Bufumu Bwa Lesa Bo Bu Ka?

1. Ñanyi lulombelo lwaya nkuwa lo tusakwisambapo?

BANTU bavula mwaya ntanda bayuka lulombelo lo batela’mba Tata Wetu wa Mwiulu, nangwa’mba Lulombelo lwa Nkambo. Yesu walombele luno lulombelo kimye kyo afunjishenga baana banji ba bwanga bya kulomba. Walombele pa ñanyi bintu? Mambo ka luno lulombelo kyo lwanemena?

2. Ñanyi bintu bisatu bitufunjishe Yesu byo twafwainwa kulombangapo?

² Yesu waambile’mba: “Byonkabyo, mwafwainwa kulombanga bino amba: ‘Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.’” (Tangai Mateo 6:9-13.) Mambo ka Yesu o ambijile’mba tulombenga pa bino bintu bisatu?—Monai Byambo byo Balumbulula, 20.

3. Ñanyi bintu byo twafwainwa kuyuka pa Bufumu bwa Lesa?

³ Twafunjile kuba’mba Lesa jizhina janji Yehoba. Kabiji twafunjile ne pa byakebelenga Lesa kuba’mba bantu bakekalenga pano pa ntanda. Pano Yesu watazhizhe mwepi byo aambile’mba: “Bufumu bwenu bwiye”? Twafwainwa kuyuka Bufumu bwa Lesa byo buji, byo bukoba ne byo bukazhijika jizhina ja Lesa. Abino byobyo tusakufundapo.

BUFUMU BWA LESA BO BU KA?

4. Bufumu bwa Lesa bo bu ka? Kabiji Mfumu mu buno Bufumu ñanyi?

⁴ Yehoba walenga kafulumende mwiulu kabiji Yesu yeye atongwele kwikala Mfumu. Baibolo utongola uno kafulumende amba Bufumu bwa Lesa. Yesu ye “Mfumu wa bamfumu ne Nkambo wa bankambo.” (1 Timoti 6:15) Yesu uji na bulume bwa kubila bantu byawama kukila bakalama bonse ba bantu, kabiji nangwatu bakwatankana pamo kechi bakonsha kumukila bulume ne.

5. Bufumu bwa Lesa bubena kulamina pi? Bukalamanga bañanyi?

⁵ Yesu wabwelele mwiulu byo papichile moba 40 kufuma po bamusangwijile. Pa kupitapo myaka, Yehoba wamutongwele kwikala Mfumu mu Bufumu bwanji. (Byubilo 2:33) Bufumu bwa Lesa bukalamanga pano pa ntanda saka buji mwiulu. (Lumwekesho 11:15) O ene mambo Baibolo o itelela Bufumu bwa Lesa amba, “Bufumu bwa mwiulu.”—2 Timoti 4:18.

6, 7. Yesu wapusana byepi na bakalama ba bantu?

⁶ Baibolo waamba’mba Yesu wakila bamfumu bonse ba bantu mambo aye ye “yenka ubula kufwa.” (1 Timoti 6:16) Bakalama ba bantu bafwa, bino Yesu kechi ukafwa ne. Bintu byonse byawama biketubila Yesu bikekala myaka ne myaka.

⁷ Bungauzhi bwa mu Baibolo bwaamba’mba Yesu ukekala Mfumu wabula misalululo ubila bantu lusa mambo, “mupashi wa Yehoba ukekala pe aye, mupashi wa maana ne wa milangwe, mupashi upana maana ne wa bulume, mupashi wa kuyuka bintu ne wa kwakamwa Yehoba. Kabiji aye ukasangalela mu kwakamwa Yehoba. Kechi ukachiba mambo kwesakana na mwekelo ya muntu ne. Nangwa kukajipila bantu kwesakana na byo aumvwa ne. Ukachibila bayanji [nangwa’mba balanda] mambo monka mo aolokela.” (Isaya 11:2-4) Nanchi kechi mukeba kwikala na kalama uji bino nenyi?

