauzhi, nanchi bashenu kechi bamwene byo byafikile nenyi?’+ Onkao mambo, babwelele kwi amiwa ne kwamba’mba: ‘Yehoba wa mabumba witubila monka mwayila mashinda etu ne byubilo byetu, byonkatu byo akebelenga kuba.’”+
7 Pa juba ja bu 24 ja ñondo wa bu 11, ko kuba’mba ñondo wa Shebata,* mu mwaka wa bubiji wa kwa Daliusa,+ byambo bya Yehoba byaishile kwi ngauzhi Zekaliya mwana wa kwa Belekiya, Belekiya mwana wa kwa Ido amba: 8 “Namwene kimwesho bufuku. Kwajinga muntu waendelenga pa mbili uchila, kabiji waimene pakachi ka bichi bya melito mu kinkunenke; kabiji kunyuma yanji kwajinga bambili bachila, bachiluluka ne batoka.”
9 Onkao mambo naipwizhe namba: “Bano bo ba ñanyi nkambo?”
Malaika waambilenga ne amiwa wankumbwile’mba: “Nsakukubula byo baji.”
10 Kepo awa muntu waimene pakachi ka bichi bya melito aambile’mba: “Abano Yehoba bo bo atuma kuya na kupitañana pa ntanda.” 11 Kabiji abo baambijile malaika wa Yehoba waimene pakachi ka bichi bya melito amba: “Twapitañanapo pa ntanda, ne ntanda yonse yazhindamatu nzoo kabiji paji mutende.”+
12 Kepo malaika wa Yehoba aambile’mba: “Anweba Yehoba wa mabumba, bimye binga byo mukatwajijila kubula kubila lusa Yelusalema ne mizhi ya mu Yuda,+ yo mwazhingijila ino myaka 70?”+
13 Yehoba wamukumbwile malaika waambilenga ne amiwa byambo byawama kabiji bya lutekenesho. 14 Kepo malaika waambilenga ne amiwa añambijile’mba: “Bijika amba, ‘Yehoba wa mabumba waamba’mba: “Naubila mukoyo Yelusalema ne Ziona, mukoyo mukatampe.+ 15 Bisaka bya bantu byaikala mu mutende nebizhingijila bingi,+ mambo amiwa nazhingijile pacheche,+ pakuba abyo byanungapo pa bya malwa.”’+
16 “Onkao mambo, Yehoba waamba’mba: ‘“Nkabwela ku Yelusalema na lusa,+ kabiji nzubo yami ikashimikwa monka,”+ byo byaamba Yehoba wa mabumba, “kabiji Yelusalema bakamupima na ntambo ya kupiminako.”’+
17 “Bijika jibiji ne kwamba’mba, ‘Yehoba wa mabumba waamba’mba: “Mizhi yami ikayula jikwabo na buwame; kabiji Yehoba ukatekenesha Ziona+ jibiji ne kusala Yelusalema jibiji.”’”+
18 Kepo nainukile ne kumona nsengo ina.+ 19 Onkao mambo, naipwizhe malaika waambilenga ne amiwa amba: “Nanchi bino bintu byo bi ka?” Aye wankumbwile’mba: “Ino yo nsengo yapalañenye Yuda,+ Isalela+ ne Yelusalema.”+
20 Kabiji Yehoba wammwesheshe basendwe bana. 21 Nashikishe namba: “Bano baiya na kuba ka?”
Aye wakumbwile’mba: “Ino yo nsengo yapalañenye Yuda kya kuba kafwako nangwa umo wakonsheshe kwinuna mutwe wanji ne. Bano bakwabo bakeya na kwibazakamisha, konauna nsengo ya bisaka bya bantu byasuntwijile nsengo yabyo kyalo kya Yuda, kuba’mba bekipalañanye.”
2 Kabiji nainukile ne kumona muntu saka aji na lutambo wa kupiminako+ mu kuboko kwanji. 2 Onkao mambo, namwipwizhe’mba: “Mubena kuya pi?”
Aye wankumbwile’mba: “Na kupima Yelusalema, kuba’mba mmone byo aji mu bwipi ne mu bula bwanji.”+
3 Kabiji malaika waambilenga ne amiwa wayile, ne malaika mukwabo waishile na kumutundaila. 4 Kepo amwambijile’mba: “Yanga lubilo ukamubuule awa nsongwalume amba, ‘“Mu Yelusalema bakekalamo+ byonka biji mizhi yabula nsakwa, na mambo a bantu bonse ne bilelwa bijimo.+ 5 Kabiji Yehoba waamba’mba, “amiwa nkekala kwi aye nobe nsakwa ya mujilo yamuzhokoloka,+ kabiji nkekala lukumo mwi aye.”’”+
6 Yehoba waamba’mba, “Iyai! Iyai! Nyemaimo mu kyalo kya ku kabeta ka ku buyeke.”+
“Mambo nemupalañenya ku luvula luna lwa mwiulu,”+ byo byaamba Yehoba.
7 “Iya, obewa Ziona! Nyemai, anweba mwikala na mwana wa mukazhi wa Babilona.+ 8 Mambo bino byo byaamba Yehoba wa mabumba, kufuma kimye kyo bamutumbijikile wantuma mu bisaka bya bantu bimupukwilenga bintu amba:+ ‘Yense ukwata pe anweba ukwata pa kantu ka pa jiso jami.+ 9 Mambo nkebasopesha na kuboko kwami, kabiji bakekala ke bipukulwa bya bazha babo.’+ Kabiji kine mukayuka’mba Yehoba wa mabumba ye wantuma.
10 Yehoba waamba’mba, “Bijika na lusekelo, obewa mwana wa mukazhi Ziona;+ mambo mbena kwiya,+ kabiji nkekala ne obewa.”+ 11 “Bisaka bya bantu byavula bikeya kwi Yehoba pa joja juba,+ kabiji bakekala ke bantu bami; ne amiwa nkekala nenu.” Kabiji mukayuka’mba Yehoba wa mabumba ye wantuma kwi anweba. 12 Yehoba ukatambula Yuda kwikala ke kintu kyanji kyo bamwabilapo mu kyalo kyazhila, kabiji ukasala Yelusalema jibiji.+ 13 Anweba bantu bonse, ikalaitu nzoo kwi Yehoba, mambo aye ubena kwingila mwazhila mo ekala.
3 Kabiji wammwesheshe Yoshua+ ñanga mwine mukatampe saka aimana kuji malaika wa Yehoba, ne Satana+ waimene ku kilujo kyanji kuba’mba amukanye. 2 Kepo malaika wa Yehoba aambijile Satana amba: “Yehoba akukajipile obewa Satana,+ kine Yehoba yenka wasala Yelusalema+ akukajipile! Nanchi aye kechi uji nobe mwandalo ubena kupya ye basompola mu mujilo nenyi?”
