January

Lukatazho lwataana bakalama ba mwanzo kuzhokoloka ntanda yonse ke lwa kuba’mba mu bipwilo byavula mubena kukebewa kufunjisha balongo, banyike ne bakulumpe, ba kulama jitanga. Kino kechi kyapeela ne. Mambo ka? Inge mwi bakulumpe mu kipwilo, mwayuka kuba’mba kufunjisha muntu mingilo kwanema bingi. Mwayuka ne kuba’mba balongo bavula babena kukebewa ba kukwasha bipwilo kwikala byakosa ne kukwasha kulenga bipwilo bikwabo. (Isa. 60:22) Kabiji mwayuka’mba Mambo a Lesa emukambizha ‘kufunjisha bakwenu.’ Nangwa byonkabyo, kyakonsha kwimukatazha kuba bino. Inge muji na kisemi, mwingila nkito ya ku mubiji, ya mu kipwilo ne mingilotu ikwabo yo mwafwainwa kwingilapo bukiji, kyakonsha kumweka nobe kechi muji na kimye kya kufunjisha bakwenu mu kipwilo ne. Nangwa byonkabyo, babena kukebewa kwibafunjisha pa kuba’mba bengileko mingilo ya mu kipwilo. Umvwe bebafunjisha mingilo, bonse bakamwenamo. w15 4/15 1:2, 3

Mulongo ye batongola katataka kechi wafwainwa kulanguluka’mba ponkapotu wafwainwa kupimpula jishinda ja kubilamo bintu ne. Bintu kechi bipimpulwa na mambo a kuba’mba muntu ukeba’mba bipimpulwe ne, bino bipimpulwa kwesakana na bibena kukebewa mu kipwilo ne na lutangijilo lwa jibumba ja Yehoba. Onkao mambo, inge bemutongola, mwafwainwa kutundaika bakwenu ne kumwesha kuba’mba mwanemeka bakulumpe mu kipwilo baingila pa myaka yavula kupichila mu kulondela mashinda a mu Baibolo o bobilamo bintu. Bino mu kuya kwa kimye, mukayukilangako mingilo kabiji mukengijilanga pamo na bakwenu mu kulondela lupimpu lukakwashanga kipwilo kwendela pamo na jibumba ja Yehoba. Kabiji mu kuya kwa kimye Yehoba ukemukwasha anweba babena kufunda mingilo kuba bintu byavula kukila ne bafunjishi benu.—Yoa. 14:12. w15 4/15 2:17

Kimye kyo muji mu makatazho akatampe, mwakonsha kumvwa nobe muji kwipi na “kanwa ka bokwe,” byonka byaumvwine Paulo. (2 Timo. 4:17) Kyanema bingi kuketekela mwi Yehoba, mambo kikatazha bingi kumuketekela mu bimye bya uno mutundu. Fwanyikizhai kuba’mba mubena kulama mulongo wenu wakolwa kikola kikatampe. Kampe mwalombapo pa luno lukatazho kuba’mba Lesa emupe maana ne bulume. Na mambo a kuba mwalombapo, nanchi kechi mwakasuluka pa kuyuka kuba’mba meso a Yehoba aji pe anweba kabiji amba ukemukwasha kuchinchika nyi? Bimye bimo bintu byakonsha kukatazha. Badokotala bakonsha kwimubuula bintu byapusana pusana. Nangwa kampe balongo benu bo mwaketekejile’mba bakemukwasha bakonsha kumweka nobe babena kulengelatu lukatazho kubayilako. Twajijilai kuketekela mwi Yehoba kuba’mba emukoseshe. Kabiji twajijilai kufwenya kwipi ne aye. (1 Sam. 30:3, 6) Makatazho enu byo akapwa, bulunda bwenu ne aye bukakosa bingi. w15 4/15 4:10, 11

Atweba bakalume ba Yehoba, kechi tuji pa boba bantu bo batwala mungi, balanguluka’mba Satana ufwako ne. Twayuka kuba’mba Satana koaji, mambo wisambile ne Evwa kupichila mu muloolo. (Nte. 3:1-5) Satana wazhinaukile Yehoba pa mambo a Yoba. (Yoba 1:9-12) Satana ye waesekele Yesu. (Mat. 4:1-10) Bufumu bwa Lesa byo bwatendekele kulama mu 1914, Satana ye watendekele “kuya na kulwa” na bashingwa bashalapo. (Lum. 12:17) Ino nkondo ko ikiji mambo Satana ubena kukeba konauna bukishinka bwa bashalapo ba mu ba 144,000 ne mikooko ikwabo. Pa kuba’mba tushinde ino nkondo, twafwainwa kumwimena Satana saka twakosa mu lwitabilo. Satana witota bingi. Pa kuba’mba kilengwa kya mupashi kizhinauke bumfumu bwa Yehoba ne kukeba’mba bekipopwelenga, kumwesha byo kitota ne kwilundumika. Onkao mambo, jishinda jimo jo twafwainwa kumwimena Satana ke kuleka kwitota ne kwikala bepelula.—1 Pe. 5:5. w15 5/15 2:3, 4

