Yesu byo Afunjishe pa Bufumu bwa Lesa

“Wayile na kupitañana mu mizhi ikatampe ne icheche na kusapwila, ... mambo awama a bufumu bwa Lesa.”—LUKA 8:1.

TWATEMWA kwamba pa bintu bitukunza ne bintu byanema mu bwikalo. Byonka Yesu mwine byo aambile’mba “monka mo byayujila mu muchima ne kanwa kamba monka.” (Mateo 12:34) Inge twalanguluka pa byaambilenga Yesu mu mwingilo wanji, tusakutana’mba kusapwila pa Bufumu bwa Lesa kyo kintu kyanemene mu bwikalo bwanji.

Bufumu bwa Lesa bo bu ka? Bufumu ke kafulumende ulamwa na mfumu. Onkao mambo, Bufumu bwa Lesa kafulumende waikajika Lesa. Yesu waambile bingi pa Bufumu bwa Lesa, kyo kyajinga kishina kya byambo byanji. Kyambo kya Bufumu kitanwamo kukila pa 110 mu mabuku ana a Mambo Awama. Bino Yesu kechi wafunjishengatu byambo byonka ne. Byubilo byanji nabyo byasolwele byavula pa Bufumu bwa Lesa ne byo bukoba.

Mfumu ñanyi? Mfumu wa Bufumu bwa Lesa kechi wasajilwe na bantu ne. Uno Kalama wasajilwe na Lesa mwine. Yesu byo afunjishenga wasolwele kuba’mba ye wasalwa kwi Lesa kwikala Mfumu.

Yesu wayukile kuba’mba bungauzhi bwa mu Baibolo bwaambijile jimo amba Mesiasa walailwe ukalamanga myaka ne myaka. (2 Samwela 7:12-14; Danyela 7:13, 14; Mateo 26:63, 64) Yesu waambile patoka kuba’mba aye mwine ye wajinga Mesiasa watongwejilwe jimo. Mu jino jishinda wiyukanyikishe mwine amba ye Mfumu watongolwa na Lesa. (Yoano 4:25, 26) Yesu waingijishanga bingi byambo bya kuba’mba “bufumu bwami.”—Yoano 18:36.

Kabiji Yesu wafunjishe’mba kuji ne bakwabo bo akalamanga nabo mu Bufumu. (Luka 22:28-30) Watelele bano bakalama bakwabo amba “kajitanga kacheche” mambo kibelengelo kyabo kyakepa bingi. Wibambijile’mba: “Kyo kyawama ku muchima wa Shenu kya kwimupa bufumu.” (Luka 12:32) Buku wa mu Baibolo wapelako waamba’mba ba 144,000 bo bakalamanga pamo na Kilishitu.—Lumwekesho 5:9, 10; 14:1.

Bufumu bwaikela pi? Yesu waambijile ndamakyalo wa bena Loma Pontiusa Pilato amba: “Bufumu bwami kechi bwa panopantanda ne.” (Yoano 18:36) Bufumu bwa Lesa kupichila mwi kilishitu, kechi bukalamwanga na bantu ne. Yesu javula watongwelenga Bufumu bwa Lesa amba “bufumu bwa mwiulu.”a (Mateo 4:17; 5:3, 10, 19, 20) Onkao mambo, Bufumu bwa Lesa ke kafulumende wa mwiulu.

Yesu watengejilenga kubwela mwiulu panyuma ya kwikala panopantanda. Waambile’mba ubena kuya na ‘kumwena kuntu,’ bakwabo bo akalamanga nabo.—Yoano 14:2, 3.

Bufumu bukoba ka? Yesu wafunjishe banteleki banji kulomba Lesa amba: “Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.” (Mateo 6:9, 10) Kyaswa muchima wa Lesa kibena kubiwa mwiulu. Bufumu bo bukafikizha nkebelo ya Lesa panopantanda. Bukoba kino byo bukapimpula bintu panopantanda.

Bufumu bukoba ka panopantanda? Yesu wafunjishe amba Bufumu bwa Lesa bukapwisha bubi byo bukafumyapo bebuba. (Mateo 25:31-34, 46) Kino kibena kulumbulula’mba byubilo byonse byatama bikapwa. Yesu wafunjishe amba mu ntanda mukakumbanatu “bakimote,” baoloka, boba lusa, “ba michima yatoka to” ne bantu bamutende.—Mateo 5:5-9.