3 Yoshua wavwajile bivwalo bya ndochi saka aimana kuji malaika. 4 Malaika waambijile aba baimene kwi aye amba, “Muvuulai bivwalo byanji bya ndochi.” Kepo amubuujile’mba, “Umvwa, bubi* bobe nebufumyapo pe obewa, kabiji basakukuvwika bivwalo byawama.”*+
5 Onkao mambo, naambile’mba: “Bamuvwike kitambala kyatoka ku mutwe.”+ Kabiji bamuvwikile kitambala kyatoka ku mutwe ne kumuvwika bivwalo; ne malaika wa Yehoba waimene kwipi. 6 Kepo malaika wa Yehoba aambijile Yoshua amba: 7 “Yehoba wa mabumba waamba’mba, ‘Inge ukendenga mu mashinda ami ne kuñingijila, po po ukekala mutonyi mu nzubo yami+ ne kulama* bipango byami; kabiji nkakuswisha kutwela mukachi ka bano baimana kuno.’
8 “‘Umvwa obewa Yoshua Ñanga Mwine Mukatampe, obewa ne balunda nobe bo wikala nabo, mambo bano banabalume ko kayukilo; umvwa! Nkaleta kalume wami+ aye Musele!+ 9 Monai jibwe jo natula kwi Yoshua! Pa jonka jino jibwe jimo paji meso atanu na abiji; kabiji mbena kunembapo kya kukololola,’ byo byaamba Yehoba wa mabumba, ‘kabiji nkafumyapo bubi bwa kyokya kyalo mu juba jimo.’+
10 Yehoba wa mabumba waamba’mba: “Mu jonkaja juba anweba bonse pa muntu pa muntu muketa ye mwikala nanji kipikipi kwiya na kwikala munshi ya muñanzañanza wenu ne munshi ya kichi kyenu kya mukuyu.”+
4 Malaika waambilenga ne amiwa waishile jibiji ne kumbuusha, nobe ubena kubuusha muntu uji mu tulo. 2 Kepo angipwizhe’mba: “Wamona ka?”
Namukumbwile’mba: “Namona kya kutulapo malampi kyo balenga kyonse na ngolode,+ peulu paji nsanyi yafukumana. Kabiji kiji na malampi atanu na abiji,+ kine atanu na abiji, ne malampi aji peulu yakyo, aji na miyengo itanu na ibiji. 3 Kabiji kwipi na ko kyaikela kuji bichi bibiji bya maolivi,+ kimo ku kilujo kya nsanyi yafukumana ne kikwabo ku kipiko.”
4 Kepo naipwizhe malaika waambilenga ne amiwa amba: “Nkambo, abino bintu byatala mu ka?” 5 Malaika waambilenga ne amiwa waipwizhe’mba: “Nanchi kechi wayuka bino bintu mo byatala nenyi?”
Amiwa nakumbwile’mba: “Ine mwane nkambo.”
6 Kepo añambijile’mba: “Yehoba waambijile Zelubabele amba: ‘“Kechi bikobiwa na bulume bwa nzhita nangwa na ngovu ne,+ kanatu na mupashi wami,”+ byo byaamba Yehoba wa mabumba. 7 Yobe ñanyi obewa mutumba mukatampe? Ukekala mushijitu*+ ku meso a kwa Zelubabele.+ Kabiji aye ukalupula jibwe ja peulu saka babijika’mba: “Byo kyawamapo! Byo kyawamapo!”’”
8 Byambo bya Yehoba byaishile jibiji kwi amiwa amba: 9 “Maboko a kwa Zelubabele aala kitendekesho kya ino nzubo,+ kabiji maboko anji o akeipwisha.+ Kabiji mukayuka’mba Yehoba wa mabumba ye wantuma kwi anweba. 10 Mambo ñanyi walengulula juba ja ntendekelo icheche?*+ Mambo bakasekela ne kumona lutambo wa kolwelako* mu kuboko kwa kwa Zelubabele. Ano atanu na abiji o meso a Yehoba, abena kupitañana pano pa ntanda ponse.”+
11 Kepo namwipwizhe namba: “Byatala mu ka bino bichi bibiji bya maolivi biji ku kilujo ne ku kipiko kya kya kutulapo malampi?”+ 12 Kabiji namwipwizhe jibiji namba: “Tuno tumisampi* twa ku bichi bibiji bya maolivi tubena kwitulwila manyi a ngolode mu miyengo ibiji ya ngolode twatala mu ka?”
13 Kepo angipwizhe’mba: “Nanchi kechi wayuka bino bintu mo byatala nenyi?”
Amiwa namukumbwile’mba: “Ine mwane nkambo.”
14 Waambile’mba: “Bino ke bashingwa babiji baimana kwipi na Nkambo wa ntanda yonse.”+
5 Nainukile jibiji, kabiji namwene muvungilo wapichilenga mwiulu. 2 Wangipwizhe’mba: “Wamona ka?”
Namukumbwile’mba: “Namona muvungilo ubena kupita mwiulu, mu bula uji makyubichi 20* ne mu bwipi makyubichi 10.”
3 Kepo añambijile’mba: “Jino jo jifingo jibena kuya pa ntanda ponse, mambo yense wiba,+ byonka byo kyanembwa ku lubaji lumo, kechi bamukambula ne; kabiji yense uchipa,+ byonka byo kyanembwa ku lubaji lukwabo, kechi bamukambula ne. 4 ‘Nejituma,’ byo byaamba Yehoba wa mabumba, ‘kabiji jikatwela mu nzubo ya ngivi ne mu nzubo ya muntu uchipa bubela mu jizhina jami; kabiji jikekala mu yonkaya nzubo ne kwiyonauna, pamo na bichi byayo ne mabwe ayo.’”
5 Kepo malaika waambilenga ne amiwa aishile kwipi ne kuñambila’mba: “Inuka umone kibena kuya.”
6 Onkao mambo, naipwizhe’mba: “Ki ka kyonkakyo?”
Aye wankumbwile’mba: “Kino ke kindundu kya efa* kibena kuya.” Wanungilepo’mba: “Bino byobyo bamweka ba pano pa ntanda ponse.” 7 Kabiji namwene saka bashikula kizhiko kya nzhingwile kya kyumbu, kabiji mu kindundu mwajinga mwanamukazhi. 8 Ponkapo waambile’mba: “Uno ye Bubi.” Kepo amushindaikijile mu efa, ne kuzhikapo kizhiko kyanema kya kyumbu peulu.
