December

Yesu waesakenye bulunda bo ajinga nabo na baana banji ba bwanga na bulunda bwikala pa kafunga na mikooko yanji. (Yoa. 10:14) Ino ngesakenyo yayilamo bingi. Mikooko yayuka kafunga wayo kabiji yumvwina byo amba. Kañenda umo wimwenejile kino kishinka. Waambile’mba: “Twakebelenga kukopa mikooko kabiji twakebelenga’mba iye kubwipi na ko twajinga. Bino kechi yaishile ko twajinga ne, mambo kechi yayukile mawi etu ne. Bino nsongwalume wajinga kafunga wayo byo aishile ne kwiita, yamulondejile.” Kyamwekejile uno kañenda kituvululamo byambo byaambile Yesu pa mikooko yanji, ko kuba’mba baana banji ba bwanga. Waambile’mba: “Ikomvwa jiwi jami.” Bino Yesu uji mwiulu. Pano twakonsha kumvwa byepi jiwi janji? Jishinda jimo jo tumvwinamo jiwi ja Nkambo yetu ke kupichila mu kwingijisha mafunjisho anji mu bwikalo bwetu.—Mat. 7:24, 25. w21.12 16 ¶1-2

Saka akyangye kwikala mwina Kilishitu, mutumwa Paulo wakanamine kabiji wamanyikile bingi bena Kilishitu. Bino mu kuya kwa kimye, waishile kuyuka’mba byo aubilenga byatamine, kabiji waswile kupimpula byubilo byanji. (1 Timo. 1:12-16) Na bukwasho bwa Yehoba, Paulo waikele kafunga wipelula, wa butemwe ne kifyele. Waketekejile kuba’mba Yehoba ukamulekelako mambo. (Loma 7:21-25) Paulo wayukile kuba’mba kechi wakonsheshe kubangatu byawama kimye kyonse ne. Pakuba waingijile na ngovu kwikala na byubilo bya bwina Kilishitu ne kuketekela’mba Yehoba ukamukwasha kwingila bulongo mwingilo wanji. (1 Ko. 9:27; Fili. 4:13) Bakulumpe mu kipwilo kechi bebatongola na mambo a kuba’mba baoloka ne. Nangwa byonkabyo, Yehoba ukeba’mba baswenga byo balubankanya, ne kuwamishako byubilo byabo. (Efi. 4:23, 24) Mukulumpe mu kipwilo wafwainwa kwingijisha Mambo a Lesa pa kuba’mba amukwashe kumona po akonsha kuwamishako. Umvwe wauba bino, Yehoba ukamukwasha kwikala na lusekelo ne kwikala mukulumpe wingila bulongo.—Yako. 1:25. w22.03 29-30 ¶13-15

Twakonsha kuba byepi inge twayuka’mba twazhachisha mukwetu wa mu lwitabilo? Twafwainwa kuvuluka kuba’mba twafwainwa kutemwa balongo betu. (Yako. 2:8) Kabiji twafwainwa kulomba kwi Yehoba na muchima yense, kumusashijila kuba’mba etukwashe kuleka kuzhachisha bakwetu. Twakonsha kuba byo twalomba kupichila mu kwikalangako na kimye kya kwisamba na muntu ye twazhachishe. Twakonsha kumwipuzha kwingila nanji mu mwingilo nangwa kumwita kwiya na kujiila pamo kajo. Inge twayuka bulongo bwikalo bwa mulongo, kiketukwasha kulondela Yehoba ne Yesu kupichila mu kuta muchima pa byubilo byanji byawama. Inge ketube bino, tumwesha kuba’mba tubena kumvwina mukambizho wa kafunga wetu wawama wa kuleka kuzhachisha bakwetu. Byonkatu mikooko byo yumvwa jiwi ja kafunga wayo, ne baana ba bwanga nabo bomvwa jiwi ja kwa Yesu. Umvwe tuji mu “kajitanga kacheche” nangwa “mikooko ikwabo,” twayai tutwajijile kumvwa jiwi ja kafunga wawama ne kumukookela.—Luka 12:32; Yoa. 10:11, 14, 16. w21.12 19 ¶11; 21 ¶17-18

Lehoboma byo aikele mfumu wa bena Isalela, bantu baishile kwi aye ne kumulomba kuba kintu kimo. Bamulombele kuba’mba ebapeezhezheko kisendwa kibatwikile shanji aye Solomone. Lehoboma waipwizhe bakulumpe ba mu Isalela kuba’mba bamubuuleko bya kukumbula bantu. Bano bakulumpe babuujile mfumu kuba’mba umvwe wauba byo bamulomba, bakatwajijila kumutundaika. (1 Mfu. 12:3-7) Pano bino, kyamweka Lehoboma kechi watondelwe na byo bamubuujile ne, onkao mambo, waipwizhe banabalume mo bakomenanga. Bamubuujile kuba’mba akanungileko bantu kisendwa kyabo. (1 Mfu. 12:9-11) Lehoboma byo aumvwine ino milanguluko ibiji yapusana, wafwainwe kwipuzha Yehoba mulanguluko ye afwainwe kulondela. Bino aye wafuukwilepo kulondela mulanguluko wamutokejile ku muchima ne kuba byamufunjileko bakwabo mo bakomenanga. Mu byo afuukulwilepo mwafumine malwa akabotoka kwi aye mwine Lehoboma ne ku bena Isalela. Ne atweba lujimuno lo tutambula kechi twakonsha kwilutemwa ne. Nangwa byonkabyo, inge luno lujimuno lwaimena pa Mambo a Lesa, twafwainwa kumvwina. w22.02 9 ¶6

