Chinai bya Bujimbijimbi ne Kujimbaikwa

“Jimukai kuchina’mba, nangwa muntu umo wakemukwata buzha . . . bo bujimbijimbi bwatu.”—KOLOSE 2:8.

1-3. (a) Bya kumwenako ka bimwesha kuba’mba lelo jino bujimbijimbi bwakumbana mu mbaji yonse ya bwikalo bwa bantu? (b) Mambo ka o twafwainwa kubula kukuminya pa kumona bujimbijimbi buji mu ntanda?

“MU MYAKA imo kunyuma, pulofesa wafunda bya mizhilo waubilepo mukwekele umo wa kushikisha kuba’mba: “Ñanyi mwi anweba ye bakyangye kubepapo kala ku bantu beya kwi anweba kuba’mba mwibemeneko mu mambo abo? Walumbulula mukumbu amba: “Pa biumbi na biumbi bya baloya, loya umotu ye yenka ye bakyangye kubepapo kala ku bantu beya amba bebemeneko mu mambo.” Mambo ka? “Uno loya po po atendekeletu kwingila mwingilo mu kipamo kikatampe kabiji kechi kwakishilepo kala kwi aye muntu wa kuba’mba amwimeneko mu mambo ne.” Awe mukwekele wamwesha kuba’mba kine kya bulanda bingi kumona kuba’mba bubela ne bujimbijimbi bwavula bingi ano moba.

² Bujimbijimbi bwishila mu mashinda avula bingi kabiji lelo jino bwakumbana mu mbaji yonse ya bwikalo bwa bantu. Masawakya a byambo amba kino byo kiji na kulumbulula bamulwila ntanda byo babepañana mu mingilo yabo, ne ba mingilo ya kulama mali ne ba loya byo balulumika mitengo, basulu byo babepa bantu bapota bipe na kwibitentemesha, bantu babepa bubela pa kulomba bukwasho ku tumpanyi twa inshuwalansi, mwane kubala kukooka. Kabiji kuji ne bujimbijimbi mu bupopweshi. Bantangi ba bupopweshi babepa bantu bavula na kwibafunjisha mafunjisho a bubela, nabiji lufunjisho lwa bumbulwakufwa, mujilo wa helo, ne lwa Balesa basatu.—2 Timoti 4:3, 4.

³ Nanchi twafwainwa kukumya pa buno bujimbijimbi bonse nyi? Ine bino ne. Baibolo yaambijile jimo kuba’mba: ‘Mu moba a kupelako bantu batama ne ba bujimbijimbi bakayangatu na kutama, kasa bajimbaika ne kujimbaikwa.’ (2 Timoti 3:1, 13) Byo tuji bena Kilishitu, twafwainwa kwikala balaba ku bintu bitwala mungi byakonsha kwitusendula ku bukine. Mepuzho abiji akonsha kwipuzhiwa kuba’mba: Mambo ka bujimbijimbi kyo bwavujila ano moba, kabiji twakonsha kwizhikijila byepi ku kujimbaikwa?

Mambo ka Bujimbijimbi kyo Bwavujila Ano Moba?

4. Baibolo ilumbulula byepi ene mambo bujimbijimbi kyo bwakumbena ntanda yonse?

⁴ Baibolo ilumbulula bingi bulongo ene mambo bujimbijimbi kyo bwakumbena ntanda yonse. Mutumwa Yoano wanembele’mba: “Byonse bya panopantanda biji mu bulume bwa kwa aye mubi.” (1 Yoano 5:19) Awe “mubi” ye Satana Diabola. Yesu waambilepo pe aye kuba’mba: ‘Aye kechi waikele mu bukine ne, mambo bukine kechi buji mwi aye ne. Byo amba bubela, wamba bya kwanji mwine: mambo ye wa bubela, ye shanja bubela.’ Byo kiji bibye, abya kya kukumya pa kumona mu ino ntanda byo mwakumbana mupashi ne byubilo bya bujimbijimbi bya kwa aye mfumu wa panopantanda nyi?—Yoano 8:44; 14:30; Efisesa 2:1-3.