9 Kepo nainukile ne kumona banabakazhi babiji saka beya, kabiji balelembelenga mu mwela. Bajinga na byapi nobe bya ñendabwala. Kabiji bashikwile kindundu ne kwikitwala pakachi ka ntanda ne jiulu. 10 Onkao mambo, naipwizhe malaika waambilenga ne amiwa amba: “Kwepi ko babena kutwala kindundu kya efa?”
11 Aye wankumbwile’mba: “Ku kyalo kya Shinala*+ na kumushimikila nzubo; kabiji inge bakeinengezhe, bakamubika monkamwa mu mpunzha yanji yamufwainwa.”
6 Byo nainukile jikwabo namwene makalaki ana saka afuma pakachi ka mitumba ibiji, kabiji ino mitumba yajinga ya mukuba. 2 Kalaki mutanshi wajinga na bambili bachila, ne kalaki wa bubiji wajinga na bambili bafita.+ 3 Kalaki wa busatu wajinga na bambili batoka, ne kalaki wa buna wajinga na bambili ba mabala mabala ne ba minkamba minkamba.+
4 Naipwizhe malaika waambilenga ne amiwa amba: “Nkambo, bano bo bañanyi?”
5 Malaika wankumbwile’mba: “Abano yo mipashi ina+ ya mwiulu ibena kuya yafuma na kwimana ku meso a Nkambo wa ntanda yonse.+ 6 Awa* uji na bambili bafiita ubena kuya ku kyalo kya ku kabeta ka ku buyeke;+ batoka babena kuya ku bushiya bwa kalunga ka mema; ne ba mabala-mabala babena kuya ku kyalo kya ku kabeta ka ku bulenge. 7 Kabiji aba ba minkamba bakebeshe bingi kuya na kupitañana pa ntanda.” Kepo aambile’mba: “Yainga mukapitañane pa ntanda.” Ne abo batendekele kupitañana pa ntanda.
8 Kepo ambijikile ne kuñambila’mba: “Tala, aba babena kuya ku kyalo kya ku kabeta ka ku buyeke balengela mupashi wa Yehoba kwikala mu kyalo kya ku kabeta ka ku buyeke.”
9 Byambo bya Yehoba byaishile kwi amiwa jikwabo amba: 10 “Utambule kwi Heledai, Tobiyaja ne Yedaya bintu byo baletele kufuma ku bantu baji mu buzha; kabiji pa joja juba wafwainwa kuya ku nzubo ya kwa Yosiya mwana wa kwa Zefwaniya pamo na boba bafumine mu Babilona. 11 Wafwainwa kushikula siliva ne ngolode ne kulenga munchinya* kabiji ukamubike ku mutwe wa kwa Yoshua+ mwana wa kwa Yehozadaka, ñanga mwine mukatampe. 12 Apa bino ukamwambile’mba,
“‘Yehoba wa mabumba waamba’mba: “Uno muntu jizhina janji Musele.+ Ukasapuka pa mpunzha yanji, kabiji aye ukashimika nzubo ya Yehoba.+ 13 Aye ye ukashimika nzubo ya Yehoba, kabiji ye ukekala na munema. Ukekala pa jitanda janji na kulama, kabiji ukekala ñanga pa jitanda janji,+ kabiji pakekala lulayañano lwa mutende pakachi ka bino bintu bibiji.* 14 Kabiji munchinya* ukekala mu nzubo ya Yehoba ke kivuluko* kya kwa Helema, Tobiyaja, Yedaya+ ne Heni mwana wa kwa Zefwaniya. 15 Kabiji aba baji kwalepa bakeya na kushimikako nzubo ya Yehoba.” Kabiji mukayuka’mba Yehoba wa mabumba ye wantuma kwi anweba. Kino kikamweka inge mwatako muchima kumvwina jiwi ja Yehoba Lesa wenu.’”
7 Kabiji mu mwaka wa buna wa Mfumu Daliusa, byambo bya Yehoba byaishile kwi Zekaliya+ pa juba ja buna ja ñondo wa butanu na buna, ko kuba’mba ñondo wa Kiselevu.* 2 Bantu ba mu Betele batumine Shaleza ne Legema-meleki ne bantu banji kuba’mba basashijile Yehoba amba ebobile lusa, 3 na kwambila bañanga ba ku nzubo ya Yehoba wa mabumba ne bangauzhi amba: “Nanchi nafwainwa kujila mu ñondo wa butanu+ ne kuleka kuja kajo, byonka byo nauba pa myaka yavula nyi?”
4 Byambo bya Yehoba wa mabumba byaishile jikwabo kwi amiwa amba: 5 “Ambila bantu bonse ba mu kyalo ne bañanga amba, ‘Byo mwazhikilwenga na nzala ne kujila mu ñondo wa butanu ne mu ñondo wa butanu na bubiji+ pa myaka 70,+ nanchi kine mwazhikilwenga na nzala na mambo a amiwa nyi? 6 Kabiji byo mwajiilenga ne kutoma, nanchi kechi mwajiilenga ne kutoma kuba’mba mwisangajike anwe bene nenyi? 7 Nanchi kechi mwafwainwa kukookela byambo byaambile Yehoba mu bangauzhi ba kala,+ kimye bantu kyo baikele mu mutende mu Yelusalema ne mizhi yamuzhokolokele, ne mu Negeba ne mu Shefela byo mwaikele bantu nenyi?’”
8 Byambo bya Yehoba byaishile jikwabo kwi Zekaliya amba: 9 “Yehoba wa mabumba waamba’mba, ‘Chibainga mambo na bunchibamambo bwa kine,+ kabiji mwimweshenga butemwe bubula kwaluka+ ne kwiubila lusa. 10 Kange mwibilenga mwanamukazhi wafwilwa, mwana wabula bashanji,*+ muntu wafuma ku kyalo kingi+ nangwa muyanji ne;+ kabiji kange mulangulukenga mu michima yenu kuba bakwenu kyatama ne.’+ 11 Bino bakainenga kutako muchima,+ kabiji na mambo a kwitota bavundamijileko,+ kabiji bashinkile mu matwi abo kuba’mba babule kumvwa.+ 12 Balengejile michima yabo kwikala nobe jibwe ja daimani*+ kabiji kechi bakookejilenga mizhilo ne byambo bya Yehoba wa mabumba byo atumine na mupashi wanji kupichila mu bangauzhi ba kala ne.+ Onkao mambo, Yehoba wa mabumba wazhingijile bingi.”+
13 “‘Byonkatu byo bakaine kumvwa kimye kyo naichile,+ ne amiwa nakaine kumvwa kimye kyo bangichilenga,’+ byo byaamba Yehoba wa mabumba. 14 ‘Kabiji nebapalañenye na kinkunkwila mu bisaka byonse bya bantu byo babujile kuyuka,+ kabiji kyalo kyashajiletu masala byo bafuminemo, kafwako nangwa umo wapichilengamo nangwa kubwelamo ne;+ mambo baalwile kyalo kyawama ke kintu kya kukankamika bantu.’”
