Kupana Bintu Byavula Byakila Nepabyowakonsha Kupana

“KECHI mambone: nangwa mwangita’mba walulombo. Ndomba bupe bwamali akwa Yesu.” Monkatu mwaambila uno mwanamulume umo wamu Pulotesitanti byobyokimweka nemubupopweshi pamambo amukwekele wakukeba bupe bwamali engijishiwa. Bupopweshi bwakosa bumweka nobe mali avula oebukosesha kuba’mba butwajijile. Bukeba mali akukonsha kulipila bantangi babo, bukeba kwikala namali akushimikila mazubo abo azhila, nemali akwiawamishisha umvwe keafwe, kabiji bukeba kwikala namali akwingijisha mumikwekele yabo yabusapwishi. Pano nga mali akebewa afumapi?

Machechi avula alomba byabujikumi.a Ntangi umo Norman Robertson waambile’mba: “Kupana byabujikumi kejishinda ja Lesa joapainamo mali akukwasha bufumu Bwanji panopantanda.” Waambile nejikwabo’mba: “Ke jishinda Janji joamwenamo mali akwingijisha mubintu bikebewa byakwasha kuba’mba Mambo Awama asapwilwenga.” Kwakubula nangwa kumvwa bumvu pamambo akuvululamo bantu bamuchechi yanji mutembo wabo wakupanane, waambishetu namukoyo kuba’mba: ‘Kupana byabujikumi kechi kintutu kyomuba mambo akuba’mba mwakonsha kwikyubane. Kimwesha’mba muji nalukokelo. Umvwe wabula kupana byabujikumi, kilumbululatu patoka kuba’mba walala mizhilo ya Lesa. Kimotu nekuba wasenda mali kwakubula lūsa nekwiengijisha obe mwine monse mowakebela, saaji abene.’—Tithing—God’s Financial Plan.

Kampepo neanweba mwaswa kuba’mba, kupana kwafwainwa kwikala lubaji lwampopwelo yabwina Kilishitu. Abya kimukatazha kusolola mali nekupana kimye kyobemukebelanyi, inyi kana kimukozha nekumuchima? Muntu umo wafunda byabupopweshi mwina Brazil wajizhina ja Inácio Strieder wapelemo mambo machechi pamambo akulomba byabujikumi kuba’mba “bamwenengamo mali akwingijisha mumachechi abo,” kabiji watelele ino miteeto amba “kechi yamujifundene, ikabishatu bantu nekwibapanga mubupopweshi.” Kabiji wamwene kuba’mba kino kilengela “bantu babula kwingila nkito, banabakazhi bafwilwa, bayanji, neboba bapelelela milanguluko kulanguluka’mba Lesa wibalekelela kabiji bebakanjikizha kupana bintu byavujisha ku ‘musapwishi’ aku bisemi byabo saka bibena kufwetuka nanzala.”

Kampe mwakonsha kwilangulusha’mba: ‘Nanchi machechi akanjikizha kupana byabujikumi alondelatu bulongo byaamba Binembelo nyi? Inyi bupopweshi bumo buchinyatu bantu amba basakwibapanyika kwi Lesa umvwe nekuba kebapane mali nenyi? Nanchi kine Lesa ukeba atweba kupananga bintu byavujisha kukila nepabyotwakonsha kupananyi?’

[Tubyambo twa mushi]