Kuyuka Lesa Bulongo Kuketukwasha Kwikala Balunda Nanji
Mulenga wetu kechi wa bulumetu ne, pakuba ke muntu uji na byubilo byawama bingi. Kabiji ukeba atweba kufunda pe aye ne kwikala balunda nanji. (Yoano 17:3; Yakoba 4:8) O ene mambo o etubuujila byo aji.
Mulenga Wetu uji na Jizhina
“Bantu bayuke’mba anweba, yenka wa jizhina ja Yehoba, yenu bunketu Mwine Wakila pano pa ntanda ponse.”—SALAMO 83:18.
Baibolo witubuula’mba Yehoba ye Lesa bunketu wa kine. Aye ye Mulenga walengele bintu byonse bya mwiulu ne bya pano pa ntanda. Yehoba ye ye twafwainwatu kupopwelanga kwapwa.—Lumwekesho 4:11.
Yehoba ye Lesa wa Butemwe
“Lesa butemwe.”—1 YOANO 4:8.
Yehoba wingijisha Baibolo ne bintu byo alenga kwitukwasha kuyuka byo aji. Kyubilo kyanji kikatampe ke butemwe. Kabiji bintu byonse byo oba wibyuba na mambo a butemwe. Onkao mambo, inge twibikako bingi kufunda pe Yehoba, tukamutemwa bingi.
Yehoba Ulekelako Bantu Mambo
“Anweba mwi Lesa waswila jimo kulekela mambo.”—NEHEMIYA 9:17.
Yehoba wayuka’mba atweba twibandengamambo. Onkao mambo, aye ‘waswila jimo kwitulekelako mambo.’ Inge twalomba kwi aye amba twalenga mambo ne kuja nyenye, aye uketulekelako mambo etu. Kabiji kechi uketukambula pa mambo o twalengele kala ne.—Salamo 103:12, 13.
Yehoba Ukeba’mba Tulombenga kwi Aye
“Yehoba uji kwipi na bonse bamwita . . . Aye umvwa kujila kwabo kwa kukeba bukwasho.”—SALAMO 145:18, 19.
Yehoba kechi ukeba’mba twingijishenga bipashañano pa kumupopwela ne. Aye umvwa milombelo yetu byonkatu bansemi batemwa kisemi kyabo byo bateleka bibabuula baana babo.