February

Yehoba ukeba’mba bapopweshi banji bonse bekalenga na lusekelo. Uji kwipi ne atweba bonse, kabiji uyuka umvwe tuji na bulanda nangwa twalefulwa. (Sala. 145:18, 19) Langulukai pe Yehoba byo atele muchima ngauzhi Elaija kimye kyo ajinga na binyenge ne byo amukwashishe. Uno muntu wa kishinka wajingako pa kimye bena Isalela kyo bapichilenga mu bintu byakatezhe bingi. Bapopweshi ba Yehoba bebamanyikilenga kya mama nafwa, kabiji bakebelenga kwipaya Elaija. (1 Mfu. 19:1, 2) Kabiji kintu kyakatezhe bingi Elaija mu milanguluko ke kya kuba’mba wamwenenga nobe ye yenkatu ngauzhi washajile na kwingijila Yehoba. (1 Mfu. 19:10) Bukiji bukiji Lesa waubilepo kimo kuba’mba akwashe Elaija. Watumine malaika kuya na kubuula ngauzhi wanji amba kechi wajinga bunke ne, kwajinga bena Isalela bakwabo bavula baingijilenga Lesa mu bukishinka. (1 Mfu. 19:5, 18) Yesu walayile baana banji ba bwanga amba kipwilo kikekala nobe kisemi kyabo. (Mako 10:29, 30) Kabiji mutwe wa kisemi kyetu kya ku mupashi aye Yehoba walaya kuba’mba ukakwasha boba bakeba kumwingijila.—Sala. 9:10. w21.06 8-9 ¶3-4

Bantu bavula betuntula mambo mafunjisho etu aimena pa Baibolo asolola patoka mafunjisho a bupopweshi bwa bubela. Bantangi ba bupopweshi bafunjisha bantu babo amba Lesa umanyika bantu mu mujilo mu ngehena. Bengijisha luno lufunjisho pa kuba’mba bantu bachinenga. Byo tuji bakalume ba Yehoba bapopwela Lesa wa butemwe, twafwainwa bakwasha bantu kuyuka’mba luno lufunjisho lwa bubela. Kabiji bantangi ba bupopweshi bafunjisha kuba’mba mweo kechi ufwa ne. Tusolola patoka kuba’mba luno lufunjisho kechi lwafuma mu Baibolo ne, kabiji lulengela bantu kumona nobe kafwako lusanguko. Kabiji nangwa kya kuba bupopweshi bwavula bufunjisha kuba’mba byonse byo tuba Lesa wibitanchikijile jimo amba byo byo tukobanga, atweba tufunjisha kuba’mba muntu mwine uji na luusa lwa kusalapo kwingijila Lesa. Nga bantangi ba bupopweshi boba byepi umvwe twasolola patoka mafunjisho abo a bubela? Javula bazhingila bingi. Inge twatemwa bukine, twafwainwa kwitabila ne kukookela byambo bya Lesa. (Yoa. 8:45, 46) Kupusanako ne Satana Diabola, atweba tukatwajijila kwikala mu bukine. Kechi tukobapo kintu kyapusanako na bintu byo twaitabilamo ne. (Yoa. 8:44) Lesa ukeba bantu banji ‘kushikwa kintu kyatama’ ne ‘kukakachila ku kintu kyawama’ byonkatu byaubile Yesu.—Loma 12:9; Hebe. 1:9. w21.05 10 ¶10-11

Twafwainwa kuba byepi umvwe twamona’mba twatendeka kwikala na bwitote nangwa lwiso? Twakonsha kupimpula byubilo byetu. Mutumwa Paulo waambile’mba bantu Diabola bo ‘akwata bomi’ bakonsha kufumamo mu kakose kanji. (2 Timo. 2:26) Vulukainga kuba’mba Yehoba uji na bulume kukila Satana. Onkao mambo, umvwe twaswa bukwasho bwa Yehoba, twakonsha kufumamo mu kakose nangwa’mba kitewa kya kwa Diabola. Onkao mambo, kyawama kubula kwikala na bwitote nangwa lwiso kukila kufwa mu tukose nangwa bitewa bya kwa Satana apa bino ke tulwishe kufumamo. Twakonsha kuchinuzhuka bino byubilo na bukwasho bwa Lesa. Onkao mambo, lombainga kwi Yehoba pa juba pa juba kuba’mba emukwashenga kupima milanguluko yenu ne kumona inge mwatendeka kwikala na bino byubilo byatama. (Sala. 139:23, 24) Ibikaiko kuchinuzhuka bwitote ne lwiso. Pa myaka yavula bingi, Satana watwajijila kwikala kibinda. Bino katatakatu bakamukase ne kumwipaya. (Lum. 20:1-3, 10) Tubena kutengela juba jo bakamuba bino Satana. Byo tubena kupembelela jino juba, twayai tuchinuzhukenga tukose twanji. Ingilainga papelela bulume bwenu kuba’mba mubule kwikala na bwitote nangwa lwiso. “Diabola mukanai ne aye ukemunyema.” w21.06 19 ¶15-17

