Ikalai Bakosa Nobe Babena Kumona Aye Ubula Kumweka!
‘[Mosesa] wakosele nobe wamwenenga Aye ubula kumweka.’—BAHEBELU 11:27.
1. Mu Busapwishi bwanji bwa pa Mutumba, ñanyi byambo Yesu byo aambile pe Lesa?
YEHOBA ye Lesa ubula kumweka. Kimye Mosesa kyo amulombele’mba amone lukumo Lwanji, Yehoba wamukumbwile’mba: “Kechi wakonsha kumona kilungi kyami ne; mambo kafwako muntu wakonsha kummona amiwa ne kwikala na bumi ne.” (Kulupuka 33:20) Kabiji mutumwa Yoano wanembele’mba: “Kafwako muntu wamwenepo Lesa nangwa pachechetu ne.” (Yoano 1:18) Nangwatu Yesu Kilishitu byo ajinga mu bumuntu pano pa ntanda, naye kechi wamumonanga Lesa na meso ne. Mu Busapwishi bwanji bwa pa Mutumba, Yesu waambile’mba: “Ba michima yatoka to bo batokwa: mambo bakamumona Lesa.” (Mateo 5:8) Nanchi Yesu wikitazhizhe muka?
2. Mambo ka o tubujila kumumona Lesa na Meso?
2 Binembelo byamba’mba Yehoba ye Mupashi ubula kumweka. (Yoano 4:24; Kolose 1:15; 1 Timoti 1:17) Yesu kechi wikitazhizhenga mu kuba’mba atweba bantu twakonsha kumumona Yehoba na meso etu ne. Kya kine, bena Kilishitu bashingwa bamumona Lesa kimye kyo basangulwa kuya mwiulu na kwikala bilengwa bya mupashi. Bino bantu “ba michima yatoka” baketekela kwikala pano pa ntanda myaka ne myaka, nabo ‘bamumona’ Lesa. Bamumona byepi?
3. Bantu bakonsha kumona byepi byubilo bimo bya Lesa?
3 Tufunda Yehoba byo aji kupichila mu kumona bintu byoalenga. Mu jino jishinda tukomoka pa kumona bulume bwanji byo buji ne kwitaba’mba kine Lesa ye Mulenga walengele byonse. (Bahebelu 11:3; Lumwekesho 4:11) Pa mambo a kino, mutumwa Paulo wanembele’mba: “[Byubilo bya Lesa] bibula kumweka byamwekesha ne ku ntendekelo ya panopantanda, kasa bimweka monka mu byo alengele, bo bulume bwanji bwa myaka ne buLesa bwanji.” (Loma 1:20) Onkao mambo, kumona Lesa kwaambile Yesu kulumbulula kwikala na bulume bwa kumona byubilo bya Yehoba. Twafwainwa kwikala na maana alumbuluka pa kuba’mba twibimonenga ku mupashi na ‘meso a muchima.’ (Efisesa 1:18) Kabiji byambo ne byubilo bya kwa Yesu nabyo bisolola byavula pe Lesa. Yesu kyo kyo aambijile’mba: “Awa wammona amiwa wamona ne Batata.” (Yoano 14:9) Yesu wamwesheshe bulongo byubilo bya Yehoba. Onkao mambo kuyuka byubilo bya kwa Yesu ne mafunjisho anji kwakonsha kwitukwasha kumona byubilo bimo bya Lesa.
Kwikala wa Bumupashi Kyanema Bingi
4. Bantu bavula lelo jino bamwesha byepi kubula bumupashi?
4 Lelo jino, kechi bavula baji na lwitabilo ne bumupashi bwa kine ne. Paulo waambile’mba ‘kechi bonse baji na lwitabilo ne.’ (2 Tesalonika 3:2) Bavula batesha michima yabo pa bya kusakasaka byabo kabiji kechi baitabila mwi Lesa ne. Byubilo byabo bya bundengamambo ne kubula bumupashi bibalengela kubula kumumona na meso a muchima, mambo mutumwa Yoano waambile’mba: “Aye uba byabipa kechi wamonapo Lesa ne.” (3 Yoano 11) Na mambo a kuba bantu ba uno mutundu kechi bamumona Lesa na meso abo ne, boba bintu uba nobe kechi ubena kwibamona ne. (Ezikyo 9:9) Balengulula bintu bya ku mupashi, kyo kyo babujila kufunda ‘maana a kuyuka Lesa.’ (Byambo bya Mana 2:5) O ene mambo Paulo o anembejile’mba: ‘Muntu wa mu buntunshi kechi utambula bya Mupashi wa Lesa ne: mambo bo bumbulwamaana kwi aye; kabiji kechi wakonsha kwibiyuka ne, mambo bebipima ku mupashi.’—1 Kolinda 2:14.
