December

Mu Baibolo, Abalahama bamutela bimye bisatu amba mulunda na Lesa. (2 Moba 20:7; Isa. 41:8; Yako. 2:23.) Ye yenkatu mu Baibolo ye batongola mu kushinkamika amba mulunda na Lesa. Nanchi kino kibena kulumbulula’mba Abalahama ye muntutu wajinga mulunda na Yehoba nyi? Ine. Baibolo umwesha’mba ne atweba bonse twakonsha kwikala balunda na Lesa. Mu Mambo a Lesa muji mashimikila avula a banabalume ne banabakazhi ba kishinka bavula baakamwanga Yehoba ne kwitabila mwi aye, kabiji baikele balunda nanji. Bonse bano baji mu ‘jibumba jikatampe ja bakamonyi’ jatongwele Paulo. Bano bantu bonse bajinga balunda na Lesa. (Hebe. 12:1) Twayai tutwajijile kulondela lwitabilo lwabo lwakosa. Tutwajijile kwikala bantu baji na lwitabilo. (Hebe. 12:1) Inge twauba bino, tukakonsha kutengela mfweto ya kwikala balunda na Yehoba myaka ne myaka! w16.02 2:1, 2, 19

Fwanyikizhai amba mukwenu wimupa motoka. Wimupa mapepala o banembesheshepo motoka ne kwimwambila’mba: “Uno motoka wenu.” Bino uno mulunda nenu wimwambila’mba: “Yami nsakulamanga makii. Kabiji yami nkendeshanga, kechi anweba ne.” Mwakonsha kwibumona byepi buno bupe? Kabiji mwakonsha kumumona byepi mukwenu wimupa motoka? Inge muntu wapana bumi bwanji kwi Yehoba, ubuula Lesa amba: “Nemupa bumi bwami. Yenu muji na luusa pe amiwa.” Yehoba uketekela uno muntu kufikizha mulaye wanji. Pano kyakonsha kwikala byepi inge uno muntu waleka kukookela Yehoba kupichila mu kwifwalama na muntu ubula kwingijila Lesa? Nangwa inge waswa kwingila nkito ikamulengelanga kubula kusapwila nangwa kupwila kimye kyonse? Ko kuba’mba uno muntu kechi ubena kulama mulaye ye alayile Yehoba ne. Ujitu pamo na yewa walama makii a motoka. Inge twapana bumi bwetu kwi Yehoba, tumubuula’mba, “Yenu muji na luusa pa bumi bwami, kechi amiwa ne.” Onkao mambo, kimye kyonse tukobanga bikeba Yehoba, kechi byo tukeba ne. Twayai tulondelenga Yesu byonka byaamba kinembelo kya lelo. w16.03 1:16, 17

Myaka pepi na 3,000 yapitapo, ngauzhi Elaija waichile Elisha saka akiji mwanyike kwikala wa mwingilo wanji. Ponkapotu, Elisha waswile kabiji wamwingijile mu bukishinka mingilo yo balengulula ku bantu. (2 Mfu. 3:11) Panyuma ya kufunda mingilo pa myaka itanu na umo, Elisha waishile kuyuka’mba mwingilo wa kwa Elaija mu Isalela wajinga pepi na kupwa. Pa kyonkakya kimye, Elaija wakambizhe Elisha ye afunjishe mingilo kuba’mba aleke kumulondela, pakuba Elisha wakebeshe bingi kwikala na mufunjishi wanji. Anweba balongo bakyanyike, mwakonsha kulondela byepi byaubile Elisha? Mwafwainwa kuswa mingilo yo bemupa, kubikapotu ne mingilo yo balengulula ku bantu. Mwafwainwa kumona bemufunjisha kuba’mba balunda nenu, kabiji mwafwainwa kwibalengela kuyuka amba mubena kusanta bingi pa byo babena kwimubila. Kyakilapo kunema, mwafwainwa kwikala bakishinka mu mingilo yonse yo bemupa. Kuba bino kwanemena ka? Mambo inge mwauba bino, popo mukamwesha kuba’mba mwi bakishinka kabiji bakulumpe mu kipwilo bakemuketekela ne kuyuka kuba’mba Yehoba ukeba kwimupa mingilo ikwabo mu kipwilo.—Sala. 101:6; 2 Timo. 2:2. w15 4/15 2:13, 14

Saulo wakebelenga Yonafwanyi kuswana pa bufumu, kechi Davida ne. (1 Sam. 20:31) Bino Yonafwanyi watemenwe Yehoba kabiji wajinga wa kishinka kwi aye. Onkao mambo, mu kifulo kya kwitemwa, Yonafwanyi waikele mulunda wa kwa Davida ne kulama mulaye ye amulayile. Na mambo a kuba twi ba kishinka kwi Lesa, tukalamanga milaye yetu. Kya kumwenako, inge twalayañana mu bya busulu, tukoba byonka byo twaumvwañana, nangwa kya kuba bintu byakatazha. Kabiji inge twaikala na makatazho mu masongola, tukamwesha’mba twatemwa Yehoba kupichila mu kwikala ba kishinka ku mwinakwetu. (Mala. 2:13-16) Onkao mambo, twayai tutwajijile kwikala ba kishinka ku balongo ne banyenga nangwatu inge bauba bya kwitulefula. Inge twauba bino, tukatokesha Yehoba ku muchima. (Maana 27:11) Twaketekela’mba uketubila byawama ne kutwajijila kwitulama. w16.02 3:16, 17