8. Twayuka byepi kuba’mba Yesu kechi ukalamangatu bunke ne?

⁸ Lesa watongola bantu bakalamanga pamo ne Yesu mu kafulumende wa mwiulu. Paulo waambijile Timoti amba: “Umvwe saka tuchinchika, tukalama nanji pamo nobe bamfumu.” (2 Timoti 2:12) Bantu banga bakekala bamfumu bakalamanga pamo ne Yesu?

9. Bantu banga bakalamanga pamo ne Yesu? Ñanyi kimye Lesa kyo atatwile kwibasala?

⁹ Byonka byo twafunjile mu Kitango 7, mutumwa Yoano bamumwesheshe kimwesho mo amwene Yesu saka aji Mfumu mwiulu na bamfumu bakwabo 144,000. Bano ba 144,000 bo bañanyi? Yoano waambile’mba, ‘baji na jizhina ja [Yesu] ne ja Shanji pa bilungi byabo.’ Kabiji wanungilepo’mba: “Bano bo boba balondela Mwana Mukooko konse konse ko aya. Bano bebapotele kufuma mu bantu.” (Tangai Lumwekesho 14:1, 4.) Ba 144,000 ke bena Kilishitu bakishinka Lesa bo asala, “bakekala bamfumu ba kulama ntanda” pamo ne Yesu. Inge bafwa, bebasangula ne kwikala na bumi mwiulu. (Lumwekesho 5:10) Kufumatu kimye kya batumwa, Yehoba watwajijila kusala bena Kilishitu bakishinka bakwikala mu jibumba ja bamfumu ba 144,000.

10. Yehoba byo asala Yesu ne ba 144,000 bakulama bantu kimwesha byepi kuba’mba witutemwa bingi?

¹⁰ Yehoba witutemwa bingi. O ene mambo o anengezhezha’mba bantu bamo bakalamenga pamo ne Yesu. Yesu uketulama bingi bulongo mambo wituyuka. Mambo wajingapo muntu kabiji wapichilepo ne mu buyanji. Paulo waambile’mba, Yesu wituta bingi muchima mambo ‘witumvwina lusa pa kubula kukosa kwetu,’ kabiji “waesekelwe mu meseko onse o tupitamo.” (Bahebelu 4:15; 5:8) Ba 144,000 nabo bajingapo bantu. Nabo bajinga bambulwakulumbuluka kabiji bakolwanga. Onkao mambo, twafwainwa kushiinwa kuba’mba Yesu ne ba 144,000 bayuka byotumvwa inge tuji na makatazho.

BINTU BIKOBA BUFUMU BWA LESA

11. Mambo ka Yesu o afunjishishe baana banji ba bwanga kulomba kuba’mba kyaswa muchima wa Lesa kyubiwe mwiulu?

¹¹ Yesu wafunjishe baana banji ba bwanga kulomba kuba’mba kyaswa muchima wa Lesa kyubiwe mwiulu. Mambo ka? Mu Kitango 3, twafunjile kuba’mba Satana Diabola wasatukijile Yehoba. Satana byo asatukile, Yehoba wakimulekele waikala mwiulu na bamalaika basatukile nangwa’mba bandemona pa kakimye kacheche. Kechi bonse bajinga mwiulu baubilenga kyaswa muchima wa Lesa ne. Mu Kitango 10 tukafunda byavula pe Satana ne bandemona.

12. Ñanyi bintu bibiji byanema byo balumbulula mu Lumwekesho 12:10?

¹² Baibolo waamba’mba Yesu byo aikele Mfumu mu Bufumu bwa Lesa, walwile nkondo ne Satana. (Tangai Lumwekesho 12:7-10.) Kyepelo 10 kyalumbulula bintu bibiji byanema bingi byamwekele. Yesu Kilishitu waikele Mfumu mu Bufumu bwa Lesa kabiji Satana bamwelele pano pa ntanda kufuma mwiulu. Bino byonse byamweka kala, byonka byo tusakufunda.

