Mwaiyaipo Mwane ku Sukulu wa Mwingilo wa Lesa

KUZHOKOLOKA ntanda yonse mu byalo kukila pa 200, bantu bavula babena kumwenamo bingi mu Sukulu wa Mwingilo wa Lesa pa mulungu pa mulungu. Bamo baji mu uno sukulu bakatatakatu. Bakwabo baikalamo myaka yavula. Uno sukulu uji mu mapunzha avula bingi. Konse ko mwikela panopantanda, mutanchi umotu wa luno lufunjisho ko aji. Bantu bamafumbi onse, bisho byonse, ne ba mfunjilo yapusana pusana babena kufunda uno sukulu wa Lesa kwa kubula kulipila.

Kimye uno sukulu kyo atatwile mu bipwilo bya Bakamonyi ba kwa Yehoba mu 1943, nkebelo yanji beyambile mu bino byambo bya kuba’mba: “Kufunjisha ‘banabalume bakishinka’ baumvwa Mambo a Lesa ne kwiaketekela kuba’mba ‘bakonshe kufunjishako bakwabo’ . . . kabiji ne kukwasha yense . . . kuyuka kwamba bulongo patoka luketekelo lo aji nalo.” (Course in Theocratic Ministry, pe. 4) Nkebelo ya uno sukulu yakitwajijilatu ne lelo jino.

Kine mwane, ñanyi kintu kyawamisha yense mwi atweba kyo afwainwa kuba na kya bupe kyetu kya kwamba kitupa Lesa? Baibolo wakumbula’mba: “Bintu byonse bipema bimutote Yehoba.” (Sala. 150:6) Umvwe ketube byobyo, tusangajika muchima wa Shetu wa mwiulu. Tumwesha kwi aye kuba’mba michima yetu ibena kusanchila buwame ne butemwe bwanji. O ene mambo bena Kilishitu o bebatundaikila kimye kyonse ‘kuletanga kitapisho kya kutota Lesa moba onse, ko kuba’mba bipangwa bya pa bya tunwa byetu bitota jizhina janji’! (Hebe. 13:15) Na mulanguluko wa kukeba kwimukwasha kuyuka bya kwingijisha bya bupe byenu bimupa Yehoba bya kumutotelamo, twimutambwila, ku Sukulu wa Mwingilo wa Lesa.

Nangwa kya kuba uno sukulu waimena pa kufunjisha bya kutanga, kwamba, kabiji ne bya kufunjisha bulongo, abye kechi byo bintutu byonka bya kufunda mu uno Sukulu wa Mwingilo wa Lesa ne. Byo mukatanwangako, kikemukwasha kuyuka bya kutanga kwa pa bunke, kuteleka ne kuvuluka, kufunda, kupesapesa, kusaabaula, kunengezha, kwisamba, kukumbula mepuzho, ne kunemba milanguluko. Baibolo ne mabuku alumbulula Baibolo mo mukafumanga bintu bya kufunda ne byambo bya kwambapo kabiji ne majashi a kwamba mu sukulu. Byo mukayuzhanga milanguluko yenu na bukine bwanema butanwa mu Mambo a Lesa, mukayuka milanguluko ya Lesa. Kino kyakonsha kwimukwasha bingi mu mbaji yonse ya bwikalo bwenu. Pa mambo a buneme bwa Mambo a Lesa, mufunjishi wa pa sukulu mukatampe wa mu myaka kitota kya bu 20 aye William Lyon Phelps wanembele’mba: “Muntu yense wayukisha bulongo Baibolo wakonsha kutelwa’mba kine wafunda. . . . Naketekela’mba, kuyuka Baibolo kwa kubula kuya ku sukulu mukatampe kwanema bingi kukila kufunda sukulu mukatampe kwa kubula kuyuka Baibolo.”

Bya Kumwenamo Pakatampe

Pa kuba’mba mumwenengamo pakatampe mu lufunjisho luji mu Sukulu wa Mwingilo wa Lesa, mwafwainwa kwibikako. Mutumwa Paulo wakambizhe mukwabo mwina Kilishitu aye Timoti amba: “Kasa ubisha bino bintu; wikale monka mwi abyo; amba, kuya palutwe kobe kumweke ku bonse.” (1 Timo. 4:15) Mu ñanyi mashinda mo mwakonsha kwibikako?