Yehoba wayuka papelela bulume bwetu. (Sala. 103:14) Onkao mambo, kechi uketekela atweba kuchinchika meseko na bulume bwetu ne, bino witukwasha mambo ye Shetu. Ibyo kuba’mba bimye bimo twakonsha kumvwa nobe bulume bwa kuchinchika bonse bwapwa. Pano bino, Yehoba witulaya kuba’mba kechi ukaleka bakalume banji kuyanda kya kuba bakankalwa kuchinchika ne. Aye ‘uketumwena jishinda ja kuchinchikilamo.’ (1 Ko. 10:13) Onkao mambo, kwa kubula nangwa kuzhinaukatu ne, twaketekela’mba Yehoba wayuka papelela bulume bwetu bwa kuchinchika. Inge milombelo yetu ya kukeba bukwasho yabula kukumbulwa bukiji, twayai tupembelele Mwine wayuka kimye kya kwitukwasha. Vulukai kuba’mba aye naye witutekenya, mambo ukeba bingi kwitukwasha. Baibolo waamba’mba: “Yehoba wimutekenya kuba’mba emubile bibusa, Kabiji ukemana kuba’mba emubile lusa. Mambo Yehoba ye Lesa uchiba mambo monka mo aolokela.” w15 4/15 4:8, 9

Kwikala na kupopwela kwa kisemi mulungu ne mulungu kwakonsha kwitukwasha. Inge bansemi ne baana ke bekaleko na kimye kya kufunda pe Yehoba, betemwa bingi. Pa bimye bya uno mutundu, bakonsha kupituluka mu byo bakamba mu mwingilo, kabiji kuba bino kukebakwasha bonse kwinengezha bulongo. Kabiji inge baumvwa mukwabo wa mu kisemi ubena kwamba pa bukine ne kumona’mba bonse batemwa Yehoba kabiji bakeba kumutokesha ku muchima, po po bakilamo kukwatankana. Ba mulume ne mukazhi bakonsha kuba byepi pa kuba’mba bengijilenga pamo? Inge kya kuba bonse batemwa Yehoba ne kumwingijila pamo, bakekala na lusekelo ne kukwatankana mu masongola abo. Kabiji bafwainwa ne kwimweshanga butemwe byonka byaubanga Abalahama ne Sala, Izaka ne Libeka, ne Elekana ne Hana. (Nte. 26:8; 1 Sam. 1:5, 8) Inge ba mulume ne mukazhi kebobe bino, bakwatankana ne kufwenya kwipi na Yehoba.—Sapwi. 4:12. w16.03 3:12, 13

Satana ubena kulwa na bashingwa bashalapo ne “mikooko ikwabo.” (Yoa. 10:16) Diabola ukeba konauna bakalume ba Yehoba bavula mu kakimyetu kacheche ko ashala nako. (Lum. 12:9, 12) Nanchi twakonsha kulwa na Satana ne kumushinda nyi? Ee! Baibolo waamba’mba: “Diabola mukanai ne aye ukemunyema.” (Yako. 4:7) Bavula bakana’mba Satana ufwako. Kwi abo Satana ne bandemona bajitu nobe bintu byo banemba mu mabuku, byo batambisha mu mafilimu ne pa makayo a pa mavidyo. Bantu ba uno mutundu balanguluka’mba kafwako bantu ba maana baswa’mba bapashi batama kobaji ne. Nanchi mulanguluka’mba kimufichisha ku muchima Satana ne bandemona banji byo bayuka’mba kechi bebanemeka mu mashimikila nenyi? Kechi byo byo kiji ne! Pano bino, Satana wakonsha kupofula michima ya bantu bazhinauka’mba koaji. (2 Ko. 4:4) Kutundaika mulanguluko wa kuba’mba mipashi ifwako ke jishinda jimo Satana jo engijisha kutwajilamo bantu mungi. w15 5/15 2:1, 2

Mosesa bamufunjishe ku bansemi banji kuyuka Yehoba, bamufunjishe’mba Yehoba walayile kufumya Bahebelu mu buzha ne kwibatwala mu Ntanda ya Mulaye. (Nte. 13:14, 15; Lupu. 2:5-10) Mosesa byo alangulukilenga pa milaye Yehoba yo alayile bena Isalela, lwitabilo lwanji ne kutemwa Lesa byakosejilengako. Byonka biji bantu bakwabo baakamwanga Lesa, ne aye wafwanyikizhenga kimye Yehoba kyo akafumyapo lufu. (Yoba 14:14, 15; Hebe. 11:17-19) O ene mambo Mosesa o atemejilwe Lesa waubijile lusa Bahebelu ne bantu bonse. Lwitabilo ne butemwe byakwashishe Mosesa mu bwikalo bwanji bonse. (Mpitu. 6:4, 5) Nangwatu kimye Felo kyo akebelenga kwipaya Mosesa, lwitabilo lwanji, kutemwa Lesa ne kufwanyikizha bintu byawama bya kulutwe kechi kwamulengejile kwakamwa ne.—Lupu. 10:28, 29. w15 5/15 3:11-13