Yehoba usangalala bingi inge muntu waswa bukine bwa mu Baibolo ne kubuulako bakwabo. (Maana 23:15, 16) Yehoba wafwainwa usangalala bingi pa kumona bantu banji byo babenga kwingila na mukoyo mwingilo wa kusapwila ne kufunjisha. Nangwa kya kuba kuji mwalo wakumbanatu ntanda yonse, mu mwaka wa mwingilo wa 2020, bantu bafunjilenga Baibolo bajinga 7,705,765, kabiji bantu bo bakwashishe kwipana bene kwi Yehoba ne kubatizhiwa bajinga 241,994. Bano baana ba bwanga ba katataka nabo babena kufunjisha bakwabo Baibolo ne kwibakwasha kwikala baana ba bwanga. (Luka 6:40) Kwa kubula nangwa kuzhinaukatu ne, tusangajika muchima wa Yehoba kupichila mu kwingilako mwingilo wa kufunjisha bantu kwikala ke baana ba bwanga. Mwingilo wa kufunjisha bantu kwikala baana ba bwanga ke mwingilo wakosa bingi, bino na bukwasho bwa Yehoba, twakonsha kwingilako mwingilo wa kukwasha ba katataka kutemwa Shetu wa mwiulu. Nanchi kechi twakonsha kwibikila kikonkwanyi kya kwikalapotu nangwa na muntu umo wa kufunjisha Baibolo nenyi? Twakonsha kukumya bingi na kyakonsha kumweka inge twaipuzha muntu yense ye twataana inge wakonsha kutemwa kufunda Baibolo ne atweba. w21.07 6-7 ¶14-16

Mfumu Davida wapaine mali avula bingi ne bya bunonshi byanji ku mwingilo wa kushimikila nzubo ya Lesa. (1 Moba 22:11-16) Inge kya kuba kechi tuji na bulume bwa kwingilako mwingilo wa kushimika bishimikwa bya mu jibumba ja Yehoba ne, twakonsha kutwajijila kutundaika uno mwingilo kupichila mu kupanako bupe bwa mali kwesakana na biji bwikalo bwetu. Kabiji twakonsha kukwasha banyike kupichila mu kwibabuulako bintu byo twayuka. Kwamba pa bumpanyi, langulukai pa byaubile mutumwa Paulo. Waichile Timoti kuba’mba bengijilenga pamo mwingilo wa bumishonale, kabiji Paulo wafunjishe uno nsongwalume mashinda a kwingijilamo mwingilo wa kusapwila ne kufunjisha. (Byu. 16:1-3) Paulo wafunjishe Timoti bya kwikala musapwishi kabiji mufunjishi wawama wa mambo awama. (1 Ko. 4:17) Timoti naye wafunjisheko bakwabo mashinda amufunjishe Paulo. w21.09 12 ¶14-15

Twakonsha kufunjilako ka ku mwana wa bwanga aye Apolosa ne ku mutumwa Paulo? Bano banabalume babiji bayukile bingi Binembelo. Bonse babiji bayukanyikilwe bingi kabiji bafunjishanga bingi bulongo. Kabiji bonse babiji bakwashishe bantu bavula kwikala baana ba bwanga. Bino bano banabalume kechi beubilanga kichima ne. (Byu. 18:24) Apolosa byo afumine mu Kolinda, Paulo wamukambizhe’mba abwele mu yenka uno muzhi. (1 Ko. 16:12) Apolosa waingijishe bya bupe byanji mu jishinda jawama, ko kuba’mba kusapwila mambo awama ne kukosesha balongo. Kabiji twashiinwa kuba’mba Apolosa wipelwile. Mambo Baibolo kechi waambapo’mba wazhingijile kimye Akwila ne Pilisila kyo bamusendele ku mbaji na “kumulumbulwila bulongo jishinda ja Lesa” ne. (Byu. 18:24-28) Mutumwa Paulo wayukile mingilo yawama yaingijile Apolosa. Bino Paulo kechi waakaminwe kuba’mba bantu bakambanga’mba Paulo bamukila kwi Apolosa ne. Umvwe twatanga byambo Paulo byo anembejile kipwilo kya mu Kolinda, twakonsha kumona’mba Paulo wipelwile bingi kabiji wayukile’mba kwajinga bintu byo akonsheshe kubula kuba.—1 Ko. 3:4-6. w21.07 18-19 ¶15-17