5. Mu ano moba a kupelako, Satana wakizhamo byepi bujimbijimbi, kabiji bañanyi kikatakata bo anankama?

⁵ Mu ano moba a kupelako, Satana pano wakizhamo bujimbijimbi. Waelelwe pano pa ntanda. Wayuka’mba kimye kyanji kyamukepela bingi, kabiji uji na “bukaji bukatampe.” Na mambo a kuba ubena kukeba konauna bantu bavula bingi, aye waikala “mujimbijimbi wa panopantanda ponse.” (Lumwekesho 12:9, 12) Satana kechi mujimbijimbi wa muleele ne. Na bulume bwanji bonse ujimbaika bantu bonse kwa kubula kuleka ne.a Wingijisha mashinda onse a bujimbijimbi mu byubilo byanji, avwangamo kongola bantu ne kwibajimbaika kabiji ne kupofula michima ya babula kwitabila ne kwibamuna kwi Lesa. (2 Kolinda 4:4) Kikatakata uno shanja bubela wibikishako na ngovu kukeba kuja boba babena kupopwela Lesa ‘na mupashi ne na bukine.’ (Yoano 4:24; 1 Petelo 5:8) Kange mulubengako kuba’mba, Satana wisunshile kuba’mba: ‘Nakonsha kwalula uji yense kumufumya kwi Lesa’ ne. (Yoba 1:9-12) Twayai tumonepo bya “bujimuku” bimo Satana byoengijisha, kabiji ne byo twakonsha kwizhikijila.—Efisesa 6:11.

Chinai Bujimbijimbi bwa Bantu Basenduka mu Lwitabilo

6, 7. (a) Bantu basenduka mu lwitabilo babepekezha kuba ka? (b) Binembelo bimwesha byepi bantu basenduka mu lwitabilo kyo bakeba kuba?

⁶ Pa kimye kyabaya Satana waingijisha bantu basenduka mu lwitabilo kujimbaikilamo bantu ba Lesa ba mwingilo. (Mateo 13:36-39) Bantu basenduka mu lwitabilo babepekezha kupopwela Yehoba ne kwitabila mu Baibolo, bino sabakana jibumba janji jimweka na meso. Bamo babwela ne ku mafunjisho abula kunemeka Lesa a “Babilona Mukatampe” bufumu bwa ntanda yonse bwa bupopweshi bwa bubela. (Lumwekesho 17:5; 2 Petelo 2:19-22) Banembi ba Baibolo bakwashiwe na Lesa kunemba byambo byakosa bya kulumbulula milanguluko ne mashinda a bantu basenduka mu lwitabilo.

⁷ Ki ka kyo bakeba nanchi bantu basenduka mu lwitabilo? Bantu basenduka mu lwitabilo bavula kechi bonse bakeba kufumamotu abo bonka bunke bwabo mu lwitabilo kampe lo banemekele amba lwa kine ne. Javula bakeba ne kusenda bakwabo. Mu kifulo kya kuya na kwikebela ne kulenga baana ba bwanga babo abo bene, bantu basenduka mu lwitabilo bavula bakeba ‘kwibakokamo baana ba bwanga [ko kuba’mba baana ba bwanga ba kwa Kilishitu] amba, betulonde.’ (Byubilo 20:29, 30) Paulo pa kwamba pa bafunjishi ba bubela, wapaine luno lujimuno lukebewa’mba: “Jimukai kuchina’mba, nangwa muntu umo wakemukwata buzha.” (Kolose 2:8) Nanchi bantu bavula basenduka mu lwitabilo kechi kyo kyo bakeba kuba nenyi? Byonkatu mbanzhi byo abombola muntu uji yense wa mu kisemi mu bwilube, ne bantu basenduka mu lwitabilo nabo bakoka bantu ba mu kipwilo bebomvwina, na kukeba kwibafumya ku jitanga.

8. Ñanyi mashinda bantu basenduka mu lwitabilo o bengijisha mu kuba byo basaka?

⁸ Ñanyi mashinda bantu basenduka mu lwitabilo o bengijisha mu kuba byo basaka? Javula bapimpula mafunjisho, kwialondolwela mu jishinda jingi japusana, kabiji ne kwingijisha bubela bwine. Yesu wayukile’mba baana banji ba bwanga bakakwatwa na boba ‘bakebabepela mu misango yonse ya bubi.’ (Mateo 5:11) Bansatuki ba yenka uno musango bamba bya bubela mu kukeba kongola bantu. Mutumwa Petelo wapaine lujimuno pa mambo a bantu basenduka mu lwitabilo amba bakengijisha “byambo byabo bya kujimbaika,” kukumbanya [“mafunjisho abo a bubela NW,”] ne ‘kukondakanya Binembelo’ mu kukeba kuba byo basaka. (2 Petelo 2:3, 13; 3:16) Kya bulanda ke kya kuba’mba, bantu basenduka mu lwitabilo ‘bonauna lwitabilo lwa bamo.’—2 Timoti 2:18.

