August

Gidiona ne bashilikale banji bapangishenga bena Mijanyi ne boba bebakwashishenga bufuku bonse pa musinso walepele makilomita 32. Bashilikale bena Isalela kechi balekele kwibapangisha ne. Gidiona ne bashilikale banji batwajijile kupangisha balwanyi babo kufikatu ne byo bebashinjile. (Mito. 7:22; 8:4, 10, 28) Ne atweba tubena kulwa nkondo yakatazha. Balwanyi betu ke Satana, ntanda yanji, ne bumbulwa kulumbuluka bwetu. Atweba bamo twatendekele kala kulwa na bano balwanyi. Na bukwasho bwa Yehoba, twashinda bulwi bimye byavula. Pano bino, tukyangye kushinda nkondo yapelako. Bimye bimo twakonsha kukooka na kulwa. Nangwa twakonsha kukooka na kupembelela mpelo ya buno bwikalo bwatama. Yesu witujimwineko amba tukapitanga mu meseko akatazha ne kwitumanyika mu moba a kupelako. Pano bino waambile ne kuba’mba inge twachinchika, tukashinda.—Luka 21:19. w16.04 2:1, 2

Pa kupwila, tufunda Baibolo kabiji Yehoba witufunjisha byo twafwainwa kuba ne byo twafwainwa kwikala. (Isa. 30:20, 21) Nangwatu bantu babula kupopwela Yehoba inge baiya na kupwila, bamona amba Lesa ubena kwitutangijila. (1 Ko. 14:23-25) Yehoba utangijila kupwila kwetu na mupashi wanji wazhila, kabiji byo tufunda bifuma kwi aye. Onkao mambo, inge twaya na kupwila, tuteleka ku bibena kwamba Yehoba, kumvwa butemwe bwanji bo etutemwa, ne kufwenya kwipi ne aye. Yesu, Mutwe wa kipwilo waambile’mba: “Ponse paji babiji nangwa basatu bapwila mu jizhina jami, ne amiwa nji nabo.” (Mat. 18:20) Baibolo waamba ne kuba’mba Yesu “upitañana mukachi” ka bipwilo. (Lum. 1:20–2:1) Kyamwekatu patoka amba Yehoba ne Yesu baji ne atweba kabiji betukosesha kimye kyo tupwila. Akilangulukaipotu, nanchi Yehoba umvwa byepi inge wamona’mba mubena kwibikako bingi kufwenya kwipi ne aye ne Mwananji? w16.04 3:13, 14

Nyenga umo waimwine balongo babiji pa kijiilo. Bino mulongo umo pe abo kechi watemenwe jishinda jo bamwimwijilemo ne. Bano balongo byo bashajile kwa bunke, mulongo ye bafichishe ku muchima watendekele kwijizhañanya pa uno nyenga. Pano bino, mulongo mukwabo wamuvulwilemo amba awa nyenga waingijila Yehoba mu bukishinka pa myaka 40 nangwa kya kuba wapita mu makatazho avula. Kine uno nyenga kechi waubijilemotu kya nshiji amba afichishe mulongo ku muchima ne. Nga mulongo wijizhañenyenga waubilepo byepi? Waambile’mba, “Waamba kishinka.” Ponkapotu walubileko ku byamwekele. Tufunjilako ka ku kino kyamwekele? Inge muntu witufichisha ku muchima, twakonsha kufuukulapo atwe bene byo tusakuba. Muntu watemwa bakwabo wibalekelako mambo. (Maana 10:12; 1 Pe. 4:8) Inge ‘twalekelako bakwetu mambo,’ nangwa kulubakotu, tusangajika bingi Yehoba. (Maana 19:11) Onkao mambo, kimye muntu kyo akamba nangwa kuba kintu kikemufichisha ku muchima, mukeshikishe’mba: ‘Nanchi kechi nakonsha kulubakotu nenyi?’ w16.05 1:8, 9

Bañanyi babena kusapwila mambo awama a Bufumu lelo jino? Ke bonkatu Bakamonyi ba kwa Yehoba. Twayuka byepi bino? Mambo tubena kusapwila Mambo Awama a Bufumu, onka akambizhe Yesu. Tuya na kukebakeba bantu mu busapwishi bwetu, kimwesha’mba tubena kulondela mashinda a kusapwilamo akambizhe Yesu. Kine kintu kyawama kitulengela kusapwila ke kutemwa Yehoba ne bantu. Mwingilo wetu wa kusapwila wabaya bingi, mambo tusapwila ku bantu ba mu bisaka byonse ne milaka yonse. Kabiji tukatwajijila kusapwila mambo awama a Bufumu kufikatu ne ku mpelo. Kituletela bingi lusekelo pa kumona mwingilo ubena kwingila bantu ba Yehoba wa kusapwila mambo awama mu ano moba a kupelako. Ki ka kitukwasha kwingila uno mwingilo? Mutumwa Paulo wakumbula mu kino kinembelo kya lelo. Twalomba kuba’mba Yehoba atwajijile kwitupa bulume bwa kutwajijila kusapwila mambo awama.—2 Timo. 4:5. w16.05 2:17, 18