Adama ne Evwa basatukijile Lesa kya nshijitu. Onkao mambo, kyayijilemo Lesa kwibapangamo mu kisemi kyanji. Pano kyakonsheshe kwikala byepi ku baana babo? Yehoba watemwa bantu, onkao mambo, wanengezhezhe jishinda ja kubwezhezhamo baana babo ba lukookelo mu kisemi kyanji. Waubile bino kupichila mu kitapisho kya Mwananji ye atemwisha. (Yoa. 3:16) Na mambo a kitapisho kya kwa Yesu, Lesa wasajile bantu ba kishinka 144,000 kwikala ke baana banji. (Loma 8:15-17; Lum. 14:1) Kabiji biumbi ne biumbi bya bantu bakwabo ba kishinka babena kukookela Lesa ne kuba kyaswa muchima wanji. Baji na luketekelo lwa kwikala mu kisemi kya Lesa inge bashinda lweseko lukapelako ku mpelo ya myaka kiumbi. (Sala. 25:14; Loma 8:20, 21) Nangwatu luno batela Yehoba, Mulenga wabo amba “Tata.” (Mat. 6:9) Aba bakasangulwa nabo bakebapa kimye kya kufunda pe Yehoba. Aba bakasalapo kukookela lutangijilo lwanji nabo bakekala mu kisemi kyanji. w21.08 5 ¶10-11

Mutumwa Paulo bamupele mwingilo, kabiji pa myaka yavula uno ye mwingilo wanemene bingi mu bwikalo bwanji. Wasapwilanga “patoka ne ku nzubo ku nzubo.” (Byu. 20:20) Aye wasapwilanga pa tubimye tonse to ashukilwanga. Pa kimye kimo byo apembelejilenga balunda nanji mu Atene, watendekele kusapwila ku jibumba ja bantu bo banemekele, kabiji bamo batambwijile bulongo mambo awama. (Byu. 17:16, 17, 34) Nangwatu kimye kyo ‘bamukashile mu kaleya,’ Paulo wasapwijilenga ku bantu bo ajinga nabo. (Fili. 1:13, 14; Byu. 28:16-24) Paulo waingijishanga kimye kyanji bulongo. Waitangako bakwabo kwiya na kwingijila nanji pamo mwingilo wa kusapwila. Kimye kyo ajinga pa lwendo lwanji lutanshi lwa bumishonale, wasendeleko Yoano Mako, kabiji pa lwendo lwa bubiji wasendeleko Timoti. (Byu. 12:25; 16:1-4) Kwa kubula nangwa kuzhinauka ne, Paulo waingijile na ngovu kufunjisha bano banabalume bya kwingila mingilo mu kipwilo, bya kwingila mwingilo wa bukafunga, ne bya kwikala bafunjishi bayuka kufunjisha.—1 Ko. 4:17. w22.03 27 ¶5-6

Bamo bamba’mba kechi baitabila mu Mulenga ne, mambo baitabilatu mu bintu byo bakonsha kumona. Bino kishinka ke kya kuba’mba baitabila mu bintu byo babula kumona, nabiji bulume buji pa ntanda bulengela bintu kupona panshi, mambo baji na bishiino bimwesha’mba buno bulume ko buji. Lwitabilo lwatongolwa mu Baibolo lwaimena pa “kiyukilo kimwesha’mba aya kyo mwaitabila kya kine nangwa kya kuba kechi mwikimona ne.” (Hebe. 11:1) Pakebewa kimye ne kwibikako kufunda bino biyukilo, kabiji bantu bavula kechi bakeba kwibikako kuba bino ne. Muntu ubula kufunda bishiino wakonsha kupwisha mu muchima wanji amba kafwako Lesa. Bashayuka ba sayansi bamo byo bapesele pesele bishiino, bashiinwe kuba’mba Lesa ye walengele bilengwa byonse. Balangulukangatu amba kafwako Mulenga na mambo a kuba’mba pa sukulu mukatampe kechi bafunjishapo’mba Lesa ye walengele bilengwa ne. Pano bino, aluno bamuyuka Yehoba kabiji bamutemwa. Onkao mambo, ne atweba bonse twafwainwa kukosesha lwitabilo lwetu mwi Lesa nangwa twafunda nangwa kechi twafunda ne. w21.08 14 ¶1; 15-16 ¶6-7

Yesu waingijishe kishimpi kya mwana waelekele pa kuba’mba etukwashe kuyuka Yehoba byo atemwa kumwesha lusa. Uno mwana wafumine pa nzubo kabiji “wakonawine nsabo yanji yonse na mambo a bwikalo buncha.” (Luka 15:13) Mu kuya kwa kimye, walapijile kabiji wipelwile ne kubwela ku nzubo. Shanji waubile byepi? Yesu waambile’mba: “Byo akijinga palepa byobya, shanji wamumwene ne kumubila lusa, kabiji wamunyemejile lubilo ne kumupakachilamo ne kumufyompa.” Uno shetu kechi waubile kintu kyakonsheshe kulengela mwananji kumweka buleya ne. Pakuba wamulekejileko mambo uno nsongwalume ne kumutambwila mu kisemi. Uno mwana waelekele walengele mambo akatampe, bino na mambo a kuba’mba walapijile, shanji wamulekejileko mambo. Uno shetu wa lusa mu kino kishimpi wimenako Yehoba. Yesu byo aingijishe kino kishimpi, witumwesheshe Shanji byo akeba kulekelako mambo bandengamambo balapila kya kine.—Luka 15:17-24. w21.10 8 ¶4; 9 ¶6