5. Bantu bata michima yabo ku bintu bya ku mupashi bayuka ñanyi kishinka?
5 Umvwe twatesha muchima pa bintu bya ku mupashi, tukayuka kuba’mba nangwa Yehoba kechi ukeba bilubo mo tuji ne, uyuka umvwe ke tube byatama ne kusakasaka kubi. Kya kine, “mashinda a muntu aji ku meso a Yehoba, ne aye utalatala konse konse ko aya.” (Byambo bya Mana 5:21) Umvwe twabula kuba byawama na mambo a bundengamambo, twafwainwa kulomba lulekelo lwa mambo kwi Yehoba mambo twamutemwa kabiji kechi tukeba kumuzhingijisha ne.—Masalamo 78:41; 130:3.
Kika Kitulengela Kukosa?
6. Kwikala bakosa kulumbulula ka?
6 Nangwa kya kuba kechi tumumona Yehoba na meso etu ne, tuvulukenga’mba kimye kyonse witumona. Kuyuka’mba koaji ne kushiinwa’mba uji kwipi na bonse bamwita, kiketulengela kwikala bakosa babula kutelengela mu bukishinka bwetu kwi aye. (Masalamo 145:18) Twikale nobe Mosesa, awo Paulo ye anembele’mba: ‘Ko ku lwitabilo ko ashile ntanda ya Ijipita, ne kuchina bukaji bwa mfumu ne: mambo aye wakosele nobe wamwenenga aye ubula kumweka.’—Bahebelu 11:27.
7, 8. Kika kyakoseshe Mosesa pa kumonañana ne Felo?
7 Byo aingijilenga mwingilo ye amupele Lesa wa kufumya bena Isalela mu buzha ku Ijipita, javula Mosesa wamonañenenga ne Felo mu kipango kyanji mo ajinga na babinemanga banji. Kimweka nobe ku bibumba bya kipango kyanji kwalamikilwe ne bankishi. Bino nangwa kya kuba Yehoba kechi wamwekelenga ne, Mosesa wayukile’mba koaji, kukila bankishi bonse baimejilengako balesa ba bubela ba bena Ijipita. O ene mambo Mosesa kyo abujile kuchiina Felo!
8 Kika kyamukoseshe Mosesa kuya javula na kumonañana ne Felo? Binembelo bitubula’mba “Mosesa wajinga kimote kukila bantu bonse bajinga pano panshi.” (Kubala 12:3) Kwakubula nangwa kuzhinaukatu ne, kukosa ku mupashi ne kushiinwa’mba Lesa wajinga nanji kwakoseshe Mosesa kwimenako ‘Aye ubula kumweka’ kwi Mfumu mukaji wa bena Ijipita. Mu ñanyi mashinda amo aba ‘bamona’ Lesa ubula kumweka mo bamweshesha’mba baji na lwitabilo mwi aye lelo jino?
9. Ñanyi jishinda jimo jo twafwainwa kutwajijilamo kwikala bakosa?
9 Jishinda jimo ja kumwesheshamo lwitabilo ne kutwajijila kwikala bakosa nobe babena kumona Aye ubula kumweka ke ja kusapwila na kuchinchika nangwa kya kuba tupita mu lumanamo. Yesu wajimwine baana banji ba bwanga amba: “Bakemushikwa ku bonse na mambo a jizhina jami.” (Luka 21:17) Kabiji wibabujile’mba: “Muzha kechi wakila nkambo yanji ne. Inge bampachile amiwa, kabiji bakemupata ne anweba.” (Yoano 15:20) Yesu waambile kine, mambo pa nyuma ya lufu lwanji, baana banji ba bwanga bebapachile kya kine kine, kwibakwata ne kwibapuma. (Byubilo 4:1-3, 18-21; 5:17, 18, 40) Nangwa kya kuba lumanamo lwayilenga na kubailako, batumwa ba kwa Yesu ne baana banji ba bwanga bakwabo batwajijile na kusapwila mambo awama na kuchinchika.—Byubilo 4:29-31.