8 Byambo bya Yehoba wa mabumba byaishile jikwabo amba: 2 “Yehoba wa mabumba waamba’mba, ‘Nkobila mukoyo Ziona, mukoyo mukatampe,+ kabiji nkamubila mukoyo na bukaji bukatampe.’”
3 “Yehoba waamba’mba, ‘Nkabwela ku Ziona+ ne kwikala mu Yelusalema;+ kabiji Yelusalema ukatelwa’mba muzhi wa bukine,*+ ne mutumba wa Yehoba wa mabumba ukatelwa’mba mutumba wazhila.’”+
4 “Yehoba wa mabumba waamba’mba, ‘Banabalume ne banabakazhi bakote bakekala jibiji mu mabanza a Yelusalema, muntu yense na mukombo wanji mu kuboko kwanji na mambo a bukote* bwanji.+ 5 Ne mu mabanza a muzhi mukayula baana ba balume ne baana ba bakazhi bakakayilanga monka.’”+
6 “Yehoba wa mabumba waamba’mba, ‘Nangwa kya kuba kikamweka kukatazha ku bantu bakashalapo mu oa moba, nanchi ne amiwa kyakonsha kunkatazha nyi?’ byo byaamba Yehoba wa mabumba.”
7 “Yehoba wa mabumba waamba’mba, ‘Mbena kupokolola bantu bami mu byalo bya ku musela ne mu byalo bya ku muzhika.*+ 8 Kabiji nkebaleta ne abo bakekala mu Yelusalema;+ kabiji bakekala ke bantu bami, ne amiwa nkekala Lesa wabo+ mu bukine* ne mu bololoke.’”
9 “Yehoba wa mabumba waamba’mba, ‘Koseshai* maboko enu+ anweba mubena kumvwa bino byambo kufuma mu tunwa twa bangauzhi,+ byambo bintutu bimo byo baambile pa juba jo baajilenga kitendekesho kya nzubo ya Yehoba wa mabumba, kuba’mba nzubo ya Lesa ishimikwe. 10 Mambo aa moba saka akyangye kufika, kechi kwajinga mfweto ya kupa muntu nangwa nyama ne;+ kabiji na mambo a kubula mutende kechi kyapelele kutwela nangwa kulupuka na mambo a balwanyi ne, mambo nalengejile bantu bonse kwialukilamo.’
11 “‘Pano luno kechi nsakuba bano bantu bashalapo byonka byo naubile mu moba a kala ne,’+ byo byaamba Yehoba wa mabumba. 12 ‘Mambo lukunwa wa mutende bakamubyala; muñanzañanza ukapanga bipangwa byanji ne ntanda ikamenesha kajo,+ ne jiulu jikanokesha kime; kabiji nkalengela bantu bashalapo kuswana bino bintu byonse.+ 13 Kabiji byonkatu byo bemufingilenga ku bisaka bya bantu,+ anweba ba mu nzubo ya Yuda ne ba mu nzubo ya Isalela, byo byo nkemupulusha, kabiji mukekala ke mapesho.+ Kange mwakamwe ne!+ Koseshai* maboko enu.’+
14 “Mambo Yehoba wa mabumba waamba’mba, “‘Byonkatu byo nakebeshe kwimuletela bya malwa na mambo a kuba bashakulu benu banzhingijishe,” byo byaamba Yehoba wa mabumba, “kabiji kechi nelangulwishe ne,+ 15 byo byo nakebesha pa kino kimye kubila Yelusalema byawama ne ba mu nzubo ya Yuda.+ Kange mwakamwe ne!”’+
16 “‘Bino byo bintu byo mwafwainwa kuba: Saka mwamba bya kine mu lwenu,+ kabiji bunchibamambo bwa ku bibelo bya mizhi yenu bwafwainwa kutundaikanga bukine ne mutende.+ 17 Kabiji kechi mwafwainwa kwilangulukilanga byatama mu michima yenu ne,+ kabiji kange mutemwe kuchipa bubela ne;+ mambo bino bintu byonse nebishikwa,’+ byo byaamba Yehoba.”
18 Byambo bya Yehoba wa mabumba byaishile jikwabo kwi amiwa amba: 19 “Yehoba wa mabumba waamba’mba, ‘Kuzhikilwa na nzala kwa mu ñondo wa buna,+ ne kuzhikilwa na nzala kwa mu ñondo wa butanu,+ ne kuzhikilwa na nzala kwa mu ñondo wa butanu na bubiji,+ ne kuzhikilwa na nzala kwa mu ñondo wa bujikumi+ bikekala ke bimye bya kusangalelamo ne kusekela ku ba mu nzubo ya Yuda, byo bijiilo bya lusekelo.+ Onkao mambo, temwai bukine ne mutende.’
20 “Yehoba wa mabumba waamba’mba, ‘Ba mu mitundu ya bantu ne bangikazhi ba mu mizhi yavula kine bakeya; 21 kabiji bangikazhi ba mu muzhi umo bakaya ku bangikazhi ba mu muzhi mukwabo ne kwamba’mba: “Twayai tuye na kumusashijila Yehoba kuba’mba etubile bibusa ne kumukeba Yehoba wa mabumba. Ne amiwa mbena kuya.”+ 22 Kabiji ba mu mitundu yavula ya bantu ne bisaka bya bantu byakosa bikeya na kukeba Yehoba wa mabumba mu Yelusalema+ ne kumusashijila Yehoba amba ebobile bibusa.’
23 “Yehoba wa mabumba waamba’mba, ‘Mu oa moba bantu jikumi bafuma mu milaka yonse ya bisaka bya bantu+ bakakwata, ee kine, bakakwachisha ku munkukumba* wa Muyudea* ne kwamba’mba: “Tubena kukeba kuya nenu,+ mambo twaumvwa’mba Lesa uji ne anweba.”’”+
9 Mbila:
“Yehoba wazhingijila kyalo kya Hadalaki,
Kabiji waamba bikamwekela Damasakasa+
—Mambo meso a Yehoba aji pa bantu+
Ne pa mikoka yonse ya bena Isalela—
2 Kabiji waambila Hamata,+ uji ku mupaka wanji,
3 Tila wishimikijile mushiime.*
Walumbikile siliva nobe maloba
Ne ngolode nobe mateshi a mu mikwakwa.+
4 Umvwai! Yehoba ukamwangata bintu byo aji nabyo,
Kabiji ukatapila nzhita yanji mu kalunga ka mema;*+
Kabiji ukapya na mujilo.+
5 Ashekelona ukamona kino ne kumvwa moyo;
Gaza ukamanama bingi,
Ne Ekelona, na mambo a kuba kyo aketekelamo bekilengesha bumvu.
