Bimwesho Byamwene Yoano

Yesu wamwesheshe Yoano bimwesho 16 byo ajinga pa jikuji ja Patamosa po bamukashijile. Bino bimwesho byajinga bya bintu bikamweka kulutwe. Byamwesheshe jizhina ja Yehoba byo jikazhijikwa inge Bufumu bwanji bwaiya ne kyaswa muchima wanji inge kyaubiwa pano pa ntanda byonka byo kibena kubiwa mwiulu.

Mu kimwesho kimo, Yoano wamwene Yehoba saka aikala pa jitanda janji ja lukumo mwiulu saka bamuzhokoloka ku bakulumpe 24 bavwajile bivwalo bitoka ne tubondo twa ngolode ku mitwe. Ku jitanda kwatataukilenga ne kubesha bingi. Bakulumpe 24 bafukamine kwi Yehoba ne kumupopwela. Mu kimwesho kikwabo, Yoano wamwene jibumba jikatampe ja bantu bafuma mu byalo ne mu milaka yapusana pusana. Mwana Mukooko aye Yesu saka abena kwibatangijila ku mema a bumi. Mu kimwesho kikwabo, Yesu wajinga pa jitanda ja Bufumu mwiulu saka abena kulama pamo na bakulumpe 24. Mu kimwesho kyalondejilepo, Yoano wamwene Yesu saka abena kulwa na nsuñunyi, aye Satana ne bandemona banji. Yesu wibashinjile ne kwibataya pano pa ntanda.

Kepo Yoano amwene Mwana mukooko saka aimana pa Mutumba wa Ziona na ba 144,000. Kabiji wamwene malaika wakilañenyenga mwiulu saka abena kubula bantu amba bakamwenga Lesa ne kumupa lukumo.

Mu kimwesho kikwabo, Yoano wamwene nkondo ya Amagedonyi. Mu ino nkondo, Yesu na nzhita yanji bashinjile Satana ne bonse bamutundaikilenga. Mu kimwesho kyapeleleko, Yoano wamwene meulu ne ntanda mwabula lukatazho. Kabiji Satana ne bonse bamutundaikilenga bebonawine. Bonse mwiulu ne pano pa ntanda baubilenga bintu bizhijika jizhina ja Yehoba kabiji ye yenkatu ye bapopwejilenga kwapwa.