Lelo jino, bantangi ba bupopweshi bavula bauba bintu byavula pa kuba’mba jizhina ja Lesa jibule kuyukanyikwa. Bejifumyamo mu ma Baibolo abo, kabiji bakanya kwingijisha jino jizhina mu machechi abo. Kino kyamweshatu patoka kuba’mba Bakamonyi ba kwa Yehoba bo bonkatu banemeka jizhina ja Lesa. Kupusanako na bupopweshi bukwabo, atweba tubena kukwasha bantu bavula mwaya ntanda kuyuka jizhina ja Lesa. Na mambo a kino, tubena kwibikako kwikela monka mwayila jizhina jetu ja kuba’mba Bakamonyi ba kwa Yehoba. (Isa. 43:10-12) Twapulinta Mabaibolo a Binembelo bya Ntanda Ipya kukila pa 240 milyonyi, mo baingijisha jizhina ja Yehoba ponse po bejifumishe ku bantuntuluzhi Baibolo bakwabo. Kabiji tubena kunemba mabuku aimena pa Baibolo mutanwa jizhina ja Yehoba mu milaka kukila pa 1,000. w21.10 20-21 ¶9-10

Tupopwela Yehoba kimye kyo tukwasha bena Kilishitu bakwetu bakajilwa. Yehoba walayile kufweta bena Isalela bapangapo bayanji bintu. (Mpitu. 15:10) Kimye kyonse kyo tukwasha mulongo nangwa nyenga wakajilwa, Yehoba umona amba ye tubena kupa. (Maana 19:17) Kimye bena Kilishitu bajinga mu Filipai kyo batumine bya bupe kwi Paulo saka aji mu kaleya, Paulo wibitelele’mba “kitapisho kyaitabilwa kitokesha Lesa ku muchima.” (Fili. 4:18) Langulukai pa balongo ne banyenga baji mu kipwilo kyenu ne kwishikisha’mba, ‘Nanchi mujipo yenafwainwa kukwasha nyi?’ Yehoba umvwa bulongo inge wamona byo tubena kwingijisha kimye kyetu, ngovu yetu, busendwe bwetu ne bintu byo tuji nabyo kukwasha bakajilwa. Lesa umona bino kuba’mba lubaji lwa mpopwelo yetu. (Yako. 1:27) Bupopweshi bwa kine bukebewa kimye ne ngovu. Pano bino, kechi kwakatazha ne. (1 Yoa. 5:3) Mambo ka? Mambo twatemwa Yehoba ne balongo ne banyenga. w22.03 24 ¶14-15

Saka tukyangye kumwesha balongo ne banyenga kifyele, patanshi twafwainwa kuyuka makatazho o babena kupitamo. Twambe’mba nyenga uji na kikola kikatampe. Uno nyenga kechi wijizhanya pa lukatazho lwanji ne, bino wakonsha kusanta bingi inge muntu umo wamukwasha. Abya twakonsha kumukwashako kunengezha kajo nangwa kumuwamishishako mu nzubo nyi? Nangwa kampe mulongo nkito yapwa. Twakonsha kumukwasha kupichila mu kumupapo mali, kampe kwa kubula kumubuula’mba yetu twamupa, pa kuba’mba ekwashishemo pa kimye kyo abena kukeba nkito. Kechi twafwainwa kupembelela’mba kana balongo ne bayenga bakalombe bukwasho apa bino tukebakwashe ne. Twakonsha kwitendekelakotu kwibakwasha byonka byuba Yehoba. Aye usamisha juba pe atweba moba onse kwa kubula ne kumulomba. Kabiji bantu bonse bamwenamo, kubikakotu ne boba babula kusanta. Yehoba byo etupa byonse bikebewa, umwesha’mba witutemwa. Twamutemwa bingi Yehoba mambo uji na kifyele kabiji mpanyi. w21.09 22-23 ¶12-13

Butemwe bwa Lesa bubula kwaluka bumulengela kulekela bantu mambo. Inge Yehoba wamona ndengamambo walapila ne kuja nyenye, butemwe bwanji bubula kwaluka bumulengela kumulekelako mambo. Nyimbi wa masalamo aye Davida waambile pe Yehoba amba: “Kechi witubila monka mwayila mambo etu, nangwa kwitufweta monka mwayila bubi bwetu ne.” (Sala. 103:8-11) Davida wayukile byo kyumvwanyika kwikala na jiwi ja mu muchima jibena kukuzhachisha. Bino wayukile ne kuba’mba Yehoba ‘waswila jimo kulekela mambo.’ Ki ka kilengela Yehoba kulekela mambo? Mukumbu wanembwa mu kinembelo kya lelo. Kya kine, byonkatu byaambile Davida mu mulombelo, Yehoba ulekela mambo bantu mambo umwesha butemwe bubula kwaluka ku boba beta pe aye. Inge twalenga mambo, kyawama kabiji kyayilamo kumvwa bulanda pa kyo twauba. Kumvwa bino kwakonsha kwitukwasha kulapila ne kupimpula byubilo byetu. w21.11 5 ¶11-12