Muntu wipelula ne kuyuka’mba kuji byo akankalwa kuba ulanguluka pa bintu byayuka banyike kechi kwikalatu na milanguluko ya kuba’mba bakyangye kuyuka bintu byavula ne. Kechi wafwainwa kumonanga banyike nobe babena kumukyombesha ne, bino wafwainwa kwibamonanga’mba ba mwingilo umo ne aye. Bakalume ba Lesa bakoma bamona kuba’mba banyike ke bupe bwafuma kwi Yehoba kabiji basanta pa mingilo yo bengila. Na mambo a kuba’mba bulume bwabo bubena kuya na kukepa, balongo bakoma basanchila bingi boba bakiji na bulume bwa bunsongwalume bepana kwingila mingilo ne kukwasha kipwilo. Muntu wanembwa mu Baibolo wa jizhina na Naomi ke muntu umo wakomene wasantanga pa bukwasho bwa mwanyike. Patanshi, Naomi waambijile mulokazhi wanji aye Luta kubwela ku kisemi kyanji. Bino Luta wakaine kusha Naomi kabiji bayile bonse ku Betelema. Naomi wasangalele bingi pa kumona kuba’mba Luta wipaine kuya nanji kabiji waswile bukwasho bwa kwa Luta. (Luta 1:7, 8, 18) Kabiji bano banabakazhi bonse babiji bamwenejilemo byawama. (Luta 4:13-16) Bakalume ba Lesa bakoma bepelula balondela byaubile Naomi. w21.09 10-11 ¶9-11

Shetu wa mwiulu wituyuka atweba pa muntu pa muntu byo twakonsha kuba. Kampe mwakonsha kuba bintu byavula kukila bantu bavula bo mwayuka ne kutemwa. Nangwa kechi mwakonsha kuba byavula byonka byubapo bakwenu ne, kampe na mambo a kuba’mba mwakota, mukolwakolwa, nangwa na mambo a mitembo ya kisemi. Kange mulefuulwe ne. (Nga. 6:4) Yehoba kechi ukavulama mingilo yenu ne. Inge ke mwingile papelela bulume bwenu na milanguluko yawama, mukasangajikanga muchima wa Yehoba. Yehoba uyuka milanguluko ya mu muchima wenu. Kabiji ukeba’mba mwikale na lusekelo, ne kutondwa na byo mubena kumwingijla papelela bulume bwenu. Tuji na mutende wa mu milanguluko mambo twayuka’mba Yehoba ukwasha bapopweshi banji umvwe ke bapite mu makatazho. (Isa. 41:9, 10) Kwambatu kine, tuji na bishinka byavula bitulengela kwikala na lusekelo byo tupopwela Shetu wa butemwe, yenka wafwainwa “kutambula lukumo ne buneme” kufuma ku bilengwa byanji byonse.—Lum. 4:11. w22.03 24 ¶16; 25 ¶18

Tukeba kulondela Yesu, pano bino, kechi twafwainwa kulefulwa inge twakankalwa kulondelatu suka Yesu ne. (Yako. 3:2) Mwana wa sukulu ulenga bipikichala kechi wakonsha kulondelatu suka mufunjishi wanji ne. Bino byo afunjilako ku byo alubankanya ne kwibikako kulondela mufunjishi wanji, utwajijila na kuwamishako. Po pamotu ne atweba, umvwe ke twingijishe bintu byo tubena kufunda pa lufunjisho lwa Baibolo lwa pa bunke, kwibikako kuwamisha bintu byo tulubankanya, tukakonsha kulondela bulongo mu ngayo ya kwa Yesu. (Sala. 119:59) Tubena kwikala mu ntanda muji bantu bavula betemwatu abo bene. Bino bantu ba Yehoba abo bapusanako. Atweba tukebesha kulondela muchima wa kwa Yesu wa kwipana kwingijila bakwetu, kabiji byo byo twafuukulapo kuba. (1 Pe. 2:21) Umvwe ke twibikeko kulondela muchima wa kwipana kwingijila bakwetu wa kwa Yesu, tukekala na lusekelo na mambo a kusangajika muchima wa Yehoba. w22.02 24 ¶16; 25 ¶18

Jishinda jimo Yehoba jo apainamo mikambizho ku bantu banji ke kupichila mu Mambo anji, Baibolo. Umvwe ke twikale na kimye kya kulanguluka languluka pa bintu bibena kwitufunjisha Yehoba, tukakookelanga lutangijilo lwanji ne kwingila bulongo mwingilo wa busapwishi. (1 Timo. 4:15, 16) Jishinda jikwabo Yehoba jo apainamo mikambizho ke kupichila mu “kalume wa kishinka kabiji wa maana.” (Mat. 24:45) Bimye bimo, uno kalume upana mikambizho yo tubula kumvwisha. Twakonsha kutambwila mikambizho yaamba pa byo twafwainwa kuba inge kwamweka bya malwa biponako bine byo tulanguluka’mba kechi byakonsha kumweka ku mpunzha kwetu ne. Twakonsha kuba byepi inge ke tumone nobe mikambizho yo betupa kechi yayilamo ne? Langulukai pa mashimikila akwabo a mu Baibolo o twatanga. Bimye bimo, bantu ba Lesa batambwijile mikambizho yamwekelenga nobe kechi yayijilemo ne, bino ibapulwishe.—Mito. 7:7; 8:10. w22.03 18-19 ¶15-16

