Mepuzho Kufuma Kubatanga

• Nanchi inge mwapota kishimikwa kujibumba jabupopweshi bungi nekwikyalula ke Nzubo ya Bufumu kilumbulula’mba mwapajika lwitabilonyi?

Bakamonyi bakwa Yehoba kechi bakeba kutambula bintu byauno mutundu kubupopweshi bungine. Pano bino umvwe kino kyaubiwa, kechi kekupajika lwitabilone. Kekishimikwatu kyobapota kwapwa. Kipwilo kya Bakamonyi bakwa Yehoba kechi kingijila pamo namabumba abupopweshi bungi nekushimika mpunzha imo amba bapwilengapo bonsene.

Ñanyi byubilo bimwesha kupajika lwitabilo kumeso a Yehoba? Vulukai lufunjisho lwakwa Paulo: ‘Kechi mwikase ku kikonkoji kimo ne babula kwitabila ne: mambo bololoke ne bubi bwendañane pamo byepi? Nangwa kyeya ne mfishi byumvwañane pamo byepi? Kabiji Kilishitu ne Beliala bapwane byepi? Nangwa waitabila etabanzhane byepi ne wabula kwitabila? Kabiji nzubo yazhila ya Lesa iswañane byepi na bankishi?. . . Onkao mambo, fumai mwi abo ne kwabana nabo, byo byamba Nkambo, ne kukwatako kukyabipa nangwa kimo ne; ne amiwa nkemutambula.’ (2 Kolinda 6:14-17) Nanchi Paulo watazhizhe mwepi bino byambo byakuba’mba “bwendañane” ne “byumvwañane”?

Kwendañana koatongwele pano Paulo kekupopwela nekwingijila pamo nabantu bapopwela bankishi nebabula lwitabilo. Wajimwineko bena Kolinda amba “kechi mwakonsha kuja . . . kutebulu wa bademona” ne. (1 Kolinda 10:20, 21) Onkao mambo, kupajika lwitabilo kekupwila pamo nangwa kwendañana namabumba abupopweshi bungi. (Kulupuka 20:5; 23:13; 34:12) Inge kishimikwa kyajinga kyajibumba jabupopweshi bungi kyapotwa, kokuba’mba bapotakotu kishimikwa kwapwa nekwikyalula ke Nzubo ya Bufumu. Saka bakyangye nekutendeka kupwilamo amba ke Nzubo ya Bufumu, patanshi balalaula byonse byaingijishanga bupopweshi bwabubela nekwibipwishatu shata. Panyuma yakuba bekiwamisha bulongo kishimikwa, kipanwa kwi Yehoba kuba’mba kingijishiwangatu kumupopwelamo aye yenka bunke. Bupopweshi bwakine kechi bumvwañana nekwendañana nabupopweshi bwabubelane.

Kimye kyobabena kumvwañana byakupota kishimikwa, bafwainwa kwisambatu pamwisambo wakwikipota kwapwa, kwakubula kukizhamo nakulolobwelako bintu bikwabone. Bamukipwilo kyabwina Kilishitu bafwainwa kulabijila lujimuno lwakwa Paulo kuba’mba kechi “mwikase ku kikonkoji kimo ne babula kwitabila ne.” Nangwa kyakuba kechi twiumvwa amba twakila boba baji nalwitabilo lungine, kechi tukeba kupwanañana nabo nangwa kongolokela mubupopweshi bwabone.a

Pano ibyepi umvwe kipwilo kibena kusonkela kishimikwa kyajibumba jabupopweshi bungi? Javula kusonkela kishimikwa kyabano bantu kilengela kwambañana nabo nangwa kwikala nabo kimye kyabaya, kino kechi kikebewane. Nangwatu kusonkela kishimikwa kyauno mutundu amba kingijishiwetu jimo, jibumba jabakulumpe jafwainwa kulanguluka pabino bintu: Nanchi mukachi kakishimikwa nangwatu pangye, pajipo bankishi nangwa bimpashañano byabupopweshinyi? Nga bantu bamukimasamasa basakwikimona byepi umvwe twaingijisha kyokyo kishimikwa? Abya kisakutuntwishapo bamo mukipwilo umvwe twaingijisha kino kishimikwanyi? (Mateo 18:6; 1 Kolinda 8:7-13) Bakulumpe mukipwilo bafwainwa kulanguluka pabino bishinka apa bino bafuukulapo kyobafwainwa kuba. Kabiji bafwainwa kumona’mba jiwi jabo jamuchima nejakipwilo jakasuluka pakufuukula umvwe kyafwainwa kupota kyokyo kishimikwa nekwikyalula ke Nzubo ya Bufumu nangwane.

[Tubyambo twa mushi]

[Kipikichala pa peja 30]

Akye kishimikwa kyajinga nshinagoga bekipotele nekwikyalula ke Nzubo ya Bufumu