Yehoba watemwa jizhina janji, kabiji ukeba bantu bonse kwijinemeka. (Isa. 42:8) Pano bino, jizhina janji bejuba bingi mwenga pa myaka 6,000 yapitapo. (Sala. 74:10, 18, 23) Kino kyatendekejile kimye Diabola (kulumbulula’mba “wa Luntepentepe”) kyo apelemo Lesa mambo a kuba’mba kechi wapele Adama ne Evwa bintu byawama ne. (Nte. 3:1-5) Kufumatu kyokya kimye, Yehoba bamupamo mambo a bubela a kuba’mba kechi upa bantu bintu byo bakeba ne. Yesu kyamwikele bingi ku muchima na mambo kuba’mba jizhina ja Shanji bejubilenga mwenga. Yehoba uji na luusa lwa kulama bilengwa bya mwiulu ne bya pano pa ntanda, kabiji bukalama bwanji bwawama bingi. (Lum. 4:11) Bino Diabola waesekele kujimbaika bamalaika ne bantu ne kwibalengela kulanguluka’mba Lesa kechi uji na luusa lwa kulama ne. Katatakatu ano mambo apwe. Bantu bakayuka’mba bukalama bwa Yehoba bo bukalama bwawama, kabiji Bufumu bwanji bo bonkatu bukaleta mutende wa kine ne luzhikijilo pano pa ntanda. w21.07 9 ¶5-6

Kijitu bulongo mutwe wa nsemi kukebela ba mu nzubo yanji kajo, bya kuvwala, ne mwakwikala. Nanchi mubena kupita mu lukatazho lwa kubula mali nyi? Umvwe byo byo kiji, ko kuba’mba bwikalo bwimukatazha bingi. Nangwa kya kuba lukatazho lo mubena kupitamo lwabaya, mwakonsha kwingijisha kino kimye kukosesha lwitabilo lwenu. Lombai kwi Lesa ne kutanga byambo bya kwa Yesu biji pa Mateo 6:25-34 ne kwibilanguluka langulukapo. Langulukai pe Yehoba byo abena kukwasha bantu banji bapayankana mu kwingila mingilo iji mu jibumba ja Lesa. (1 Ko. 15:58) Kuba bino kusakwimulengela kukinka manungo mwi Shetu wa mwiulu kuba’mba byonka byo akwasha bakalume banji, ne anweba ukemukwasha. Wayuka bintu byo mwakajilwa, kabiji wakonsha kwimupabyo. Inge mwamona Yehoba byo abena kwimukwasha mu bwikalo bwenu, lwitabilo lwenu lukakoselako pa kuba’mba mukakonshe kuchinchika meseko akatampe aji kulutwe. w21.11 20 ¶3; 21 ¶6

Lufunjisho lwa bukuzhi lwakosesha lwitabilo lwa bena Kilishitu bavula. Batwajijila kusapwila nangwa kya kuba kwajinga bebakanya kwingila uno mwingilo, kabiji bachinchika meseko a misango ne misango mu bwikalo bwabo bonse. Langulukai pa byapichilemo mutumwa Yoano. Wasapwijile mu bukishinka bukine pe Kilishitu ne bukuzhi pa myaka kukila pa 60. Kimye kyo ajinga na myaka kukila pa 90, kafulumende wa bena Loma walangulukilenga’mba kechi wajinga muntu wawama ne kya kuba bakamukashijile pa jikuji ja Patamosa. Ñanyi mambo o alengele? “Mambo [waambilenga] pe Lesa ne kushimuna pe Yesu.” (Lum. 1:9) Kine, twafwainwa kufunjilako kwi Yoano bya kwikala na lwitabilo lwakosa ne kuchinchika. Mu mabuku a mu Baibolo anembele Yoano, wamwesheshe byo atemenwe Yesu ne kunemeka bukuzhi. Pa bimye kukila pa 100, waambile pa bukuzhi ne pa bintu byawama byo tumwenamo mu bukuzhi. (1 Yoa. 2:2) Kya kine, Yoano wanemekele bingi bukuzhi. w21.04 17 ¶9-10

Yehoba wakebelenga bantu banji kubilanga lusa bantu balemana. Kintu kimo kyo akambizhe bena Isalela ke kubula kufinga muntu washinka matwi. Kufinga muntu kwavwangilemo kumuchinyisha nangwa kwamba’mba kintu kyatama kimumwekele. Kino ke kintu kyatama bingi kuba muntu washinka matwi. Kechi wakonsheshe kumvwa byo bamwambijilenga ne, onkao mambo, kechi wakonsheshe kwipokolola ne. Kabiji Bena Levi 19:14, Lesa wabuujile bakalume banji kuba’mba kechi bafwainwe “kubika mu jishinda kintu kyakonsha kwituntulako mpofu ne.” Buku umo waamba pa bantu baji na bulema amba: “Ku byalo bya kala bya ku Musela, bantu ba uno mutundu bebobanga nshiji ne kwibayanjisha.” Kampe muntu washinta wakonsha kubika kintu kulutwe ya mpofu kuba’mba ekozhe nangwa kukeba kuba’mba bamuseke. Kino kyubilo kechi kimwesha lusa ne. Muzhilo uji mu kyepelo 14 wakwashishe bantu ba Yehoba kubila lusa boba bajinga bilema. w21.12 8-9 ¶3-4