Yesu waubile kya kukumya kitanshi pa kijiilo kya masongola kyajinga mu Ngalilea ku Kana. Kyamweka benyi baishile bavujile bingi. Nangwa byonkabyo, binyu byapwile. Pa benyi baishile pajinga ne Maliya inanja Yesu. Pa myaka yavula Maliya walangulukanga bingi pa milaye yonse ya bungauzhi yaambile pa mwananji, ye ayukile’mba bakamutela’mba “Mwana wa Mwine Wakila.” (Luka 1:30-32; 2:52) Nanchi wayukile’mba mwananji wajinga na bulume bwa kuba kintu bwabujile kusoloka nyi? Kintu kyamwekele ku Kana kimwesha’mba Maliya ne Yesu baubijile lusa ba mulume ne mukazhi besongweletu, kabiji bakebele kwibakwasha kuba’mba kibule kwibalenga bumvu. Yesu wayukile’mba wafwainwe kwibakwasha. Onkao mambo, waalwile malita 100 a mema ke “binyu byawama.” (Yoa. 2:6-11) Nanchi paji waambijile Yesu kuba kino kya kukumya nyi? Ine. Waubile kino mambo watemenwe bantu kabiji walondejile byonka biji Shanji mpanyi. w15 6/15 1:3

Yesu saka akyangye kuya mwiulu, batumwa banji bamushikishe bwipuzho buji peulu. Byakumbwile Yesu bimwesha’mba kechi bafwainwe kuyuka kimye kikatendekelamo kulama Bufumu bwa Lesa ne. Wabuujile baana banji ba bwanga kutatu muchima pa mwingilo wanema wa kusapwila ye bafwainwe kwingilanga. (Byu. 1:7, 8) Nangwa byonkabyo, Yesu wafunjishe baana banji ba bwanga kutengelanga Bufumu bwa Lesa. Onkao mambo, kufumatu mu moba a batumwa, bena Kilishitu batwajijila kulomba’mba bwiye. Kimye byo kyafikile kuba’mba Yesu atendeke kulama mwiulu, Yehoba wakwashishe bantu banji kumvwisha bintu bikamweka. Mu 1876, Charles Taze Russell wanembele kibaba kyajinga mu magazini wa Bible Examiner. Kino kibaba kyajinga na mutwe wa kuba’mba “Bimye bya Bangetila: Bikapwa Kimye Ka?,” kyatongwele 1914 kwikala yewo mwaka. Kino kibaba kyakwatankenye “bimye bitanu na bibiji” byaambiwapo mu bungauzhi bwa kwa Danyela ku “bimye byatongolwa bya bisaka” byaambilepo Yesu.—Da. 4:16; Luka 21:24. w15 6/15 4:11, 12

Kyamukolanga bingi ku muchima Yesu byo amonanga bantu na kuyanda. Yesu byo amwene byaubilenga bantu bakwabo pa lufu lwa mulunda nanji Lazalasa, “waumvwine bingi bulanda kabiji kyamukolele bingi ku muchima.” Waumvwine bulanda nangwa kya kuba wayukile’mba katatakatu asangule Lazalasa. (Yoa. 11:33-36) Yesu kechi waumvwine bumvu kujila ne. Bantu bamwenengako, bamwene Yesu byo aubijile lusa Lazalasa ne balongo banji. Yesu wamwesheshe lusa byo aingijishe bulume bwamupele Lesa kusangula mulunda nanji. (Yoa. 11:43, 44) Baibolo walumbulula Yesu amba ‘ye kipasha [kya Mulenga] wanji.’ (Hebe. 1:3) Onkao mambo, bya kukumya byaubile Yesu bimwesha’mba aye ne Shanji bakebesha bingi kufumyapo misongo ne lufu. Katatakatu Yehoba ne Yesu bakasangule bantu bavula. Yesu waambile’mba: ‘Kimye kibena kwiya aba bonse baji mu bilende kyo . . . bakafumamo.’—Yoa. 5:28, 29. w15 6/15 2:13, 14

Bapusanako na bapopweshi bamo balanguluka kuba’mba bakatumbijika Lesa inge baya mwiulu. Bakamonyi ba kwa Yehoba bonse bayuka’mba bafwainwa kumutumbijika lonka luno kabiji ponka pano pa ntanda. Onkao mambo, tulondela byaubanga bakalume ba Yehoba bakishinka baambiwapo mu Sala. 99:1-3, 5. Byonka byaamba uno salamo, Mosesa, Alona ne Samwela batundaikile bingi mpopwelo ya kine. (Sala. 99:6, 7) Saka bakyangye kuya mwiulu na kwingila mwingilo wa buñanga pamo ne Yesu, bashingwa bashalapo bengila mu kipango kya pano pa ntanda kya nzubo ya Lesa ya ku mupashi mu bukishinka. “Mikooko ikwabo” nayo ibatundaika mu bukishinka. (Yoa. 10:16) Nangwa kya kuba baji na luketekelo lwapusana, bonse bakwatankena pamo mu kupopwela Yehoba pano pa ntanda, ko kuba’mba pa jitebe po anyanta maulu Lesa. Pano bino, atweba bonse pa muntu pa muntu twafwainwa kwiipuzha amba, ‘Nanchi ntundaika lunengezho lwa Yehoba lwa mpopwelo ya kine nyi?’ w15 7/15 1:4, 5

