Bukine Bwaamba pa Bufumu bwa Lesa
Yesu wafunjishe baana banji ba bwanga kulomba’mba: “Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.” (Mateo 6:9, 10) Bufumu bwa Lesa bo bu ka? Ñanyi bintu byo bubena kuba? Kabiji mambo ka o twafwainwa kulombelanga amba bwiye?
Yesu ye Mfumu wa Bufumu bwa Lesa.
Luka 1:31-33: “Ukamutumbe’mba Yesu. Uno ukanema bingi kabiji ukatelwa’mba Mwana wa Mwine Wakila, kabiji Yehoba Lesa ukamupa jitanda ja kwa Davida shanji, kabiji ukekala Mfumu pa nzubo ya kwa Yakoba myaka ne myaka, ne Bufumu bwanji kechi bukapwa ne.”
Bufumu bwa Lesa kyo kishina Yesu kyo asapwijilengapo.
Mateo 9:35: “Yesu wapitañenenga mu mizhi yonse ikatampe ne icheche na kufunjisha mu mashinagoga ne kusapwila mambo awama a Bufumu ne kubuka bikola byapusana pusana ne bulema bwapusana pusana.”
Yesu wabuujile baana banji ba bwanga biyukilo bya kwibakwasha kuyuka’mba Bufumu buji pepi kwiya.
Mateo 24:7: “Mambo kisaka kikalukuka kisaka kikwabo ne bufumu bukalukuka bufumu bukwabo, kabiji kukekala bipowe bya nzala ne bitentanshi kuku ne kuku.”
Baana ba bwanga ba kwa Yesu babena kusapwila pa Bufumu mwaya ntanda yonse.
Mateo 24:14: “Kabiji ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”