Yehoba witupa luusa lwa kwifuukwila. Witupa luusa lwa kusalapo kumukookela nangwa ne. Inge twasalapo kumukookela ne kwibikako kuba kyaswa muchima wanji, tumwesha’mba twamutemwa kabiji tukeba kumusangajika. Satana wamba’mba Yehoba kechi uji na luusa lwa kulama ne. Pano inge twakookela Yehoba, tumwesha’mba amba aye ye Kalama wetu. Kabiji twayuka’mba Shetu wa butemwe usanta bingi pa byo twibikako kumukookela. (Yoba 2:3-5; Maana 27:11) Inge twibikako kushinda miteeto yetu nangwa kya kuba kechi kyapela ne, tumwesha’mba twi bakishinka kwi Yehoba kabiji tumwesha’mba aye ye Kalama wetu. Yehoba witubuula’mba twafwainwa kwibikako kwikala na byubilo byo ajipo nabyo. (2 Pe. 1:5-7; Kolo. 3:12) Kabiji ukeba’mba twibikengako kushinda milanguluko yabula kufwainwa. (Loma 8:5) Inge twibikishako kushinda muteeto watama, tumvwa bingi bulongo. w16.05 4:12, 13

Byonkatu mbumbi byo ayuka biji buchimba bo abena kubumba, ne Mbumbi wetu aye Yehoba wituyuka bulongo. Wayuka kubula kukosa kwetu, bintu byo tukankalwa kuba, ne bintu byo twauba kabiji witubumba kwesakana na byo tuji. (Sala. 103:10-14) Twakonsha kuyuka Yehoba byo etumona inge twalanguluka Yesu byo aubanga na batumwa banji. Bimye bimo, batumwa bepachikilenga pa wajinga mukulumpe pe abo. Umvwe mwajingako, inge mwamwenenga byepi byubilo bya batumwa? Kampe inge mwalangulukilenga’mba kechi baji nobe buchimba bwanekena ne. Bino Yesu wayukile’mba Lesa wakonsha kwibabumba inge bateleka ku lujimuno lwanji ne kulondela kyubilo kyanji kya kwipelula. (Mako 9:33-37; 10:37, 41-45; Luka 22:24-27) Yesu byo asangwilwe, batumwa batambwile mupashi wa Lesa kabiji kechi batele muchima pa wajinga mukulumpe pe abo ne. Bino bateletu muchima pa mwingilo wibapeele Yesu.—Byu. 5:42. w16.06 1:10

Yehoba ye Lesa yenka wa kine, kechi kujipo lesa mukwabo waesakana nanji ne. (2 Sam. 7:22) Onkao mambo, byambo byaambile Mosesa byavulwilengamo bena Isalela amba bafwainwa kupopwelatu Yehoba bunke bwanji. Kechi bafwainwe kuba byaubanga bantu bebazhokolokele bapopwelanga balesa ba bubela ne balesa babakazhi ne. Bano bantu baitabijile’mba balesa babo bakonsha kutangijila bilengwa. Bena Ijipita bapopwelanga lesa wa juba aye Ra, lesa wamukazhi wa lwelele aye Nut, lesa wa ntanda Geb, lesa wa Nile aye Hapi ne banyama. Yehoba wamwesheshe’mba wakila bano balesa ba bubela byo aletele Binkunka Jikumi. Bena Kenana bapopwelanga Baela, lesa wa bubela ye baketekejile’mba ye walengele bumi. Kabiji bamumonanga’mba ye lesa wa lwelele, wa mvula ne kinkunkwila. Bantu bavula baketekejile mwi Baela amba wibazhikijila. (Bala. 25:3) Bena Isalela bafwainwe kuvulukanga’mba Lesa wabo, “Lesa wa kine” wapusanako, ke “Yehoba umotu.”—Mpitu. 4:35, 39. w16.06 3:4, 5

Byaubile Yesu bitufunjisha’mba twafwainwa kwikala ba kishinka kwi Yehoba ne ku bantu banji. Tuji na bishinka byavula bitulengela kuba bino. Tubena kwimwena Yehoba byo abena kutangijila bantu banji mu ano moba a kupelako. Ubena kwibakwasha kusapwila mambo awama mu ntanda yonse, kabiji bo bonka babena kwingila uno mwingilo. Bakwatankana kabiji baji na lusekelo na mambo a bintu byonse bibena kwibafunjisha Yehoba. Yehoba walumbulwile kino pa Isaya 65:14 amba: “Umvwai! Bakalume bami bakabijikanga na lusekelo na mambo a kusangalala.” Tuji bingi na lusekelo mambo Yehoba ubena kwitutangijila ne kwitukwasha kuba bintu byawama byavula bingi. Twapusanako na bantu ba mu ino ntanda ya kwa Satana babula lusekelo ne luketekelo lwa bintu byawama biji kulutwe. Twafwainwa kutwajijila kwikala ba kishinka kwi Yehoba ne kulondela lutangijilo lwanji. w16.06 4:10-12