Mfumu wa Gaza ukonaika,
Ne mu Ashekelona kechi mukekala bantu ne.+
6 Baana ba bantu ba mu byalo bingi bakekala mu Ashadoda,
Kabiji nkapwisha bwitote bwa bena Filishitiya.+
7 Nkafumya mu kanwa kanji bintu biji na mashi
Ne bintu bya bunya nkebifumyamo mu meno anji,
Kabiji ukekala ke wa Lesa wetu;
Kabiji ukekala nobe mfumu* mu Yuda,+
Ne Ekelona ukekala nobe mwina Yebusi.+
8 Nkekala mu tente na kusopa* nzubo yami,+
Pa kuba’mba kukabule kwikala muntu nangwa umo wa kupitamo nangwa kubwelamo;
Kabiji kafwako kapitao* ukapitamo jikwabo ne,+
Mambo namona kino* na meso ami.
9 Sangalala bingi, obewa mwana wa mukazhi Ziona.
Bijika na lusekelo, obewa mwana wa mukazhi Yelusalema.
Tala! Mfumu wobe ubena kwiya kwi obewa.+
Aye waoloka, ubena kuleta lupulukilo,*
Wipelula+ kabiji ubena kwenda pa mbongolo,
Pa mwana mbongolo mulume, mwana wa mbongolo mukazhi.+
10 Nkafumyamo kalaki wa nkondo mu Efelaimu
Ne mbili nkamufumyamo mu Yelusalema.
Buta bwa mukanda bwa nkondo bakebufumyamo.
Kabiji aye ukataya mbila ya mutende ku bisaka bya bantu;+
Bukalama bwanji bukafuma ku kalunga ka mema kufika ku kalunga ka mema kakwabo
11 Pakuba obewa mwanamukazhi, kupichila mu mashi a lulayañano lobe,
Nkafumyamo bakaili bobe mu kimbo kyabula mema.+
12 Bwelai ku nsakwa yakosa anweba bakaili saka muji na luketekelo.+
Lelo jino mbena kukubuula’mba,
‘Obewa mwanamukazhi, nkakubwezhezha bintu bibiji pa kimo.+
13 Mambo nkavwemuna* Yuda nobe buta bwami bwa mukanda.
Mu buta bwa mukanda nkabikamo Efelaimu,*
Kabiji nkabuusha baana bobe, obewa Ziona,
Ne kulwisha baana bobe, obewa Gilisi,
Kabiji nkakulengela kwikala nobe mpoko ya mushilikale.’
14 Yehoba ukamweka peulu yabo,
Ne muketo wanji ukalupuka nobe kubesha kwa mvula.
Nkambo Mfumu Yehoba ukavumya lusengo,+
Kabiji ukayanga kulutwe na luvula lwa ku kabeta ka ku bulenge.
15 Yehoba wa mabumba ukebazhikijila,
Kabiji bakonauna ne kushinda mabwe a mu binzhipunzhipu.+
Bakatoma ne kuba kyungwe, uba nobe batoma binyu;
Kabiji bakayula byonka biyula nsanyi yafukumana,
Nobe makonka a kya kusokelapo bitapisho.+
16 Yehoba Lesa wabo ukebapulusha aja juba
Byo baji jitanga ja bantu banji;+
Mambo bakekala nobe mabwe a buneme a ku munchinya* abekauka pa mushiji wanji.+
17 Byo bwabayapo buwame bwanji,+
Kabiji byo akamwekapo bulongo!
Kajo kakalengela bansongwalume kukoma bulongo,
Ne binyu bya katataka bikalengela bisungu kukoma bulongo.”+
10 “Lombai kwi Yehoba kuba’mba anokeshe mvula wapelako.
Yehoba ye ulenga makumbi a mvula mukatampe,
Ye wibanokeshesha mvula,+
Ne kupa muntu yense bijimwa mu bujimi.
2 Mambo bipashañano bya telafimu* byaamba bya bujimbijimbi;
Ne aba baponga bamona bimwesho bya bubela.
Bamba pa biloto byatutu,
Kabiji byo batekenesha byo byatutu.
O ene mambo o bakapitañenangatu nobe mikooko.
Bakamanama, mambo kafwako kafunga.
3 Bakafunga nkebabuukila bukaji,
Kabiji bantangi bakanama* nkebatotolwesha;
Mambo Yehoba wa mabumba wata muchima jitanga janji,+ ba mu nzubo ya kwa Yuda,
Kabiji wibalengela kwikala nobe mbili wa lukumo mu nkondo.
4 Mwi aye mo mufuma ntangi,*
Mwi aye mo mufuma kalama umukwasha,*
Mwi aye mo mufuma buta bwa mukanda bwa nkondo;
Mwi aye mo mufuma bakalama* bonse, bonse bafuma mwi aye.
5 Bakekala nobe babilobo,
Saka banyantaula mateshi a mu mikwakwa pa kulwa nkondo.
6 Nkalengela ba mu nzubo ya kwa Yuda kukosa,
Kabiji ba mu nzubo ya kwa Yosefwa nkebapulusha.+
Nkebabwezha,
Mambo nkebobila lusa;+
Kabiji bakekala nobe kechi nebapangilepo ne;+
Mambo amiwa yami Yehoba Lesa wabo, kabiji nkebakumbula.
7 Bena Efelaimu bakekala nobe babilobo,
Kabiji michima yabo ikasekela uba nobe batoma binyu.+
Baana babo bakamona kino ne kusekela;
Michima yabo ikasangalela mwi Yehoba.+
8 ‘Nkebeta na mulozhi ne kwibakonkanya pamo;
Mambo nkebakuula,+ kabiji bakavula,
Kabiji bakatwajijila kuvula.
9 Nangwa nebapalañanya mu bantu nobe nkunwa,
Bakamvuluka mu mapunzha aji kwalepa;
Abo ne baana babo bakekala jibiji na bulume ne kubwela.
10 Nkebabwezha kufuma ku kyalo kya Ijipita
Ne kwibakonkanya pamo kufuma ku Asilya;+
Nkebaleta mu kyalo kya Gileada+ ne Lebanoni,
Kabiji kyalo kikebakepela.+
11 Aye ukapita mu kalunga ka mema na bya malwa;
Kabiji mu kalunga ka mema ukapuma manyaki;+
Ne mazhiba onse a Mukola wa Nile akooma.