Yakoba waakaminwe bingi kuba’mba kolojanji watwajijila kumubila mfika ne kumuzhingijila. Onkao mambo, walombelepo na mukoyo kwi Yehoba pa luno lukatazho. Kabiji watumijile Isao bupe bwavula bingi. (Nte. 32:9-15) Kepo bano bankasa ne kolo byo bamonañene kilungi na kilungi, Yakoba wamwesheshe mushingi kwi Isao. Wafukamine kwi Isao, kechi jimotu ne, bino bimye bitanu na bibiji. Na mambo a kwipelula ne kumwesha mushingi, Yakoba wapwaine na kolojanji. (Nte. 33:3, 4) Tufunjilako lufunjisho lwanema bingi kwi Yakoba byo anengezhezhe bintu saka akyangye kumonañana ne Isao, ne byo aubile kimye kyo afikile kwajinga uno kolojanji. Yakoba wipelwile ne kulomba bukwasho kwi Yehoba. Kepo aubijile bintu monka mwayijile lulombelo lwanji kupichila mu kubapo bintu bimo pa kuba’mba kimye kyo akamonañana na kolojanji pakekale mutende. Bano bankasa ne kolo byo bamonañene, Yakoba kechi waambile pa watamishe ne wabujile kutamisha pe aye ne Isao ne. Yakoba kyo akebelenga ke kupwana ne kolojanji. Mwakonsha kulondela byepi byaubile Yakoba?—Mat. 5:23, 24. w21.12 25 ¶11-12

Umvwe mwalanguluka pe Yesu byo emufwijile na mambo a bundengamambo bwenu, kampe mwakonsha kwamba’mba, ‘Amiwa kechi nafikilamo kutambwila bubwe bupe ne.’ Mambo ka? Byo tuji bambulwa kulumbuluka, muchima wetu wakonsha kwitulengela kwilengulula nangwa kumona’mba kechi twanema ne. (1 Yoa. 3:19) Umvwe ketulanguluke bino, twafwainwa kuvuluka’mba “Lesa wakila michima yetu.” Nangwa kya kuba tulanguluka’mba Yehoba kechi witutemwa ne, nangwa’mba kechi uketulekelako mambo etu ne, bino Shetu wa mwiulu ukatwajijila kwitutemwa ne kwitulekelako mambo. Twafwainwa kushiinwa kuba’mba Yehoba witutemwa. Pa kuba’mba tubena bino, twafwainwa kufundanga Mambo anji moba onse, kulomba kwi aye kimye kyonse, ne kupwanañananga na bantu banji ba kishinka. Mambo ka kuba bino bintu o kwanemena? Mambo kukemukwasha kuyuka byubilo byawama bya Yehoba. Mukayuka byo emutemwa. Kulangulukishapo pa byo mutanga mu Mambo a Lesa pa juba pa juba kwakonsha kwimukwasha kwikala na milanguluko yawama ne ‘kwimololako.’—2 Timo. 3:16. w21.04 23-24 ¶12-13

Pa kuba’mba twikale na lwitabilo lwakosa, kuji byavula byo twafwainwa kuba, kechi kupelelatu pa kufunda ne. Twafwainwa kulanguluka langulukanga pa bintu byo tufunda. Langulukai pa byapichilemo nnembi wa Salamo 77. Wajinga bingi na bijikila mambo walangulukile’mba Yehoba waleka kumutala bulongo aye ne bakwabo bena Isalela. Ino milanguluko yamulengelanga kutoñama bufuku. (Byepelo 2-8) Pano waubile byepi? Wabuujile Yehoba amba: “Nkalanguluka langulukanga pa mingilo yenu kabiji nkalangulukanga pa bintu byo mwauba.” (Kyepelo 12) Ibyo kuba’mba nyimbi wa masalamo wayukile bintu Yehoba byo aubijile bantu banji bajingako kala, bino washikishe’mba: “Nanchi Lesa walubako kumwesha bibusa byanji, nangwa abya bukaji bwanji bwamulengela kuleka kuba lusa nyi?” (Kyepelo 9) Nyimbi wa masalamo walanguluka langulukanga pa mingilo ya Yehoba, lusa ne kifyele byo amwesheshe bantu banji kala. (Kyepelo 11) Ki ka kyafuminemo? Uno nyimbi wa masalamo washiinwe kuba’mba Yehoba kechi wakonsheshe kusha bantu banji ne. (Kyepelo 15) w22.01 30-31 ¶17-18