Kufumatu ne kala, bapopweshi ba Yehoba batengela kufika kwa bungauzhi. Isaya naye waawile’mba Yehoba ukabwezha Bayudea mu Yuda. Waambile’mba: “Bo bene ba lusekelo aba bonse babena kumupembelela.” (Isa. 30:18) Mika naye waketekejile kuba’mba milaye ya Yehoba ikafika. Waambile’mba: “Amiwa nkatalanga kwi Yehoba.” (Mika 7:7) Pa myaka yavula, bakalume ba Lesa nabo bapembelejilenga kufika kwa bungauzhi bwaambile pe Mesiasa, nangwa’mba Kilishitu. (Luka 3:15; 1 Pe. 1:10-12) Ne lelo jino, tubena kupembelela kufika kwa bungauzhi bwaamba pa Bufumu bwa Yehoba. Yesu ye Mfumu wa buno Bufumu, kabiji katatakatu apokolole bakalume ba Lesa ku ino ntanda ibi. Ukonauna bangubabibi bonse ne kupwisha buyanji. (1 Yoa. 5:19) Onkao mambo, twafwainwa kutwajijila kutengela juba ja Yehoba mambo jakonsha kufika kimye kiji kyonse. Kabiji twafwainwa kwibikako kwinengezhezha jimo. w15 8/15 2:1, 2

Yehoba waambijile bena Isalela kushimika tente wa lusambakeno. (Lupu. 25:8) Mu kuya kwa moba, bashimikile nzubo ya Lesa ya kupopwelamo Yehoba. (1 Mfu. 8:27, 29) Byo bafumine mu buzha mu Babilona, Bayudea bapwilanga kimye kyonse mu mashinagoga. (Mako 6:2; Yoa. 18:20; Byu. 15:21) Kabiji bena Kilishitu batanshi bapwilanga pamo mu mazubo a balongo ne banyenga. (Byu. 12:12; 1 Ko. 16:19) Lelo jino, bantu ba Yehoba bapwila pamo na kufunda Baibolo ne kupopwela Lesa mu Mazubo a Bufumu avula mwaya ntanda. Yesu watemenwe bingi ne kunemeka nzubo ya Yehoba yajinga mu Yelusalema kya kuba baana banji ba bwanga bavulukile byambo bya bungauzhi biji mu kinembelo kya lelo.” (Sala. 69:9) Kafwako Nzubo ya Bufumu lelo jino yakonsha kufikilamo kutelwa’mba yo “nzubo ya Yehoba” byonka byajinga nzubo ya Lesa mu Yelusalema ne. (2 Moba. 5:13; 33:4) Nangwa byonkabyo, twafwainwa kunemeka mapunzha etu a kupopwelamo Lesa. w15 7/15 4:1, 2

Nanchi tukekala na butemwe ne kulekelako bakwetu mambo mu kimye kya Bukalama bwa Kilishitu bwa Myaka Kiumbi nyi? Inge twafunda kulekelako bakwetu mambo ne kwikala na bulunda bwawama na bakwetu pa kino kimye, kiketupelela kuba byonkabyo mu ntanda ipya. (Kolo. 3:12, 13) Mu ntanda ipya kechi baketupangatu bintu byonse byo tukakebanga ponka po twibikebela ne. Kimo kimye tukakebewanga kupembelela. Kabiji tukakebewanga kwikala na muchima wa kusanta ne kutondwa na bintu byo tukekala nabyo, ne kumwena lusekelo mu kukookela bukalama bwa Yehoba. Tukakebewanga kwikala na byubilo bibena kwitufunjisha Yehoba luno. Inge twafunda kwikala byonka byo tukekalanga mu ntanda ipya, ko kuba’mba tubena kufunda byubilo byo tukekala nabyo myaka ne myaka. Tubena kukosesha lwitabilo lwetu mu “ntanda ikeya.” (Hebe. 2:5; 11:1) Kabiji tumwesha ne kuba’mba tubena kukebesha bwikalo bwawama bukekala mu ntanda ipya. Kwa kubula nangwa kuzhinaukatu ne, tubena kwinengezha byo tukekala myaka ne myaka mu ntanda ipya ya Lesa. w15 8/15 3:11, 12

Inge mwatajisha bipangwa byapya pa kisankanyi, mukamona’mba kechi byaesakana kubaya ne. Nangwa byonkabyo, byonse bikala na bintu bimo bilengela’mba muyuke amba byapya. Byo biji ne bena Kilishitu bakoma. Kechi baesakana ne. Bafuma mu byalo byapusana pusana ne nkomeno yapusana pusana. Bapusana myaka ya kusemwa ne bintu byo batemwa ne byo babula kutemwa. Pano bino, bena Kilishitu bonse bakoma baji na byubilo bipasha bibayukisha’mba bakoma. Ñanyi byubilo bimo byonkabye? Mwina Kilishitu wakoma uba byaubanga Yesu ne kulondela “bulongo mu ngayo yanji.” (1 Pe 2:21) Yesu waambile’mba kyanema bingi muntu kutemwa Yehoba na muchima wanji yense, mweo wanji yense ne na maana anji onse ne kutemwa mukwabo byonka byo etemwa aye mwine. (Mat. 22:37-39) Mwina Kilishitu wakoma wesekesha bingi kumvwina luno lujimuno. Bwikalo bwanji bumwesha’mba bulunda bwanji ne Yehoba ne kutemwa bakwabo kyo kintu kyanema kwi aye. w15 9/15 1:3-5