Byo tuji bena Kilishitu, kitutundaika bingi kulangulukanga pa luketekelo lwetu umvwe tukaya mwiulu nangwa tukekala pano pa ntanda. Nanchi mubena kufwanyikizha saka mubena kwiyowa bintu byalaya Lesa nyi? Kulanguluka pa bintu byo mukeba kuba kimye Lesa kyo akafikizha milaye yanji, kukemusangajika bingi. Fwanyikizhai mubena “kumona” saka mwaikala myaka ne myaka pano pa ntanda. Akifwanyikizhai mubena kwingijila pamo na bakwenu kwalula ino ntanda yonse kwikala ke paladisa. Kumona bakwenu batemwa Yehoba byonka byo mwamutemwa. Muji na bumi bwawama, bulume ne kubula kwakamwa. Aba babena kwimutangijila kuwamisha ntanda bemulengela kumvwa bulongo mambo bemuta muchima. Kabiji mwatemwa bingi kwingijisha bintu byo mwayuka ne busendwe bwenu, mambo byonse mwibyubila kukwasha bakwenu kumwenamo bintu byawama ne kunemeka Lesa. Mubena kukwasha bantu bo basangula katataka kuba’mba bayuke Yehoba. (Yoa. 17:3; Byu. 24:15) Abino kechi bilototu ne. Kufwanyikizha kwa uno mutundu kwaimena pa bukine bwa mu Binembelo bwaamba pa bintu biji kulutwe.—Isa. 11:9; 33:24; 35:5-7; 65:22. w15 5/15 3:15

Yesu walengele binyu byawama mu jishinda ja kukumya ne kwibipana ku jibumba ja bantu. (Yoa. 2:6-11) Yesu kechi waingijishe bulume bwanji kubilamo byo akeba ne. Akilangulukai kimye Diabola kyo aesekele Yesu kwalula mabwe ke bashinkwa. Yesu wakaine kuba bino. (Mat. 4:2-4) Pakuba aye waingijishe bulume bwanji kukwashishamo bantu. Twakonsha kulondela byepi Yesu pa kukwasha bakwetu? Watundaikile bakalume ba Lesa ‘kupananga.’ (Luka 6:38) Nanchi kechi twakonsha kumwesha kyubilo kya bumpanyi pa kwitako bakwetu ku mazubo etu ne kujiila nabo pamo kajo ne kwikosesha mu lwitabilo nenyi? Nanchi kechi twakonsha kwikalako na kimye inge twapwisha kupwila, kya kukwasha muntu wakajilwa ne kuteleka ku mulongo saka abena kupituluka mu jashi janji nenyi? Twakonsha kukwasha byepi bakwetu kuyuka bya kusapwila? Tumwesha’mba tulondela byaubanga Yesu umvwe saka tukwasha bakwetu mu bintu bya ku mubiji ne kwibakwasha kukosesha bulunda bwabo ne Lesa kwesakana na papelela bulume bwetu. w15 6/15 1:3, 4, 6

Umvwe twatwajijila kwikala bena Kilishitu ba kishinka, tukamona kya kukumya kikatampe kikyangye kumwekapo, kya kupuluka malwa akatampe. Inge nkondo ya Amagedonyi yapwa, kukamweka bya kukumya byavula bya kukwasha bantu kwikala na bumi bwawama. (Isa. 35:5, 6; Lum. 21:4) Fwanyikizhai bantu babena kutaya malole, mikombo, tukinga twa bilema, bya kumvwinako ne bintutu bikwabo. Bantu bakapuluka Amagedonyi bakekala na mingilo yavula ya kwingila. Bakalula ntanda yetu itupa Lesa ke paladisa. (Sala. 115:16) Yesu byo abukanga bantu kala, kitutundaika atweba “jibumba jikatampe” ja mu ano moba kabiji kikosesha ne luketekelo lwetu kuba’mba ukapwisha makatazho etu onse. (Lum. 7:9) Kubuka bantu ko aubilenga kumwesha Mwana Lesa mubeji byo atemwa bantu. (Yoa. 10:11; 15:12, 13) Yesu byo atemenwe bantu kyamwesheshenga Yehoba byo ata muchima bakalume banji.—Yoa. 5:19. w15 6/15 2:16, 17

Mu 1914, kwabuukile nkondo ku byalo bya ku Europe, kabiji ino nkondo yakumbenetu ntanda yonse. Byo yapwilenga mu 1918, kwajinga nzala ne bikola byaipayile bantu bavula kukila bantu bafwile mu nkondo. Abino byonse ke lubaji lwa “kiyukilo” kyaambilepo Yesu. Kino kiyukilo kyamwesheshenga’mba Yesu waikele ke Mfumu mwiulu mu 1914. (Mat. 24:3-8; Luka 21:10, 11) Biyukilo byavula bimwesha’mba mwaka wa 1914 kyo kimye Nkambo Yesu Kilishitu kyo “bamupele munchinya.” Kabiji “aye wayilenga na kushinda kuba’mba apwishe kushinda.” (Lum. 6:2) Yesu wapangile Satana ne bandemona banji kufuma mwiulu ne kwibataya pano pa ntanda. Kufumatu kyokya kimye, bantu bashiinwa’mba byambo byanembelwe na lutangijilo lwa mupashi wazhila biji mu kinembelo kya lelo bya kine. w15 6/15 4:13