Yehoba umvwa byepi pa banabalume ne banabakazhi ba kishinka bafwa? Ukebesha bingi kwibamona jibiji. (Yoba 14:15) Fwanyikizhaitu Yehoba byo atonga mulunda nanji aye Abalahama. (Yako. 2:23) Nangwa fwanyikizhai Yehoba byo akebesha kwisamba ne Mosesa, muntu ye esambanga nanji “kilungi na kilungi.” (Lupu. 33:11) Kabiji ubena kutengela kimye kyo akomvwanga jibiji Davida ne banyimbi ba masalamo bakwabo byo bakembanga nyimbo ya kimenge ya kumutota. (Sala. 104:33) Nangwa kya kuba abo balunda na Lesa bafwa, Yehoba kechi wibalubako ne. (Isa. 49:15) Uvulukatu byonse pe abo. Juba jimo, ukebasangula, kabiji ukatendeka kumvwa jibiji milombelo yabo ya kufuma panshi ya muchima ne kuswa mpopwelo yabo. Umvwe mwafwisha muntu ye mwatemwa, bino byambo byakonsha kwimutekenesha. Kimye kyatendekele bunsatuki mu Edena, Yehoba wayukile kuba’mba bintu bikataminangakotu kufika ne kimye kyo akebiwamisha. Yehoba washikwa bubi, nshiji, ne bukapondo bubena kubiwa mu ntanda lelo jino. w21.07 10 ¶11; 12 ¶12

Umvwe twatemwa balongo ne banyenga yetu, ko kuba’mba tubena kumwesha’mba twanemeka bukuzhi. Mambo ka? Mambo Yesu kechi wapaine bumi bwanji na mambo a atwebatu bunke ne, wapanyijile ne balongo ne banyenga yetu. Yesu wipaine kwibafwila. Kino kimwesha’mba wibatemwa bingi. (1 Yoa. 3:16-18) Byo tuba na balongo ne banyenga byo bimwesha’mba twibatemwa. (Efi. 4:29, 31–5:2) Bintu bimo byo tuba ke kwibakwasha inge bakolwa nangwa inge babena kupita mu meseko akatampe, kubikapotu ne bya malwa biponakotu mu ntanda. Pano twafwainwa kuba byepi inge mulongo nangwa nyenga wauba kintu nangwa waamba kintu kitukozha ku muchima? Nanchi bimye bimo kimukatazha kulekelako bakwenu mambo nyi? (Levi 19:18) Inge byo byo kiji, londelai luno lujimuno lwa kuba’mba: “Itekenyainga anwe bene na bene ne kwilekelako mambo umvwe umo uji na mambo na mukwabo. Byonkatu Yehoba byo emulekejileko mambo, ne anweba byo byo mwafwainwa kubanga.” (Kolo. 3:13) Kimye kyonse inge twalekelako mambo mulongo nangwa nyenga, tumwesha Shetu wa mwiulu amba tubena kusanta pa bukuzhi. w21.04 18 ¶12-13

Twakonsha kwingila na ngovu mwingilo wa Yehoba, kabiji twakonsha kukwasha bantu bavula kubatizhiwa. Bino twayuka kuba’mba bintu byonse byo twakonsha kuba, twibyuba na bukwasho bwa Yehoba. Kwi Apolosa ne mutumwa Paulo, tufunjilako ne kishinka kikwabo kya kuba’mba inge tuji na mingilo yavula mu kipwilo, ko kuba’mba tuji na mwingilo mukatampe wa kutundaika mutende. Tusanta bingi inge bakulumpe ne bankwasho mu kipwilo ke betukwashe kwikala mu mutende na bakwetu ne kukwatankana. Boba bino umvwe kya kuba lujimuno lonse lo bapana lwaimena pa Mambo a Lesa. Kabiji kechi bakeba kwimwesha’mba banema ne, pakuba bakwasha bonse mu kipwilo kukookela Kilishitu Yesu ne kulondela mu ngayo yanji. (1 Ko. 4:6, 7) Atweba bonse pa muntu pa muntu Lesa witupa bya bupe nangwa maana a kuba bintu. Twakonsha kumona nobe byo tuba kechi byanema ne. Bino bintu bicheche byo tuba pa kutundaika mutende bijitu nobe tonge ye baingijisha pa kusona kivwalo pa kuba’mba kikwatankane. Twayai atweba bonse twingilenga na ngovu kuchinuzhuka kwikyombesha na bakwetu. Kabiji twayai tutwajijile kutundaika mutende ne lukwatankano mu kipwilo.—Efi. 4:3. w21.07 19 ¶18-19