Twakonsha kufunjilako ku bakasopa basopanga mizhi mu kimye kya kala. Mizhi yavula ya kala nabiji Yelusalema bazhokolwesheko masakwa alepa pa kuba’mba balwanyi babulenga kutwela mukachi. Bakasopa baimananga pa ano masakwa ne kukenketa monse mwapela muzhi. Bakasopa bakwabo baimananga pa bibelo bya muzhi. Bano bakasopa basopanga muzhi mute ne bufuku, kabiji inge bamona balwanyi na kwiya bajimunangako bantu mu muzhi. (Isa. 62:6) Bayukile buneme bwa kulaba ne kukenketa na kusopa byamwekelenga. Bakonsheshe kwipaisha bantu inge kechi balabilenga ne. (Ezi. 33:6) Josephus wanembele pa bwikalo bwa Bayudea walumbulwile bena Loma byo batwelele mu Yelusalema mu mwaka wa 70 C.E. Bakasopa basopelenga lubaji lumo lwa muzhi balaajile. Kino kyalengejile bashilikale bena Loma kutwela mu muzhi. Bayile ku nzubo ya Lesa ne kwiisoka na mujilo, kabiji baonawine Yelusalema yense. Luno lo lwajinga lubaji lwapeleleko lwa malwa akatampe apichilemo kisaka kya Bayudea. w16.07 2:2, 7, 8

Tubilwa bibusa byavula na mambo a lusa lukatampe lwa Yehoba. Nangwa byonkabyo, kechi twafwainwa kwingijishanga lusa lukatampe lwa Lesa kubilamo bubi ne. Pa bena Kilishitu batanshi, pajinga bamo ‘baalwile lusa lukatampe lwa Lesa ke mwa kubila byubilo bya kwizozola.’ (Yuda 4) Bano bena Kilishitu babujile bukishinka kyamweka balangulukilenga’mba bafwainwa kulengatu mambo kabiji Yehoba ukebalekelangakotu mambo. Kabiji baongwelenga bakwabo nabo kuba’mba bobenga byo baubilenga. Ne lelo jino, bantu boba bino babena “kuba mwenga mupashi wa lusa lukatampe.” (Hebe. 10:29) Satana ulengela bena Kilishitu bamo kulanguluka’mba bakonsha kulenga mambo kabiji amba Yehoba wibalekelako mambo nangwa kya kuba kechi balapila ne. Ibyo kuba’mba Yehoba waswila jimo kulekelako bandengamambo balapila, bino ukeba’mba twibikengako kuleka miteeto yatama. w16.07 3:16, 17

Kwimuswisha ku kije kya mambo kwikana pabula mambo a bukende kechi kulumbulula’mba muntu wakasuluka kusongola nangwa kusongolwa ne. Ibyo kuba’mba muntu wakonsha kusalapo kulekelako mambo mwinakwanji wauba bukende bino walapila, byonkatu ngauzhi Hoseya byo alekejileko mambo mukazhanji wajinga pite aye Goma. Ne Yehoba naye walekejileko mambo kisaka kya bena Isalela kyalapijile panyuma ya kuba bukende bwa ku mupashi. (Ho. 3:1-5) Kikwabo, inge muntu wayuka’mba mwinakwanji wauba bukende kabiji wafuukulapo kulaala nanji, kuba bino kumwesha’mba wamulekelako mambo kabiji wafumyapo mambo a mu Binembelo a kwikainapo. Byo apwishishe kwamba byambo biji mu kinembelo kya lelo, Yesu waambile pa ‘boba baji na kya bupe’ kya kwikala kwa kubula kusongola nangwa kusongolwa. Wanungilepo’mba: “Awa wakonsha kwikala byonka bino, obe byonkabyo.” (Mat. 19:10-12) Bavula basalapo kutwajijila kwikala bunke pa kuba’mba bengijilenga Yehoba kwa kubula bya kwibatabankanya. Twafwainwa kwibasanchilanga pa kuba bino. w16.08 1:15, 16

Banyike baji na bulume bwa kwingila bintu byavula bingi mu mwingilo wa Yehoba. (Maana 20:29) Balongo bakitwala baji pa Betele bengilako mwingilo wa kupulinta ne kubika nkupiko ku Mabaibolo ne mabuku alumbulula Baibolo. Balongo ne banyenga bavula bakitwala bengila mwingilo wa kushimika ne kuwamisha Mazubo a Bufumu. Inge kwamweka bya malwa bisolomokatu, banyike bengijila pamo na Bakamonyi bayukisha mingilo pa kupana bukwasho bukebewa ku baponenwa na bya malwa. Bapainiya banyike bakwashako kutwala mambo awama mu manyaunda muji bantu bamba milaka ya ku byalo bingi. Nyimbi wa masalamo waimbile’mba: “Aba bamwakamwa kafwako kintu nangwa kimo kyo bakajilwa ne.” (Sala. 34:10) Kya kine, Yehoba kechi ulekelela boba bamwingijila na mukoyo ne. Ne atweba ‘tumutompa Yehoba ne kumona byo awama’ byo twibikako kwingila mwingilo ye etupa. Kabiji umvwe ke tupopwele Lesa na muchima yense, tukekala na lusekelo lukatampe. w16.08 3:5, 8