9, 10. (a) Twakonsha kuchina byepi kujimbaikwa na bantu basenduka mu lwitabilo? (b) Mambo ka o tubujila kukatazhiwa umvwe kuyuka kwetu kwa nkebelo ya Lesa kukebewa kupimpulwa?

⁹ Twakonsha kuchina byepi kujimbaikwa ku bantu basenduka mu lwitabilo? Twakonsha kuba kino kupichila mu kulondela Byambo bya Lesa byamba’mba: “Baketainga boba balenga bya kwimwabanya ne bya kwimutuntwisha, bintu bibula kwesakana na mafunjisho o mwafunjile: kabiji mwabane nabo.” (Loma 16:17) ‘Twabana nabo’ kupichila mu kuchinuzhuka milanguluko yabo, kampe ya mu misambo yabo, yanembwa mu mabuku nangwa pa Intaneti. Nga mambo ka o twafwainwa kubila kino? Patanshi, ke na mambo a kuba Byambo bya Lesa bitukambizha kuba kino, kabiji twaketekela’mba Yehoba kimye kyonse wituta bingi muchima kwitukebela byawama.—Isaya 48:17, 18.

¹⁰ Kya bubiji, twatemwa jibumba janji jitufunjisha bukine bwawama bwitulengela kine kwipatulako ku Babilona Mukatampe. Pa kimye kimotu, twayuka namba kuyuka kwetu kwa nkebelo ya Lesa kechi kwafika palepa ne; ñumvwino yetu yapimpulwa pimpulwa pa myaka yavula. Bena Kilishitu bakishinka batala ne kupembelela Yehoba kupimpula bintu. (Byambo bya Mana 4:18) Pano bino kechi tukasha jibumba Yehoba joasala kwingijisha ne, mambo twimwena atweba bene na meso kuba’mba, kine ubena kwijitangijila.—Byubilo 6:7; 1 Kolinda 3:6.

Chinai kwijimbaika Anweba Bene

11. Mambo ka bantu bambulwakoloka kyo bekela na mulanguluko wa kwijimbaika abo bene?

¹¹ Bantu bambulwakoloka bekala na mulanguluko wa kulangulukatu’mba Satana upelawizha bingi kuleta milanguluko ya kwijimbaika atweba bene. Byambo bya mu Yelemiya 17:9 byaamba’mba: “Muchima wa muntu uji na bujimbijimbi kukila bintu byonse, kabiji watamishatu.” Yakoba naye wanembele’mba: “Bantu bonse baesekwa, byo bebakoka ku lwiso lwabo bene, ne kwibongola.” (Yakoba 1:14) Umvwe muchima wetu waongolwa na bya lwiso byetu, kya kine wakonsha kwitulengela kumona bubi nobe kintu kyawama kabiji kyakonsha kubula kwitonauna. Mweno ya uno mutundu ke bujimbijimbi, mambo muntu kwitwezha aye mwine mu bubi kuleta lonaiko.—Loma 8:6.

12. Mu ñanyi mashinda motwakonsha kutanyiwa mu muteeto wa kwijimbaika atweba bene?

¹² Kwijimbaika atweba bene kwakonsha kwituletela makatazho. Muchima uji na bujimbijimbi wakonsha kwitulengela ketwikangaizhe umvwe kya kuba tujipo na muteeto umo watama nangwa kukeba kwikangaizha umvwe twalenga mambo. (1 Samwela 15:13-15, 20, 21) Muchima wakonsha ne kukeba mashinda a kwikangaizhilamo satuba byubilo byatama. Twayai tumone kya kumwenako pa mambo a kisangajimbwe. Bya kisangajimbwe bimo byafwainwa, kabiji bileta bingi kisangajimbwe. Nangwa byonkabyo, bintu byavula ino ntanda byo imwesha mu mafilimu, mapologalamu a pa televizhonyi ne pa Intaneti byatama bingi kabiji ke bintu byabula kufwainwa. Kyapela bingi kwijimbaika atweba bene amba twakonsha kutamba bya kisangajimbwe byatama kwa kubula kwituletela malwa ne. Bamo balanguluka ne kwamba’mba: “Kechi nkatazhiwapotu nangwa na jiwi jami ja muchima ne, onkao mambo ki ka kyo nakonsha kwakaminwa?” Bantu boba kino ‘bejimbaikatu abo bene.’—Yakoba 1:22.