Nanchi bano bantu bakishinka bakatwajijila kwikala mu ntanda yatama nyi? Ine! Yesu walayile amba ntanda ikapimpulwa kupichila mu Bufumu bwa Lesa. Mwanamulume wafwijile pamo ne Yesu waambile’mba: “Bandanguluke byo mukeya mu bufumu bwenu!” Yesu wamukumbwile’mba: ‘Kine, nemwambila namba, Jonka jino ja lelo, mukekala ne amiwa mu Paladisa.’ (Luka 23:42, 43) Ee Bufumu bwa Lesa bukalula ino ntanda kwikala Paladisa byonka byajinga bujimi bwa Edena.

Ki ka kikwabo Bufumu kyo bukobila bantu? Yesu kechi walayiletu bintu bikoba Bufumu bwa Lesa ne, bino wamwesheshe ne byo bukoba kino. Yesu waubile byakukumya kumwesha byo akoba kulutwe na lwendo mu kimye kyo akalamanga. Mambo Awama aambapo pe Yesu amba: “Wapitañenenga monse mu Ngalilea, na kufunjisha mu mashinagoga abo, saka asapwila mambo awama a bufumu, ne kupwisha misango yonse ya bikola ne ya bulema mu bantu.”—Mateo 4:23.

Yesu wabukile bikola byavula bingi. “Walabishe meso a mpofu wasemenwetu nabo.” (Yoano 9:1-7, 32, 33) Yesu watanyikile kuboko ne kubuka mwanamulume wajinga na mbumba. (Mako 1:40-42) Byo “bamuletele umo washinka matwi waji ne na kanangata,” Yesu wamwesheshe kuba’mba wakonsha kulengela “bakishinka matwi ke bomvwe, ne bakamama ke bambe.”—Mako 7:31-37.

Mfumu wasalwa na Lesa wajinga na bulume bwa kusangula bafwa. Mu mashimikila asatu Yesu wasangwile bafwa. Wasangwile mwana wamulume wa mwanamukazhi wafwilwa, kashimbi wa myaka 12, ne mulunda nanji Lazalasa.—Luka 7:11-15; 8:41-55; Yoano 11:38-44.

Yesu waambijile jimo kupichila mu mutumwa Yoano bintu byawama bya kulutwe bibena kutengela bangikazhi ba mu Bufumu bwa Lesa amba: “Tala, kya kwikalamo Lesa kiji mu bantu, ne aye ukekala nabo, ne abo nabo bakekala ke bantu banji, ne aye Lesa mwine ukekala nabo, ne kwikala ke Lesa wabo: kabiji aye ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.” (Lumwekesho 1:1; 21:3, 4) Akifwanyikizhai ntanda yabulamo bulanda, misongo ne lufu! Kino kikafikizha byambo biji mu lulombelo bya kuba’mba kyaswa muchima wa Lesa kyubiwe panopantanda byonka byo kiji mwiulu.

Bufumu bwa Lesa bukeya ñanyi kimye? Yesu wafunjishe’mba kimye kyo akatendeka kulama kyo kimye kikatendeka kiyukilo kya “kwiya kwanji nangwa’mba kya kwikalapo” kwanji. Yesu waambile bungauzhi bwa kuyukanyikisha kimye kya kwikalapo kwanji pa bufumu kyo kukatendeka. Kino kimye kikayukanyikilwa ku makatazho mu ntanda kuvwangakotu ne makondo, bipowe bya nzala, bitentanshi, myalo ne kuvujilako kwa bubi. (Mateo 24:3, 7-12; Luka 21:10, 11) Bino ne bintutu bikwabo byo aambijile jimo Yesu byatendekele kumweka mu 1914, mwaka watatwile Nkondo Itanshi ya Ntanda Yonse. Ko kuba’mba Yesu ubena kulama. Katatakatu Bufumu bukafike ne kulengela kyaswa muchima wa Lesa kubiwa panopantanda.b

Nanchi kwiya kwa Bufumu bwa Lesa kulumbulula ka kwi anweba? Kino kyashajila kwi anweba kana mukeba kuteleka ku byambo bya kwa Yesu nangwa ne.

[Tubyambo twa mushi]