Jiwi ja mu muchima jo bafunjisha bulongo kechi jitujimunakotu pa bintu byatama ne, bino jitutundaika ne kuba byawama. Bintu bimo byawama ke kusapwila ku nzubo ku nzubo ne busapwishi bwa kushukilwa. Abino byo byaubanga Paulo. Wanembele’mba: “Kyamfwainwa’mba ñingile uno mwingilo. Kine, malwa o ami umvwe nabula kusapwila mambo awama!” (1 Ko. 9:16) Inge saka tulondela Paulo, tukekala na jiwi ja mu muchima jawama pa kuyuka’mba tubena kuba byawama. Kabiji inge ke tusapwile mambo awama ku bakwetu, tufunjisha jiwi jabo ja mu muchima. Kyo tukeba ke kwikela mwayila mafunde ne mizhilo ya Yehoba. Kabiji jiwi jetu ja mu muchima jakonsha kwitukwasha kuba bino. Inge saka tufunda Mambo a Lesa kimye kyonse, kulanguluka langulukapo ne kwingijisha byo tufunda, tukafunjisha jiwi jetu ja mu muchima. Buno bupe bwanema po po bukekala lutangijilo lwaketekelwa lwa kwitutangijila mu bwikalo bwetu bwa bwina Kilishitu! w15 9/15 2:16, 18

Mu Baibolo tutangamo mashimikila a bakalume ba kishinka Yehoba bo afunjishe kwikala bantu bawama. Kya kumwenako, Yosefwa, Mosesa, ne Davida bapichile mu makatazho abaya bingi. Yehoba wajinga nabo kimye kyo bapichilenga mu ano makatazho. Kabiji bintu byo bafunjile kimye kyo bapichilenga mu ano makatazho bibakwashishe kimye Yehoba kyo ebapele mingilo ikatampe. Inge ketutange mu Baibolo Yehoba byo akwashishe ne kufunjisha bantu banji, tumvwa’mba Yehoba kine witutemwa bingi. Inge twakookela byo abena kwitufundako ne kulapila, aye ‘uketulekelako mambo etu onsetu.’ (Isa. 55:7) Kino kyalumbulula’mba ka? Byambo byaambile Davida pe Yehoba byo alekelako mambo, bitumwesha’mba ke Shetu wa lusa. Waambile’mba: “Aye ukulekelako mambo obe onse ne kukubuka bikola byobe byonse; upokolola bumi bobe mu kimbo, kabiji ukuvwika butemwe bwanji bubula kwaluka ne lusa lwanji nobe munchinya. Byonkatu musela byo aji kwalepa na muzhika, byo byo abika kwalepa mizhilulwila yetu.” (Sala. 103:3, 4) Yehoba witufundako ne kwitutangijila mu mashinda apusana pusana. Nanchi mupelawizha kukookela inge wimufundako nyi? Vulukainga’mba Yehoba witufundako mambo witutemwa.—Sala. 30:5. w15 9/15 4:13, 14

Mata wapayankene na kunengezhezha Yesu kajo kawama, byo amwene’mba Maliya kechi ubena kumukwashako ne, wazhingijile. Yesu wayukile’mba Mata ukeba kuba bintu byavula, onkao mambo, wamwambijile’mba: “Mata, Mata obewa wabambisha muchima ne kutabakana na bintu byavula.” Kabiji wamwambijile’mba kajo kachechetu ko kakebewenga. Kepo Yesu atakaikile Maliya na mambo a kuba wamutelekelenga. Waambile’mba: “Aye Maliya wasala kintu kyawama kabiji kechi bakamwangatakyo ne.” (Luka 10:38-42) Byo papichile kimye, kampe Maliya walubilemo kajo ko ajiile pa joja juba, pano bino kechi walubilemo bintu byo afunjile kwi Yesu ne byo amutakaikile ne. Byo papichile myaka 60, mutumwa Yoano wanembele’mba: ‘Yesu watemenwe bingi Mata ne Maliya.’ (Yoano 11:5) Bino byambo bimwesha’mba Mata waswile byo bamufunjileko kwi Yesu kabiji waingijile Yehoba mu bukishinka mu bwikalo bwanji bonse. w15 10/15 3:3, 4