10. Luketekelo lo tuji nalo kuba’mba Yehoba witulama lwitukwasha byepi mu mwingilo wetu?
10 Byonka byajinga Mosesa, baana ba bwanga ba kwa Yesu kechi bachiinenga balwanyi babo bo bamwenenga na meso ne. Baana ba bwanga ba kwa Yesu bajinga na lwitabilo mwi Lesa kabiji kino kibalengejile kuchinchika ku lumanamo lo bapichilengamo. Ee, batwajijile kwikala bakosa nobe babena kumona Aye ubula kumweka. Ne atweba lelo jino tubena kuchinchika mambo twayuka namba Yehoba ubena kwitulama ne kwitukosesha kwingila mwingilo wa kusapwila Bufumu kwa kubula kuchina. Mambo a Lesa amba kuba’mba “moyo wa kuchina bantu wauba nobe wita obe mwine kitewa; pakuba awa uketekela Yehoba bakamukankalwa.” (Byambo bya Mana 29:25) Onkao mambo kechi tubwela mu nyuma na mambo a lumanamo nangwa kumubila bumvu mwingilo wetu ne. Lwitabilo lwetu lwitukosesha kusapwila na kuchinchika ku bakwetu bakinkalankulo, bakwetu motwingijila pa nkito, mo tufunjila ku sukulu ne ku bantutu bakwabo.—Loma 1:14-16.
Ubula Kumweka ye Ubena Kutangijila Bantu Banji
11. Kwesakana na byaambile Petelo ne Yuda, bamo bapwañenenga na kipwilo kya bwina Kilishitu bamwesheshe byepi kubula bumupashi?
11 Lwitabilo lwitukwasha kuyuka’mba Yehoba ye ubena kutangijila jibumba janji ja pano pa ntanda. Onkao mambo, kechi twafwainwa kwendeleka bakulumpe baji na mwingilo wa kulama kipwilo ne. Mutumwa Petelo ne mulongo wa kwa Yesu aye Yuda bajimwinepo bamo babujile bumupashi banenenenga bya mwenga bakulumpe batangijilenga bena Kilishitu. (2 Petelo 2:9-12; Yuda 8) Nanchi aba baambilenga bya mwenga bakonsheshe kwibyamba pa meso a Yehoba umvwe kya kuba bamumwenenga nyi? Kwalepeshatu! Bino na mambo a kuba Lesa kechi bamumwenenga na meso ne, aba bantu balubileko kuba’mba baketotolwela bene kwi aye.
12. Twafwainwa kwibamona byepi aba batangijila mu kipwilo?
12 Kya kine, kipwilo kya bwina Kilishitu kyalengwa na bantu babumbulwakoloka. Aba baji pa bukulumpe mu kipwilo boba bilubo byakonsha kwitukozha ku muchima. Bino nangwa kiji byonkabyo, Yehoba ubena kwingijisha bano bantu mu kulama jitanga janji. (1 Petelo 5:1, 2) Banabalume ne banabakazhi batesha michima yabo ku bintu bya mupashi bayuka’mba jino jo jishinda jimo Yehoba jo abena kutangijilamo bantu banji. Onkao mambo, atweba bena Kilishitu kechi twafwainwa kunena bya mwenga ne kutamauka ne, twayai tumwesha mushingi ku lunengezho lwa Lesa lwa kutangijila bantu banji. Byo tukokela bakulumpe babena kwitutangijila, tumwesha kuba’mba tumona Aye ubula kumweka.—Bahebelu 13:17.
Kumona Lesa Amba ye Mufunjishi Wetu Mukatampe
13, 14. Kumona Yehoba’mba ye Mufunjishi wetu Mukatampe kulumbulula ka kwi anweba?
13 Kuji mbaji ikwabo ya ku mupashi yo twafwainwa kutako muchima. Isaya waawile’mba: “Mukamumona Mufunjishi wenu na meso enu.” (Isaya 30:20) Twafwainwa kwikala na lwitabilo pa kuba’mba tuyuke’mba Yehoba ye ubena kwitufunjisha kupichila mu jibumba janji ja pano pa ntanda. (Mateo 24:45-47) Kumona Lesa amba ye Mufunjishi wetu Mukatampe kulumbulula byavula kukila kufundatu Baibolo ne kutanwa jonse ku kupwila kwa bwina Kilishitu. Kulumbulula kwingijisha bintu byonse Lesa byo etupa kuba’mba tumwenemo ku mupashi. Kya kumwenako, twafwainwa kutesha muchima ku mikambizho Yehoba yo abena kwitupa kupichila mwi Yesu pa kuba’mba tubule kukumpulwa ku mupashi.—Bahebelu 2:1.
