Lufunjisho 9

Nanchi Balunda Na Lesa Bo Bañanyi?

Yesu Kilishitu ye Mwana wa kwa Yehoba kabiji ye mulunda nanji walamankesha ye atemwisha. Yesu saka akyangye kwikalako mu bumuntu pano pa ntanda, waikeleko mwiulu mu bukilengwa kya mupashi. (Yoano 17:5) Kepo aishile pano pa ntanda na kufunjisha bantu bya bukine bwa kwa Lesa. (Yoano 18:37) Kabiji wapaine bumi bwanji bwa bumuntu pa kuba’mba apulushe bantu bakyumvwina ku bundengamambo ne lufu. (Loma 6:23) Yesu luno ke Mfumu wa Bufumu bwa kwa Lesa, abo bwaikala kamfulumende wa mwiulu ukaleta Paladisa pano pa ntanda.—Lumwekesho 19:16.

Bamalaika nabo balunda na Lesa. Bamalaika kechi balengelwe nobe bantu ba pano pa ntanda ne. Balengelwe mwiulu Lesa saka akyangye kulenga ntanda ne. (Yoba 38:4-7) Kuji mamilyoni a bamalaika. (Danyela 7:10) Bano balunda na Lesa ba mwiulu basaka bantu kufunda bukine bwa kwa Yehoba.—Lumwekesho 14:6, 7.

Kabiji Lesa uji na balunda nanji pano pa ntanda; wibatela’mba Bakamonyi banji. Kamonyi mu kije kya mambo ushimuna byoayuka pa mambo a muntu nangwa kintu. Bakamonyi ba kwa Yehoba abo bashimuna byo bayuka pe Yehoba ne nkebelo yanji. (Isaya 43:10) Byonka biji bamalaika, Bakamonyi bakeba kwimukwasha kufunda bukine bwa kwa Yehoba. Bakeba kuba’mba nenuwa mwikale balunda na Lesa.