Yehoba wipana kwitukosesha kwingijisha mupashi wanji wazhila. (1 Moba 29:12) Kyanema kwikala na uno mupashi pa kuba’mba tushinde meseko a kwa Satana ne ntanda yanji yatama. (Sala. 18:39; 1 Ko. 10:13) Tusanta bingi pa kwikala na Mambo a Lesa anembelwe na lutangijilo lwa mupashi wazhila. Kabiji langulukai ne pa mabuku alumbulula Baibolo o tutambula pa ñondo pa ñondo. Byambo biji mu Zekaliya 8:9, 13 bebyambile kimye kyo bashimukulwilenga Yelusalema, kabiji bitukwasha ne lelo jino. Kabiji bitufunjisha Lesa pa kupwila, pa kubuñana, pa kushonkena ne mu masukulu a mwingilo wa Lesa bitukosesha bingi. Byo tufunda bitutundaika kwibikila bikonkwanyi bya kwingijila Lesa ne kwingila mingilo ya Lesa. (Sala. 119:32) Nanchi mukebesha kutanwa ku ano masukulu akonsha kwimukosesha nyi? w16.09 1:10, 11

Mizhilo Lesa yo apeele bena Isalela yamwesheshenga Yehoba byo ashikwa bivwalo bibula kumwesha lupusano luji pakachi ka banabalume ne banabakazhi. (Mpitu. 22:5) Byaambile Lesa pa mvwajilo bimwesha’mba kimufichisha bingi ku muchima umvwe banabalume ke bavwale nobe banabakazhi ne banabakazhi nabo inge ke bavwale nobe banabalume, nangwa kuvwala bivwalo bibula kumwesha lupusano luji pakachi ka mwanamulume ne mwanamukazhi. Mu Mambo a Lesa muji mafunde akwasha bena Kilishitu kusala bulongo bya kuvwala. Konse ko twikala, bisho byetu nangwa kwatwa kyuya nangwa kuji mashika twafwainwa kuvwala bulongo. Kechi tukebewa mutanchi umwesha bivwalo byawama ne byatama ne. Bino, mafunde a mu Binembelo o afwainwa kwitukwasha. w16.09 3:3, 4

Langulukai pa kuchinchika ne bukishinka bwa banabalume banembele Baibolo. Banembi bavula ba kala banembangatu byawama pa bantangi babo ne pa bufumu bwabo. Bino bangauzhi ba Yehoba kimye kyonse baambanga bya kine. Baambanga ne pa byatamishanga bantu babo, nangwatu bamfumu babo. (2 Moba 16:9, 10; 24:18-22) Banembele ne byo batamishanga ne bya bakalume ba Lesa bakwabo. (2 Sam. 12:1-14) Na mambo a kuba mu Baibolo muji mafunde etutangijila, bantu bavula bashiinwa’mba wanembelwe na lutangijilo lwa Lesa. (Sala. 19:7-11) Mafunde a mu Baibolo etuzhikijila ku bupopweshi bwa bubela ne ku bingelekezha byabika bantu mu buzha. (Sala. 115:3-8) Mafunjisho nabiji a kuba’mba bintu byaishilekotu bine alengela bantu kupopwela bilengwa kukila kupopwela Yehoba. Bantu baitabila’mba kafwako Lesa baketekela’mba bantu bakawamisha bintu kulutwe. Pano bino, bakankalwa kupwisha makatazho aji mu ntanda.—Sala. 146:3, 4. w16.09 4:10, 11

Boaza byo atendekele kwisamba ne Luta wamwesheshe’mba wamutele bingi muchima ne lukatazho lo ajinga nalo na mambo a kwikala mwenyi. Kitanshi, Boaza wamwichile kwikala kwipi na bansongwakazhi banji ba mingilo kuchina’mba bansongwalume baingijilenga mu bujimi bakamuvulañanya. Kabiji wamubuujile’mba inge wafwa kilaka ne nzala wafwainwa kuja ne kutoma mema byonka byaubilenga ba mingilo bakwabo. Kabiji Boaza kechi waambilepo byatama ku uno mwanamukazhi mwenyi ne, bino wamutekeneshe. (Luta 2:8-10, 13, 14) Boaza kechi waubijile Luta byawama na mambo a kutemwa bako banji ba Naomi konka ne, bino ne na mambo a kwikala mupopweshi wa Yehoba. Kifyele kya kwa Boaza kyamwesheshenga butemwe bwa Yehoba bubula kwaluka bo atemenwe uno mwanamukazhi waishile ‘na kufyama mu byapi bya Lesa wa Isalela.’ (Luta 2:12, 20; Maana 19:17) Ne atweba lelo jino, inge twakwasha “bantu bonse” kuyuka bukine, tumwesha’mba Yehoba wibatemwa.—1 Timo. 2:3, 4. w16.10 1:10-12