Saka pakyangye kupita myaka 100 kufuma palengejilwe kipwilo kya bwina Kilishitu, busantuki bo baambijile jimo bwatendekele kumweka. (Byu. 20:28-30; 2 Tesa. 2:3, 4) Mu kuya kwa kimye, kyakatezhe bingi kuyuka bapopweshi ba Lesa bakine. Panyuma ya kupitapo myaka yavula, Yehoba kupichila mwi Mfumu Yesu Kilishitu po po ayukanyikishe bantu bamwingijila mu nzubo ya Lesa ya ku mupashi. Byo kyafikilenga mu 1919, bonse baitabijilwe kwi Yehoba kabiji bamwingijilenga mu nzubo ya Lesa ya ku mupashi bayukanyikilwe. Bebatokesheshe pa kuba’mba mwingilo wabo etabilwe kwi Lesa. (Isa. 4:2, 3; Mala. 3:1-4) Kimwesho kyamwene mutumwa Paulo kala kyatendekele kufika pachepache. Kimwesho kyamwene Paulo bekilumbulula mu 2 Kolinda 12:2-4. Mu kino kimwesho Yehoba wamwesheshe Paulo bintu bikamweka kulutwe. w15 7/15 1:6-8

Nanchi kino kibena kulumbulula amba bashingwa ‘bakebasenda na mibiji ya bumuntu’ kuya mwiulu nyi? Bantu baji mu Kilishitendomu baitabila kuba’mba bena Kilishitu bakebasenda mwiulu na mibiji ya bumuntu. Kabiji balanguluka’mba Yesu ukeya na kulama ntanda saka bamumona. Bino Baibolo wasabapotu’mba: “Kiyukilo kya Mwana muntu” kikamweka mwiulu kabiji Yesu ukeya “mu makumbi a mwiulu.” (Mat. 24:30) Bino byambo bibena kulumbulula’mba Yesu byo akabwela kechi bakamumona na meso ne. Kunungapo, Baibolo waamba’mba “mibiji ya mashi kechi yakonsha kuswana Bufumu bwa Lesa” ne. Onkao mambo, aba bakaya mwiulu patanshi ‘bakebalula, mu kakimye kacheche, nobe mu kukopa kwa jiso, kimye kikavuma ntolompita yapelako.’ (1 Ko. 15:50-53) Kechi twingijisha byambo bya kuba’mba kusendwa na mibiji ya bumuntu ne, mambo bya bubela. Bashingwa bakiji pano pa ntanda bakebakonkanya pamo nobe mu kukopa kwa jiso. w15 7/15 2:14, 15

Kuji konse ko twikela, Nzubo ya Bufumu yo mpunzha ya mpopwelo ya kine mu kimasamasa kyetu. Kupwila pa Nzubo ya Bufumu ke bupe bwafuma kwi Yehoba kabiji kukosesha lwitabilo lwetu. Pa kuno kupwila, po po tutambula lutundaiko ne lutangijilo kufuma ku jibumba ja Lesa. Twatokwa bingi pa kwitwita kwi Yehoba ne Mwananji kwiya na kuja pa “tebulu wa Yehoba” pa mulungu pa mulungu. Onkao mambo, twafwainwa kunemeka luno lwito. (1 Ko. 10:21) Yehoba wanemeka bingi kuno kupwila ne kwitundaika, kabiji o ene mambo o atangijile mutumwa Paulo kwitutundaika kuba’mba kechi twafwainwa kuleka kupwila pamo ne. (Hebe. 10:24, 25) Nanchi kikamwesha mushingi kwi Yehoba inge ketubule kutanwa ku kupwila kwa kubula mambo nyi? Twafwainwa kumwesha’mba tumusanchila Yehoba pa luno lunengezho kupichila mu kunengezha bulongo ne kukumbulapo pa kupwila. w15 7/15 4:3, 4

Luno lujimuno lwafwainwa kwitulengela kutwajijila na kutengela, mambo byo bitubuujile Yesu. Jibumba ja Yehoba jitubuula byo twafwainwa kuba kino. Kupichila mu mabuku alumbulula Baibolo, jitutundaika kutwajijila na “kutengela ne kukebesha kwiya kwa juba ja Yehoba” ne kuketekela mu milaye ya Lesa ya ntanda ipya. (2 Pe. 3:11-13) Bena Kilishitu ba mu myaka kitota kitanshi bafwainwe kutengelanga. Bino atweba twafwainwa ne kukizhamo kutengela juba ja Yehoba. Mambo ka? Mambo kiyukilo kyaambile Yesu kibena kumwesha’mba waikele ke Mfumu wa Bufumu bwa Lesa mu 1914. Kabiji kibena kumweshe’mba tuji mu moba apelako nangwa’mba mu kimye “kya mpelo ya buno bwikalo.” Byonkatu byaawile Yesu, bintu mu ntanda bibena kuyatu na kutaminako kabiji mambo awama a Bufumu babena kwiasapwila mwaya ntanda yonse. (Mat. 24:3, 7-14) Yesu kechi waambile kimye kikapitapo pa kuba’mba mpelo ikafike ne. Onkao mambo, twafwainwa kulabanga ne kukenkenta. w15 8/15 2:4, 5

