Kimye Kyafwainwa Kusolwelamo Kintu Kyankama

Kulama bintu bimo munkama kwakonsha kuleta mutende nekukanya lutobo. Nanchi kujipo kimye kyafwainwa kusolwelamo kintu kyankamanyi? Monai byaambile ngauzhi Amosi pe Lesa wanji amba: “Yehoba kechi uba kintu kwa kubula kwikisolwela jimo ku bakalume banji bangauzhi ne.” (Amosi 3:7) Twakonsha kufundamo kimo mubino byambo pamambo abintu byankama. Yehoba wakonsha kulamapo bintu bimo munkama kwakubula kwibisololane, pano mukupitapo kwakimye wibisolola kubantu bamo. Twakonsha kulonda byepi Yehoba mukino?

Kimye kimo bakafunga batongolwa mukipwilo kyabwina Kilishitu bakonsha kwikimona’mba kyawama kulama kintu kimo munkama. (Byubilo 20:28) Kyakumwenako, byobayuka buwame bwakipwilo, bakonsha kufuukula kubula kusolola byambo byalunengezho lumo, nangwa bintu bimo byaaluka mumingilo yamu kipwilo, poso kimye kyafwainwa kyafika.

Pano bino, kyanema bingi kubuulako boba bafwainwa kwikiyukila jimo kino kintu, kimye kyobakasolwelamo kyokyo kintu nejishinda mokikobilwa. Kuyuka kimye kikasololwa kyokyo kintu kubantu bonse, kwakonsha kwibakwasha kwikilama munkama.—Byambo bya Mana 25:9.