Ne atweba twafwainwa kubuula Yehoba byonse biji mu muchima wetu, ne kuketekela’mba ukomvwa kabiji uketupa bulume bwa kuchinchika. Kabiji inge milombelo yetu yakumbulwa, lwitabilo lwetu lukoselako. (1 Yoa. 5:14, 15) Na mambo a kuba’mba lwitabilo ke lubaji lwa bipangwa bya mupashi, twafwainwa ‘kulombanga’ mupashi wa Lesa, byonka bitukambizhe Yesu. (Luka 11:9, 13) Nangwa byonkabyo, kechi twafwainwa kulombangatu kuba’mba Lesa etukwashe ne. Kuji ‘mingilo ya kukumya yavula ya kukankalwa kubala’ yo twafwainwa kusanchila Yehoba ne kumutota pa juba pa juba. (Sala. 40:5) Kabiji milombelo yetu yafwainwa kumwesha’mba ‘tuvuluka aba baji mu kaleya, uba nobe betukashila nabo pamo.’ Twafwainwa ne kulombelako balongo betu ba ntanda yonse, kikatakata ‘aba betutangijila.’ Tumvwa bingi bulongo umvwe twamona Yehoba byo akumbula milombelo yetu atweba bonse.—Hebe. 13:3, 7. w16.10 3:8, 9

Lelo jino, bantu ba Yehoba babena kumwesha lwitabilo mu Bufumu bwa Lesa bwaikajikwa. Kino kyalengela bantu ba Lesa kwikala mu paladisa wa ku mupashi muji bangikazhi kukila pa 8 milyonyi. Uno paladisa waiyako na mambo a bipangwa bya mupashi wa Lesa. (Nga. 5:22, 23) Kine, kino ke kiyukilo kikatampe kya lwitabilo ne butemwe bwa kine bwa bena Kilishitu. Kafwako muntu wakonsha kwamba’mba yami naletako uno paladisa ne. Lesa wetu ye waleta uno paladisa. Kino kyo kibena kulengela “Yehoba kutumbalala, kyo kiyukilo kya myaka ne myaka, kikabula kuzhimañana.” (Isa. 55:13) Paladisa wetu wa ku mupashi ukatwajijila na kukoma kufika ne kimye ntanda yonse po ikakumbana na bantu balumbuluka, baoloka, kabiji ba lusekelo bakatotanga jizhina ja Yehoba myaka ne myaka. Twayai tutwajijile kumwesha lwitabilo lwetu mu milaye ya Yehoba. w16.10 4:18, 19

Twafwainwa kukookelanga lutangijilo lwa bakulumpe mu kipwilo lwaimena pa Baibolo. Vulukai Paulo byo afunjileko bakyendeende bajinga mu kipwilo. Bantu bamo ‘bebikilenga mu mambo a bakwabo.’ Bebajimwineko ku bakulumpe mu kipwilo, bino balengulwile. Kipwilo kyafwainwe kuba byepi na muntu wajinga na bino byubilo? Paulo wakambizhe’mba: “Mumulabijile ne kuleka kupwanañana nanji.” Bafwainwe kuleka kupwanañana nanji, bino kechi kumumona nobe mulwanyi ne. (2 Tesa. 3:11-15) Lelo jino, bakulumpe mu kipwilo bakonsha kwamba jashi ja kujimunako kipwilo umvwe muntu umo watwajijilatu na kuba bintu byatama bileta mwenga pa kipwilo, nabiji kwifwalama na muntu wabula kwitabila. (1 Ko. 7:39) Nanchi mulondela lujimuno lwabo nyi? Umvwe mwayuka waubile bintu byo baambapo mu jashi, nanchi mukaleka kupwanañana nanji nyi? Umvwe mwauba bino, mwakonsha kumukwasha kuyuka’mba byubilo byanji byatama kabiji bifichisha Yehoba ku muchima kabiji wakonsha kupimpula byubilo byanji. w16.11 2:13

Pa Pentekosita 33 C.E., Bayudea bavula bingi ne bantu bakwabo baalukile ke Bayudea bashingilwe na mupashi wazhila. Bano bena Kilishitu bakatataka baikele ‘mukoka wasalwa, bañanga ba bufumu, kisaka kyazhila, bantu baikala kya bunonshi.’ (1 Pe. 2:9, 10) Batumwa saka bakyangye kufwa, bo batangijilenga bipwilo bya bantu ba Lesa. Bino batumwa byo bafwile, banabalume bamo batendekele kufunjisha “mafunjisho aluwankana kukeba kongola baana ba bwanga amba bebalondelenga.” (2 Tesa. 2:6-8) Bano banabalume bamo bo batangijilanga bipwilo, bamo bajinga bakalama, kabiji kulutwe batatwile kutelwa’mba “bishopu.” Jibumba ja bantangi ba bupopweshi jatatwile kulengwa nangwa kya kuba Yesu waambijile baana banji ba bwanga amba: “Anweba bonse mwi balongo na balongo.” (Mat. 23:8) Banabalume batangijilenga balondejilenga buntemwa maana bwa ba Aristotle ne Plato kabiji batendekele kufunjisha mafunjisho a bubela. Mu kuya kwa kimye balekele kufunjisha mafunjisho a kine aji mu Mambo a Lesa. w16.11 4:8