Kintu kikatampe kiketuletelanga lusekelo mu ntanda ipya ke kwikala na bulunda bwawama na Lesa. (Mat. 5:3) Kwingijila Lesa kyo kintu kikatampe kyo tukobanga, kabiji tukamwesha’mba tubena kusangalela mwi Yehoba. Inge ketutangizheko kwingijila Lesa mu bwikalo bwetu, ko kuba’mba tubena kwinengezha byo tukekalanga mu ntanda ipya. (Mat. 6:19-21) Twakonsha kwingijila byepi Yehoba na lusekelo? Jishinda jimo ke kwibikila bikonkwanyi bya kwingijila Lesa. Inge mukiji banyike, langulukainga pa kwingijila Yehoba mu bwikalo bwenu bonse. Mwakonsha kupesa pesa mu mabuku etu pa kuba’mba muyuke mbaji yapusana pusana ya mwingilo wa kimye kyonse, ne kusalapo mwingilo umo ne kwibikila kikonkwanyi kya kumwingila. Mwakonsha kwisambako na bamo baingijila Yehoba pa myaka yavula mu mwingilo wa kimye kyonse. Inge kemwingijile Yehoba mu bwikalo bwenu bonse, mukafunda bintu byanema bingi. Kino kikemukwasha kwingijila Yehoba mu ntanda ipya. w15 8/15 3:13, 14

Butemwe ke kyubilo kimo pa byubilo byavula bimwesha’mba mwina Kilishitu wakoma. (Nga. 5:23) Umwesha ne kukooka muchima, kwikanya ne kutekanya. Abino byubilo byakonsha kumukwasha kubula kuzhingila inge ubena kupita mu makatazho, ne kuchinchika ne kubula kulefulwa inge bintu byo aketekejilenga byabula kumweka. Mu lufunjisho lwanji lwa pa bunke, mwina Kilishitu wakoma ukebakeba mafunde a mu Baibolo amukwasha kuyuka byawama ne byatama. Kabiji inge walondela jiwi janji ja mu muchima jo afunjisha bulongo mwayila Baibolo, wakonsha kufuukula byawama. Mwina Kilishitu wakoma wipelula, onkao mambo, waketekela’mba lutangijilo lwa Yehoba ne mafunde anji awama kukila byo alanguluka. Usapwila mambo awama na mukoyo kabiji wingila papelela bulume bwanji kukwasha kipwilo kukwatankana. Nangwa kya kuba twaingijila Yehoba myaka yavula, atweba bonse twafwainwa kwishikisha’mba: ‘Nanchi kujipo lupimpu lo nakonsha kuba pa kuba’mba ndondelenga bulongo Yesu nyi? Nanchi kujipo mo nakonsha kuwamishako nyi?’ w15 9/15 1:6, 7

Juba jimo bufuku, baana ba bwanga bamwene Yesu saka enda pa kalunga ka mema. Petelo waichile Yesu ne kumwipuzha inge wakonsha kwenda pa mema kuya ko aji. Yesu byo amwambijile’mba iya, Petelo wafumine mu bwato ne kutendeka kuya ko ajinga. Bino Petelo byo aendelekotu pacheche, watendekele kwibila. Mambo ka? Mambo watajile ku luvula ne manyaki ne kumvwa moyo. Petelo wabijikile’mba bamukwashe, kabiji ponkapotu Yesu wamukwachile ne kumwambila byambo biji peulupo. (Mat. 14:24-32) Petelo wajinga na lwitabilo lwakosa. Mambo ka o twaambila bino? Mambo Yesu byo amwichile, Petelo wafumine mu bwato ne kwenda pa mema. Waketekejile’mba bulume bwa Lesa busakumukwasha byonka byo bwakwashishe Yesu. Po pamotu ne atweba, Yesu byo etwichile’mba tumulondelenga, twipaine kwi Yehoba ne kubatizhiwa. Mambo ka? Na mambo a lwitabilo lwetu mwi Yehoba ne Yesu ne kuketekela’mba baketukwashanga.—Yoa. 14:1; 1 Pe. 2:21. w15 9/15 3:1, 3