13. Mwiulu muji byepi Satana byo bamupangilemo?

¹³ Baibolo waamba’mba bamalaika bakishinka basangalele bingi Satana ne bandemona byo bebataile pano pa ntanda. Tutanga’mba: “Sekelai anweba meulu ne anweba mwikalamo!” (Lumwekesho 12:12) Mwiulu muji mutende kabiji bakwatankana mambo bonse babena kuba kyaswa muchima wa Lesa.

14. Bwikalo buji byepi Satana byo bamwelele pano pa ntanda?

¹⁴ Bwikalo pano pa ntanda bwakatazha bingi. Bya malwa byavula ‘mambo Diabola waikila ko tuji, saka azhingila bingi, mambo wayuka’mba washalatu na kakimye kacheche.’ (Lumwekesho 12:12) Satana wazhingila bingi mambo bamupangile mwiulu kabiji wayuka’mba katatakatu bamonaune. Ubena kwingila bingi papelela bulume bwanji kuleta bya malwa ku bantu pano pa ntanda.

15. Lesa wakebelenga’mba bantu bakekalenga byepi pano pa ntanda?

¹⁵ Byakebelenga Lesa kuba’mba bantu bakekalenga pano pa ntanda kechi byaaluka ne. Ne lunotu Lesa ukeba’mba bantu balumbuluka bakekalenga bulongo mu paladisa pano pa ntanda. (Salamo 37:29) Pano Bufumu bwa Lesa bukoba byepi bino?

16, 17. Bungauzhi buji mu Danyela 2:44 bwitubulapo ka pa Bufumu bwa Lesa?

¹⁶ Bungauzhi buji mu Danyela 2:44 bwaamba’mba: “Mu moba a boba bamfumu, Lesa wa mwiulu ukaleta bufumu bo bakabula konauna. Kabiji buno bufumu kechi bakebupana ku bantu bangi ne. Bukavingakanya ne kupwisha buno bufumu bonse kabiji abo bukekala myaka ne myaka.” Buno bungauzhi bwitufunjishapo ka pa Bufumu bwa Lesa?

¹⁷ Patanshi bwitubula’mba Bufumu bwa Lesa bukatendeka kulama “mu moba a boba bamfumu.” Kino kibena kulumbulula’mba buno Bufumu bukatendeka kulama makafulumende a bantu saka a bena kulama pano pa ntanda. Kya bubiji, bwitubula’mba buno Bufumu bukekala myaka ne myaka, kabiji kechi bakebufumyapo ku kafulumende mukwabo ne. Kya busatu bwitubula’mba Bufumu bwa Lesa bukalwa nkondo na makafulumende a pano pa ntanda. Bufumu bwa Lesa bukashinda, kabiji ye kafulumende ukalamanga ino ntanda yonse. Bantu bonse bakebalamanga ku kafulumende wawama bingi.

18. Nkondo ikapelako ikalwa Bufumu bwa Lesa na makafulumende a pano pa ntanda itelwa’mba ka?

¹⁸ Bufumu bwa Lesa bukafumyapo byepi bamfumu bonse ba pano pa ntanda? Nkondo ikapelako ya Amagedonyi saka ikyangye kutendeka, bandemona bakongola “bamfumu ba pano pa ntanda ponse mu kwibakonkenya pamo ku nkondo ya aja juba jikatampe ja Lesa wa Bulume Bonse.” Makafulumende a bantu akalwa na Bufumu bwa Lesa.—Lumwekesho 16:14, 16; monai Byambo byo Balumbulula, 10.

19, 20. Mambo ka o tukebela Bufumu bwa Lesa kutendeka kulama pano pa ntanda?

¹⁹ Mambo ka o tukebela Bufumu bwa Lesa? Bishinka bimo bilengela kwibukeba bingi ke bino bisatu byalondelapo. Kitanshi, twibandengamambo o ene mambo o tukolelwa ne kufwa. Baibolo waamba’mba, mu Bufumu bwa Lesa tukekalanga myaka ne myaka. Kinembelo kya Yoano 3:16 kyaamba’mba: “Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.”