13, 14. (a) Kya kumwenako ka kya mu Binembelo kyamwesha kuba’mba jiwi jetu ja muchima kechi kimye kyonse kyo jakonsha kwitukwasha ne? (b) Twakonsha byepi kuchina kwijimbaika atweba bene?

¹³ Twakonsha kuchina byepi kwijimbaika atweba bene? Kya kutendekelapo, twafwainwa kuvuluka’mba jiwi ja muchima ja muntu kechi kimye kyonse kyo jamba bya kine ne. Monai kya kumwenako kya mutumwa Paulo. Saakyangye kwikala mwina Kilishitu, wamanyikilenga baana ba bwanga ba kwa Kilishitu. (Byubilo 9:1, 2) Jiwi janji ja muchima kechi jakonsheshe ku mukatazha pa kyo kyo kimye ne. Pano bino, jayile mungi. Paulo waambile’mba: “Nekyubile pa kubula kuyuka monka mu kubula kwitaba kwami.” (1 Timoti 1:13) Onkao mambo, kishinka kya kuba’mba jiwi jetu ja muchima kechi jitukatazha pa kutamba bya kisangajimbwe byatama ne, kechi kyo kintu kimwesha kuba’mba byubilo byetu byawama ne. Jiwi ja muchima jawamatu jakonsha kwitukwasha, ke jo ja jijitu bulongo jafunjishiwa na Byambo bya Lesa.

¹⁴ Pa kuba’mba tuchinuzhuke kwijimbaika atweba bene, koaji mashinda amo akwashañana o twafwainwa kulangulukangapo. Ipalanguzhai anweba bene na lulombelo. (Masalamo 26:2; 2 Kolinda 13:5) Kwipalanguzha anweba bene kwa bukishinka kwakonsha kwimumwesha jishinda ne kumona byo mwakonsha kupimpula bintu bimo mu bwikalo bwenu. Telekai ku bakwenu. (Yakoba 1:19) Byo kiji kuba’mba kwipalanguzha kwakonsha kushinkamana pa milangwe yetu atweba bene, kyawama bingi kuteleka byambo bya bena Kilishitu bakwetu bakoma ku mupashi byabulamo bujimbijimbi. Umvwe mwatana’mba kufuukula kwenu nangwa byubilo byenu babena kwibizhinauka ku bakwenu ba mu lwitabilo bakosa mu bukine, mwakonsha kwiipuzha anweba bene amba, ‘Abya kyaikala bino na mambo a kuba’mba jiwi jami ja muchima kechi jafunjishiwa bulongo ne nyi, inyi mbena kwijimbaikatu amiwa mwine?’ Kimye kyonse tangainga Baibolo ne mabuku alumbulula Baibolo. (Masalamo 1:2) Kuba bino kuketukwasha kwikala na milangwe, milanguluko, ne byubilo bya mwayila mafunde a Lesa.

Chinai Bubela bwa kwa Satana

15, 16. (a) Satana wingijisha ñanyi bubela mu kukeba kwitujimbaika? (b) Twakonsha kuchinuzhuka byepi kujimbaikwa na bubela bwa uno musango?

¹⁵ Satana wingijisha bubela bwapusana pusana mu kukeba kwitujimbaika. Aye weseka kwitushiina amba kwikala na bintu bya ku mubiji kuleta bingi lusekelo ne kutondwa, pano bino kechi byo byo kikala ne. (Musapwishi 5:10-12) Ukeba’mba twitabile kuba’mba aino ntanda ya bubi ikatwajijilangatu kikupu, nangwa kya kuba biyukilo bya kuba’mba tuji ‘mu moba a kupelako’ bimweka. (2 Timoti 3:1-5) Satana utundaika mulanguluko wa kuba’mba kukeba kwikala bwikalo bwa kuba byubilo byatama kujitu bulongo, nangwa kya kuba bakebesha bya kisangajimbwe banowa bintu byatama. (Ngalatiya 6:7) Twakonsha kuchinuzhuka byepi bubela bwa uno mutundu?