Nsemi wa mulume uji na butemwe uzhikijila kisemi kyanji ku bizumba. Abino byo byuba ne Shetu aye Yehoba. Langulukai pa kino: Byonkatu byo mupelawizha kuzhikijila meso enu na mambo a kuba anema kwi anweba, Yehoba naye byo byo apelawizha kuzhikijila bantu banji mambo banema kwi aye. (Zeka. 2:8) Ibyo kuba’mba bakalume ba Yehoba bamo, nabiji mwana wa bwanga aye Setepena ne bakwabotu, bebepayile na mambo a bukishinka bwabo. Kechi kimye kyonse Yehoba kyo akanya bintu bya uno mutundu kubiwa ne. Pano bino, uzhikijila jibumba ja bantu banji kupichila mu kwibajimunako pa mashinda apusana pusana engijisha Satana kwibajimbaika. (Efi. 6:10-12) Tutaana luno lujimuno mu Baibolo ne mu mabuku anengezha jibumba ja Yehoba. Kya kumwenako, witujimunako pa bubi buji mu bintu bimo bitaanwa pa intaneti, mu kutemwa mali, mu mafilimu amwesha bulalelale ne bukapondo, ne mu mabuku ne makayo atama. Kine, Yehoba witutemwa kabiji ukeba kwituzhikijila. w15 9/15 4:15, 17

Yehoba wakwasha bantu banji kulwila mambo awama ne kutambula luusa lwa kwiasapwila. (Fili. 1:7) Kya kumwenako, makafulumende amo byo akebelenga kulekesha mwingilo wetu wa kusapwila, twatwajile mambo ku kochi kuba’mba twipokolole. Twabinga mambo 268 mu bije bikatampe mwaya ntanda, kabiji pa ano mambo paji ne mambo 24 o twabingile mu kochi wa European Court of Human Rights kufuma mu mwaka wa 2000. Kyamwekatu patoka’mba kafwako nangwa umo wakonsha kukanya kuboko kwa Lesa ne. (Isa. 54:17) Kusapwila mambo awama mwaya ntanda ke kishiino kikwabo kimwesha bulume bwa Lesa. (Mat. 24:14; Byu. 1:8) Kabiji lukwatankano luji pa bantu ba Yehoba mu byalo byonse lwafwainwa kubiwatu na bukwasho bwa Yehoba. Kafwako bantu bakwabo bakwatankana bino ne! Nangwatu bantu babula kupopwela Yehoba baswa’mba: “Lesa kine muji nanji.” (1 Ko. 14:25) Tuji na bishiino byavula bimwesha’mba Lesa uji na bantu banji.—Isa. 66:14. w15 10/15 1:13, 14

Kukizhamo kwingijisha bya pano pa ntanda kwakonsha kwitubika mu kizumba. (1 Ko. 7:29-31) Bintu bimo kechi byatama ne, pano bino byakonsha kwitonawina kimye. Kya kumwenako, apo kampe kuji bintu byo twatemwa kuba, nabiji kutanga mabuku, kutamba televizhonyi, kuya na kufwakasha ku mapunzha awama, kuya na kupotapotako tubintu mu mashitolo ne kumonamo tubiñambañamba twa katataka, nangwatu bikwabo bya kisangajimbwe. Kabiji bavula batemwa kwisamba na bakwabo pa intaneti, kwitumina tubyambo twa pa foni ne pa intaneti, nangwa kuteleka ku majashi a pa mwela ne mpila. Pano bino, bamo bakonsha kunonkwa buzha ku bino bintu. (Sapwi. 3:1, 6) Inge twataya kimye kyabaya ku bintu byabula kunema, tukakankalwa kuta muchima ku kintu kyanemesha, ko kuba’mba kupopwela Yehoba. (Efi. 5:15-17) Satana wingijisha mashinda onse kuba’mba etongole na bintu bya mu ntanda yanji ne kwitulabika kuba’mba tukankalwe kwingijila Yehoba. Satana waubile bino mu myaka kitota kitanshi, kabiji mu ano moba po po akizhamo ne kukizhamo. (2 Timo. 4:10) Onkao mambo, twafwainwa kulondela lujimuno luji mu kinembelo kya lelo. w15 10/15 3:7, 8

Manowa ne mukazhanji byo bebabujile kuba’mba bakasema mwana, Manowa watemenwe bingi. Bino walangulukilepo bingi pa byakebelenga Yehoba kwi aye byo aji nsemi wa mulume. Aye ne mukazhanji bafwainwe kufunjisha byepi mwanabo kutemwa Yehoba ne kumwingijila nangwa kya kuba bantu bavula mu Isalela baubilenga byatama? Manowa wasashijile Yehoba amba atume malaika wanji ne kwamba’mba: “Mwane awa muntu wa Lesa wa kine ye mwaji kutuma muswishai abwele jibiji na kwitufunjisha byo twafwainwa kuba na uno mwana ukasemwa.” (Mito. 13:1-8) Inge mwi bansemi, mwakonsha kuyuka byaumvwine Manowa. Ne anweba muji na mwingilo wa kukwasha baana benu kuyuka Yehoba ne kumutemwa. (Maana 1:8) Pa Kupopwela kwa Kisemi, mwakonsha kwibakwasha kutwajijila kufunda pe Yehoba ne Baibolo. Nangwa byonkabyo, kechi mwafwainwa kupelelatu pa kufunda Baibolo na baana benu mulungu ne mulungu ne. (Mpitu. 6:6-9) Nanchi mwakonsha kwibafunjisha kutemwa Yehoba ne kumwingijila nyi? w15 11/15 1:1, 2