Umvwe kyakonsheka, tanwainga ku Sukulu wa Mwingilo wa Lesa pa mulungu pa mulungu. Ingijishainga uno buku wa Mwenaimo mu Sukulu wa Lufunjisho lwa Mwingilo wa Lesa. Nembai jizhina jenu pa kakinshabu kaji pa peja panembwa mutwe wa uno buku. Sendainga uno buku kimye kyonse kyo mutanwa ku uno sukulu. Uno buku uji ne na mapunzha mwa kunemba bishinka. Umvwe mwatangamo bishinka bikatampe byo mwalanguluka’mba bikemukwasha, bishabulai. Ingijishainga mapunzha aji kwapelela byambo kunembamo bishinka byo mwafunda mu majashi a mu sukulu.

Mutanchi wa ndonda ya majashi a mu Sukulu wa Mwingilo wa Lesa bamunengezha bunke bwanji. Uno mutanchi wikala ne na mikambizho ya sukulu byo afwainwa kubiwa. Kyawama kubika uno mutanchi mu uno buku kuba’mba kikemupelelenga kumumona bukiji.

Pa kunengezha majashi a mu sukulu pa mulungu pa mulungu, yukai kuba’mba Baibolo ye buku mukatampe wa kufundamo. Tatwilaipo kutanga bitango bya mu Baibolo byo batanchika kutanga mu yewo mulungu. Kabiji umvwe mwakonsha ne kutangila jimo byambo mwafuma majashi apusana pusana, napo kikemukwasha bingi.

Kimye kya sukulu, kwakonsha kwikala kimye kya kwambapo luonde. Shukilwai bino bimye. Kwambapo pa misambo ya uno mutundu ke kintu kyanema bingi kyakonsha kwimukwasha kuvuluka bintu byo mumvwa kabiji ne kukonsha kwibingijisha mu bwikalo bwenu.

Baana ba sukulu bonse bakekalangako na jishuko ja kwamba majashi nangwa kumwesha bimwesho mu kipwilo. Ingijishai ano mashuko. Ibikishaiko kuba bulongo mu ñambilo yonse yo bemupa kwingijilapo. Bakemufundako kuba’mba mutwajijile kuyilangako palutwe. Umvwinai byo bemufundako. Nembai mu uno buku wenu milanguluko ya byo mwakonsha kuba pa kuba’mba muyilengako palutwe. Na mambo a kuba kyakatazha bingi muntu kwimona mwine bimumona bakwabo, milanguluko ya butemwe ifuma mu Baibolo ne mafunde o bemufundako akonsha kwimukwasha kukomenako bingi. Kino byo byo kiji nangwa kya kuba mwaikalamo myaka yavula mu sukulu.—Mana. 1:5.

Nanchi mukeba kuyilako palutwe bukiji bukiji nyi? Kino kyakonsha kubiwa umvwe saka mwibikako. Nengezhezhainga jimo majashi onse asakukamba baana ba sukulu. Umvwe mwine mwina jashi ufwapo, mukakonsha kwipana ne kwijamba, kabiji kino kikemulengela kupijilwa. Umvwe bakwenu babena kwamba majashi, telekeshai bulongo byo babena kwiamba, mambo tufunjila ku bakwetu.

Kabiji umvwe kyakonsheka, mwakonsha kuyilako palutwe bukiji kupichila mu kufunjila jimo mafunde aji mu uno buku. Umvwe mwapwisha kufunda mikambizho iji mu mafunjisho 15 alondelapo, twajijilai kufunda ne mafunde aji mu “Mutanchi wa Kukomesha Busendwe bwa Buñambi ne Bufunjishi,” kutatwila pa peja 78. Patanshi akifundai lufunjisho lumo ne kwingila mwingilo wa kuba wanembwa kunshi ko lwapelela. Mafunde o mubena kufunda, engijishainga mu mwingilo wa mu bujimi. Kino kyakonsha kwimukwasha bingi kuyilako palutwe mu buñambi ne mu bufunjishi bwa Mambo a Lesa.

Sukulu wenu wa Mwingilo wa Lesa ukemukwasha kwinengezha kuba bintu byanema mu bwikalo. Byo tuji bomi na mambo a kyaswa muchima wa Lesa, kumutota ko kumwesha’mba twayuka ine nkebelo yo twaikelako. Yehoba Lesa wafwainwa kutotwa pakatampe bingi. (Lum. 4:11) Lufunjisho lo tufunda mu uno sukulu jo jishinda ja kubilamo kino kuba’mba tukonshe kulanguluka bulongo, kuba bintu na maana, kabiji ne kwamba bulongo bukine bwanema buji mu Mambo a Lesa anembelwe na lutangijilo lwa mupashi.