Yesu wamwesheshe’mba wajinga na luketekelo lukatampe byo aambile byambo biji mu kinembelo kya lelo. Yesu wayukile’mba bwikalo bwanji bwa kulutwe bwaimenejile pe Yehoba, kabiji washiinwe kuba’mba Shanji ukamuvuluka. Twakonsha kufunjilako ka ku byambo byaambile Yesu? Mwafwainwa kutwajijila kwikala ba kishinka kwi Yehoba nangwatu inge bumi bwenu buji mu kizumba. Pa kuba’mba mube bino, mwafwainwa ‘kuketekela mwi Yehoba na muchima wenu yense.’ (Maana 3:5) Langulukai pe Joshua, Kamonyi wajinga na myaka 15 kabiji wajinga na kikola kibula kupwa. Wakaine kumubuka mu jishinda jilala mizhilo ya Lesa. Byo kwashajiletu pacheche kufwa, wabuujile bainanji amba: “Mama, amiwa nji mu maboko a Yehoba. . . . Nsakwimbuula kino Mama, kwa kubula nangwa kuzhinaukatu ne kuba’mba: Nayuka’mba Yehoba ukasangula. Wayuka milanguluko ya mu muchima wami, kabiji namutemwa bingi.” Atweba bonse pa muntu pa muntu twafwainwa kwiipuzha’mba, ‘Inge kya kuba napita mu bintu byakonsha kundengela kufwa na mambo a lwitabilo lwami, abya nkapana bumi bwami mu maboko a Yehoba ne kumuketekela kuba’mba ukamvuluka nyi?’ w21.04 12-13 ¶15-16

Yehoba ukosesha bantu banji kupichila mu mwingilo wa kusapwila. Kimye kyo tusapwila ku bantu bukine bwa mu Baibolo, tumvwa bingi bulongo nangwa kya kuba baswa kuteleka nangwa bakana. Na mambo a makatazho mu bwikalo, balongo ne banyenga bamo bakonsha kulanguluka’mba kechi bakonsha kwingila pakatampe mwingilo wa kusapwila ne. Umvwe byo byo mulanguluka, yukai kuba’mba Yehoba usanta bingi inge mwibikako kwingila papelela bulume bwenu. Yehoba umona kabiji usanta bingi pa muchima wa kukebesha kwingila mwingilo wa kusapwila nangwa kya kuba twikalatu pa nzubo na mambo a lukatazho lwa kwenda. Yehoba wakonsha kwitukwasha kusapwila ku babena kwitulama nangwa ku ba dokotala. Umvwe twaesakanya byo tubena kwingila mwingilo luno ne byo twaingilanga kala, twakonsha kulefulwa. Bino inge twamona Yehoba byo abena kwitukwasha luno, tukekala na bulume buketukwasha kuchinchika makatazho na lusekelo. Kechi twakonsha kuyuka kunwa ya bukine yo tubyala yakonsha kumena ne kukoma ne.—Sapwi. 11:6. w21.05 24-25 ¶14-17

Lwiso lwalengejile Mfumu Davida kulubako bintu byamupele Yehoba, kubikapo ne bunonshi, kutumbalala, ne kushinda balwanyi banji bavula bingi. Davida wasanchile kabiji waambile pa bintu byamupele Lesa amba: “Byavujisha kabiji bya kukankalwa kubala!” (Sala. 40:5) Bino pa kimye kimo, Davida waikele na lwiso kabiji wakebelenga bintu byavula kukila pa byamupele Yehoba. Nangwa kya kuba Davida wajinga na bakazhi bavula, bino watendekele kukeba kwikala na mwanamukazhi wasongwelwe ku muntu mukwabo nangwa kya kuba Yehoba waambile’mba kuba bino ke kintu kyatama bingi. Uno mwanamukazhi wajinga Batesheba, kabiji mwatawanji wajinga Uliya mwina Hiti. Davida walaajile ne Batesheba, kabiji waimichile. Kintu kyaubile Davida kyatama bingi, bino wanungilepo ne kikwabo kyakijilemo kutama. Waipayishe Uliya. (2 Sam. 11:2-15) Ñanyi kintu kyajinga mu milanguluko ya kwa Davida? Nanchi walangulukilenga’mba Yehoba kechi ubena kumona nenyi? Nangwa kya kuba Davida wajinga kalume wa Yehoba wa kishinka pa myaka yavula, bino kulutwe waikele na lwiso, kabiji lwiso lwamulengejile kumona malwa a kabotoka. Kyawaminekotu ke kya kuba’mba, mu kuya kwa kimye, Davida waswile mambo o alengele kabiji walapijile. Wasanchijile bingi Yehoba pa kumulekelako mambo.—2 Sam. 12:7-13. w21.06 17 ¶10