Saka tukyangye kwikala bena Kilishitu, twalenganga mambo bimye byavula bingi, kimo kimye kwa kubula ne kuyuka byo twafichishanga Lesa ku muchima. Twajinga nobe “bazha ba bubipisho ne bazha ba mizhilulwila.” Twakonsha ne kwamba’mba twajinga “bazha ba bundengamambo.” (Loma 6:19, 20) Bino byo twafunjile bukine bwa mu Baibolo, twapimpwile bwikalo bwetu, kwipana kwi Lesa ne kubatizhiwa. ‘Betukasulwile ku bundengamambo,’ kabiji twaikele “ke bazha ba bololoke.” (Loma 6:17, 18) Inge ketube byonse bisakasaka mubiji wetu wa bundengamambo, ko kuba’mba tubena ‘kuswisha bundengamambo kwitulama nobe mfumu.’ Na mambo a kuba twakonsha kuswisha bundengamambo kwitulama nangwa kubula kwitulama, bwipuzho ke bwa kuba’mba, Ñanyi bintu byo tulangulukapo mu muchima wetu? Kabiji twakonsha kwiipuzha’mba: ‘Nanchi nswisha mubiji nangwa milanguluko ya bundengamambo kundengela kuba bintu byatama nyi? Nangwa nanchi nafwa ku bundengamambo nyi? Inge tusanchila Lesa pa lusa lwanji lukatampe lo amwesha pa kwitulekelako mambo, tukebikangako kumutokesha ku muchima. w16.12 1:11, 12

Kintu kimo kitukwasha kwikala na uno mutende ke kwibikako kwikala mu mutende na ba mu kisemi ne balongo ne banyenga mu kipwilo. Twayuka kuba’mba atweba bonse, kubikapotu ne balongo ne banyenga twibambulwa kulumbuluka. Onkao mambo, bimye bimo twifichisha ku muchima atwe bene na bene. Inge kino kyamweka, twafwainwa kulondela lujimuno lwa kwa Yesu lwa kuba’mba: “Kapwane na mulongo wobe.” (Mat. 5:24) Kitukwasha kuba bino ke kuvuluka kuba’mba uno mulongo wetu nangwa nyenga yetu naye wingijila “Lesa upana mutende.” (Loma 15:33; 16:20) Kuji mutende mukwabo wakilamo kunema. Inge ‘twata muchima ku bintu bya mupashi,’ tukeyowa mutende na Mulenga wetu. Isaya wanembele byambo byafikile mu moba anji, kabiji bibena kufika lelo jino, bya kuba’mba: “[Anweba Yehoba] mukapokolola boba bemuketekela; mukebapa mutende wa myaka ne myaka, mambo baketekela mwi anweba.”—Isa. 26:3; Loma 5:1. w16.12 2:5, 18, 19

Nangwatu mu ano moba a kupelako akatazha a ntanda ya kwa Satana, Yehoba ubena kupesha bantu banji. Ubena kupa bapopweshi ba kishinka kajo ka ku mupashi kavula bingi ne kwibakwasha kwikala mu mutende na balongo bonse mwaya ntanda. (Isa. 54:13) Byonka byalayile Yesu, Yehoba witufweta lelo jino kupichila mu kwitupa kisemi kya balongo ne banyenga ba mu lwitabilo betutemwa. (Mako 10:29, 30) Kunungapo, aba bonse bakebesha Lesa bebafweta na mutende, lusekelo, ne kwibalengela kutondwa na bwikalo bwabo. (Fili. 4:5-7) Ketekelai kuba’mba ‘umvwe mwapwisha kuba kyaswa muchima wa Lesa, mukatambula akya kyalaiwe.’ (Hebe. 10:35, 36) Onkao mambo, twayai tutwajijile kukosesha lwitabilo lwetu mwi Yehoba ne kumwingijila na muchima yense. Twayai tubenga bino mambo twayuka’mba Yehoba uketufweta.—Kolo. 3:23, 24. w16.12 4:17, 20

Nanchi twakonsha kwamba’mba tuji na bwana bwa bene bwa kine inge luusa lwetu lwa kwifuukwila bintu luji na po lupelela nyi? Ee. Mambo ka o twaambila bino? Kuyuka pa kupelela pa kwingijisha luusa lwa kwifuukwila kwakonsha kwituzhikijila. Akilangulukai pa kino: Mwakonsha kwingijisha luusa lwenu kusalapo kuya na motoka ku mpunzha kwalepa. Bino inge mubena kwendesha motoka mu mukwakwa mupita myotoka yavula mwabula mizhilo ya pa mukwakwa, abya mwakonsha kumvwa’mba mwazhikijilwa nyi? Ine. Kyo kimotu mizhilo ikebewa pa kuba’mba bantu bonse bakeyowe bwikalo bwawama kulutwe. Pa kuba’mba tumvwishe buwame buji mu kwingijisha luusa lwetu lwa kwifuukwila kwesakana na mizhilo yabikako Yehoba, twayai twisambe pe Adama. Aye walengulwile mizhilo yamupele Lesa ne kuja kipangwa kyo bamukainye kujako. Kubula kwingijisha bulongo luusa lwa kwifuukwila bintu kwaleta bya malwa pa baana ba kwa Adama. (Loma 5:12) Kuyuka byatama byafuminemo na mambo a bintu byafuukwilepo Adama kwafwainwa kwitulengela kwingijisha bulongo luusa lwetu lwa kwifuukwila bintu ne kulondela mizhilo ya Yehoba. w17.01 2:6, 8