Bwitote bwa Asilya bakebupwisha,
Kabiji ndondo ya Ijipita ikafumako.+
12 Amiwa Yehoba nkebalengela kwikala na bulume,+
Kabiji bakendanga mu jizhina jami,’+ byo byaamba Yehoba.”
11 “Shinkula binzhilo byobe obewa Lebanoni,
Pa kuba’mba mujilo asoke bichi byobe bya sida.
2 Jila mabingo obewa kichi kya yunipa, mambo kichi kya sida kyapona;
Bichi bya lukumo byaonaika!
Jilai mabingo anweba bichi bya oko bya ku Bashana,
Mambo jivunda bejonauna!
3 Umvwai! Bakafunga babena kujila mabingo,
Mambo lukumo lwabo belonauna.
Umvwai! Kubuluma kwa baana ba mabokwe,
Mambo mato a ku Yodano beonauna.
4 “Yehoba Lesa wami waamba’mba, ‘Funga jitanga jo bakeba kwipaya,+ 5 jo baipayile ku boba bejipotele+ kabiji kechi bebazhachisha ne. Kabiji aba bejipoteshe+ bamba’mba, “Atotwe Yehoba, mambo nsakunonka.” Kabiji bakafunga bajo kechi bejubila lusa ne.’+
6 “‘Mambo kechi nkatwajijila kwibobila lusa bangikazhi ba mu kyalo ne,’ byo byaamba Yehoba. ‘Onkao mambo, nkapana muntu yense mu kuboko kwa mukwabo ne kwa mfumu wanji; kabiji bakonauna kyalo, ne amiwa kechi nkebapokolola mu maboko abo ne.’”
7 Kabiji natendekele kufunga jitanga jo bakebelenga kwipaya,+ naubile kino na mambo a anweba bonse ba mu jitanga bo bamanyika. Onkao mambo, nashikwile tumama tubiji, kamo nekatumbile’mba Buya, ne kakwabo nekatumbile’mba Buumo,+ kabiji natendekele kufunga jitanga. 8 Kabiji napangile bakafunga basatu mu ñondo umo, mambo amiwa* nakankelwe kwibatekenya, ne abo* banshikilwe. 9 Kabiji naambile’mba: “Kechi nkatwajijila kwimufunga ne. Awa ukeba kufwa afwe, ne yewa ukeba konaika onaike. Pakuba aba bashalapo, beje bene na bene.” 10 Onkao mambo, nashikwile kamama kami ka Buya+ ne kwikachimuna, ne kulala lulayañano lo nalayañene na bantu bonse. 11 Byonkabyo, lwaonaikile aja juba, kabiji aba bo bamanyikilenga ba mu jitanga bammwenenga bayukile’mba jino jajinga jiwi ja Yehoba.
12 Kepo nebambijile’mba: “Inge mwamona’mba kijitu bulongo, mpai mfweto yami; bino inge mwakana, itulai.” Kabiji bampele* mfweto yami, mashekele a siliva 30.+
13 Kepo Yehoba añambijile’mba: “Ataye mu kipao, ye munema mukatampe ye bannemekelamo.”+ Onkao mambo, nashikwile mashekele a siliva 30 ne kwiataya mu kipao kya mu nzubo ya Yehoba.+
14 Kabiji nachimwine kamama kami ka bubiji, ka Buumo,+ ne konauna bulongo bwajinga pakachi ka bena Yuda ne bena Isalela.+
15 Kabiji Yehoba wañambijile’mba: “Tola byo engijisha kafunga wabula maana.+ 16 Mambo mbena kuleta kafunga mu kyalo. Aye kechi ukatako muchima ku mikooko ibena konaika ne;+ kechi ukakeba twana nangwa kubuka yo bakozha ne,+ nangwa kujiisha aya yakonsha kwimana ne. Pakuba aye ukajanga nyama ya boba banuna+ ne kuchibaula mikono ya mikooko.+
17 Malwa anji kafunga wami watutu,+ usha jitanga!+
Mpoko ikapuma mukoko wanji ne jiso janji ja kilujo.
Mukoko wanji ukomatu yense,
Kabiji jiso janji ja kilujo jikapofula.”*
12 Mbila:
“Byambo bya Yehoba byo aambile pa bena Isalela,” byo byaamba Yehoba,
Yenka watanyikile jiulu,+
Waajile kitendekesho kya ntanda,+
Ne kupa muntu mupashi* uji mwi aye.
2 “Mbena kwalula Yelusalema ke katomeno* kakalengela mitundu ya bantu yonse yamuzhokoloka kubalangila; kabiji Yuda bakamuzhokoloka ne Yelusalema.+ 3 Mu joja juba nkalengela Yelusalema kwikala jibwe janema ku mitundu ya bantu yonse. Aba bonse bakejishikula kine jikebakozha bingi;+ kabiji bisaka bya bantu byonse bya pano pa ntanda bikakonkana pamo na kulwa nanji.+ 4 Mu joja juba,” byo byaamba Yehoba, “Nkebalengesha moyo bambili bonse ne kwibalengela kukonya bendapo. Nkazanza meso ami pa ba mu nzubo ya kwa Yuda, pakuba bambili ba mitundu ya bantu nkebapofula meso. 5 Kabiji bamfumu* ba bena Yuda bakamba mu michima yabo amba, ‘Bangikazhi ba mu Yelusalema bandengela kukosa na mambo a Yehoba wa mabumba, Lesa wabo.’+ 6 Pa joja juba nkalengela bamfumu ba bena Yuda kwikala nobe mbabula yayula mujilo yo batula mu nkunyi kabiji nobe nsoko ya mujilo yo batula mu bikuta bya kajo ko banowa,+ kabiji bakasoka mitundu ya bantu yonse ibazhokoloka ku kilujo ne ku kipiko;+ kabiji mu Yelusalema bakekalamo jibiji mu mpunzha* yanji, monka mu Yelusalema.+
7 “Kabiji Yehoba ukapulusha patanshi matente a mu Yuda, pa kuba’mba buya* bwa ba mu nzubo ya kwa Davida ne buya* bwa bangikazhi ba mu Yelusalema bukabule kukila Yuda. 8 Mu joja juba Yehoba ukazhikijila bangikazhi ba mu Yelusalema;+ mu joja juba awa wituntula* mukachi kabo ukekala nobe Davida, kabiji ba mu nzubo ya kwa Davida bakekala nobe Lesa, nobe malaika wa Yehoba utangila kulutwe yabo.+ 9 Kabiji mu joja juba nkonauna bisaka bya bantu byonse bikeya na kulwisha Yelusalema.+
10 “Nketulwila mupashi wa bibusa ne misashijilo pa ba mu nzubo ya kwa Davida ne pa bangikazhi ba mu Yelusalema, kabiji bakatala ku yewa ye baashile,+ kabiji bakamujila byonka byo bajila mwana umotu; kabiji bakamujila bingi byonka byo bajila mubeji. 11 Mu joja juba mabingo akabaya bingi mu Yelusalema, nobe mabingo a ku Hadadalimona mu Musanza wa Megido.+ 12 Kabiji bonse ba mu kyalo bakajila, kisemi pa kisemi; kisemi kya ba mu nzubo ya kwa Davida bunke bwakyo, ne banabakazhi bunke bwabo; kisemi kya ba mu nzubo ya kwa Natana+ bunke bwakyo, ne banabakazhi bunke bwabo; 13 kisemi kya ba mu nzubo ya kwa Levi+ bunke bwakyo, ne banabakazhi bunke bwabo; kisemi kya bena Shimei+ bunke bwakyo, ne banabakazhi bunke bwabo; 14 ne bisemi byonse byashala, kisemi pa kisemi, ne banabakazhi bunke bwabo.