Twakonsha kulanguluka’mba kechi tuji na busendwe bwa kufunjisha muntu Baibolo ne. Kampe tulanguluka’mba twafwainwa kuyuka byavula nangwa kwikala mufunjishi wayuka kufunjisha apa bino twatendeka kufunjisha muntu. Inge byo byo mulanguluka, langulukai pa bintu bisatu byakonsha kwimukwasha kushiinwa’mba mwakonsha kufunjisha muntu Baibolo. Kitanshi, Yehoba wimumona’mba mwafikilamo kufunjisha bakwenu. Kya bubiji, Yesu yenka ye bapa “luusa lonse pa bintu bya mwiulu ne bya pano pa ntanda,” ye wimukambizha kufunjisha bantu. (Mat. 28:18) Kya busatu, basapwishi bakwenu bakonsha kwimukwasha. Yesu waketekejile mu bintu byamufunjishe Shanji kwamba, ne anweba byo byo mwafwainwa kuba. (Yoa. 8:28; 12:49) Kikwabo, mwakonsha kwipuzhako kalama wa jibumba jenu ja mwingilo, painiya wingila bulongo, nangwa musapwishi wayuka kufunjisha kwimukwashako kutaana muntu wa kufunjisha Baibolo ne bya kufunjisha. Jishinda jimo jakonsha kwimukwasha kwikala mufunjishi wawama ke kuyila pamo na basapwishi bakwenu kimye kyo baya na kufunjisha bantu Baibolo. w21.07 6 ¶12

Mpelo ya buno bwikalo byo yafwenya kala pepi, twafwainwa kukizhamo kuketekela jishinda Yehoba jo obilamo bintu. Mambo ka? Mambo mu kimye kya malwa akatampe, baketubuulanga bintu bikamwekanga nobe kechi byayilamo ne, nangwa nobe kechi byakonsha kwingila ne. Kechi tukomvwa jiwi ja Yehoba na kwamba ne atweba ne. Uketubuulanga bya kuba kupichila mu bantu bo atongola bamwimenako. Kino kechi kikekala kimye kya kukankazhama nangwa kuzhinauka ne kwiipuzha’mba, ‘Bino abye byo babena kwamba byafuma kwi Yehoba nyi, inyi milangulukotu ya balongo babena kwitutangijila?’ Ine. Nanchi mukaketekela mwi Yehoba ne jibumba janji pa kikye kimye kyanema nyi? Mukumbu waimena pa byo mumona mikambizho ifuma ku jibumba ja Lesa lelo jino. Inge mwaketekela mikambizho yo tutambula lelo jino, mukakonsha kuketekela ne mikambizho yo tukatambulanga mu kimye kya malwa akatampe. w22.02 6 ¶15

Gidiona ne banabalume 300 bo ajinga nabo Yehoba wibakwashishe kushinda balwanyi babo, kabiji kino kyakonsheshe kwibalengela kwitota. Banabalume bena Efelaimu bayile kwi Gidiona, kechi na kumusanchila ne, bino bayile na kumutobosha, mambo Gidiona kechi wibechileko kuba’mba bayile pamo na kulwa na balwanyi ba Lesa ne. (Mito. 8:1) Gidiona wibavulwilemo Yehoba byo ebakwashishe kuba bintu bikatampe. Kyafuminemo, bano banabalume “balekele kumukatazha.” (Mito. 8:3) Gidiona wipelwile pa kuba’mba bantu ba Lesa batwajijile kwikala mu mutende . Ku bena Efelaimu, tufunjilako kuba’mba kechi twafwainwa kuta muchima pa kutambula munema atweba bene ne, bino twafwainwa kuta muchima pa kunemeka Yehoba. Mitwe ya bisemi ne bakulumpe mu kipwilo, twakonsha kufunjilako kwi Gidiona. Inge muntu umo wazhingila pa kintu kyo twauba, twafwainwa kweseka kuyuka kyalengela yewo muntu kuzhingila. Kabiji twafwainwa kumutakaika pa bintu byo oba bulongo. Twafwainwa kwipelula pa kuba’mba tube bino. Pano bino, kintu kyanema ke kwikala mu mutende kechi kukeba kuyuka watamisha ne wabula kutamisha ne. w21.07 16-17 ¶10-12

Yehoba witunemeka pa kwitulenga mu kipasha kyanji. Byo kiji kuba’mba twalengwa mu kipasha kya Lesa, twakonsha kwikala na byubilo byanji byawama, nabiji butemwe, kifyele, bukishinka ne bololoke. (Sala. 86:15; 145:17) Inge twibikako kwikala na bino byubilo, tunemeka Yehoba ne kumupa lukumo. (1 Pe. 1:14-16) Kabiji inge ketube bintu bitokesha ku muchima Shetu wa mwiulu, twikala na lusekelo. Yehoba byo etulengele mu kipasha kyanji, witupele bulume bwa kwikala mu kisemi kyanji. Yehoba witunengezhejile muzhi wawama. Yehoba saka akyangye kulenga muntu mutanshi, wanengezhezhe ntanda kuba’mba pakekalenga bantu. (Yoba 38:4-6; Yele. 10:12) Na mambo a kuba’mba Yehoba uji na lusa kabiji mpanyi, witunengezhejile bintu byavula bingi byawama kuba’mba tukeyowenga. (Sala. 104:14, 15, 24) Bimye bimo, walangulukanga pa bintu byo alengele, kabiji “wibimwene’mba byawama.”—Nte. 1:10, 12, 31. w21.08 3 ¶5-6

