Lufuunjisho 6

Bufumu bwa Lesa Bobuka?

Bufumu bwa kwa Lesa buji pi? (1)

Ñanyi Mfumu bwayo? (2)

Naanchi paji bakwabo bajimo na lubaji mukulela na uno Mfumu nyi? Inge ibyo, banga? (3)

Kika kimwesha kuba mba tuji mu mooba apelako? (4)

Kika Bufumu bwa Lesa kyobukobila bantu kulutwe na lwendo? (5-7)

1. Kimye ajinga panopantanda, Yesu wafuunjishe baana banji babwanga kulombelela Bufumu bwa Lesa. Bufumu ke kamfulumende ulelwa na Mfumu. Bufumu bwa Lesa ke kamfulumende wasalululwa. Buji mwiulu kabiji bukalela ino ntanda. Bukazhijika jizhina ja Lesa. Bukalengesha kyaswa muchima wa Lesa kubiwa byoka byokyubiwa mwiulu.—Mateo 6:9, 10.

2. Lesa walaile kubamba Yesu yeukekala Mfumu ya Bufumu bwanji. (Luka 1:30-33) Yesu byoakijinga panopantanda, wamwesheshe kuba mba ukekala Kalama wakifyele, wawama, kabiji waoloka. Byoabwelele mwiulu, kechi wakafikenejiletu kwikala Mfumu wa Bufumu bwa Lesa ponkapotu ne. (Bahebelu 10:12, 13) Mu 1914, Yehoba wamupele Yesu luusa lo amulaile. Kufumatukyokyo kimye, Yesu uji pa bufumu mwiulu nobe Mfumu ya salwa na Yehoba.—Daniel 7:13, 14.

3. Kabiji Yehoba wasala baana balume ne baana bakazhi bamo bakishiinka panopantanda kuya mwiulu. Bakalela pamo ne Yesu nobe mafumu, mitonyi, ne bañanga mutundu wa bantu. (Luka 22:28-30; Lumwekesho 5:9, 10) Yesu watelele bano bakalama bakwabo ba mu Bufumu bwanji ’mba “kajitanga kacheche.” Baji 144,000.—Luka 12:32; Lumwekesho 14:1-3.

4. Aku wikalatu pa Bufumu, Yesu bukijibukiji waelele Satana ne bamalaika baji batama panopantanda kufuma mwiulu. Kutendekatu mu 1914 bintu panopantanda kyo kyobyatamina. (Lumwekesho 12:9, 12) Makondo, bipowe byanzala, myalo, kuvujilako kwa bubi—byonse byaikala ke lubaji lwa “kiyukilo” kumwesha ku ba mba Yesu ubena kulela kabiji ne ino ngubilo yatama iji mu mooba ayo apelako.—Mateo 24:3, 7, 8, 12; Luka 21:10, 11; 2 Timoti 3:1-5.

5. Katataakatu Yesu akachibile bantu mambo, ne kwibabanya byonka byabanya kafuunga mikooko ne bambuzhi. ‘Mikooko’ ke bantu baji na luketekelo mwi aye. Bakekala na buumi bwa myaka panopantanda. “Bambuzhi” ke bobo bakaana Bufumu bwa Lesa. (Mateo 25:31-34, 46) Kulutwe kwafwenya kala pepi, Yesu ukonauna bonse baji nobe bambuzhi. (2 Tesalonika 1:6-9) Inge mukeba kwikala umo wa ‘mikooko’ ya Yesu, mwafwainwa kumvwina ku mawi a Bufumu ne kuba mwaila byo mubena kufuunda.—Mateo 24:14.

6. Pakino kimye ntanda yaabanwa mu byalo byavula. Kyalo kyonse kiji ne kamfulumende wakyo. Ino mikoka javula ilwiisha. Bino Bufumu bwa Lesa bukaswana makamfulumende a bantu onse. Abo, ye kamfulumende ukalela panopantanda ponse. (Danyela 2:44) Kechi kukekale jibiji nkondo, bumbanzhi, ne kiwowo ne. Bantu bonse bakekala mu mutende ne mu buumo.—Mika 4:3, 4.

7. Mukachi ka Myaka Kiumbi Kimo kya Bukalama bwa Yesu, bantu balwiitabilo bakekala ke balumbuluka, ne ntanda yonse ikaluka ke paladisa. Kumpelo ya myaka kiumbi, Yesu ukekala wapwisha byonse Lesa byoamutumine kuba. Kepo akafikizha Bufumu kwiba Shanji. (1 Kolinda 15:24) Mamboka o mwabujila kubulako balunda nenu bintu bikoba Bufumu bwa Lesa?

[Kipikichala pa peja 13]

Kimye kya bukalama bwa Yesu, kechi kukekala lupato ne misalululo jibiji ne