Nangwa kya kuba kechi mwakonsha kumona biji mu muchima wa muntu byonka byamonanga Yesu ne, bino milangwe yakonsha kwimukwasha. Yehoba wakonsha kwimukwasha kumonamo byubilo byawama mu mwanenu. Nangwa inge kya kuba mwanenu walubankanya, kange mwambe’mba uji na byubilo byatama nangwa’mba kechi umvwa ne. Kange mulangulukenga bya uno mutundu pe aye ne. Bino, mubuulai’mba mwayuka’mba uji na byubilo byawama kabiji mwaketekela’mba ukeba kuba byawama. Monainga byo abena kwibikako kuwamishako byubilo byanji, ne kumusanchila. Pa kuba’mba mumukwashe kuwamishako byubilo byanji, mupai ne mingilo ikwabo inge kyakonsheka. Yesu byo byo aubanga na baana banji ba bwanga. Byo papichile mwaka umo ne kichika kufuma po asambakenejile Natanela, Yesu wamupele mwingilo wanema. Watongwele Natanela kwikala mutumwa, kabiji Natanela waingijile mu bukishinka mwingilo wamupele Yesu. (Luka 6:13, 14; Byu. 1:13, 14) Onkao mambo, mu kifulo kya kulengela mwanenu kulanguluka nobe kafwapo kyawama kyo oba ne, musanchilai ne kumutundaika. Mulengelai kuyuka’mba wakonsha kwimusangajika anweba ne Yehoba, ne kuba’mba wakonsha kwingijisha bulume bwanji kwingijila Yehoba. w15 11/15 2:15, 16

Ku ntendekelo ya moba a kupelako mu 1914, kwajingatu bakalume ba Lesa bacheche. Na mambo a kutemwa bakwabo ne na bukwasho bwa mupashi wazhila wa Lesa, jino jibumba jicheche ja balongo ne banyenga bashingwa jasapwijilenga mambo awama a Bufumu nangwa kya kuba bapichilenga mu makatazho. Ki ka kyafumamo? Lelo jino, jibumba jikatampe ja bantu baji na luketekelo lwa kwikala pano pa ntanda myaka ne myaka jibena kukonkana. Bakamonyi bafika ku 8,000,000 mu bipwilo byakila pa 115,400 kuzhokoloka ntanda yonse, kabiji babena kuvujilakotu. Kya kumwenako, Bakamonyi ba katataka kukila pa 275,500 bo babatizhiwe mu mwaka wa mwingilo wa 2014. Kino kijitu nobe bantu 5,300 babatizhiwenga pa mulungu pa mulungu. Jibumba jetu jatwajijila na kukoma na mambo a kuba tuji na lwitabilo mwi Lesa kabiji twaswa amba Baibolo ke Mambo anji anembelwe na lutangijilo lwa mupashi wanji. (1 Tesa. 2:13) Nangwa kya kuba Satana witushikwa ne kwitumanyika, twatwajijila kwiyowa mapesho a Yehoba.—2 Ko. 4:4. w15 11/15 4:12, 14, 16

Bashayuka ba Baibolo batajile bulongo mu mamanyusikilipiti avula, mu bipungu bya mamanyusikilipiti, ne mu ma Baibolo atuntulwilwe kala. Panyuma ya kwiesakanya, bataaine kuba’mba mujitu byepelo bicheche byapusenamo, kabiji byapusenamotu pacheche. Pano bino, byambo biji mu Baibolo kechi byapimpulwa ne. Bino bishinka byo bataana byalengela bafunda Baibolo mu bukishinka kushiinwa’mba Baibolo ye baji nanji lelo ke Mambo a Yehoba anembelwe na lutangijilo lwanji. Nangwa kya kuba Baibolo baeseka kumonauna bimye byavula, bino bamutuntulula mu milaka kukila pa 2,800. Nangwa kya kuba ma Baibolo amo kechi apela kutanga nangwa kumvwa ne, bino onse amba pa luketekelo lwawama ne bumi bwa myaka ne myaka. w15 12/15 1:13, 14

Bintu byo twamba byakonsha kulengela bantu kumvwa bulongo nangwa kumvwa kutama. Bantu bavula mu ino ntanda ya kwa Satana bamba ‘byambo byatama’ biji nobe “miketo” nangwa “mpoko” mambo bakeba kuzhingijisha bakwabo. (Sala. 64:3) Bino bena Kilishitu kechi bamba bintu byatama kabiji byabula kufwainwa nangwatu kwibyambila mu bisela ne. Ibyo kuba’mba ñambilo ya bisela yawama kabiji yakonsha kulengela byo tubena kwamba kumvwanyika bulongo. Bino kechi twafwainwa kwamba bya mwenga ne, ko kuba’mba kwamba bintu byakonsha kulengesha bakwetu bumvu nangwatu kutukana pa kuba’mba bantu baseke. Baibolo wakambizha bena Kilishitu kubula kwamba “mwenga.” Kabiji wamba ne kuba’mba: “Kange muleke byambo byatama bilupuke mu kanwa kenu ne, poso byawama byonka bikomesha bantu bibafwainwa pa kyonkakyo kimye kuba’mba bikwashe aba babena kwibyumvwa.”—Efi. 4:29, 31. w15 12/15 3:10