Atweba bonse tuji na mwingilo wa kusapwila ne kufunjisha bantu kwikala ke baana ba bwanga. (Mat. 28:19, 20; Loma 10:14) Abya mubena kukeba kuwamishako busendwe bwenu mu uno mwingilo wanema bingi nyi? Ibikilai bikonkwanyi bya kufunda ne kwingijisha mafunjisho aji mu buloshuwa wa Kufunjisha. Kimye kyo mubena kulanguluka pa bikonkwanyi byo mwakonsha kwibikila, kechi mwafwainwa kulubako kikonkwanyi kyakilamo kunema kya kwikala na byubilo bitokesha Lesa ku muchima ne. (Kolo. 3:12; 2 Pe. 1:5-8) Kwambatu kine, atweba bonse tukeba kuba byavula mu mwingilo wa Yehoba kukila pa byo tubena kuba pa kino kimye. Mu ntanda ipya, tukamwingijilanga monse mo tukebela. Pa kino kimye, inge twateshako muchima kwingila mingilo yonka yo tuji nayo, tukekala na lusekelo lukatampe kabiji kechi tukomvwanga bibi ku muchima na mambo a kubula kwingilako mingilo imo ne. Ne kyakilamo kunema, tukaletanga munema ne lutotelo kwi Yehoba, “Lesa wa lusekelo.” (1 Timo. 1:11) Onkao mambo, twayai tumwenenga lusekelo mu mingilo yonka yo tuji nayo. w21.08 25 ¶18-20

Inge bemukomeshe ku bansemi Bakamonyi ba kwa Yehoba, mwafwainwa mwafunjile pe Yehoba saka mukijitu banyike. Bemufunjishe kuba’mba ye Mulenga, uji na byubilo byawama, ne kuba’mba ukeba kwalula ino ntanda ke paladisa. (Nte. 1:1; Byu. 17:24-27) Pano bino, bantu bavula kechi baitabila’mba Lesa ko aji nangwa’mba ye Mulenga ne. Pakuba baitabila’mba bumi bwatendekeletu bwine ne kwikala bilengwa byumi bikatampe. Bantu bamo baitabila bino ke bantu bafunda bingi. Bakonsha kwamba’mba sayansi yamwesha’mba byaamba Baibolo kechi bya kine ne, ne kuba’mba bantu babula kufunda nangwa babula maana bo betabila’mba kuji Mulenga. Nangwa kya kuba twi Bakamonyi ba kwa Yehoba babanda mu bukine, twafwainwa kutwajijila kukosesha lwitabilo lwetu. Umvwe ke tube bino, kechi baketutwala mungi “na buntemwa maana ne bujimbijimbi” bufunjisha bantu balengulula Mambo a Lesa ne.—Kolo. 2:8. w21.08 14 ¶1-3

Abela, Nowa, Abalahama, ne Yoba bamwesheshe’mba batemenwe Yehoba ne kumunemeka kupichila mu kwikala na lukookelo, lwitabilo ne muchima wa kwipana. Bebikileko kuba bikebewa pa kunemeka Yehoba, kabiji mpopwelo yabo yaitabijilwe kwi aye. Kabiji mu kuya kwa kimye, Yehoba wapele bena Isalela Mizhilo kupichila mwi Mosesa. Mu ino mizhilo mwajinga byavula byaambile pa byo bafwainwe kumupopwela. Yesu byo afwile ne kusangulwa, Yehoba walekeshe bantu kulondela Mizhilo ya Mosesa pa kumupopwela. (Loma 10:4) Bena Kilishitu balondela muzhilo wa katataka, ko kuba’mba “muzhilo wa Kilishitu.” (Nga. 6:2) Kukookela uno “muzhilo” kechi kulumbulula kumulabijila ne kulondela mikambizho yavula ne. Bino kulumbulula kulondela byaubanga Yesu ne mafunjisho anji. Lelo jino, bena Kilishitu nabo bebikako kulondela byaubanga Kilishitu pa kuba’mba basangajike muchima wa Yehoba ne ‘kukokoloka.’—Mat. 11:29. w22.03 20-21 ¶4-5

Yehoba uteleka ku baana banji inge babena kulomba. Yehoba watelekele ku milombelo yavula yalombanga Mwananji kimye kyo ajinga pano pa ntanda. Watelekele Yesu byo alombelenga pa kufuukulapo bintu bikatampe, nabiji kimye kyo asajilenga batumwa banji 12. (Luka 6:12, 13) Kabiji Yehoba watelekele Yesu byo alombelenga kimye kyo ajinga bingi na bijikila. Byo kwashajiletu pacheche kumusolola, Yesu walombele kwi Shanji pa lweseko lukatampe lwajinga pepi kumufikila. Yehoba kechi waumvwinetu byalombele Yesu ne, bino watumine ne malaika kwiya na kumukosesha. (Luka 22:41-44) Lelo jino, Yehoba umvwa milombelo ya bakalume banji, kabiji wibakumbula pa kimye kyafwainwa kabiji mu jishinda jawama. (Sala. 116:1, 2) Langulukai pa nyenga wa ku India byo emwenejile kino. Uno nyenga wajinga bingi na bijikila, kabiji walombele kwi Yehoba na muchima yense pa makatazho o apichilengamo. Wanembele’mba: “Mutanchi wa JW Broadcasting^® wa May 2019 waambilenga pa bya kuba na bijikila, waishijile pa kimye kyafwainwa. Uno mutanchi ye wajinga mukumbu wa milombelo yami.” w21.09 21-22 ¶6-7

