Babiyangala Bajingako Panopantanda

INGE kya kuba muntu ubena kwiya ko uji kabiji wazama kya kuba ke afikizhe ne mutwe mu musemi wa nzubo yenu, obewa wakonsha kulanguluka amba muntu wa mutundu ka? Uno muntu ke kiyangala! Kala kwajingapo babiyangala panopantanda. Baibolo waamba’mba bashabo bano babiyangala bajinga bamalaika bafumine mwiulu. Nga kino kyakonshekele byepi?

Vuluka’mba malaika watama Satana wapayankene na kuleta makatazho. Wakebelenga ne kulengela bamalaika ba Lesa kwikala batama. Mu kuya kwa kimye, bamalaika bamo batendekele kumvwina Satana. Balekele kwingila mwingilo wibapele Lesa mwiulu. Baishile panopantanda ne kwialula bene mu mibiji ya bumuntu. Nanchi wayuka kyalengejile amba bobe bino nyi?

Baibolo waamba’mba baubile bino mambo bano baana ba Lesa bamwene banabakazhi ba buya panopantanda kabiji bakebele kwikala nabo. Kyo kyalengejile amba beye panopantanda ne kusongola bano banabakazhi. Baibolo waamba’mba kino kyatamine, mambo Lesa walengele bamalaika kwikala mwiulu.

Bamalaika ne bakazhi babo byo basemene baana, bano baana bapusene bingi. Patanshi kechi bamwekele nobe bapusanako kya kine ne. Bino batwajijiletu na kukoma, ne kukosa, kufikatu ne kimye kyo baikele ke babiyangala.

Bano babiyangala batamine bingi. Byo bajinga babikakashi ne kukosa, bamanyikilenga bingi bantu. Baesekele kukanjikizha bantu bonse kuba’mba batame byonka byo batamine abo.

Enoka wafwile, bino kwajingapo muntu mukwabo umo panopantanda wawamine. Uno muntu jizhina janji wajinga Nowa. Kimye kyonse waubanga byonka byamubujile Lesa.

Juba jimo Lesa waambijile Nowa amba kimye kyafika kya kuba’mba onaune bantu bonse batama. Bino Lesa waambile’mba ukamupulusha Nowa, kisemi kyanji ne banyama bavula. Twaya tumone Lesa byo aubile kino.