Tente wa Kupopwelamo 37

NANCHI kino kishimikwa wikiyuka nyi? Ke tente wa kupopwelamo Yehoba. Kabiji utelwa’mba tente wa lusambakeno. Bantu bapwishishe kumushimika mwaka umo panyuma ya kufuma mu Ijipita. Nanchi wamuyuka walengejile’mba bamushimike uno tente nyi?

Wajinga Yehoba. Mosesa byo akijinga ku Mutumba wa Sinai, Yehoba wamubujile bya kumushimika. Waambile’mba wafwainwe kumushimika kya kuba ke bamushimukulule kwakubula kukatazhiwa. Mu jino jishinda, bakonsheshe kumusenda ku mpunzha ikwabo, ne kumushimika jibiji. Onkao mambo, bena Isalela byo bayilenga ku mapunzha apusana pusana mu kiselebwa, basendelenga ne uno tente.

Umvwe watala mukachi ka kibamba kya kicheche kiji kwapela uno tente, usakumonamo kibokoshi. Kino kibokoshi kitelwa’mba jikwachi ja lulayañano. Jino jikwachi jajinga na bamalaika babiji nangwa’mba bakelubi balengelwe na ngolode, umo ku lubaji lumo, mukwabo naye ku lubaji lukwabo. Kabiji Lesa wanembele jibiji Mikambizho Jikumi pa mabwe abiji apapakana, mambo Mosesa walajile oa atanshi. Kabiji ano mabwe beabikanga mukachi ka jikwachi ja lulayañano. Kabiji monkamwa mu jikwachi mwajinga ne kapuki mwajinga manna. Nanchi ukiavuluka manna nyi?

Mulongo wa kwa Mosesa aye Alona ye ye basajile kwi Yehoba kwikala ñanga mukatampe. Watangijilenga bantu kupopwela Yehoba. Kabiji baana banji nabo bajinga bañanga.

Pano akimona kibamba kikatampe kya tente. Kyabaya bimye bibiji kukila kibamba kya kicheche. Nanchi wamona kino kibokoshi mubena kufutumuka bwishi nyi? Kino kyo kyakusokelapo bitapisho po balambwilanga bañanga bintu byanunkilanga bulongo byatelwanga amba byakufutumuna. Kabiji muji ne kitulwapo malampi kiji na malampi atanu ne abiji. Kabiji kintu kya busatu kiji mu kino kibamba ke tebulu. Peulu ya uno tebulu paji bashinkwa 12.

Mu kipango kya jikwachi ja lulayañano muji nsanyi ikatampe nangwa’mba muchiba mukatampe mwayula mema. Mo mwaowelanga bañanga. Kabiji muji ne kyakusokelapo bitapisho kikatampe. Pa kino kitapisho po po balambwilanga banyama bafwa ke mulambo kwi Yehoba. Tente wajingatu mukachi ka kampu, ne bena Isalela baikalanga mu matente abo kuzhokoloka uno yenka tente.