Fwanyikizhai byo kyakatezhe ku bena Kilishitu batanshi kusha bintu byabo byonse ne kuya na kutendeka bwikalo kipya kipya. Bafwainwe kwikala na lwitabilo ne kuketekela mwi Yehoba kuba’mba ukebakwasha kwikala na bintu byanema bikebewa mu bwikalo. Bino kwajinga kintu kyafwainwe kwibakwasha. Byo kwashajile myaka itanu bena Loma kwiya na kutaya Yelusalema mu kañumbwañumbwa, mutumwa Paulo wafunjileko Bahebelu amba: “Mwikale babula kutemwa mali, sekelainga mu bintu byonka byo muji nabyo. Mambo aye waamba’mba: ‘Kechi nkakusha ne, kabiji kechi nkakulekelela ne.’ Kuba’mba tukose ne kwamba’mba: ‘Yehoba ye nkwasho wami; kechi nakonsha kuchina ne, muntu angube ka.’” (Hebe. 13:5, 6) Aba baumvwijile mafunde a kwa Paulo bena Loma saka bakyangye kwiya na kulukuka muzhi kechi kibakatezhe kutendeka kwikala bwikalo bwa katataka ku mpunzha ikwabo kwabujile bintu byavula ne. Bashiinwe kuba’mba Yehoba ukebakwasha kwikala na bintu byanema bikebewa mu bwikalo. w22.01 4 ¶7, 9

Inge twalanguluka pa muntu uji na lusa, twakonsha kufwanyikizha muntu wa kifyele, wawama muchima, kabiji mpanyi. Kabiji twakonsha ne kulanguluka pa jishimikila jaambile Yesu ja mwina Samaliya wajinga na kifyele. Muntu wa mu kisaka kikwabo ‘waubijile lusa’ Muyudea ye bapumine ku bangivi ne kumwangata bintu. Mwina Samaliya ye “wamubijile lusa” uno Muyudea ye bakozhezhe kabiji wamukwashishe. (Luka 10:29-37) Kino kishimpi kibena kwitufunjisha pa kyubilo kyawama kya lusa kiji na Lesa wetu. Lesa witubila lusa mambo witutemwa, kabiji witumwesha kino kyubilo pa juba pa juba mu mashinda avula. Kuji ne jishinda jikwabo muntu mo akonsha kumweshesha lusa. Muntu wa lusa wakonsha kufuukulapo kubula kukambula walenga mambo. Jino jo jishinda jikwabo Yehoba jo etumwesheshamo lusa. Nyimbi wa masalamo waambile’mba: “Aye kechi witubila monka mwayila mambo etu [ne].” (Sala. 103:10) Pano bino, pa bimye bimo Yehoba upana lujimuno lwakosa bingi ku muntu walenga mambo. w21.10 8 ¶1-2

Yehoba umweshatu butemwe bubula kwaluka ku boba baji na bulunda bwakosa ne aye, ko kuba’mba bakalume banji. Kino kyamwekela mu byambo byaambile Mfumu Davida ne ngauzhi Danyela. Davida waambile’mba: “Twajijilai kumwesha butemwe bwenu bubula kwaluka ku boba bemuyuka.” “Butemwe bwa Yehoba bubula kwaluka bo bwa myaka ne myaka ku boba bamwakamwa.” Kabiji Danyela waambile’mba: “Anweba Yehoba Lesa wa kine, [mumwesha] butemwe bubula kwaluka ku boba bemutemwa kabiji balama mikambizho yenu.” (Sala. 36:10; 103:17; Da. 9:4) Abino byambo byanembelwe na lutangijilo lwa mupashi wa Lesa, bimwesha kuba’mba Yehoba umwesha butemwe bubula kwaluka ku bakalume banji mambo bamuyuka, bamwakamwa, bamutemwa, kabiji balama mikambizho yanji. Yehoba umwesha butemwe bwanji bubula kwaluka ku bantu banji, bapopweshi ba kine. Saka tukyangye kutendeka kwingijila Yehoba, Lesa witumwesheshe butemwe bonka bo amwesha bantu bonse. (Sala. 104:14) Nangwa byonkabyo, byo tuji bapopweshi banji, witumwesha ne butemwe bwanji bubula kwaluka. w21.11 4 ¶8-9

Nangwa bantu betukanjikizhe kuba bintu bya mutundu ka, atweba twafuukulapo kukookela byambo byaambile Yesu biji peulupo. Lelo jino, bantu bavula batemwa kuteleka ku byamba bantangi ba bupopweshi baya nkuwa. Banemeka bingi bano bantangi kya kuba bebapopwelatu nobe Lesa. Bantu bavula bayula mu machechi abo, bapota mabuku abo, kabiji bebapa mali avula bingi nangwa kupana ku bipamo byo batundaika. Bantu betabila byambo byonse byo bamba. Bantu baya mu machechi abo basangalala bingi pa kumvwa byamba bano bantangi. Bamona bano bantangi nobe Yesu. Bino bapopweshi ba Yehoba ba kine kechi balondela bantu ne. Nangwa kya kuba tunemeka boba betutangijila, bino tulondela lufunjisho lwa kwa Yesu lwa kuba’mba: “Anweba bonse mwi balongo na balongo.” (Mat. 23:8-10) Kechi tupopwela bantu ne, nangwatu bantangi ba bupopweshi nangwa bantangi ba makafulumende. Kabiji kechi tutundaika bupopweshi bwabo nangwa milaye ya bamulwila ntanda ne. Kechi twivwanga mu bya ino ntanda ne. Na mambo a bino bintu, atweba twapusanako na mabumba avula etela’mba bena Kilishitu.—Yoa. 18:36. w21.10 20 ¶6-7