²⁰ Kishinka kya bubiji, tukeba Bufumu bwa Lesa mambo twikala mu bantu batama. Bavula babepa, ne kuba byubilo bincha. Kafwako muntu wakonsha kufumyapo bano bantu batama ne, kanatu Lesa mwine. Bantu boba bintu byatama bakebonauna pa nkondo ya Lesa ya Amagedonyi. (Tangai Salamo 37:10.) Kishinka kya busatu kyo tukebela Bufumu bwa Lesa ke kya kuba’mba makafulumende a bantu akankalwa kulama kabiji batama, boba bya bumbanzhi ne mazhikakanwa. Kechi bafunjisha bantu kukokela Lesa ne. Baibolo wamba’mba, ‘bantu balama bantu bakwabo na kwibayanjisha.’—Musapwishi 8:9.

21. Buno Bufumu bukoba byepi kyaswa muchima wa Lesa pano pa ntanda?

²¹ Nkondo ya Amagedonyi byo ikapwa, Bufumu bwa Lesa bukoba kyaswa muchima wa Lesa pano pa ntanda. Bukafumyapo Satana ne bandemona banji. (Lumwekesho 20:1-3) Kabiji bikola ne lufu kechi bikekalako ne. Mambo bukuzhi bwa kwa Yesu bukalengela bantu bakishinka kwikala myaka ne myaka. (Lumwekesho 22:1-3) Buno Bufumu bukazhijika jizhina ja Lesa. Kino kilumbulula ka? Kilumbulula’mba bantu bonse bakanemekanga jizhina ja Yehoba, kafulumende wa Lesa byo akatendeka kulama ino ntanda.—Monai Byambo byo Balumbulula, 21.

ÑANYI KIMYE YESU KYO AIKELE MFUMU?

22. Twayuka byepi kuba’mba Yesu kechi waikele Mfumu byo ajinga pano pa ntanda nangwa aku usangulwatu ne?

²² Yesu wafunjishe baana banji ba bwanga kulomba’mba, “Bufumu bwenu bwiye.” Onkao mambo, Bufumu kechi bwaishile pa kyonka kya kimye ne. Yehoba wafwainwe patanshi kulenga kafulumende ne kutongola Yesu kwikala Mfumu mu uno kafulumende. Nanchi Yesu waikele Mfumu aku ufikatu mwiulu nyi? Ine, wapembejile. Byo papichile kimye Yesu saka bamusangula kala, Petelo ne Paulo balumbulwile bungauzhi buji pa Salamo 110:1 byo bwafikile pe Yesu. Mu buno bungauzhi, Yehoba waambijile Yesu amba: “Ikala ku kuboko kwami kwa kilujo poso nkalule balwanyi bobe ke jitebe ja kunyantapo maulu obe.” (Byubilo 2:32-35; Bahebelu 10:12, 13) Papichile kimye kyalepa byepi pa kuba’mba Yehoba atongole Yesu kwikala Mfumu?

23. (a) Mu ñanyi mwaka Yesu mo aikele Mfumu mu kafulumende wa Lesa? (b) Mu kitango kyalondelapo tukafunda pa ka?

²³ Pa myaka yavula, mwaka wa 1914 saka akyangye kufika, kwajinga jibumba ja bena Kilishitu bakishinka baumvwine mwatala bungauzhi bwa mu Baibolo bwaamba pa uno mwaka. Byamwekele kutendeka mu 1914 bimwesha’mba kechi bayile mungi ne. Yesu waikele Mfumu mu yenka uno mwaka. (Salamo 110:2) Byo aikele Mfumu watayile Satana pano pa ntanda, kabiji Satana “wayuka’mba washalatu na kakimye kacheche.” (Lumwekesho 12:12) Mu kitango kyalondelapo tukafunda pa bishinka bimwesha’mba tubena kwikala mu moba apelako. Kabiji byo tukafunda biketulengela kushiinwa kuba’mba katatakatu Bufumu bwa Lesa bukobe kyaswa muchima wanji pano pa ntanda.—Monai Byambo byo Balumbulula, 22.