Bino byambo byapelako mu nkalata yatumine jibumba jitangijila ja mu myaka kitota kitanshi ku bipwilo, bituvululako kuba’mba atweba bonse tukeba kwikala na bumi bwawama. Na mambo a kuba twi bambulwa kulumbuluka, kechi twakonsha kuchinuzhuka bikola byonse ne. Kabiji inge twakolwa, kange tuketekelenga’mba Yehoba uketubuka mu jishinda ja kukumya ne. Bino tubena kutengela kimye kya kulutwe Lesa po aketubuka ku bikola byonse. Pa Lumwekesho 22:1, 2, mutumwa Yoano waambile pa “mema a bumi” ne pa “bichi bya bumi” bikabuka bantu bonse. Abino kechi bibena kulumbulula michi ya kimuntu yo twakonsha kutoma luno nangwa mu ntanda ipya pa kuba’mba tukose ne. Pakuba, bimenako bintu byonse bikoba Yehoba ne Yesu pa kuba’mba tukekalenga myaka ne myaka.—Isa. 35:5, 6. w15 12/15 4:17, 18

Yehoba waambile’mba mu kimye kyetu, “bantu jikumi bafuma mu milaka yonse ya bisaka bya bantu bakakwata, ee kine, bakakwachisha ku munkukumba wa Muyudea ne kwamba’mba: ‘Tubena kukeba kuya nenu, mambo twaumvwa’mba Lesa uji ne anweba.’” (Zeka. 8:23) “Muyudea” wimenako aba Lesa bo ashinga na mupashi wazhila. Kabiji batelwa ne kuba’mba “bena Isalela ba Lesa.” (Nga. 6:16). Byonka byaambile ngauzhi Zekaliya, Yesu waambile’mba bantu ba Lesa bakekala bakwatankana. Watelele boba baji na luketekelo lwa kwikala mwiulu amba “kajitanga kacheche,” ne boba baji na luketekelo lwa kwikala pano pa ntanda amba “mikooko ikwabo.” Bino Yesu waambile ne kuba’mba bakekala “jitanga jimo” kabiji bakalondelanga “kafunga umo,” aye Yesu.—Luka 12:32; Yoa. 10:16. w16.01 4:1, 2

Twafwainwa kuzhikijila bulunda bwetu na Yehoba. Twikala mu ntanda ya kwa Satana kabiji twi bambulwa kulumbuluka, onkao mambo, kyapeela kutendeka kulanguluka ne kuba bintu byonka byuba bantu ba mu ino ntanda. Kiji nobe kufwenka mu mukola kuya kubena kufumina mema. Onkao mambo, twafwainwa kufwenka na bulume pa kuba’mba tufike ko tubena kuya. Mu jishinda jimotu, twafwainwa kwibikako pa kuba’mba tubule kongolwa na bintu bya mu ntanda ya kwa Satana. Inge tubena kwamba pe Yehoba ne pa Baibolo, tuta muchima pa bintu byanema kabiji byawama, kechi pa bintu byakonsha kukookesha lwitabilo lwetu ne. Kusapwila kukosesha lwitabilo lwetu mambo kwituvululamo milaye ya Lesa ne mizhilo yanji ya butemwe. Kwitukwasha ne kutwajijila kwikala na byubilo byafwainwa kwitukwasha pa kuba’mba twizhikijile kwi Satana ne ntanda yanji. (Efi. 6:14-17) Inge twapayankana mu kwingijila bakwetu mu kipwilo, tuzhikijilwa mambo kechi twikala na kimye kya kutendeka kulanguluka pa makatazho etu ne. w16.01 5:12, 13

Monai Luta byo atemenwe Yehoba. Kino kyasangajikile ne Boaza, wamutakaikile na mambo a ‘kufyama mu byapi bya Yehoba.’ (Luta 2:12) Byambo byaambile Boaza byakonsha kwituvululamo kaana ka ñonyi byo kafyama mu byapi bya inako pa kuba’mba kazhikijilwe. (Sala. 36:7; 91:1-4) Mu jishinda jimotu, Yehoba wazhikijile Luta ne kumufweta pa lwitabilo lwanji. Luta kechi wilangulwishepo pa kintu kyo afuukwile kuba ne. Lelo bantu bavula babena kufunda pe Yehoba, bino kechi bafuukulapo kufyama mwi aye ne. Bakankazhama kwipana kwi aye ne kubatizhiwa. Umvwe byo byo mumvwa, langulukai pa kimulengela kukankazhama kwipana. Muntu yense uji na lesa ye apopwela. (Yosh. 24:15) Kintu kyawama ke kufuukulapo kwingijila Lesa wa kine. Inge mwipana kwi Yehoba, mumwesha’mba mwaitabila’mba ye kya kufyamamo kyenu. Kabiji ukemukwasha kutwajijila kumwingijila nangwatu inge kemupite mu makatazho. Abino Lesa byo byo akwashishe Luta. w16.02 2:6, 7