14 Kimye kimo kikebewa kukosako pa kuba’mba tufunde byavula biji mu kajo ka ku mupashi. Kimo kimye kampe twikala na kisela kya kupitamotu lubilo mu bishimikizho bimo bya Baibolo byo tubula kumvwisha. Kabiji pa kutanga magazini a Kyamba kya Usopa nangwa Loleni! kampe mitwe imo kechi twiitanga ne, mambo akuba kechi twiitemwa ne. Apo kampe tulanguluka bingi, kimye kyo tuji pa kupwila kwa bwina Kilishitu. Pa kino twakonsha kujimuka ne kuta muchima ku bishinka byambiwa. Kusanchila mikambizho ya ku mupashi yo tufunda, kyo kimwesha’mba twamuyuka Yehoba Mufunjishi wetu Mukatampe.
Tuketotolwela Mambo
15. Bamo boba byepi uba nobe Yehoba kechi ubena kwibamona ne?
15 Bubi byo bubasampukile ne pakatele mu “kino kimye kya kumpelo,” kyanema bingi kwikala na lwitabilo mwi Aye ubula kumweka. (Danyela 12:4) Kubula bukishinka ne bulalelale bibaubetu mbwee konse konse. Byo kiji bino, kyawama kuvulukanga’mba Yehoba umona byubilo byetu nangwa kya kuba bantu kechi betumona ne. Kino kishinka bamo bekilubamo. Umvwe bakwabo kechi babena kwibamona ne, boba byubilo byakanyiwa mu binembelo. Kya kumwenako, bamo kechi bashinda lweseko lwa kutamba bisela byatama bya mulekese bitambishiwa pa Intaneti, televizhonyi ne pa biñambañamba bikwabo bibena kulengwa katataka ne. Bino bintu byo bitambiwa ku mbaji, bamo boba uba nobe Yehoba kechi ubena kumona byubilo byabo ne.
16. Kika kyakonsha kwitukwasha kukokela mikambizho ya Yehoba?
16 Kyawama kuvulukanga byambo bya mutumwa Paulo: “Atweba bonsetu umo umo tukeambila mambo kwi Lesa.” (Loma 14:12) Kimye kyonse twafwainwa kuyukanga’mba umvwe twalenga mambo, ko kuba’mba twamulenga mambo Yehoba. Kuyuka kino, kuketukwasha kumvwina mikambizho yanji ya kuchina byubilo bincha. Baibolo ituvululako’mba: “Kafwako kilengwa nangwa kimo kyabula kumweka ku meso anji ne; pakuba bintu byonse biji patokatu, byasololwatu ku meso a yewa ye tukatotololako.” (Bahebelu 4:13) Kya kine tuketotolwela kwi Lesa, bino butemwe bwa kine bwa kumutemwa Yehoba kyo kintu kikatampe kitulengela kuba kyaswa muchima wanji ne kumvwina mikambizho yanji yaoloka. Onkao mambo, twafwainwa kujimuka mu bya lusangajiko ne byubilo byotuba umvwe tuji na banabalume nangwa banabakazhi.
17. Yehoba wituta byepi muchima?
17 Yehoba wituta bingi muchima, bino kino kechi kyalumbulula’mba witupembelela kulenga mambo pa kuba’mba etukabishe ne. Wituta muchima na butemwe byonka byuba shetu uji na butemwe ukeba kufweta baana banji bamumvwina. Byo kibena kwitutekeneshapo pa kuyuka’mba Shetu wa mwiulu usangalala bingi na lwitabilo lwetu kabiji ye “ufweta boba bamukebesha”! (Bahebelu 11:6) Twayai twikale na lwitabilo mwi Yehoba ne ‘kumwingila na muchima yense.’—1 Byambo bya Moba 28:9.
18. Mambo a kuba Yehoba wituta muchima ne kumona bukishinka bwetu, ñanyi mulaye yetutana mu Binembelo?
18 Byambo bya Mana 15:3 byaamba’mba: “Meso a Yehoba aji konse konse, saka atala pa batama ne pa bawama.” Ee, Lesa utala pa bantu batama ne kwiboba mwayila byubilo byabo. Bino umvwe tuji pakachi ka “bawama,” twayuka’mba Yehoba umona byubilo byetu bya bukishinka. Byo kibena kwitukoseshapo mu lwitabilo pa kuyuka’mba ‘mwingilo wetu mwi Nkambo kechi ye watu ne’ kabiji ne kuba’mba aye ubula kumweka kechi ‘akavulame mwingilo wetu ne butemwe bo twijimwesha jizhina janji’ ne!—1 Kolinda 15:58; Bahebelu 6:10.
Kulomba Yehoba’mba Etutaletalenga
19. Ñanyi mfweto imo ifuma mu kwikala na lwitabilo lwakosa mwi Yehoba?
