Mepuzho Kufuma Kubatanga
Nanchi kijitu bulongo mwina Kilishitu kuya kukijilo nangwa kumasongola obatwala muchechinyi?
Kwivwanga mubyubilo byabupopweshi bwabubela mujishinda jiji jonse kufichisha Yehoba kumuchima kabiji kechi kyafwainwane. (2 Kolinda 6:14-17; Lumwekesho 18:4) Kutwalwa kwakitumbi muchechi kebyubilo byabupopweshi, javula kobaya nakwambila majashi atundaika mafunjisho abula mubinembelo nabiji akuba’mba mweo kechi ufwane kabiji nekuba’mba muntu inge wafwa uya mwiulu. Kabiji kimo kimye kwikala nebyubilo byakulenga musalabu nekukwatankena pamo mumilombelo namusapwishi wamu yoyo chechi. Nemasongola ekela muchechi nao pekala milombelo nebyubilo bikwabo byabupopweshi byapusana nabifunjisha Baibolo. Kishupa bingi mwina Kilishitu kukana kubako byubilo byabupopweshi bwabubela bibena kuba bonse baji muluonde moaji. Byokyatamapo kwibika mulukatazho lwauno mutundu!
Pano ibyepi umvwe mwina Kilishitu walanguluka’mba bino nafwainwa kuya nakutanwa kulufu nangwa masongola obatwala muchechi? Kyakumwenako, wamulume wabula kwitabila wakonsha kukambizha mukazhanji mwina Kilishitu amba kanatu bayile pamo. Nanchi wakonsha kuya nanji amba akashinkwekotu saabula kubako byubilo bibena kubiwanyi? Namambo akukokela bibena kukeba mwata wanji, wamukazhi waitabila wakonsha kuya nanji, saka apwisha mumuchima wanji’mba kechi usakwivwangamo mubyubilo byabupopweshine. Kimo kimye wakonsha kukana kuyako, namambo akulanguluka’mba byubilo bisakubiwangako byakonsha kumukosela kyakuba byamulengela naye kwivwangamo nekulala mizhilo ya Lesa. Mwine yewakonsha kwifuukwila kana kuyako nangwane. Kwakubula nangwa kuzhinaukatune, kechi ubena kukeba kwizhachisha mumuchimane, ubena kukeba kwikala najiwi jamuchima jatoka too.—1 Timoti 1:19.
Monse mokyakonsha kwikela, kyakonsha kuwama bingi inge kyakuba walumbulwila mwata wanji kuba’mba jiwi janji jamuchima kechi jisakumuswisha nangwa pacheche kwivwanga mubyubilo byabupopweshi biji byonse nangwa kwimba nabo nyimbo nangwa kukunyika kilungi panshi kimye kisa kulombewanga milombelone. Namambo abino byoamulumbulwila, mwata wanji wakonsha kulanguluka’mba umvwe kyakuba mukazhami aye nakwikalamotu kwakubula nekyoabena kubane, usakundengesha bumvu. Onkao mambo, wakonsha kuya bunke namambo abutemwe boatemwa mukazhanji, nekunemeka lwitabilo lwanji, nangwa kuchina kumulengesha bumvu. Pano bino, umvwe kyakuba wakosapotu popolo amba kanatu tuye bonse, wakonsha kuya kyabyonkabya kwakubula kukobako kiji kyonsene.
Kabiji twafwainwa kulanguluka byobakonsha kwikimona bakwetu bamulwitabilo umvwe twaya kuchechi nakutanwa kubintu byauno mutundu. Abya bamo kyakonsha kwibakola kumuchimanyi? Nanchi kino kyakonsha kulefula bakwetu bakana kupopwela bankishi? Mutumwa Paulo wakambizhe’mba: “Mwitabe bintu byawamisha; ne kwikala ba kine ne ba kubulwa mambo [“ne bakubula kutuntwisha bakwenu,” NW] kufika ne ku juba ja kwa Kilishitu.”—Filipai 1:10.
Bino inge kyakuba’mba alo lufu nangwa masongola amulongo wakumubiji, pakonsha kwikala lukatazho lukatampe bingi naba mukisemi. Nangwatu kikale byepi nangwa byepi, mwina Kilishitu wafwainwa kulangulukishapo bulongo bintu byonse bijimo. Namambo amakatazho amo, wakonsha kulanguluka’mba kechi mambone umvwe waya nakutanwa kulufu nangwa kumasongola aji muchechi kwakubula kuketumpa mubyubilo bisakubiwangako. Kimo kimye umvwe waya, wakonsha kutana kuba’mba nekubula kuyakotu kyawama, mambo usakukatazhiwanga aye mwine kumuchima nebakwabo. Monse mokyafwainwa kwikela, mwina Kilishitu wafwainwa kumona kuba’mba kyonse kyoafuukula kechi kisakukatazha jiwi janji ja muchima kwi Lesa neku bantune.