Kitango 24

Kechi Wafwainwa Kwikala Ngivi Ne!

BAKIKWIBILAPO kala nyi?— Waumvwine byepi?— Awa wakwibijile ke ngivi, kabiji kafwako watemwa muntu wiba ne. Ki ka kilengela muntu kwikala ngivi? Nanchi usemwatu saka aji ngivi nyi?—

Mu Kitango kyafumako twafunda amba bantu basemwa na bundengamambo. Atweba bonse twi bandengamambo. Pano bino kafwako usemwa sa aji ngivi ne. Ngivi wakonsha kusemwa mu kisemi kyawama bingi. Bansemi, bakolojanji ne bankasanji bonsetu bakonsha kwikala bakishinka. Pano bino muchima wa kukebesha mali ne bintu byo akonsha kupotamo byakonsha kumulengela kwikala ngivi.

Ñanyi ngivi mutanshi?— Twaya twisambepo. Mufunjishi Wayukisha byo akijinga mwiulu wamuyukile uno muntu. Uno ngivi wajinga malaika. Lesa walengeletu bamalaika bawama, pano nga uno malaika waikele byepi ke ngivi?— Byonka byo twafunjile mu Kitango 8 kya uno buku, uno malaika wakebelenga kintu kyabula kyanji. Nanchi ubena kwikivuluka nyi?—

Lesa byo alengele mwanamulume ne mwanamukazhi mutanshi, awa malaika wakebelenga amba bamupopwelenga. Kechi bafwainwe kumupopwela aye ne. Bafwainwe kupopwela Lesa. Pano bino wibongwele! Byo alengejile ba Adama ne Evwa kumupopwela, awa malaika waalukile ke ngivi. Waikele ke Satana Diabola.

Ki ka kilengela muntu kwikala ngivi?— Kukumbwa bintu byabula byanji. Luno lunkumbwa lwakonsha kubaya kya kuba lwalengela ne bantu bawama kutendeka kuba bintu byatama. Kimye kimo aba bekala ke bangivi kechi balapila ne kutendeka kuba byawama jibiji ne. Byo byaubile ne mutumwa umo wa kwa Yesu. Jizhina janji wajinga Yudasa Isakaliota.

Yudasa wayukile amba kyatama kwiba mambo bamufunjishe Mizhilo ya Lesa kufumatu ku bwanyike. Wayukile amba Lesa waambijile bantu banji amba: “Kwiba ne.” (Kulupuka 20:15) Yudasa byo akomene, waikele ke mwana wa bwanga wa Mufunjishi Wayukisha. Palutwe kacheche, Yesu wasajile Yudasa kwikala umo wa pa batumwa banji 12.

Yesu ne batumwa banji baendangatu bonse. Bajiilangatu pamo. Kabiji mali onse o bajinga nao bealaminanga mu kabokoshi. Yesu wamupele Yudasa kano kabokoshi amba alamenga. Pano bino, aa mali kechi ajinga a kwa Yudasa ne. Nanchi wayuka byatendekele kuba Yudasa nyi?—

Yudasa watendekele kufumyamo mali mu kabokoshi kwakubula kumwambila ne. Watolangamo bakwabo umvwe kechi babena kumumona ne, kabiji wakebelenga ne mashinda mwakumwena mali avula. Kimye kyonse walangulukangatu pa mali. Akitwaya tumone kyafuminemo mu uno mulanguluko watama mu mobatu acheche Mufunjishi Wayukisha saka bakyangye kumwipaya.

Maliya nyenga ya kwa Lazalasa mulunda nanji Yesu, washikwile manyi afwa mutengo wabaya bingi ne kushinga ku maulu a kwa Yesu. Bino Yudasa wijizhañenyenga. Wayuka kyalengejile nyi?— Waambile’mba manyi afwanyijilwe kupotolwesha ne kupana aa mali ku bayanji. Pano bino, wakebelenga amba mu kabokoshi mwikale mali avula, ebenga bulongo.—Yoano 12:1-6.

Yesu wamwambijile Yudasa amba kechi wafwainwa kumushupa Maliya muntu wamubile lusa ne. Bino Yudasa kechi waumvwine bulongo Yesu byo amwambijile bino ne. Onkao mambo wayile ku bañanga bakatampe, balwanyi ba kwa Yesu. Bano bañanga bakebelenga kukwata Yesu, pano bino bakebelenga kuba bino bufuku kuchina kwibamona ku bantu.

Yudasa waambijile bañanga amba: ‘Nsa kwimubula kuji Yesu umvwe mumpe mali. Musakumpa inga?’

Bañanga bamukumbwile amba: ‘Tusakukupa mali makumi asatu.’—Mateo 26:14-16.

