Bufumu bwa Lesa bo bu Ka?

1. Bufumu bwa Lesa bo bu ka?

Bufumu bwa Lesa ke kafulumende wa mwiulu. Bukafumyapo makafulumende onse ne kulama kabiji bukalengela kyaswa muchima wa Lesa kubiwa mwiulu ne pano pa ntanda ponse. Kyawama bingi kuba’mba, Lesa ukengijisha Bufumu bwanji mu jino jishinda. Katatakatu Bufumu bwa Lesa bukalete kafulumende ukoba byonse bikeba bantu. Bukakwatankanya bantu bonse pano pa ntanda.—Tangai Danyela 2:44; Mateo 6:9, 10; 24:14.

Bufumu bonse bwafwainwa kwikala na mfumu. Yehoba watongola Mwananji, Yesu Kilishitu kwikala Mfumu wa Bufumu bwanji.—Tangai Lumwekesho 11:15.

2. Mambo ka Yesu o aikela Mfumu wafwainwa?

Mwana Lesa ye Mfumu wafwainwa uji na lusa, watemwa bololoke. (Yoano 1:14) Kabiji uji na bulume bwa kukwasha bantu mambo ukalamanga ino ntanda saka aji mwiulu. Panyuma ya kusangulwa wayile mwiulu ne kwikala ku kuboko kwa kilujo kwa Yehoba na kupembelela. (Bahebelu 10:12, 13) Mu kuya kwa moba, Yehoba wamupele bulume bwa kutendeka kulama.—Tangai Danyela 7:13, 14.

3. Bañanyi bakalamanga ne Yesu?

Yesu ukalamanga na “bazhijikwa” mwiulu. (Danyela 7:27) Batumwa banji bakishinka bo bazhijikwa batanshi bo asajile. Ne lelo jino Yehoba watwajijila kusala banabalume ne banabakazhi bakishinka bakwikala bazhijikwa. Byonka byo kyajinga kwi Yesu, nabo basangulwa na mibiji ya bumupashi.—Tangai Yoano 14:1-3; 1 Kolinda 15:42-44.

Bantu banga bakaya mwiulu? Yesu wibatelele’mba “kajitanga kacheche.” (Luka 12:32) Bonse pamo bakekala 144,000. Bakalamanga ino ntanda pamo ne Yesu saka baji mwiulu.—Tangai Lumwekesho 14:1.

4. Ki ka kyamwekele kimye kyatendekele kulama Yesu?

Bufumu bwa Lesa bwatendekele kulama mu 1914.a Yesu byo aikeletu Mfumu, watayile Satana ne bandemona banji pano pa ntanda. Satana wazhingijile bingi kabiji waletele makatazho mwaya ntanda yonse. (Lumwekesho 12:7-10, 12) Kufumatu kyo kya kimye, bya malwa bilengela bantu kuyanda bibena kuvujilakotu. Makondo, bipowe bya nzala, myalo ne bitentanshi ke mbaji ya “kiyukilo” kimwesha’mba Bufumu bwa Lesa katataka butendeke kulama ino ntanda.—Tangai Luka 21:7, 10, 11, 31.

5. Bufumu bwa Lesa bukaleta ka?

Kupichila mu mwingilo wa kusapwila, Bufumu bwa Lesa bubena kukonkanya jibumba jikatampe kufuma mu bisaka byonse bya bantu ne kwibakwatankanya mu mutende. Bantu bavula bakoka michima babena kwikala bangikazhi ba mu Bufumu bwa Lesa bulamwa ne Yesu. Bufumu bwa Lesa bukebazhikijila byo bukonauna buno bwikalo bubi pano pa ntanda ponse. Onkao mambo, bonse bakeba kwikala bangikazhi mu Bufumu bwa Lesa bafwainwa kukokelanga Yesu kalama wabo.—Tangai Lumwekesho 7:9, 14, 16, 17.

Mu myaka 1,000, Bufumu bwa Lesa bukabwezha bwikalo Lesa boakebelenga bantu kwikala kuntendekelo. Ino ntanda yonse ikekala paladisa. Kepo Yesu akabwezha Bufumu kwi Shanji. (1 Kolinda 15:24-26) Nanchi mwayukapo bamo bomwakonsha kubulako pa Bufumu bwa Lesa nyi?—Tangai Salamo 37:10, 11, 29.