Tuji na bishiino bimwesha’mba Yehoba ubena kukwasha bantu lelo jino. Javula tumvwa pa byamwekejile bantu balombele’mba Lesa ebakwashe mu bwikalo bwabo ne byo akumbwile milombelo yabo. (Sala. 53:2) Kya kumwenako, ba Allan byo basapwijilenga pa kajikuji kacheche mu kyalo kya Philippines, bataaine mwanamukazhi kabiji watendekele kujila. Ba Allan baambile’mba, “Pa jonkaja juba lukelo, walombele kwi Yehoba amba Bakamonyi bamufwakeshe.” Lesa wakumbwile lulombelo lwanji bukiji kya kuba kino kyamufikile pa muchima. Ne mwaka umo saka akyangye kupwa, wipaine kwi Yehoba. Bakalume ba Yehoba bavula bemwena byo ebakwashishe kuleka byubilo byatama byo bajinga nabyo saka bakyangye kwikala Bakamonyi, nabiji kupepa fwanka, kwingijisha bizhima nangwa kutamba bya mulekese. Bamo bamba’mba baesekele kuleka abo bene bino bakankelwe. Pano bino, byo balombele kwi Yehoba amba ebakwashe, wibapele “bulume bwakila bwa bantu,” kabiji balekele byubilo byabo byatama.—Sala. 37:23, 24. w15 10/15 1:10, 11

Bamo babuuka kumakya na kutanga, kulanguluka langulukapo, ne kulomba. Bakwabo boba bino pa kimye kya pachaile. Kampepo anweba kimye kimuwamina kutanga Baibolo ke mabanga nangwa saka mukyangye kulaala. Bamo batemwa kutanga Baibolo lukelo ne mabanga saka bakyangye kulaala. (Yosh. 1:8) Kyanema ke ‘kwingijisha kimye kyenu bulongo,’ ko kuba’mba, kubula konauna kimye ku bintu byabula kunema ne kwikingijisha mu kulanguluka languluka pa Mambo a Lesa pa juba pa juba. Baibolo walaya’mba Yehoba ukapesha bonse balanguluka languluka pa Mambo anji ne kwingila papelela bulume bwabo kulondela byo bafunda. (Sala. 1:1-3) Yesu waambile’mba: “Batokwa ke boba bomvwa mambo a Lesa ne kwialama!” (Luka 11:28) Bino kyanema pa byonse ke kya kuba’mba, kulanguluka languluka pa Mambo a Yehoba moba onse kuketukwasha kubila bintu mu jishinda jileta munema kwi aye. Inge twauba bino, Yehoba uketulengela kwikala na lusekelo luno, ne kwitupa bumi bwa myaka ne myaka mu ntanda yanji ipya.—Yako. 1:25; Lum. 1:3. w15 10/15 4:17, 18

Mutumwa Petelo waambijile Yesu kubula kwakamwa. Yesu wayukile amba Petelo wamutemenwe, bino wayukile ne kuba’mba byalangulukilenga Petelo kechi byawamine ne. Yesu wakwashishe byepi Petelo ne baana ba bwanga bakwabo? Patanshi, wakwashishe Petelo. Kepo Yesu alumbulwile bikamwekela boba bachinuzhuka kuba kyaswa muchima wa Yehoba inge bintu byakatazha. Yesu waambile ne kuba’mba Yehoba ukapesha bonse bepana. (Mat. 16:21-27) Petelo wafunjile kino kishinka. (1 Pe. 2:20, 21) Lombai kwi Yehoba amba emupe milangwe pa kuba’mba muyuke bukwasho bubena kukeba mwanenu. (Sala. 32:8) Kampe mwamona’mba kechi wasangalala byonka byo asangalala jonse ne, nangwa ubena kwamba byatama pa balongo. Apo kampe mubena kulanguluka’mba paji bimo byo abena kubula kwimubuula. Kechi mufikenetu kulanguluka’mba mwanenu paji byatama byo abena kuba mu bufyamfya ne. Bino kange mulubekotu ku luno lukatazho nangwa kulanguluka’mba lukepwilatu lwine ne. w15 11/15 2:12, 13

Butemwe bwa kine ne kukwatankana kwa bakalume ba Yehoba bibayukisha’mba bo baji na bupopweshi bwa kine. Yesu waambile’mba: “Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.” (Yoa. 13:34, 35) Kabiji mutumwa Yoano wanembele’mba: “Baana ba Lesa ne baana ba Diabola bayukanyikilwa mu kino: Yense ubula kuba byaoloka kechi ye wa kwa Lesa ne, kyo kimotu ne yewa wabula kutemwa mulongo wanji. Mambo ano o mambo o mwaumvwine ku ntendekelo, amba twafwainwa kwitemwa atwe bene na bene.” (1 Yoa. 3:10, 11) Butemwe ne lukwatankano byo biyukisha Bakamonyi ba kwa Yehoba amba baana ba bwanga ba kwa Kilishitu ba kine, Lesa bo abena kwingijisha kusapwila mambo awama a Bufumu ntanda yonse.—Mat. 24:14. w15 11/15 4:10, 11