Yudasa watambwile oa mali. Kyajingatu nobe ubena kupotesha Mufunjishi Wayukisha ku boba bantu! Nanchi kyawama kuba kintu kya uno mutundu nyi?— Umvwe muntu waikala ngivi ne kutendeka kwiba mali byo byo kyakonsha kwikala. Wakonsha kutemwisha mali kukila byo atemwa bantu ne Lesa.

Kampe wakonsha kwamba’mba, ‘Kechi nafwainwa kutemwa kiji kyonse kukila byo natemwa Yehoba Lesa ne.’ Kyawama bingi kulanguluka mu jino jishinda. Yesu byo asajile Yudasa kwikala mutumwa, Yudasa naye wafwainwa byo byo eumvwine. Ne bakwabotu nabo baikele bangivi byo byo beumvwinenga. Twaya twisambepo pa bamo.

Umo wajinga kalume wa Lesa utelwa’mba Akana, wajingako kala kene Mufunjishi Wayukisha saka akyangye kusemwa ne. Akana wamwene kivwalo kyawamisha, kyela kya ngolode, ne mashekele a siliva. Bino bintu kechi byajinga byanji ne. Baibolo ushimuna’mba byajinga bya Yehoba mambo byajinga bipukulwa byo baangachile ku balwanyi ba Lesa. Bino Akana wibikumbilwe bingi ne kwiba waibile.—Yoshua 6:19; 7:11, 20-22.

Akimona kya kumwenako kikwabo. Mu moba a kunyuma Yehoba wasajile Davida kwikala mfumu wa bena Isalela. Juba jimo, Davida watendekele kutala mwanamukazhi walambile aye Batesheba. Waubile kasa amutajishatu nakanaka kabiji watendekele kulanguluka’mba na musendetu ku nzubo ekale ke mukazhami. Pano bino Batesheba wajinga muka Uliya. Davida wafwanyijilwe kuba ka?—

Davida wafwanyijilwe kuleka kulanguluka bya kumusenda Batesheba. Bino kechi wikilekele ne. Wamusendele Batesheba ku nzubo yanji. Kabiji wanengezhezhe’mba Uliya bamwipaye. Mambo ka Davida o aubijile bintu bya uno mutundu?—Mambo wakebeshenga mwanamukazhi wajinga wa bene.—2 Samwela 11:2-27.

Davida walapijile, kabiji Yehoba wamulekejileko mambo. Pano bino Davida wajinga bingi mu lukatazho. Mwananji aye Abisalomo wakebelenga’mba aje bufumu bwa shanji Davida. Bantu byo baiyanga na kumona Davida, Abisalomo wibakumbatanga ne kwibafyompa. Baibolo washimuna’mba: ‘Abisalomo waongwelenga michima ya bena Isalela.’ Waongwelenga bano bantu kuba’mba ekale mfumu mu kifulo kya Davida.—2 Samwela 15:1-12.

Nanchi ne obewa wakikebeshapo kala kwikala na bintu byonka byaubile Akana, Davida, ne Abisalomo nyi?— Kusenda kintu kya bene kwakubula kulomba, ke bwivi. Nanchi wayuka ngivi mutanshi aye Satana kyo akebelenga nyi?— Wakebelenga’mba bantu bamupopwelenga mu kifulo kya kupopwela Lesa. Onkao mambo Satana waongwele ba Adama ne Evwa kuba’mba bamukokelenga. Buno bwajinga bwivi

Umvwe muntu uji na kintu, ye uji na lūsa lwa kwikipana ku wakonsha kwikingijisha. Kya kumwenako, wakonsha kuya na kukaya na bakwenu ku nzubo yabo. Nanchi kyawama kusenda kiji kyonse ne kwikitwala kwenu nyi?— Ine, kana bansemi ba mukwenu bakwambila’mba senda. Umvwe wasenda kwakubula kwibambila ne, ke bwivi.

Ki ka kyakonsha kukulengela’mba wibe?— Inge ke ukebe kintu kyabula kyobe ne. Nangwa kya kuba kafwako muntu wakonsha kukumona ne, pano bino ñanyi wakonsha kukumona?— Yehoba Lesa. Kabiji twafwainwa kuvulukanga’mba Lesa washikwa bwivi. Onkao mambo, butemwe bwa kutemwa Lesa ne bakwenu bukakulengela kubula kwikala ngivi.

Baibolo waambatu patoka’mba kwiba kwatama. Tanga Mako 10:17-19; Loma 13:9; ne Efisesa 4:28.

[Kipikichala pa jipa 129]

Mambo ka Yudasa o aibijile?

[Bipikichala pa jipa 130]

Akana ne Davida babena kulanguluka pa bintu ka byatama?

[Kipikichala pa jipa 130]

Abisalomo waikele byepi ke ngivi?