“Wi Mwanamukazhi Walumbuluka”

Nsongwakazhi mwina Moabu yewatakaikilwe nabino byambo. Wajinga mwanamukazhi wafwilwa. Jizhina janji wajinga Luta, mulokazhi wamwanamukazhi mwina Isalela, Naomi. Luta watakaikilwenga bingi mu Isalela myaka 3000 yapitapo, kimye yoya ntanda kyoyalaminwenga namitonyi. (Luta 3:11) Kika kyalengejile kumutakaika? Twakonsha kufunjilakoka kubyubilo byanji byawama?

Luta kechi wajinga muntu ‘wajangatu kwakubula kwingila ne.’ Wakelwanga bimye byabaya nakwingila mwingilo wakupupula kajo mumajimi, kabiji bantu bamutakaikilenga bingi mambo wakosele. Nangwa kyakuba bamwambila’mba tukepesheko mingilo yobe, aye watwajijilangatu nakwingila, saka engijishatu kukila nebyo baketekejilenga. Kine wajinga mwanamukazhi wafwainwa kutakaikwa, walumbuluka, kabiji wingila nangovu byonka byalumbulula Baibolo.—Byambo bya Mana 31:10-31; Luta 2:7, 15-17.

Byubilo byakumupashi byakwa Luta byobyamulengejile kutakaikwa, mambo wajinga mwanamukazhi wakoka muchima, wipananga kwingila mingilo, kabiji nebutemwe bwanji bwakishinka. Washile bansemi yanji nekyalo kyanji nekukakachila Naomi, naluketekelo lucheche lwakumona lusekelo lufumapo mumasongola. Pakimye kimotu Luta wamwesheshe kusaka kwanji kwakukeba kwingijila Yehoba Lesa wa inanjivyala. Namambo akulumbuluka kwanji, jishimikila jamu Baibolo jaamba’mba: ‘Wakwashishe [Naomi] kukila baana ba balume batanu nababiji.’—Luta 1:16, 17; 2:11, 12; 4:15.

Luta kechi watakaikilwetu kubantu bonkatune, bino kyakijilepo kuwama, Lesa wamwene byubilo byanji byawama nekumupa jishuko jakwikala mushakulu wamukazhi mwasemekejilwe Yesu Kilishitu. (Mateo 1:5; 1 Petelo 3:4) Byubilo byakwa Luta byobyawama kumwenako banabakazhi bena Kilishitu nebantutu bonse bapopwela Yehoba!