Twafwainwa kulanguluka pa bisho bya bantu baji mu nyaunda yetu ne byo baitabilamo pa kuba’mba tuyuke kimye kyafwainwa kya kwisamba nabo. Kuji bintu bikwabo byavula mo twafwainwa kupembelela kimye kyafwainwa kya kwamba. Kampe inge muntu witwambila byatama. Mu kifulo kya kumukumbula ponkapotu ne kwamba byabula kufwainwa, kyawama kutulumana ne kulanguluka’mba: ‘Nanchi waji kukebangatu kunzhingijisha nyi? Nanchi nafwainwa kwisamba nanji pa byo aji kwamba nyi?’ Kyakonsha kuwama kuzhindamatu. Bino inge twamona’mba twafwainwa kwisamba nanji, twafwainwa kupembelela bukaji bwatontoloka. (Maana 15:28) Nangwa kampe tubena kukeba kutundaika ba mu kisemi kyetu babula Bakamonyi kuyuka Yehoba. Twafwainwa kutekanya, kulangulukapo bulongo pa byo tukeba kwamba ne kutaana kimye kyafwainwa kyo bakonsha kuteleka. w15 12/15 3:6, 8, 9

Twafwainwa “kulanguluka bulongo,” nangwa kwingijisha milangwe. Kino kyanema bingi, kikatakata inge jishinda jo babena kwitupiminamo nangwa kwitubukilamo jamweka kukobankana. Nanchi muntu ubena kwitwingijilapo wakonsha kulumbulula bulongo jino jishinda ja kupiminamo nangwa ja kubukilwamo byo jingila nyi? Nanchi byo alumbulula kechi bibena kumvwanyika bulongo nenyi? Nanchi badokotala bavula baswa kuba’mba jino jishinda ja kupiminamo nangwa ja kubukilwamo jakonsha kubuka muntu nyi? (Maana 22:29) Kimo kimye muntu wakonsha kwimubuula’mba jino jishinda ja kubukilwamo ja katataka kabiji badokotala bavula bakyangye kwijiyuka ne. Bino nanchi kuji bishiino bibena kumwesha’mba jino jishinda ja kubukilwamo ko jiji nyi? Bamo bakonsha ne kwitwambila’mba jino jishinda ja kubukilwamo jingila na bulume bumo bubula kumweka. Mu kuba bino mwakonsha kufuma byatama. Vulukai’mba Lesa witukanya kwingijisha bulume bwa mipashi nangwa bwa bingelekezha.—Isa. 1:13; Mpitu. 18:10-12. w15 12/15 4:16

Mu Baibolo mwanembwa bantu bavula bajinga ba kishinka batambwijile mupashi wazhila wa Yehoba bino babujile kuya mwiulu. Umo pa bano ke Yoano Mubatizhi. Yesu waambile’mba kafwako nangwa umo wakila Yoano, bino waambile’mba Yoano kechi ukalama nobe mfumu mwiulu ne. Davida naye bamutangijilanga ku mupashi wazhila. (1 Sam. 16:13) Mupashi wazhila wamukwashishe kumvwisha byazhika byaamba pe Yehoba ne kumutangijila kunembako mbaji imo ya mu Baibolo. (Mako 12:36) Nangwa byonkabyo, mutumwa Petelo waambile’mba Davida “kechi wayile mwiulu ne.” (Byu. 2:34) Yehoba waingijishe mupashi wanji wazhila kwibapa ngovu ya kuba bintu bikatampe, bino kechi waingijishe mupashi wanji kwibechilamo kuya mwiulu ne. Nanchi kino kibena kulumbulula’mba kechi bajinga na lwitabilo lwakosa lwa kuba’mba bafikilemo kuya mwiulu nenyi? Ine. Kino kibena kulumbulula’mba Yehoba ukebasangula kabiji bakekala mu Paladisa pano pa ntanda.—Yoa. 5:28, 29; Byu. 24:15. w16.01 3:16

Inge tubena kwingijila pamo na bantu bo twatemwa, tufwenya kwipi ne abo. Tutendeka kwibayuka bulongo ne kuyuka byubilo byabo. Tuyuka byo bakeba kuba mu bwikalo bwabo ne byo babena kuba pa kuba’mba bafikizhe byo bakeba. Yesu waingijile pamo ne Yehoba pa myaka ya kukankalwa kubala. Butemwe pakachi kabo bwakosele bingi kya kuba kafwako kintu kyakonsheshe konauna bulunda bwabo ne. Bakwatankene bingi, kabiji baumvwañananga bingi pa kwingila mingilo yabo. Yesu walombele Yehoba amba azhikijile baana banji ba bwanga. Mambo ka? Walombele’mba: “Kuba’mba bekale umo byonka anweba ne amiwa byo tuji umo.” (Yoa. 17:11) Inge tubena kwikela mwayila mafunde a Lesa ne kwingila mwingilo wa kusapwila, tuyuka bulongo byubilo byanji byawama. Tufunda buwame buji mu kuketekela mwi aye ne kulondela lutangijilo lwanji. Kabiji inge twafwenya kwipi ne Lesa, ne aye ufwenya kwipi ne atweba. (Yako. 4:8) Kabiji tufwenya kwipi na balongo betu ne banyenga mambo tupita mu makatazho epasha na o bapitamo ne kumwena lusekelo mu bintutu bimo, kabiji bonse tuji na bikonkwanyi bimotu mu bwikalo. w16.01 5:9, 10