Abishai byo akebelenga kwipaya Saulo, wakebelenga kumwesha’mba wa kishinka kwi Davida. Bino na mambo a kuba’mba Davida wayukile’mba kyatama kwipaya “mushingwa wa Yehoba,” kechi waswishishe Abishai kwipaya mfumu ne. (1 Sam. 26:9-11) Kino kitufunjisha lufunjisho lwanema lwa kuba’mba: Inge tubena kukeba kusala mutanshi ye twafwainwa kumwesha bukishinka, twafwainwa kulanguluka pa mafunde a mu Baibolo akonsha kwitukwasha kufuukula bulongo. Bino na mambo a kuba twi bambulwa kulumbuluka, milanguluko yetu yakonsha kwitutwala mungi. (Yele. 17:9) Onkao mambo, inge muntu ye twatemwa ubena kuba bintu byatama kabiji wafuma mu bukine, twafwainwa kuvuluka’mba kyanema bingi kwikala ba kishinka kwi Yehoba kukila ku muntu uji yense.—Mat. 22:37. w16.02 4:5, 6

Mambo ka o mwafwainwa kubila bino? Mwakonsha kufunjilako ku byaubile Timoti. Wayukile bulongo Binembelo mambo bainanji ne bankambo yanji ba bakazhi bamufunjishe bukine. Nangwa byonkabyo, Paulo wabuujile Timoti amba: “Utwajijile kulondela bintu byo wafunjile ne byo bakukwashishe kumvwisha kuba’mba witabile.” (2 Timo. 3:14, 15) Byambo bya kuba’mba “byo bakukwashishe kumvwisha” bilumbulula “kushiinwa ne kuketekela amba abyo bintu bya kine.” Onkao mambo, Timoti washiinwe’mba bukine butaanwa mu Binembelo. Kechi waitabijile na mambo a kuba’mba bainanji ne bankambo yanji ba bakazhi bamwambijile’mba etabile ne, bino ke na mambo a kuba’mba walangulukilepo pa byo afunjile ne kwitabila. (Loma 12:1) Kyo kimotu kutesha muchima ku lufunjisho lwa pa bunke kukemukwasha kukumbula mepuzho, kuleka kuzhinauka, ne kushiinwa pa byo mwaitabilamo.—Byu. 17:11. w16.03 2:3, 4, 7

Kimye bena Isalela kyo bayanga ku bijiilo byabo ku Yelusalema, baingijilanga pamo. Banengezhanga byonse bya pa lwendo. Kabiji baendelanga pamo ne kwikwasha mulwabo. Inge bafika pa nzubo ya Lesa, batotelanga Yehoba pamo ne kumupopwela. Ne atweba lelo jino, byo tubena kwinengezha kutwela mu ntanda ipya, twafwainwa kukwatankana ne kwingijila pamo na bakwetu. Bantu ba mu ino ntanda bepachika ne kulwila pa bintu byavula. Bino atweba tusanta mambo Yehoba witukwasha kwikala mu mutende ne kumvwisha bukine. Bantu banji mwaya ntanda babena kumupopwela mu jishinda jo akeba. Kikatakata mu ano moba a kupelako, bantu ba Yehoba bakwatankana bingi kukila ne kala. Byonkatu byaawile Isaya ne Mika, tubena kuyila pamo ku “mutumba wa Yehoba.” (Isa. 2:2-4; Mika 4:2-4) Tukekala bingi na lusekelo kulutwe na lwendo bantu bonse pano pa ntanda byo ‘bakakwatankena pamo’ na bakwabo mu kupopwela Yehoba. w16.03 3:16, 17

Bakulumpe mu kipwilo bamo kibakatazha bingi kumonapo kimye kya kufunjisha bakwabo mingilo. Kampe balanguluka’mba: ‘Mwingilo wa kufunjisha wanema, bino kuji mingilo ikwabo ya mu kipwilo ibena kukebewa kwingijilapo lonka luno. Inge naamba namba mwingilo wa kufunjisha nkamwingile kulutwe, kipwilo kisakutwajijila kwingilatu bulongo.’ Ibyo kuba’mba kuji bintu byavula bikebewa’mba mukulumpe mu kipwilo engijilepo bukiji, pano bino, kubanda kufunjisha bakwenu kwakonsha kulengela kipwilo kubwela panshi. Bakulumpe mu kipwilo bengila mingilo yavula yanema ikebewa kwingijilapo bukiji. Bino inge bakulumpe kebabule kufunjisha bukiji bakwabo, mu kuya kwa kimye, kipwilo kikashalatu kwa kubula balongo bafikilamo ba kwingila mingilo ikebewa. Onkao mambo, kechi twafwainwa kulangulukanga’mba mwingilo wa kufunjisha bakwetu tukamwingila kimye kikwabo ne. Bakulumpe mu kipwilo bamwena bintu kulutwe bamonapo kimye kya kufunjisha balongo babula kuyuka mingilo. Kuba bino kumwesha kuba’mba ke bakalama ba maana kabiji kipwilo kimwenamo bingi mu mingilo yabo.—1 Pe. 4:10. w15 4/15 1:4, 6, 7