Inge betupapo kwingila mingilo imo, kulombapo ne kulangulukapo bulongo kuketukwasha kubula kukanamina mingilo yavula yo twakonsha kukankalwa kwingila. Inge twipelula tukakana. Pano bino, byaubile Gidiona bituvululamo amba kechi twakonsha kwingila bulongo mingilo yetu kwa kubula lutangijilo lwa Yehoba ne mapesho anji ne. Baibolo witubuula’mba twafwainwa ‘kwenda na Lesa wetu saka twipelula.’ (Mika 6:8) Onkao mambo, kimye kyonse kyo betupa mwingilo mu kipwilo, twafwainwa kulombapo ne kulangulukapo pa bitubuula Yehoba kupichila mu Mambo anji ne jibumba janji. Twafwainwa kupimpulako milanguluko yetu pa kuba’mba tulondelenga bitubuula Yehoba. Twayai tuvulukenga’mba kwipelula kwa Yehoba ko ‘kwitulengela kutumbalala,’ kechi bulume bwetu ne. (Sala. 18:35) Kwenda na Lesa saka twipelula kuketukwasha kubula kwitumbijika nangwa kwilengulula. w17.01 3:17, 18

Yesu wayukile’mba mwingilo wanji pano pa ntanda ukapwa, kabiji bakwabo bo bakatwajijila kwingila uno mwingilo. Nangwa kya kuba baana banji ba bwanga bajinga bambulwa kulumbuluka, wibaketekejile kabiji wibambijile’mba bakengila mingilo yakila pa mingilo yo aingijile aye mwine. (Yoa. 14:12) Wibafunjishe bulongo, kabiji basapwijile mambo awama mu byalo byonse byayukanyikilwe mu oa moba. (Kolo. 1:23) Yesu byo afwile ne kusangulwa, wayile mwiulu mo bamupele mwingilo mukatampe ne luusa “kukila makafulumende onse, luusa lonse, bulume bonse, [ne] bunkambo bonse.” (Efi. 1:19-21) Inge twafwa ba kishinka Amagedonyi saka ikyangye kwiya, tukasangulwa ne kwikala mu ntanda ipya ya bololoke, mo tukengilanga mingilo yavula iketuletelanga lusekelo. Bino pa kino kimye, atweba bonse tuji na mwingilo wanema wa kusapwila mambo awama ne kukwasha bantu kwikala baana ba bwanga ba kwa Kilishitu. Umvwe twi banyike nangwa bakikulumpe, twayai atweba bonse twikale “na bya kuba byavula mu mwingilo wa Nkambo.” w17.01 5:17, 18

Bukuzhi bwapainwe kikupu. (Hebe. 9:24-26) Bukuzhi bwafumishepo luzhachisho lo twaswaine kufuma kwi Adama. Na mambo a kitapisho kya kwa Kilishitu, twapokololwa ku buzha bwa ino ntanda ya kwa Satana kabiji kechi tuchina lufu ne. (Hebe. 2:14, 15) Milaye ya Lesa kimye kyonse ifika. Byonkatu mizhilo yo abikile mu bilengwa byo ibula kwaluka, Yehoba kechi ukankalwa kufikizha byo alaya ne. Kechi waluka ne. Yehoba uketubila bintu byavula bingi, kechi kwitupatu bumi kwapa ne. Lesa witutemwa. Baibolo waamba’mba: “Twayuka ne kwitaba abwa butemwe Lesa bo etutemwa. Lesa butemwe.” (1 Yoa. 4:16) Ntanda yonse ikekala paladisa kabiji bantu bonse bakamweshanga butemwe bwa Lesa. Kepo bakalume ba Lesa bonse ba kishinka pano pa ntanda ne mwiulu bakamba’mba: “Kutotwa ne lukumo ne maana ne sante ne munema ne bulume ne ngovu bikale kwi Lesa wetu myaka ne myaka. Amena.”—Lum. 7:12. w17.02 2:16, 17