¹⁶ Funjilaiko ku bya kumwenako bya mu Baibolo. Baibolo iji na bya kumwenako bijimunañana byamba pa bantu bajimbaikilwe na bubela bwa kwa Satana. Batemenwe bintu bya ku mubiji, kechi batele maana ku bintu byanema byakebewenga kubiwa pa kyo kyo kimye mu bwikalo bwabo ne, kabiji betayile bene mu byubilo byabula kufwainwa, kabiji mu byonse bino mwafumine malwa. (Mateo 19:16-22; 24:36-42; Luka 16:14; 1 Kolinda 10:8-11) Funjilai ku bya kumwenako bya ano moba. Kya bulanda ke kya kuba’mba, javula bena Kilishitu bamo balefulwa ne kufumyako maana kabiji ne kwitabizha’mba kwingijila Lesa kubena kwibalengela kushalapo pa bintu byawama. Bakonsha kusha bukine ne kwitwezha mu bwikalo bwakwitobwelatu mu bya kisangajimbwe. Nangwa byonkabyo, bantu ba uno mutundu baji “patezhima,” mambo bukijitu nangwa palutwe kacheche bakatanamo mpwa kubula na mambo a kuba byubilo byabula moyo wa kwakamwa Lesa. (Masalamo 73:18, 19) Ke kintu kyawama bingi kufunjilako ku bintu byatama bipitamo bakwetu.—Byambo bya Mana 22:3.

17. Mambo ka Satana kyoaletela bubela bwa kuba’mba Yehoba kechi witutemwa nangwa kwitumona amba twanema kwi aye ne?

¹⁷ Kabiji kuji bubela bukwabo Satana boaingijishapo kala—bubela bwa kuba’mba Yehoba kechi witutemwa nangwa kwitumona amba twanema kwi aye ne. Satana waikala biumbi na biumbi bya myaka na kukebatu kuyuka bulongo bantu bambulwakoloka byo baji. Wayukishatu bulongo amba kulefulwa kwakonsha kwitukokesha ku mupashi. (Byambo bya Mana 24:10) Onkao mambo, uleta bubela bwa kuba’mba kechi twanema kwi Yehoba ne. Umvwe “twalapulwa panshi” kabiji ne kushiinwa amba Yehoba kechi wituta muchima ne, twakonsha kulefulwa ne kuleka kumwingijila. (2 Kolinda 4:9) Abye byo byo akeba Mujimbijimbi mukatampe! Pano bino, twakonsha kuchina byepi kujimbaikwa na buno bubela bufuma kwi Satana?

18. Baibolo itubula byepi Yehoba byo etutemwa?

¹⁸ Anweba bene bunke langulukainga pa Baibolo ne kumona Lesa byo etutemwa. Byambo bya Lesa bingijisha bishimpi bimo bifika pa muchima bitumwesha’mba Yehoba wituta muchima kabiji witutemwa pa muntu pa muntu. Aye ulonga mipolo yenu mu “mutumwa” wanji, kulumbulula kuba’mba umona ne kuvuluka mipolo yo mulakasha mu kwibikishako kwenu kwa kukeba kwikala bakishinka. (Masalamo 56:8) Aye uyuka umvwe mwaikala na ‘muchima walajika’ kabiji wikala kwipi ne anweba pa byo byo bimye. (Masalamo 34:18) Wimuyukisha bingi bulongo, kabiji “nangwa nsuki yenu ya ku mitwe” wiibala. (Mateo 10:29-31) Kikatakata, Lesa “wapaine Mwananji yenkawa umo” na mambo a anweba. (Yoano 3:16; Ngalatiya 2:20) Pa bimye bimo, kampe kyakonsha kwimukatazha kuketekela amba bino Binembelo byamba pe anweba umo umo. Nangwa byonkabyo, twafwainwa kuketekela Byambo bya Yehoba. Ukeba atweba kuketekela amba witutemwa kechi mu bujibumba ne, bino witutemwa pa muntu pa muntu.

19, 20. (a) Mambo ka o kyanemena kuyuka ne kukana bubela bwa kwa Satana bwa kuba’mba Yehoba kechi wimutemwa ne? (b) Mukulumpe wenda umo wakwasha byepi boba balajika michima?