19 Byotuji bakalume ba Yehoba bakishinka, twanema bingi koaji. (Mateo 10:29-31) Nangwa kya kuba kechi tumumona na meso ne, twafwainwa kuyuka’mba koaji, ne kulama bulunda botuji nabo ne aye. Byotuji na mulanguluko wa uno mutundu kwi Shetu wa mwiulu kituletela mfweto yavula bingi. Lwitabilo lwetu lwakosa lwitukwasha kwikala na muchima watoka to kwi Yehoba. Kwikala na lwitabilo lwabula bujimbijimbi kwitukwasha kuchina bwikalo bwa kuba aku na kuba byubilo byawama kabiji aku na kwivwatakanya mu bwikalo buncha. (1 Timoti 1:5, 18, 19) Kabiji lwitabilo lwakosa mwi Lesa lulengela bakwetu kumwenako ne kwibatundaika. (1 Timoti 4:12) Luno lwitabilo lwitulengela kwikala na byubilo byawama bikeba Yehoba ne kumusangajika ku muchima.—Byambo bya Mana 27:11.
20, 21. (a) Mambo ka o tukebela Yehoba kwitusopa? (b) Twakonsha kwingijisha byepi Masalamo 139:23, 24 kotuji?
20 Umvwe kya kine twi ba maana, Yehoba witusopanga. Kechi kuba’mba etusopengatu ne, bino tusaka ne kuba’mba etutaletalenga mu milanguluko ne byubilo byetu. Mu lulombelo, twafwainwa kulomba Yehoba kwitutalatala ne kumona kana umvwe tuji na milanguluko yabula kufwainwa. Wakonsha kwitukwasha mwakubila na makatazho etu ne kuwamya milanguluko yetu. O ene mambo nyimbi wa masalamo kyo aimbijile’mba: “Muntaletale, anweba Lesa, muyuke muchima wami: Ngesekai muyuke milanguluko yami: Mumone kana muji jishinda ja bubi mwi amiwa, Ne kuntangijila mu jishinda ja myaka.”—Masalamo 139:23, 24.
21 Davida wasashijile Yehoba kuba’mba amutaletale ne kumumona umvwe mwi aye mwajingapo “jishinda ja bubi.” Nobe byonka byaambile nyimbi wa masalamo, nanchi ne atweba kechi tukeba Yehoba kwitutalatala mu michima yetu ne kwitumona umvwe tuji na milanguluko yabula kufwainwa nenyi? Na lwitabilo, twayai tulombe Yehoba kwitutalatala bulongo. Pano ibyepi umvwe tuji na kijikila na mambo a milanguluko ibi? Twayai tutwajijile kulomba na mukoyo kwi Lesa wetu wa butemwe aye Yehoba, ne kukokela buntangi bwa mupashi wanji wazhila ne mafunde a Byambo byanji. Twakonsha kuketekela’mba usakwitukwasha kulondela jishinda jitangijila ku bumi bwa myaka.—Masalamo 40:11-13.
22. Twafwainwa kutwajijila na kuba ka pa mambo a Aye ubula kumweka?
22 Ee, Yehoba uketupa bumi bwa myaka umvwe satulondela mikambizho yanji. Kabiji twafwainwa kuyuka bulume ne lūsa lwanji byonka byaubile mutumwa Paulo pa kunemba’mba: “Kwi aye Mfumu wa myaka, ubula kufwa, ubula kumweka, yenkaye Lesa, kwikale buneme ne lukumo myaka ne myaka. Amena.” (1 Timoti 1:17) Kimye kyonse twayai tumweshe uno moyo wa kwakamwa Yehoba. Kabiji nangwa kishupetu byepi, twayai tutwajijile kwikala bakosa nobe babena kumona Aye ubula kumweka.
Musakukumbula’mba Ka?
• Bantu bakonsha kumumona byepi Lesa?
• Umvwe kya kine twayuka’mba Yehoba koaji, twakonsha kuba byepi umvwe betumanyika?
• Kumona Yehoba’mba ye Mufunjishi wetu Mukatampe kulumbulula’mba ka?
• Mambo ka o twafwainwa kusakila’mba Yehoba etutaletalenga?
[Kipikichala pa peja 14]
Mosesa byo abujile kuchina Felo, wachinchikile nobe wamumwenenga Yehoba, Lesa ubula kumweka
[Kipikichala pa peja 17]
Kange tubenga bintu uba nobe Yehoba kechi umona byotuba ne
[Kipikichala pa peja 19]
Tukebesha kuyuka maana a Lesa mambo twayuka namba ye Mufunjishi wetu Mukatampe