Mwakonsha kushiinwa kuba’mba mukamonañana jibiji na bantu bo mwatemwa bafwa. Mipolo yajijile Yesu kimye kyo atekeneshenga balunda nanji bajinga bingi na bulanda ke kishiino kimwesha kuba’mba ukebesha bingi kusangula bantu bafwa. (Yoa. 11:35) Mwakonsha kukwasha boba baji na bulanda. Yesu kechi wajijiletu pamo ne Mata ne Maliya ne, bino watelekele ku byo baambilenga kabiji wibatekeneshe. (Yoa. 11:25-27) Ne atweba byo byo twafwainwa kuba ku boba baji na bulanda. Mukulumpe mu kipwilo ku Australia, wa jizhina ja Dan waambile’mba: “Bakazhi bami byo bafwile, nakebewenga bingi lutundaiko. Balongo bavula ne bakazhi babo baiyanga kimye kyonse kabiji batelekanga inge mbena kwamba. Banswishanga kumwesha patoka bulanda bwami, kabiji kechi baumvwanga bumvu umvwe natendeka kujila ne. Kabiji bankwashangako ne mu bintu bimo, nabiji kungovwelako motoka, kumpotelako bintu, ne kuntekelako kajo inge nakankalwa kwiubila bino bintu amiwa mwine. Kabiji bandombelangako bimye byavula. Bamwesheshe kuba’mba bajinga balunda ba kine bo ‘wakonsha kuketekela mu kimye kya bya malwa.’”—Maana 17:17. w22.01 16 ¶8-9

Yehoba ukeba bintu bituwamina. (Maana 4:20-22) Inge witupa lujimuno kwingijisha Mambo anji, mabuku aimena pa Baibolo, nangwa mukwetu wakoma mu lwitabilo, ko kuba’mba ubena kumwesha byo etutemwa. (Hebe. 12:9, 10) Tai muchima pa lwine lujimuno, kechi pa jishinda jo belupainamo ne. Bimye bimo, twakonsha kumona’mba jishinda jo betupeelamo lujimuno kechi jawama ne. Ibyo, yense ubena kupana lujimuno wafwainwa kumona kuba’mba wilupana mu jishinda ja kuba’mba ye abena kupa lolo lujimuno wilutambwila bulongo. (Nga. 6:1) Pano bino, inge yetu babena kujimunako, twafwainwa kuta muchima pa byambo, nangwa kya kuba twamona’mba kechi bebyamba mu jishinda jawama ne. Twakonsha kwiipuzha atweba bene amba: ‘Nangwa kya kuba kechi natemwa jishinda jo bampeelamo lujimuno ne, nanchi mujipo bishinka mu byambo byo baamba nyi? Nanchi nakonsha kulubako ku bumbulwa kulumbuluka bwa muntu wampa lujimuno ne kuta muchima pa byambo byo aamba nyi?’ Ke kintu kya maana kumonapo jishinda jo twakonsha kumwenamo mu lujimuno lo betupa. w22.02 12 ¶13-14

Yehoba wayuka’mba twafwainwa kwingila na ngovu pa kuba’mba tuleke ndangulukilo ne miteeto yatama, kabiji papita kimye kyabaya. (Sala. 103:13, 14) Nangwa byonkabyo, kupichila mu Mambo anji, mupashi wazhila, ne mu jibumba janji, Yehoba witupa maana, bulume, ne kwitukwasha pa kuba’mba tupimpule bumuntu bwetu. Ingijishainga Baibolo pa kwipesapesa anweba bene. Mambo a Lesa aji nobe kimbonyi; akonsha kwitukwasha kupesapesa milanguluko yetu, ñambilo, ne byubilo byetu. (Yako. 1:22-25) Kabiji Yehoba kimye kyonse winengezha kwimukwasha. Ye wayuka bulongo bya kwimukwasha mambo wayuka biji mu muchima wenu. (Maana 14:10; 15:11) Onkao mambo, ikalai na muteeto wa kulomba kwi aye ne kufunda Mambo anji pa juba pa juba. Shiinwai kuba’mba malamuna a Yehoba awama. Twakonsha kumwenamo mu bintu byonse Yehoba byo etukambizha kuba. Aba balondela malamuna a Yehoba banemekwa, bayuka ene mambo o baikelako, kabiji bekala na lusekelo lwa kine.—Sala. 19:8-11. w22.03 4 ¶8-10

Tupopwela Yehoba kimye kyo tushimika ne kuwamisha mapunzha a kupwijilapo. Baibolo waamba’mba mwingilo wa kulenga tente wa lusambakeno ne bintu byajingamo wajinga “mwingilo wazhila.” (Lupu. 36:1, 4) Ne lelo jino, Yehoba umona mwingilo wa kushimika Mazubo a Bufumu ne bishimikwa bikwabo bya Lesa amba mwingilo wazhila. Pa kwingila ino mingilo, balongo ne banyenga bamo bengila maola avula bingi. Tusanchila bingi bano balongo ne banyenga pa kwipana kwingila uno mwingilo utundaika Bufumu. Kabiji bengila ne mwingilo wa kusapwila. Bamo bakeba ne kwingilako bupainiya. Onkao mambo, bakulumpe mu kipwilo bakonsha kumwesha’mba babena kutundaika mwingilo wa buntungi kupichila mu kuswisha bano balongo ne banyenga kwingilako bupainiya inge bafikizha bikebewa. Umvwe twayuka mwingilo wa buntungi nangwa ne, atweba bonse twakonsha kwingilako mwingilo wa kulama butooto bishimikwa bya Lesa ne kuwamisha paonaika. w22.03 22 ¶11-12