Mwina Kilishitu yense ukeba kwikala wazhila wafwainwa kumona kuba’mba kafwako kintu nangwa muntu ye afwainwa kunemeka kukila bulunda bwanji ne Lesa ne. Kabiji na mambo a kuba’mba tutelwa’mba Bakamonyi ba kwa Yehoba, twafwainwa kutwajijila kuchinuzhuka byubilo byakonsha kulengulwisha nangwa kuleta mwenga pa jizhina janji jazhila. (Levi 19:12; Isa. 57:15) Bena Isalela bamweshanga’mba Yehoba ye Lesa wabo kupichila mu kukookela mizhilo yavula bingi. Pa Bena Levi 18:4 paamba’mba: “Mwafwainwa kulondela mizhilo yami ne kulama malamuna ami ne kwendela monka. Amiwa yami Yehoba Lesa wenu.” Kitango 19 kyaambapo “malamuna” amo alondelanga bena Isalela. Byepelo 5-8, 21, 22 byaamba pa bitapisho bya banyama. Bena Isalela bafwainwe kupananga bino bitapisho mu jishinda jibula ‘kuzhilulula kintu kyazhila kya kwa Yehoba.’ Kutanga bino byepelo kwafwainwa kwitulengela kukebesha kutokesha Yehoba ku muchima ne kumupa “bitapisho bya kumutota” byaitabilwa kwi aye byonka byo betutundaika pa Bahebelu 13:15. w21.12 5-6 ¶14-15

Bakitwala batwela mu masongola bakonsha kufunjilako ku bakwabo baji mu masongola bya kuketekela mwi Yehoba. Bamo baji mu masongola baingila mwingilo wa kimye kyonse pa myaka yavula. Inge mukeba kwingilako pakatampe mwingilo wa Yehoba, mwakonsha kwibepuzha bemubuulako bya kuba. Ajino ke jishinda jikwabo jo mwakonsha kumwesheshamo’mba mwaketekela mwi Yehoba. (Maana 22:17, 19) Yukai kuba’mba masongola ke bupe bwafuma kwi Yehoba. (Mat. 19:5, 6) Yehoba ukeba baji mu masongola kwiyowanga buno bupe. Anweba bakitwala mwatwela mu masongola, langulukai pa byo mubena kwingijisha bumi bwenu. Nanchi mubena kuba bintu bimwesha’mba musanta pa bupe bwimupa Yehoba nyi? Mubuulai Yehoba mu lulombelo. Kebai mu Mambo anji mafunde o mwakonsha kwingijisha mu bintu byo mubena kupitamo. Kabiji umvwinainga bimufundako Yehoba. Shiinwai kuba’mba mukekala na lusekelo mu masongola enu inge mwatangizhako mwingilo wa Yehoba mu bwikalo bwenu! w21.11 19 ¶16, 18

Yakoba kechi wimwenenga’mba wanema kukila bakwabo ne. Yakoba kechi walangulukanga’mba wanemene kukila bakwabo bena Kilishitu na mambo a kuba’mba wajinga nkasanji Yesu, nangwa na mambo a mingilo yanema yo aingilanga ne. Watelanga bakwabo ba mu lwitabilo amba “balongo bami batemwe.” (Yako. 1:16, 19; 2:5) Kechi walengelanga bakwabo kulanguluka’mba aye waoloka ne. Lufunjisho: Vulukainga kuba’mba atweba bonse twi bandengamambo. Kechi twafwainwa kulangulukanga’mba kampe twanema kukila boba bo tufunjisha ne. Mambo ka? Inge kya kuba twalengela muntu ye tufunjisha Baibolo kulanguluka’mba atweba kechi tulubankanyapo ne, wakonsha kulanguluka’mba kechi wakonsha kufikizha bikeba Lesa ne. Bino inge twamukwasha kuyuka’mba bimye bimo kitukatezhe kulondela mafunde a mu Binembelo ne kulumbulula Yehoba byo etukwashishe kushinda makatazho ano, tukakwasha muntu ye tufunjisha Baibolo kumona kuba’mba ne aye wakonsha kwingijila Yehoba. w22.01 11-12 ¶13-14

Umvwe ke tulanguluke nobe Yesu, tukamweshanga byubilo byanji. (Hebe. 1:3) Twakonsha kulanguluka’mba: ‘Yesu kechi mbulwa kulumbuluka ne. Kechi nakonsha kwikala byonka byo aji ne.’ Inge byo byo mulanguluka, vulukainga bino bishinka: Kitanshi, mwalengelwe kwikala byonka biji Yehoba ne Yesu. Onkao mambo, mwakonsha kwikala byonka byo baji. (Nte. 1:26) Kya bubiji, mupashi wazhila wa Lesa ke bulume bukatampe bwakila bintu byonse. Na bukwasho bwa uno mupashi, mwakonsha kuba bintu byo mwakonsha kukankalwa kuba na bulume bwenu. Kya busatu, Yehoba kechi uketekela’mba mwakonsha kumweshangatu suka suka bipangwa byonse bya mupashi pa kino kimye ne. O ene mambo Shetu wa butemwe o anengezhezha myaka 1,000 ya kukwasha boba bakekala pano pa ntanda kwikala balumbuluka. (Lum. 20:1-3) Yehoba kyo abena kukeba kwi atweba pa kino kimye ke kwibikako papelela bulume bwetu ne kuketekela mu bukwasho bwanji. w22.03 9 ¶5-6

