Kitango 114

Kijiilo kya Mabanga kya Kivuluko

YESU byo apwishishe kovwa batumwa banji ku maulu, waambile byambo biji mu Salamo 41:9 amba: “Awa ye najanga nanji shinkwa waaluka ke mulwanyi wami.” Muchima byo amukatezhenga, waambile’mba: “Umo pe anweba usakunsolola.”

Batumwa baubile bingi bulanda ne kutatula kwiambila pa muntu pa muntu kwi Yesu amba: “Nanchi amiwa nyi?” Ne Yudasa Isakaliota naye washikishe kintutu kimo. Yoano waikele ku tebulu kwipi ne Yesu kabiji wasendalejile kwipi na kyaji kya kwa Yesu ne kumushikisha’mba: “Nkambo, nanchi ñanyi?”

Yesu wakumbwile’mba: “Yenka ye mbena kuja nanji muchiba umo. Ibyo kuba amba, Mwana muntu basakumwipaya byonka byo kyanembwa pe aye, pano bino, malwa anji awa muntu umusolola Mwana muntu! Kyamufwainwe umvwe wabujiletu ne kusemwa.” Byo apwishishe kwamba bino, Satana watwelele mwi Yudasa mambo waikele na muchima watama. Palutwe kacheche bonkabwa bufuku, Yesu watelele Yudasa amba “mwana wa lonaiko.”

Kepo Yesu aambijile Yudasa amba: “Akya kyo ubena kukeba kuba, kyube bukiji.” Batumwa bakwabo kechi bakwatakenye mwatazhizhe Yesu ne. Bamo balangulukilenga amba Yudasa byo alaminenga mali, kampe Yesu wamwambila’mba: “Kapote bintu bibena kukebwa bya pa kijiilo,” nangwa’mba aye akape bintu balanda.

Yudasa byo afuminepo, Yesu watatwile kijiilo kipya nangwa’mba kivuluko na batumwa banji bakishinka. Washikwile shinkwa, walombele, wamutebawile ne kwibapa ne kwibambila’mba: “Tambulai, muje.” Walumbulwile’mba: “Kino kibena kwimenako mubiji wami, ye nkapana na mambo a anweba. Saka muba kino mu kumvuluka.”

Bonse byo bajiile shinkwa, Yesu washikwile katomeno ka binyu ka buna ko aingijishe kimye kya Kijiilo kya Lupitailo. Kabiji walombele, kwikapana kwi abo ne kwibabula’mba batome ne kwibambila amba: “Kano katomeno lo lulayañano lupya lukatatula kimye kyo nkemwichijila mashi ami.”

Onkao mambo, kino kyajinga kivuluko kya lufu lwa kwa Yesu. Byonka Yesu byo aambile, kino kivuluko kyubiwa pa mwaka pa mwaka pa Nisanyi 14. Akye kivuluko kyalengejile aba batainweko kuvuluka kintu Yesu ne Shanji wa mwiulu kyo bauba kya kupokolwelamo bantu ku lufu. Ku Bayudea baikele baana ba bwanga ba kwa Kilishitu, akya kivuluko kyo kyapingakene pa Kijiilo kya Lupitailo.

Lulayañano lupya lwaikajikilwe na mambo a mashi aichikile a kwa Yesu, lwapingakene pa lulayañano lwa kala lwa Mizhilo. Yesu Kilishitu ye ñambi pakachi ka Yehoba Lesa ne ba 144,000 bena Kilishitu bashingwa na mupashi. Kununga pa kulekelwa kwa mambo, alwa lulayañano lwalengela kulengwa kwa kisaka kya bañanga bamfumu mwiulu. Mateo 26:21-29; Mako 14:18-25; Luka 22:19-23; Yoano 13:18-30; 17:12; 1 Kolinda 5:7.

▪ Ñanyi bungauzhi bwa mu Baibolo Yesu bo aambile pa mambo a mulunda nanji, kabiji wibwingijishe byepi?

▪ Mambo ka batumwa o baubijile bulanda, kabiji pa muntu pa muntu bashikishe’mba ka?

▪ Ñanyi kintu Yesu kyo abujile Yudasa kuba, kabiji batumwa bakwabo baumvwijile mwepi ino mikambizho?

▪ Ñanyi kijiilo Yesu kyo atatwile Yudasa byo afuminepo, kabiji ñanyi mwingilo ye kyaingijile?

▪ Bañanyi baji mu lulayañano lupya kabiji luno lulayañano lwaingila ñanyi mwingilo?