13 “Mu joja juba ba mu nzubo ya kwa Davida ne bangikazhi ba mu Yelusalema bakebashinkwila mushima wa kwibatokesha ku bundengamambo ne ku bintu byatama.+
2 “Yehoba wa mabumba waamba’mba, ‘Mu joja juba nkafuuta mazhina a bankishi mu kyalo,+ kabiji kechi bakeavuluka jibiji ne; kabiji mu kyalo nkafumyamo bangauzhi+ ne mupashi wa biko. 3 Kabiji inge muntu akabwezhepo kwaula, bashanji ne bainanji bamusemene bakamwambila’mba, ‘Kechi usakwikala na bumi ne, mambo waamba bubela mu jizhina ja Yehoba.’ Kabiji bashanji ne bainanji bamusemene bakamwasa kya kumupulankanya na mambo a kwaula kwanji.+
4 “Mu joja juba ngauzhi yense ukomvwa bumvu na mambo a kimwesho kyanji pa kwaula; kabiji kechi bakavwala bivwalo byabo bya boya+ kuba’mba babepe ne. 5 Kabiji ngauzhi ukamba’mba, ‘Amiwa kechi nengauzhi ne, amiwa yami njimi, mambo muntu wampotele byo nakijingatu mwanyike.’ 6 Kabiji umvwe muntu wamwipuzha’mba, ‘Nga bino bilonda biji pakachi ka bipuzhi* byobe byaishile byepi?’ ukakumbula’mba, ‘Bino bilonda bankozhezhe mu nzubo ya balunda nami.’”*
“Mutape kafunga,+ pa kuba’mba jitanga* jipalañenemo;+
Kabiji nkatanyika kuboko kwami ne kulwisha boba babula kunema.”
8 Yehoba waamba’mba, “Kabiji mu kyalo kyonse,
Muji mabumba abiji bakeachibako ne kwionauna;*
Kabiji jibumba ja busatu bakejisha monka.
9 Kabiji aba ba mu jibumba ja busatu nkebapisha mu mujilo;
Kabiji nkebatubula byonka byo batubula siliva,
Ne kwibeseka byonka byo beseka ngolode.+
Baketa pa jizhina jami,
Ne amiwa nkebakumbula.
Nkamba’mba, ‘Abo bo bantu bami,’+
Ne abo bakamba’mba, ‘Yehoba ye Lesa wetu.’”
14 “Umvwa! Juba jibena kwiya, juba ja Yehoba, jo bakabenya bantu bipukulwa byobe.* 2 Nkakonkanya pamo bisaka byonse bya bantu na kulwa nkondo na Yelusalema; kabiji muzhi bakamwangata ne mazubo bakeapukula ne banabakazhi bakalaala nabo kya kwibakanjikizha. Kabiji kichika kya muzhi kikaya mu buzha, pakuba bantu bakashalamo kechi bakebafumyamo mu muzhi ne.
3 “Yehoba ukaya na kulwa na byobyo bisaka bya bantu+ byonkatu byo alwa mu juba ja nkondo.+ 4 Mu aja juba maulu anji akanyanta pa Mutumba wa Maolivi,+ watalañana na Yelusalema ku musela; kabiji Mutumba wa Maolivi ukabana pakachi, kufuma ku musela* kufika ku muzhika,* ne kulenga kimpachiko kikatampe; kabiji lubaji lumo lwa mutumba lukekela ku kabeta ka ku buyeke ne lubaji lukwabo lukekela ku kabeta ka ku bulenge. 5 Mukanyemena mu kimpachiko kya mitumba yami, mambo kimpachiko kya mitumba kikayatu kukafika ne ku Azela. Mukanyema, byonka byo mwanyemene na mambo a kitentanshi mu moba a kwa Uzaya Mfumu wa Yuda.+ Kabiji Yehoba Lesa wami ukeya, ne bazhila bonse bakekala nanji.+
6 “Pa joja juba, kechi kukekala kyeya kyawama ne,+ bintu bikachimba. 7 Kabiji jikekala ke juba jikayukanyikwa’mba juba ja Yehoba.+ Kechi jikekala na mute, nangwa bufuku ne; kabiji kimye kya mabanga a bufuku kukekala kyeya. 8 Pa joja juba mema a bumi+ akakonkolokanga kufuma mu Yelusalema,+ kichika kyao akayanga ku kalunga* ka mema ka ku musela+ ne kichika kikwabo akayanga ku kalunga* ka mema ka ku muzhika.+ Kino kikobiwa kisalo ne mu kimye kya mayoo. 9 Kabiji Yehoba ukekala Mfumu pa ntanda ponse.+ Pa joja juba Yehoba ukekala umo,+ ne jizhina janji jimo.+
10 “Kyalo kyonse kikekala nobe Alaba,+ kufuma ku Geba+ kukafika ku Limonyi+ ku kabeta ka ku bulenge bwa Yelusalema; kabiji uno muzhi ukemana ponka pa mpunzha po ajinga kala kabiji mukekala bantu,+ kufuma ku Kibelo kya kwa Benjamina+ kukafika ne ku Kibelo Kitanshi, kuyatu kukafika ne ku Kibelo kya ku Jikonka, ne kufuma ku Kyamba kya Hananela+ kukafika ne ku bya kufiinamo binyu* bya mfumu. 11 Kabiji bantu bakekala monka; kechi kukekalapo jibiji jifingo ja lonaiko ne,+ bantu bakekala mu mutende mu Yelusalema.+
12 “Kabiji uno ye mwalo Yehoba ye akaleta pa bantu bonse balwa nkondo na Yelusalema:+ Mibiji yabo ikabola saka baimana, meso abo akabolela mu ñoma ya meso, ne njimi yabo ikabolela mu tunwa twabo.