Kulomba kechi jo jishindatu jo twingijisha pa kuba’mba tukoseshe bulunda bwetu na Yehoba ne. Kufunda Mambo a Lesa ne kupwila kimye kyonse nabyo byakonsha kwitukwasha kufwenya kwipi ne Lesa. Abya kujipo byo mwakonsha kuba pa kuba’mba mwiyowenga kufunda byambo bya Lesa ne kupwila nyi? Ishikishai’mba, ‘Ñanyi bintu bimvulañanya kimye kya kupwila nangwa kimye kyo mbena kufunda byambo bya Lesa?’ Nanchi kutambwila mafoni, kutambwila tubyambo pa foni nangwa kwitumina tubyambo nangwa pa biñambañamba bikwabo nyi? Umvwe mwamona’mba mubena kukankalwa kutako muchima kimye kyo mubena kufunda nangwa kimye kyo mubena kupwila, lombai Yehoba kwimukwasha. Kyakonsha kwimukatazha kuleka kulanguluka pa bijikila byenu ne kuta muchima pa Mambo a Lesa. Pano bino, kyanema kuta muchima pa Mambo a Lesa. Lombai mutende wa Lesa ukalama muchima ne “milanguluko” yenu.—Fili. 4:6, 7. w22.01 29-30 ¶12-14

Mfumu Uzaya wakaine lujimuno. Watwelele mu nzubo ya Yehoba ku mpunzha ko baswishishetu bañanga, kabiji wakebelenga kusoka bya kufutumuna pa kya kusokelapo bya kufutumuna. Bañanga ba Yehoba bamwambijile’mba: “Anweba ba Uzaya, kechi mwafwainwa kusoka bya kufutumuna kwi Yehoba ne! Bañanga bo bonkatu bafwainwa kusoka bya kufutumuna.” Uzaya waubile byepi? Inge kya kuba wipelwile ne kuswa lujimuno ne kufumamo bukiji mu nzubo ya Lesa, Yehoba kampe inge wamulekejileko mambo. Bino “Uzaya . . . wazhingijile bingi.” Mambo ka o akanyijile lujimuno? Kyamweka walangulukilenga’mba byo ajinga mfumu, wajinga na luusa lwa kuba kintu kyonse kyo akeba. Bino Yehoba kechi wikiswishishe ne. Na mambo a kuba waubile kintu kyo babujile kumuswisha kuba, Uzaya wakolelwe mbumba kabiji “waikele na mbumba kufikatu ne byo afwile.” (2 Moba 26:16-21) Kyamwekejile Uzaya kitufunjisha kuba’mba nangwa tuji pa kifulo kikatampe nangwa ne, inge twakana lujimuno, Yehoba uketukana. w22.02 9 ¶7

Muntu utangijilwa na “bumuntu bwa kala” javula ulangulukatu pa kuba bintu bya buntunshi. (Kolo. 3:9) Wakonsha kwitemwatu aye mwine, kechi usanta ne, kabiji wikala na bwitote. Wakonsha kutemwa kutamba bya mulekese ne mafilimu a bulalelale nangwa a bukapondo. Bino wakonsha kwikala ne na byubilo byawama, kabiji wakonsha ne kwizhachisha pa bintu byatama byo amba nangwa byo oba. Pano bino, kechi wibikako kupimpula milanguluko ne byubilo byanji ne. (Nga. 5:19-21; 2 Timo. 3:2-5) Twibambulwa kulumbuluka, onkao mambo, kafwako wakonsha kufumya milanguluko yonse yatama mu muchima ne. Bimye bimo, twakonsha kuba kintu nangwa kwamba kintu kyo twakonsha kwilangulushapo. (Yele. 17:9; Yako. 3:2) Bino inge twavuula bumuntu bwa kala, tukashinda miteeto ne byubilo bya buntunshi. Tukapimpula bwikalo bwetu.—Isa. 55:7. w22.03 3 ¶4-5

Anweba bakulumpe mu kipwilo, tai muchima pa byubilo byawama biji na balongo ne banyenga. Mulongo nangwa nyenga yense ke mbulwa kulumbuluka, bino uji na byubilo byawama byo twakonsha kutemwa. Kya kine, bakulumpe mu kipwilo bimye bimo bafwainwa kujimunako mulongo nangwa nyenga. Bino byonka byajinga mutumwa Paulo, bakulumpe bafwainwa kwibikako kubula kuta muchima pa byambo byatama nangwa byubilo byatama byamwesha yeo muntu. Bino bafwainwa kuta muchima pa yeo muntu byo atemwa Yehoba, byo achinchika pa kwingijila Lesa, ne byo ebikako kuba kyawama. Bakulumpe inge bata muchima pa byubilo byawama bya bakwabo, balengela balongo ne banyenga kuyuka’mba bebatemwa ku bonse mu kipwilo. Vulukainga kuba’mba Yehoba wayuka’mba mwi bambulwa kulumbuluka, bino ukeba’mba mwikale ba kishinka. (1 Ko. 4:2) Paulo byo aingilanga mwingilo wanji na ngovu ne bukishinka, wasangajikanga bingi Yehoba ku muchima. Mwafwainwa kuketekela’mba Lesa wanemeka mwingilo ye mwingila. Yehoba kechi “[ukuvulama] mingilo yenu ne butemwe bo mwamwesha jizhina janji ne, byo mwibengijilenga bazhijikwa ne byo mwatwajijila na kwibengijila.”—Hebe. 6:10. w22.03 31 ¶19, 21