Byambo Bitanshi

Buku wa Binembelo Bikwasha Bena Kilishitu ukemukwashanga kutaana Binembelo bukiji ne mashimikila a mu Baibolo afwainwa kwimukwasha kuyuka mwa kubila na makatazho o mubena kupitamo. Kabiji ukemukwashanga kutaana bukiji jishimikila ja mu Baibolo jo mwafwainwa kwingijisha kutundaikilamo bakwenu ne kwibakwasha kufuukulapo kuba bintu bitokesha Yehoba ku muchima. Salai mutwe ye mwatemwa. Mu mutwe yense muji mepuzho ne byambo bicheche byalumbulula jishimikila ja mu Baibolo. (Monai kakitenguluzha mutwe wa kuba’mba “Bya Kwingijisha Uno Buku.”) Musakutaanamo binembelo byafwainwa kwimukwasha kuyuka mwa kubila bintu ne lutekenesho. Kabiji muji mafunde a mu Baibolo o mwakonsha kwingijisha kukwashishamo bakwenu babena kupita mu makatazho ne kwibatundaika.

Bya Kwingijisha Uno Buku

Pa kukeba mutwe, mwafwainwa kuya pa kukebela nangwa pa bipungu. Mu uno buku wa Binembelo Bikwasha Bena Kilishitu bamwabanya mu bipungu bitanu na bibiji: Makatazho, Miteeto, Kipwilo, Bwikalo bwa pa Juba pa Juba, Kisemi, Bulunda ne Lesa ne Byubilo. Mitwe yavula iji mu bino bipungu. Yai pa kipungu ne kusalapo mutwe ye mubena kukeba. Bino inge kechi mwayuka kipungu paji mutwe ye mubena kukeba ne, yai po batanchika Mitwe Yonse pa kuba’mba mu mutaane. Pa mutwe yense, paji tumitwe twavula to bafichisha. Mitwe imo mikuku ya byambo pakuba mitwe ikwabo mepuzho. Inge mubena kutanga binembelo byo bafichisha biji mu yeo mutwe, mwafwainwa kutulumanako ne kulanguluka langulukapo pa byo bibena kukosesha kishinka nangwa kukumbula bwipuzho. Mitwe imo beyabanya mu bipungu pa kuba’mba kimupeelele kutaana bukiji byo mubena kukeba. Kabiji mu mitwe imo muji ne binembelo bikwabo biji po banemba’mba “Kabiji monai.” Abino binembelo bikemukwashanga kumvwisha yewo mutwe. Mu uno buku muji ne kipungu kya kuba’mba “Mashimikila a mu Baibolo.” Papelela bino byambo, paji mukuku wa byambo mwipi walumbulula kishinka kiji mu byo byo binembelo. Uno mukuku wa byambo ukemukwasha kulanguluka languluka pa binembelo byo mwatanga.

Mu uno buku kechi batanchikamo binembelo byonse byaamba pa mutwe yense ujimo ne. Bamunemba kuba’mba emukwashe kutaana binembelo byo mukeba. Inge mukeba kufunjilapo bikwabo mwakonsha kutanga binembelo byo bamwesha pakachi mu lubaji 1 ne lubaji 2 ne byambo byo balumbulula biji mu Baibolo wa Binembelo bya Ntanda Ipya. (Man 2:1-6) Pa kuba’mba muyuke mwatala kinembelo, ingijishainga Buku wa Kukwasha Bakamonyi ba kwa Yehoba Kukebakeba Bishinka nangwa Watch Tower Publications Index. Ano mabuku akemukwasha kuyuka byo banemba katataka byaamba pa kyo kyo kinembelo.

Uno buku wa Binembelo Bikwasha Bena Kilishitu emukwashe kwikala na maana, milangwe ne kumvwisha bulongo Binembelo. Kwingijisha uno buku, kukemukwasha kushiinwa’mba “mambo a Lesa o omi kabiji aji bingi na bulume.”—Heb 4:12.