13 “Pa joja juba, bya kwibavulañanya bikafuma kwi Yehoba bikavula mwi abo; muntu yense ukakwata mukwabo, kabiji kuboko kwanji kukalukilamo mukwabo.*+ 14 Bena Yuda nabo bakalwako nkondo ku Yelusalema; ne bunonshi bwa bisaka bya bantu byonse bibazhokoloka bakebukonkanya pamo, ngolode ne siliva ne bivwalo byavula bingi.+
15 “Kabiji mwalo wapasha uno mwalo ukeya pa bambili, bamyule, bangamela, bambongolo, ne pa bilelwa byonse biji mu oa makampu.
16 “Muntu yense ukashalapo mu bisaka bya bantu byonse byaishile na kulwa na Yelusalema, ukayanga pa mwaka pa mwaka+ na kufukamina* Mfumu, Yehoba wa mabumba,+ ne kwiya ku Kijiilo kya Mimba.*+ 17 Bino muntu yense wa mu bisemi bya pano pa ntanda inge akabule kuya ku Yelusalema na kufukamina Mfumu, Yehoba wa mabumba, mvula kechi ukanokela pe aye ne.+ 18 Kabiji inge kisemi kya Ijipita kikabule kwiya ne kubula kutwela mu muzhi, kechi kikekala na mvula ne. Pakuba kikekala na mwalo Yehoba ye akaleta pa bisaka bya bantu bikabula kwiya ku Kijiilo kya Mimba. 19 Luno lo lukekala lukabisho lwa bubi bwa bena Ijipita ne lwa bubi bwa bisaka bya bantu byonse bikabula kwiya ku Kijiilo kya Mimba.
20 “Pa joja juba, byambo bya kuba’mba ‘Buzhile bo bwa kwa Yehoba!’+ bikanembwa pa mangengele a bambili. Kabiji mipika*+ ya mu nzubo ya Yehoba akekala nobe masanyi afukumana+ aji ku kya kusokelapo bitapisho. 21 Kabiji mwipika* yense uji mu Yelusalema ne mu Yuda ukekala wazhila kabiji ukekala wa kwa Yehoba wa mabumba, ne aba bonse bakatapishanga bitapisho bakatwela ne kwingijishapo umo kutekelamo. Pa joja juba, kechi mukekala mwina Kenana* mu nzubo ya Yehoba wa mabumba ne.”+
Kulumbulula’mba “Yehoba Wavuluka.”
Nangwa’mba “Alulukai.”
Monai bya Kulumbulula B15.
Nangwa’mba “mambo obe.”
Nangwa’mba “minkukumba ya munema.”
Nangwa’mba “wa kutala pa; kasopa.”
Nangwa’mba “musanza.”
Nangwa’mba “bintu bicheche?”
Mu Kihebelu, “jibwe, kikopo.”
Ko kuba’mba, misampi ya kichi iji na bipangwa.
Kyubichi umo waesakana na masentimita 44.5. Monai bya Kulumbulula B14.
Mu Kihebelu, “efa,” ubena kwimenako kindundu nangwa ntumbe yo bapiminangako efa. Kipimo kya efa kyaesakana na malita 22. Monai bya Kulumbulula B14.
Ko kuba’mba, Babilonya.
Ko kuba’mba, kalaki.
Nangwa’mba “munchinya mukatampe.”
Ko kuba’mba, pakachi ka mingilo yanji ya bukalama ne buñanga.
Nangwa’mba “munchinya mukatampe.”
Nangwa’mba “kya kuvululako.”
Monai bya Kulumbulula B15.
Nangwa’mba “mwana wa kishale.”
Nangwa, “jibwe jakosa,” nabiji jibwe ja emeli.
Nangwa’mba “bukishinka.”
Mu Kihebelu, “na mambo a kuvula moba.”
Nangwa’mba “kufuma ku kyalo kuselela juba ne ku kyalo kuzhikila juba.”
Nangwa’mba “bukishinka.”
Nangwa’mba “Chinchikai.”
Nangwa’mba “Chinchikai.”
Nangwa’mba “kwapelela kivwalo.”
Mu Kihebelu, “mwanamulume Muyudea.”
Nangwa’mba “nsakwa yakosa.”
Nangwa, “pa kalunga ka mema.”
Mfumu wajinga mukulumpe wa mukoka.
Nangwa’mba “kampu wa bashilikale.”
Nangwa’mba “muntu umanyikañana.”
Kyamweka, lumanamo lwa bantu banji.
Nangwa’mba “lushinjilo; kupokololwa.”
Ko kuba’mba, Ufelata.
Mu Kihebelu, “kunyanta.”
Ko kuba’mba, nobe muketo.
Nangwa’mba “kabondo.”
Nangwa’mba “balesa ba mu nzubo; bankishi.”
Mu Kihebelu, “bapeepe.”
Mu Kihebelu, “kyamba kya pa jikonka,” kwimenako muntu wa bulume nangwa wanema; mfumu.
Mu Kihebelu, “lupopo,” kwimenako muntu ukwashañana; kalama.
Nangwa’mba “ba kapitao.”
Nangwa’mba “mweo wami wakankelwe.”
Nangwa’mba “mweo wabo washikilwe.”
Mu Kihebelu, “bapimine.”
Mu Kihebelu, “jikashishipela.”
Nangwa’mba “muya.”
Nangwa’mba “nsanyi yafukumana.”
Mfumu wajinga mukulumpe wa mukoka.
Nangwa’mba “mu mpunzha yamufwainwa.”
Nangwa’mba “lukumo.”
Nangwa’mba “lukumo.”
Nangwa’mba “wakooka bingi.”
Mu Kihebelu, “pasambakena maboko obe?” Ko kuba’mba, pa kyaji nangwa munyuma.
Nangwa’mba “ya boba bantemwa.”
Nangwa’mba “mikooko.”
Nangwa’mba “kwiepaya.”
Ko kuba’mba, muzhi watongolwa mu kyepelo 2.
Nangwa’mba “kuselela juba.”
Mu Kihebelu, “kalunga ka mema.”
Ko kuba’mba, Kalunga ka Mema Kafwa.
Ko kuba’mba, Kalunga ka Mema ka Meditelanya.
Nangwa’mba “bipe bikatampe bya kufiinamo.”
Nangwa’mba “muntu umo ukalukuka mukwabo.”
Nangwa’mba “kupopwela.”
Nangwa’mba “Bimpampa.”
Nangwa’mba “mipika yabaya pa kanwa.”
Nangwa’mba “mwipika wabaya pa kanwa.”
Nangwa, “musulu.”