Naomi wakebeshe bingi kubwela kwabo ku Isalela. Nga Luta wafuukwilepo kuba ka? Kyamukatezhe bingi kufuukula bya kuba. Nanchi wafwainwe kubwela kwabo ku Moabu na kwikala na kisemi kyanji nyi, inyi kuya ne Naomi, muko wanji wa mukazhi ku Betelema? (Luta 1:1-8, 14) Kisemi kya kwa Luta kyaikalanga mu Moabu. Umvwe wabwelele kwabo, bakonsheshe kumutambwila ne kumulama bulongo. Wayukile bantu ba mu Moabu, mulaka wabo, ne bisho byabo. Naomi kechi wakonsheshe kupa Luta bino byonse inge waya nanji ku Betelema ne. Kabiji Naomi waakaminwe’mba kechi ukakonsha kukebela Luta mwanamulume wa kumusongola nangwa nzubo ne. Onkao mambo, Naomi wamwambijile kubwela ku Moabu. Byonka byo twamona kala, Olipa wabwelele “ku balongo banji ne ku balesa banji.” (Luta 1:9-15) Pano bino, Luta wakaine kubwela ku bantu banji ne balesa babo ba bubela. w16.02 2:4, 5

Saulo ne bashilikale banji 3,000 bakebelenga Davida mu kiselebwa kya mu Yuda amba bamwipaye. Bino bufuku bumo, Davida ne bantu banji bataaine palaajile Saulo ne bashilikale banji. Bonse bajinga mu tulo, onkao mambo, Davida ne Abishai bapichile pakachi ka bashilikale kwa kubula kwibomvwa ne kufika palaajile Saulo. Kepo Abishai anongotwejile Davida amba: “Nswishai, namwase jifumo jimotu jipulankane jisumpe ne mu mushiji, kabiji kechi nsakumwasa jibiji ne.” Bino Davida wamukainye kwipaya Saulo. Waambijile Abishai amba: “Kange umube kyatama ne, mambo ñanyi wakonsha kutanyika kuboko kwanji pa mushingwa wa Yehoba ne kwikala kwa kubula mambo?” Kepo Davida aambile’mba: “Kwesakana na mumwena Yehoba, kechi kyailamo kuba’mba ntanyike kuboko kwami pa mushingwa wa Yehoba ne!” (1 Sam. 26:8-12) Davida wayukile kyo afwainwe kuba pa kuba’mba ekale wa kishinka kwi Yehoba. Wayukile’mba wafwainwa kunemeka Saulo, ne kuba’mba kechi wafwainwa ne kulanguluka kumuba kyatama ne. Mambo ka? Mambo Lesa ye wasajile Saulo kwikala mfumu wa Isalela. Byonka byo kyajinga kala, ne lelo jino Yehoba ukeba bakalume banji kwikala ba kishinka ne kunemeka boba bo aswisha kwikala na luusa pe abo. w16.02 4:1, 2

Nanchi mwi mwanyike ubena kukeba kubatizhiwa nyi? Umvwe ibyo, mukeba kuba kintu kyanema kukila byonse. Inge mwabatizhiwa, mumwesha bonse amba mwipana kwi Yehoba, ko kuba’mba mwamulaya amba mukamwingijilanga myaka ne myaka ne kuba’mba kuba kyaswa muchima wanji kyo kintu kyanema mu bwikalo bwenu. Na mambo a kuba’mba uno ke mulaye wanema kwi Lesa, mwafwainwatu kubatizhiwa inge mwakoma mu maana, mwifuukwila anwe bene kubatizhiwa, kabiji mwayuka byo kilumbulula kwipana kwi Lesa. Pano bino, kampe mulanguluka’mba kechi mwinengezha kubatizhiwa ne. Nangwa kampe mulanguluka’mba mwafikilamo kubatizhiwa, bino bansemi benu babena kwamba’mba mupembeleleko pacheche, mukikomeko ne kuyuka byavula mu bwikalo. Mwafwainwa kuba byepi? Kulefulwa ne. Pakuba mwafwainwa kwingijisha kino kimye kufunjilapo byavula pa kuba’mba mukafikilemo bukiji kubatizhiwa. w16.03 2:1, 2

Pano bino, kuji balongo ne banyenga baji mu masongola na bantu babula Bakamonyi ba kwa Yehoba. Bamo bafunjile bukine saka besongola kala, bino benakwabo bakana kwikala Bakamonyi. Bakwabo kampe besongwele na kalume wa kwa Yehoba, bino pa kupitapo kimye benakwabo bafumine mu kipwilo. Inge kyaikala bino, bena Kilishitu bengila papelela bulume bwabo kukosesha masongo abo kupichila mu kulondela mafunde a mu Baibolo. Kuba bino kechi kwapela ne. Lelo jino, Satana ubena kulukuka bisemi. O ene mambo ba mulume ne mukazhi bengijila Yehoba o bafwainwa kwingijilanga pamo. Nangwa kya kuba mwabanda mu masongola, langulukaipo bintu byo mwakonsha kwamba nangwa kuba pa kuba’mba mukoseshe masongola enu. Inge mwabanda mu masongola, banyike baji mu masongola bakonsha kufunjilako kwi anweba. Kampe mwakonsha kwibetako ku kupopwela kwenu kwa kisemi. Bakafunjilako kuba’mba nangwatu inge ba mulume ne mukazhi babanda mu masongola, bafwainwa kutwajijila kwimwesha butemwe ne kukwatankana.—Titu. 2:3-7. w16.03 3:14, 15