Mu Kyamba kya Usopa kya June 1 1973, mwajinga bwipuzho bwa kuba’mba: “Nanchi bantu babula kuleka kupeepa fwanka bakonsha kufikilamo kubatizhiwa nyi?” Mukumbu waambile’mba: “Bishinka bya mu Binembelo bimwesha’mba kechi bafikilamo ne.” Kino Kyamba kya Usopa kyalumbulwile binembelo byavula ne kwamba’mba, muntu inge wakana kuleka kupeepa fwanka, bafwainwa kumupanga mu kipwilo. (1 Ko. 5:7) Kyaambile’mba: “Kupanga uno muntu mu kipwilo kechi kwalumbulula’mba balongo mu kipwilo bashinta ne. Tuba bino mambo Lesa mwine byo byo aamba mu Mambo anji.” Buku umo waamba pa bya bupopweshi mu United States waamba’mba: “Bantangi bavula ba mu Kilishitendomu bapimpulako mafunjisho abo pa kuba’mba basangajike bapopweshi babo ne kulondela milanguluko ya bantu mu bimasamasa.” Kafwako jibumba jikwabo ja bupopweshi jilondela Mambo a Lesa mu bintu byonse, nangwatu inge kyamweka kukatazha ku bapopweshi bajo ne. w17.02 4:15

Bakulumpe mu kipwilo bakana kukizhamo kwibanemeka ne kwibamona nobe bantu baya nkuwa mu bya makayo. Kino Kimwesha’mba bepelula. Kino kyo kibapusanyako ku bantangi ba bupopweshi ba mu ano moba ne bantangi bajingako mu moba a kwa Yesu, bo aambilepo’mba: “Batemwa bingi kwikala pa bipona byo balamina benyi ku bijiilo bya mabanga ne pa bipona bya kulutwe mu mashinagoga ne kukeba kwibemuna mu bisankanyi.” (Mat. 23:6, 7) Bakafunga ba mu kipwilo kya bena Kilishitu ba kine bakookela byambo bya kwa Yesu bya kuba’mba: “Anweba kechi mwafwainwa kutelwa’mba Labi ne, mambo mujitu na Mufunjishi umo, ne anweba bonse mwi balongo na balongo. Kabiji kechi mwafwainwa kwita muntu nangwa umo pano pa ntanda amba tata ne, mambo kwi anweba kujitu Shenu umo, yenka uji mwiulu. Nangwa kutelwa’mba bantangi ne, mambo mujitu na Ntangi umo, aye Kilishitu. Bino mukulumpe mwi anweba wafwainwa kwikala wa mwingilo.” (Mat. 23:8-11) Kino kyakonsha kwitukwasha kuyuka ene mambo bakulumpe mu bipwilo kuzhokoloka ntanda yonse o bebatemenwa, kwibapa mushingi ne kwibanemeka ku Bakamonyi bakwabo. w17.03 1:14, 15

Muntu yense wafwainwa kwifuukwilapo bya kuba, kabiji inge tukeba kufuukula bintu bulongo, twafwainwa kulondela Mambo a Lesa. Kechi twafwainwa kupa muntu mukwabo mutembo wa kwitufuukwila bintu ne. Pakuba twafwainwa kuyuka kyaswa muchima wa Lesa ne kwifuukwilapo atweba bene kwikyuba. Ki ka kyakonsha kulengela’mba tuswishe bakwetu kwitufuukwilako bintu? Kwitukanjikizha ku bakwetu kwakonsha kwitulengela kubula kufuukula bintu bulongo. (Maana 1:10, 15) Pano bino, nangwa bakwetu betukanjikizhe byepi, ke mwingilo wetu wa kwingijisha jiwi jetu ja mu muchima jo twafunjisha na Baibolo. Inge twaswisha bakwetu kwitufuukwila bya kuba, ko kuba’mba tubena ‘kwibalondela.’ Kuba bino kwakonsha kwituletela makatazho. Mutumwa Paulo wajimwineko bena Kilishitu mu Ngalatiya pa byatama bifumamo mu kuswisha bakwabo kwibafuukwila bya kuba. (Nga. 4:17) Balongo bamo mu kipwilo mu Ngalatiya bakebelenga kufuukwila bakwabo bya kuba pa kuba’mba bebongole ne kwibafumya ku batumwa. w17.03 2:8-10

Yosiya waubile bintu byaoloka ku meso a Lesa. Banyike lelo jino bafwainwa kutendeka kwingijila Yehoba mu bwanyike bwabo, byonka byaubile Yosiya. Kyamweka Mfumu Manase byo alapijile, wafunjisheko munkananji aye Yosiya pa lusa lwa Lesa. Anweba banyike, ikalai balunda na bakikulumpe mu kisemi kyenu ne mu kipwilo baingijila Yehoba mu bukishinka, ne kufunjilako Yehoba byo ebobila bibusa. Kabiji vulukainga kuba’mba Yosiya byo atangile Binembelo, byamufikile pa muchima ne kumulengela kufuukulapo kwingijila Yehoba. Inge kemutange Mambo a Lesa, akemulengela kufuukulapo kwingijila Yehoba ne kukosesha bulunda bwenu na Lesa, kabiji mukekala ba lusekelo. Mukakebanga ne kubuulako bakwenu pe Lesa. (2 Moba 34:18, 19) Kufunda Baibolo kukemukwasha ne kumona mo mwafwainwa kuwamishako pa kuba’mba mwingijilenga Lesa bulongo. Onkao mambo, ibikaingako kuba byonka byaubile Yosiya. w17.03 3:18, 19