¹⁹ Yukai bubela ne kwibukana. Umvwe mwayuka muntu amba ubena kubepa, mwakonsha kwilama anweba bene kuchina kujimbaikwa. Onkao mambo, kuyukatu kuba’mba Satana ukeba anweba kwitabila bubela bwanji bwa kuba’mba Yehoba kechi wimutemwa ne, ke bukwasho bwakonsha bingi kwimukwasha. Kibaba kimo mu Kyamba kya Usopa kyajinga na byambo bya lujimuno pa mambo a bujimuku bwa kwa Satana. Mwina Kilishitu wamukazhi waambile’mba: “Kechi nayukile namba Satana weseka kwingijisha milanguluko yami mu kukeba kundefula ne. Kuyuka kino, kundengela kukosa bingi kuba’mba mpwishe luno lukatazho.”

²⁰ Langulukai kino kyaubile mukulumpe wenda mu kyalo kya ku kabeta ka ku bulenge mu South America. Kimye kyo aya lwendo lwa bukafunga ku bakwabo ba mu lwitabilo ba michima yalajika, wibepuzha javula amba, ‘mwaitabila mu lufunjisho lwa Balesa basatu nyi? Walefulwa javula ukumbula’mba, ‘Ine mwane ne’ saka avuluka’mba buno ke bubela bumo bwa Satana. Awe mukulumpe wenda kimo kimye wipuzha’mba: ‘Nanchi mwaitabila mu lufunjisho lwa mujilo wa helo nyi? Kabiji wakumbula jikwabo amba, ‘Ine mwane ne!’ Mukulumpe wenda ubwela wibambila jikwabo amba kuji bubela bwa kwa Satana bukwabo bwabula kuyukanyikwa. Wibamwesha mu buku wa Palameni Kuli Yehova,b pa peja 249, palagalafu 21, walumbulula patoka bubela bwa kuba’mba Yehoba kechi witutemwa pa muntu pa muntu ne. Mukulumpe wenda upana sawakya wawama wa bifumamo mu mwingilo wanji wa kukwasha boba balefulwa kuba’mba bayuke ne kukana buno bubela bwa kwa Satana.

Ilamai Anweba Bene Kuchina’mba Mwakajimbaikwa

21, 22. Mambo ka o twabujila kwikela mu mfishi pa mambo a bujimuku bwa kwa Satana, kabiji twafwainwa kwikala bakosa kuba byepi?

²¹ Mu ano moba a kupelako o tujimo, Satana watwajijila na kuvuzha bubela ne bujimbijimbi. Ke sante kwi Yehoba amba kechi witusha mu bwilube bwa kukankalwa kuyuka bujimuku bwa kwa Satana boetujimbaikilamo ne. Baibolo ne mabuku alumbulula Baibolo a “kalume wa kishinka ne wa maana” amwesha patokatu mashinda a bubi a kwa Diabola. (Mateo 24:45) Umvwe twayuka bujimuku bwanji kechi uketujimukila ne.—2 Kolinda 2:11.

²² Mwane, twayai tutwajijile kuchina milanguluko ya bantu basenduka mu lwitabilo. Twikale bakosa kuchinuzhuka bujimuku bwa kwijimbaika atweba bene. Kabiji twafwainwa kwibukana bubela bonse bwa kwa Satana. Mu kuba bino, tukakosesha bulunda bwetu na “Lesa wa bukine,” umona bujimbijimbi amba kintu kya bunya.—Masalamo 31:5; Byambo bya Mana 3:32.

[Tubyambo twa mushi]

Mukivuluka Nyi?

• Mambo ka bujimbijimbi kyo bwavujila mu ntanda ano moba?

• Twakonsha kwilama byepi kuchina kwitongola ku bantu basenduka mu lwitabilo?

• Twakonsha kwikanya byepi ku kintu kiji kyonse kyakonsha kwitulengela kwijimbaika atweba bene?

• Twakonsha kuchinuzhuka byepi kubula kujimbaikwa na bubela bwa kwa Satana?

[Kipikichala pa peja 17]

Kechi mwafwainwa kwijimbaika anweba bene na bya kisangajimbwe ne

[Bipikichala pa peja 18]

Pa kuchina kwijimbaika anweba bene, ipalanguzhai na lulombelo, telekai ku bakwenu, ne kutanga Byambo bya Lesa kimye kyonse